Creeyninchej, ¿sumaj “jarkʼakuna escudo” jinachu?

1, 2. 1) Efesios 6:16 nisqanman jina, ¿imajtintaj creeyninchej “uj jatun jarkʼakuna escudo jina” kanan tiyan? 2) ¿Ima tapuykunamantaj kay yachaqanapi kutichisun?

CREEYNINCHEJQA “uj jatun jarkʼakuna escudo jina” (Efesios 6:16 leey). Soldadosqa escudonkuwan espadasmanta, flechasmantawan, casi tukuy cuerponkuta jarkʼakoj kanku. Ajinallatataj creeyninchejpis, kay mundoj sajra imasninmanta jarkʼawanchej. Chaykuna kanku: Khuchichakuy jucha, maqanakuykuna, Diospa kamachiykunasninpa contranpi kaj imaspiwan.

² ‘Qhepa pʼunchaykunapi’ kausasqanchejrayku, creeyninchejqa pruebaman churasqallapuni kanqa (2 Tim. 3:1). ¿Imaynatá yachasunman creeyninchej sumaj jarkʼakuna escudo jinachus manachus kashan chayta? ¿Imatá ruwasunman creeyninchej sinchʼillapuni kananpaj? Kay yachaqanapi chay tapuykunaman kutichisun.

 3. ¿Imatataj soldados escudonkuwan ruwaj kanku?

³ Ñaupa tiempopi, soldadospa escudosninkoqa, qarawan forrasqa karqa. Soldadosqa escudonkuta wirawan jawej kanku, qaran unayta aguantananpaj, fierrontaj mana ensarraykunanpaj. Uj soldado escudon mana allinchu kashasqanta reparaj chayqa, chay rato allincharqoj. Ajinamanta qhepan maqanakupaj wakichisqa kananpaj.

 4. 1) ¿Imaraykutaj creeyninchej sinchʼi kanan tiyan? 2) ¿Imatá ruwasunman ima llakiy jamunanpajpis creeyninchej sinchʼi kananpaj?

⁴ Ñaupa tiempomanta soldados jina, noqanchejpis creeyninchej sinchʼichus manachus kashasqanta yachananchej tiyan. Mana sinchʼichu kashasqanta reparaspataj, imallatapis ruwananchej tiyan. Chaytaqa mana pipis ruwapuwasunmanchu. Creeyninchej sinchʼi kajtenqa, maqanakunapaj wakichisqa kasunchej. Imaraykuchus cristianosqa supaykunawan maqanakupi jina kashanchej (Efe. 6:10-12). ¿Imatá ruwasunman ima llakiy jamunanpajpis creeyninchej sinchʼi kananpaj? Ñaupajtaqa Diospa yanapanta mañakuna. Chantá creeyninchej sinchʼichus, manachus kashasqanta yachanapaj, Diospa Palabranwan yanapachikuna (Heb. 4:12). Biblia niwanchej: “Tukuy sonqoykiwan Tata Diospi atienekuy; ama qampa yachasqallaykipeqa atienekuychu”, nispa (Pro. 3:5, 6). Pasaj killaspi, ¿chay versículos nisqanman jinachu imatapis kausayninchejpi ruwarqanchej? Qolqemanta pisisqas karqanchej chay, ¿imatachus Hebreos 13:5 nisqanta yuyarikorqanchejchu? Jehová Dios chaypi niwanchej: “Mana jaykʼajpis saqerparisqaykichu. Nitaj jaykʼajpis wijchʼurparisqaykichu”, nispa. Chay nisqanpi, ¿atienekorqanchejchu? Chayta ruwarqanchej chayqa, creeyninchej uj sumaj jarkʼakuna escudo jina kashan.

 5. Sumajta qhawarikuspa, ¿imatataj creeyninchejmanta reparasunman?

⁵ Sumajta qhawarikuspaqa, ichapis reparasun creeyninchej mana sinchʼichu kashasqanta. Ichá chaypiraj reparasun, wakin imaspi pantanapaj jina kashasqanchejta. Ichapis anchata phutikusqanchejrayku, Diosta wasanchajkuna llullasta parlasqankurayku, chayri llakisqalla kasqanchejrayku creeyninchej pisiyashan. Ajinapi rikukushanchej chay, ¿imatá ruwasunman creeyninchej mana astawan pisiyananpaj?

 6. ¿Imasmantataj llakikunchejpuni?

⁶ Runasqa wakin imasmanta llakikunchejpuni. Chaykunamanta ujqa kashan, Jehová Diosta, Jesustawan kusichinanchej (1 Cor. 7:32). Jatun juchapi urmarqanchej chayqa, Jehová Dioswan watejmanta allinpi kanamanta llakikunchej (Sal. 38:18). Casarasqa kajkunaqa, warminkuta chayri qosankuta kusichinankumanta llakikunku. Tukuyninchejtaj familianchej, hermanosninchej ima allin kanankumanta llakikunchej (1 Cor. 7:33; 2 Cor. 11:28).

 7. Proverbios 29:25 nisqanman jina, ¿imaraykutaj runata mana manchachikunachu tiyan?

⁷ Anchata phutikojtinchejqa, creeyninchej pisiyanman. Ichapis ropayoj, mikhunayoj kanamanta anchata llakikunchej (Mat. 6:31, 32). Chaykunamanta anchata llakikuspaqa, kapuyniyoj kayta maskʼasunman, qolqetapis munakuyta qallarisunman. Jina kajtintaj, niña Jehová Diospi atienekusunmanchu, paymantataj karunchakapusunman (Mar. 4:19; 1 Tim. 6:10). Chantapis ichá anchata llakikusunman runaswan allinpaj qhawachikunamanta. Jinapitaj Diosta manchachikunamantaqa, runas asipayanawanchejta chayri qhatiykachanawanchejta astawan manchachikusunman. ¿Imatá ruwasunman mana chaypi urmanapaj? Jehová Diosmanta creeyta, kallpatawan mañakuna. Ajinamanta mana imatapis manchachikusunchu (Proverbios 29:25 leey; Luc. 17:5).

 8. ¿Imatá ruwananchej tiyan pillapis Jehová Diosmanta, hermanosninchejmantawan llullasta parlajtin?

⁸ Satanasqa ‘llullakojkunaj tatan’. Payqa atiyninpi kajkunamanta valekuspa, Jehová Diosmanta, hermanosninchejmantawan llullasta parlan (Juan 8:44). Chaykuna ukhupi kashanku, Diospa llajtanta wasanchajkuna. Paykunaqa cheqa kajta qʼewispa, Jehovaj llajtanmanta llullasta parlanku. Chaytataj ruwanku Internetnejta, telenejta, radionejta, periodicosnejta ima. Chay llulla parlasqankoqa, ‘Supaypa laurashaj flechasnin’ jina (Efe. 6:16). ¿Imatá ruwasunman pillapis chay llulleriosta willawajtinchej? Mana uyarinachu tiyan. Imaraykuchus noqanchejqa, Jehová Diospi creenchej, hermanosninchejpitaj atienekunchej. Chayrayku Diosta wasanchajkunataqa, manapuni uyarinchejchu. Imastachus nisqankuta yachayta munaspapis, paykunawanqa ni imarayku parlanchejchu, nitaj discutinchejchu.

 9. Llakisqalla kajtinchej, ¿imastaj kanman?

⁹ Llakisqalla kajtinchejqa, creeyninchej pisiyanman. Problemasniyoj kaspaqa, wakin kutis llakisqalla kanchej. Problemastaqa mana qonqayta atisunmanchu, allinchanapunitaj tiyan. Jinapis mana allinchu kanman, chayllapi yuyananchej. Imaraykuchus Jehová Dios sumaj kausayta qonawanchejta nisqanta qonqapusunman (Apo. 21:3, 4). Llakisqalla kajtinchejqa saykʼupusunman, niñataj Jehová Diosta sirvisunmanchu (Pro. 24:10). Mana jinapi rikukunapaj, imallatapis ruwanapuni tiyan.

10. ¿Imatá uj hermanaj nisqanmanta yachakusunman?

¹⁰ Estados Unidosmanta hermananchejpi piensarina. Paypa qosanqa sinchʼi onqosqa kashan. Jinapis hermananchejqa sinchʼi creeyniyojllapuni. Imatachus chaypaj ruwasqanta qhawarina. Chay hermanaqa centralninchejman uj cartata apachisqa. Chaypitaj jinata nisqa: “Wakin kutisqa manchay llakisqa kayku. Jinapis jamoj bendicionesta mana qonqakuykuchu. Jehová Diosman mayta agradecekuyku, creeyniykuta kallpachanaykupaj tukuy imata qowasqaykumanta. Chaykunaqa maytapuni sonqochawayku. Yanapawaykutaj ñaupajman rinallaykupajpuni, Satanás churawayku chay pruebastapis aguantanaykupaj”, nispa. Hermananchejpa nisqanqa, llakiyninchejta atipayta atisqanchejta yachachiwanchej. ¿Imaynatá chayta ruwasunman? Problemasninchejta Satanás rikhurichisqanta yuyana, Jehová Dios sonqochanawanchejpi atienekuna, pay qowasqanchej yachachiykunatataj jatunpaj qhawana.

11. ¿Imaspitaj tʼukurinanchej kanman creeyninchej sinchʼichus manachus kashasqanta yachanapaj?

¹¹ Ichapis creeyninchej aswan sinchʼi kananta necesitanchej. Pasaj killaspi imastachus ruwasqanchejpi tʼukurina. ¿Kallpachakorqanchejchu mana anchata llakikunapaj? ¿Tukuy imatachu ruwarqanchej Diosta wasanchajkunata mana uyarinapaj, nitaj paykunawan discutinapaj? ¿Llakiyninchejta atipayta aterqanchejchu? Chaykunata ruwarqanchej chayqa, creeyninchejqa sinchʼi kashan. Jinapis sumajta qhawarikunallapuni tiyan. Imaraykuchus Satanaspataqa waj armasnin kapullantaj. Qhepan parrafospi ujmanta parlarisun.

12. Tukuy imayoj kayta maskʼajtinchej, ¿imastaj kanman?

¹² Tukuy imayoj kayta maskʼajtinchejqa, creeyninchej pisiyanman, Jehová Diospajtaj pisillataña llankʼasunman. Apóstol Pablo nerqa: “Ni mayqen runapis, soldado kashaspa waj ruwanasman satʼikunchu. Imaraykuchus payqa, pichus soldado kananpaj churarqa, chayta kusichiyta munan”, nispa (2 Tim. 2:4). Romano soldadosqa, soldado kashaspa mana waj imaspi trabajayta atejchu kanku. Qhepan parrafopi yachakusun, imaraykuchus mana waj trabajoyojchu kananku kasqanta.

13. ¿Imaraykutaj soldados mana waj imaspi trabajanankuchu karqa?

¹³ Kaypi piensarina: Uj tropa soldadosqa, tukuynin paqarinta espadankuta sumajta apaykachayta yachakunku. Jinapis chay tropamanta ujninkoqa, llajtapi mikhuna negocionta atiendekushan. Chay tardetaj, soldadosqa maqanakuna pʼachankuta sumajta qhawaykunku, espadasninkutapis filochanku. Mikhuna negocioyoj kaj soldadorí, qʼayantin vendenanpaj wakichikushan. Jinallapi enemigosqa qʼayantin paqarin maqanakoj jamunku. ¿Mayqen soldadotaj maqanakunanpaj wakichisqa kanqa, comandantentataj kusichenqa? ¿Mayqen soldadowantaj kayta munasunman? ¿Maqanakupaj wakichikusharqa chaywanchu chayri negocionwan musphasharqa chaywanchu?

14. ¿Imatataj aswan sumajpaj qhawanchej?

¹⁴ Uj sumaj soldado jinallataj, noqanchejpis mana waj imaswan musphaykachanchejchu. Noqanchejqa comandantesninchej Jehová Diosta, Jesustawan kusichiyta munanchej. Chaytataj aswan sumajpaj qhawanchej, Satanaspa mundon imatapis qonawanchejmanta nisqaqa. Chayrayku mayta kallpachakunchej, tiempochakunchejtaj Jehová Diosta sirvinapaj. Kikillantataj ruwanchej escudowan ninakoj creeyninchej sinchʼi kananpaj, Dios qowanchej chay maqanakuna pʼachatapis allinta japʼinapaj.

15. ¿Imatataj apóstol Pablo nerqa, imaraykutaj?

¹⁵ Tukuy tiempo wakichisqas kananchej tiyan. Imaraykuchus apóstol Pablo nerqa: “Qhapajyaytapuni munajkunarí”, “creeymanta karunchakapunku”, nispa (1 Tim. 6:9, 10). “Karunchakapunku” palabraqa, reparachiwanchej mana necesitasqanchej imasta maskʼaypi urmayta atisqanchejta. Sonqonchejpeqa “imaymana pierdechej wampu” munapayay saphichakuyta qallarinman. Chayrayku ama saqenachu chay munapayay sonqonchejman yaykunanta. Imaraykuchus Satanasqa, chaywan creeyninchejta pisiyachiyta munan.

16. Marcos 10:17-22 versiculosta leeytawan, ¿imaspitaj piensarinanchej kanman?

¹⁶ Ichapis ashkha imasta rantinapaj qolqenchej kapuwanchej. ¿Juchachu kanman mana necesitaspa imatapis rantinallanchej? Mana. Jinapis kay imaspi piensarina: Imatachus rantisqanchejta apaykachanapaj, allinchasqata japʼinapajtaj, ¿tiemponchej, kallpanchejpis kanqachu? ¿Nisunmanchu chay rantisqanchejta mana munakunanchejta? Chayrí chay rantisqanchejta munakuspa, ¿Jesuspa wajyarisqanta qhesachaj joven jinachu kasunman? Ajina kasunman chayqa, niña Diospaj astawan llankʼayta munasunmanchu (Marcos 10:17-22 leey). Aswan allin kapuwasqallanchejwan kausakunanchej, Jehová Diospa munaynintataj tukuy tiemponchejwan, kallpanchejwantaj ruwananchej.

17. ¿Imatataj ni jaykʼaj qonqanachu tiyan?

¹⁷ Ni jaykʼaj qonqananchejchu tiyan, uj guerrapi jina kashasqanchejta, sapa diataj maqanakunapaj wakichisqa kananchej kasqanta (Apo. 12:17). Sinchʼi creeyniyoj kanapajqa, noqanchej kallpachakunanchej tiyan, manataj hermanosninchejchu.

18. ¿Imaraykutaj soldados escudonkuta mana kacharejchu kanku?

¹⁸ Ñaupa tiempopeqa, guerrapi sumajta maqanakoj soldadota jatunpaj qhawaj kanku. Jinapis uj soldado mana escudoyoj kutimunanqa pʼenqay kaj. Romamanta Tácito sutiyoj runaqa qhelqarqa: “Escudota saqerpayqa, soldadopaj may pʼenqay karqa”, nispa. Chayrayku soldadosqa, escudonkuta mana kacharejchu kanku.

19. ¿Imatá ruwasunman escudonchejta sumajta japʼinapaj?

¹⁹ ¿Imatá ruwasunman escudonchejta sumajta japʼinapaj, nisunman creeyninchej sinchʼillapuni kananpaj? Reunionesman mana faltakuspa rinanchej tiyan. Chantapis Jehová Diospa sutinta, Gobiernonta ima runasman rejsichina tiyan (Heb. 10:23-25). Bibliatapis sapa día leena. Chantá chaypi nisqanman jina imatapis ruwanapaj, Jehová Diosmanta yanapata mañakuna (2 Tim. 3:16, 17). Ajinamanta Satanaspa ni mayqen armanpis wiñaypaj ñakʼarichiwasunchu (Isa. 54:17). Creeyninchejqa “uj jatun jarkʼakuna escudo jina” jarkʼawasun. Chantapis Jehová Diosta hermanosninchejwan khuska sirvispa, sinchʼita sayasun. Manataj imaschus pantachiwanchej chayllatachu atipasun, manachayqa Satanasta, paywan kajkunatawan Jesús atipashajtin, paywan khuska kasun (Apo. 17:14; 20:10).