LECCIÓN 46
Jehovaman kausayninchejta qopuna, bautizakunataj
Jehovamanqa uj mañakuypi ninchej payllataña yupaychananchejta, munayninman jinataj kausananchejta, ajinamanta kausayninchejta payman qopunchej (Salmo 40:8). Bautizakuspataj kausayninchejta Jehovaman qopusqanchejta tukuyman rikuchinchej. Jehovaman kausayninchejta qopuyta ajllasqanchejqa may sumaj, imaraykuchus chaymantapacha manaña munayninchejtachu ruwanchej. Chayrayku kaypi yachakusun imastachus ruwanata Diosman kausayninchejta qopunapaj.
1. ¿Imaraykutaj Jehovaman kausayninchejta qopunchej?
Jehovata munakusqanchejrayku kausayninchejta payman qopunchej (1 Juan 4:10, 19). Chayrayku Biblia nin: “Jehová Diosniykitaqa munakunayki tiyan tukuy sonqoykiwan, tukuy kausayniykiwan, tukuy yuyayniykiwan, tukuy kallpaykiwantaj”, nispa (Marcos 12:30). Chaytaj sutʼi rikukun parlasqanchejpi, ruwasqanchejpi ima. Imaynatachus uj qhariwan uj warmiwan munanakusqankurayku casarakuyta munanku, ajinallatataj noqanchejpis Jehovata munakusqanchejrayku kausayninchejta payman qopunchej, bautizakunchejtaj.
2. Jehovaj testigon jina bautizakuspa, ¿ima allin imastataj tarinchej?
Jehovaj familianmanta kajkunaqa may kusisqa kanku. Bautizakuspataj Jehovaj familianmanta kayta atinki. Chantapis Jehovaqa astawan munakusonqa, qanpis payman astawan qayllaykunki (Malaquías 3:16-18 leey). Jehovataqa Tataykita jina qhawanki, mundo enteropitaj payta munakojkunaqa familiayki kanqanku, munakusonqankutaj (Marcos 10:29, 30 leey). Chantapis wiñay kausayta japʼiyta atinki. Jinapis niraj bautizakushaspaqa kay imasta ruwanayki tiyan: Jehová Diosta rejsinayki tiyan, munakunaykitaj tiyan, Wawan Jesuspipis creenayki tiyan. Chantá Jehovaman kausayniykita qopunayki tiyan. Chay imastaqa ruwanaykipuni tiyan, imaraykuchus Bibliapi nin: “Bautismomin qankunatapis salvashasunkichej”, nispa (1 Pedro 3:21).
ASTAWAN YACHAKUNA
Kaypi yachakusun imaraykuchus kausayninchejta Jehová Diosman qopuna kasqanta, bautizakunataj kasqanta.
3. Pitachus sirviyta ajllana
Ñaupa tiempopi israelitasqa yuyarqanku Jehovatawan Baal diostawan ujllapi yupaychay allin kasqanta. Chay yuyasqankutaj mana allinchu karqa, chayrayku Jehovaqa profeta Eliasta kacharqa chayta reparachinanpaj. 1 Reyes 18:21 leeriychej, chantá yachakojta tapuriy:
¿Imatataj israelitas ajllananku karqa?
Noqanchejpis israelitas jinallataj ajllananchej tiyan pitachus sirvinata. Lucas 16:13 leeriychej, chantá yachakojta tapuriy:
¿Atisunmanchu Jehová Diosta, uj runata, waj imastawan ujllapi sirviyta?
Jehová Diosta sirviyta ajllasqanchejta rikuchinapaj, ¿imatá ruwasunman?
4. Jehová munakuwasqanchejpi piensarina
Jehová Diosqa ashkha imasta qowanchej. Noqanchejrí, ¿imatá payman qosunman? Chaypaj VIDEOTA qhawariychej.
Jehová Dios munakuwasqanchejrayku imastachus ruwasqanta qhawarina. Salmo 104:14, 15; 1 Juan 4:9, 10 leeriychej, chantá yachakojta tapuriy:
Jehová Dios imastachus qowasqanchejmanta, ¿mayqenmantataj astawan agradecesqa kashanki?
Jehová imastachus qowasqanchejpi piensarispa, ¿astawanchu payta munakunki?
Pillapis gustawasqanchej regalota qowajtinchejqa, pichus qowanchej chay runaman mayta agradecekunchej. Deuteronomio 16:17 leeriychej, chantá yachakojta tapuriy:
Jehová imastachus qanrayku ruwasqanpi piensarispa, ¿imatá ruwayta munanki agradecekunaykipaj?
5. Jehovaman kausayninchejta qopuspaqa ashkha bendicionesta japʼisun
Ashkha runasqa yuyanku may rejsisqa kaspa, sumaj profesionniyoj kaspa chayri ashkha qolqeyoj kaspa kusisqa kanankuta. Ajinachus manachus kasqanta yachanapaj VIDEOTA qhawariychej, chantá yachakojta tapuriy:
Videopi rikorqanchej chay hermanoman fútbol mayta gustajtinpis, ¿imaraykutaj saqeporqa?
Hermanonchejqa Jehovata sirviyta ajllarqa, ¿chayta ruwasqan allinchu karqa? ¿Imaraykú chayta ninki?
Apóstol Pablopis, niraj cristiano kashaspa uj sumaj profesionniyoj karqa. Paypa yachachejnenqa judiospa leyninkuta sumajta rejsej runa karqa. Jinapis apóstol Pabloqa tukuy chayta saqeporqa cristiano kananpaj. Chay imasta saqesqanmanta pesachikusqantachus manachus yachanapaj Filipenses 3:8 leeriychej, chantá yachakojta tapuriy:
¿Imaraykutaj Pablo imastachus niraj cristiano kashaspa ruwasqanta “qʼopata jina” qhawarqa?
Ñaupa kausayninta saqesqanrayku, ¿ima allin imastataj japʼerqa?
Qan Jehovata sirviyta ajllanki chay, ¿kausayniykipi allinchu risonqa? ¿Imaraykú chayta ninki?
Apóstol Pabloqa cristiano kananpaj imastachus saqesqanmanta aswan allin imastaraj japʼerqa.
WAKIN RUNAS NINKU: “Yachani Bibliamanta cheqatapuni yachachisqaykichejta, jinapis manaraj wakichisqachu kashani bautizakunaypaj”, nispa.
Qanrí, ¿imatá yuyanki?
¿IMASTÁ YACHAKUNCHEJ?
Kaypi yachakunchej Jehovata munakusqanchejrayku payman kausayninchejta qopusqanchejta, bautizakusqanchejta ima.
Yuyarikunapaj
¿Imaraykutaj Jehová Diosllata tukuy sonqonchejwan munakunanchej tiyan, sirvinanchejtaj tiyan?
Jehovaj testigon jina bautizakojtinchej, ¿ima allin imastaj noqanchejpaj kanqa?
¿Jehová Diosman kausayniykita qopuyta munawajchu?
ASTAWAN YACHAKUNAYKIPAJ
Takiyta yachaj warmiwan uj deportistawan Jehová Diosta sirviyta ajllarqanku. Paykunamanta yachanaykipaj kay videota qhawariy.
Jovenespa tapukuyninku: Ruwasqasniyta qhawarispa, ¿imatá kausayniywan ruwayman? (6:52)
¿Imaraykutaj uj mañakuynejta Diosman kausayninchejta qopunanchejpuni tiyan? Chayta yachanaykipaj kayta leeriy.
“¿Imaraykutaq Jehovaman qukunanchik tiyan?” (Torremanta Qhawaj, 15 de enero de 2010)
Jehovata sirviyta ajllajkunaqa may kusisqa kanku. Chaypaj kay takiykunasniyoj videota qhawariy.
¿Imastataj uj warmi saqerqa Jehová Diosta rejsisqanrayku? Chayta yachanaykipaj “Mana yacharqanichu imapajchus kausashasqanchejta” nisqata leeriy.
“Bibliaqa cambianankupaj yanaparqa” (La Atalaya, 1 de noviembre de 2012)