Ama qonqaychejchu forasteroswan kʼachas kayta

1, 2. 1) ¿Ima chʼampaykunapitaj ashkha forasteros rikukunku? (Patapi kaj dibujota qhawariy). 2) ¿Ima yuyaychaykunatataj apóstol Pablo qorqa, ima tapuykunatataj ukhuncharisun?

OSEIQA niraj Jehovaj testigon kashajtin Ghana suyumanta Europaman riporqa.^[1] Ripusqanmantataj 30 watas kurajña kashan. Pay nin: “Repararqani chay lugarmanta runas noqamanta mana llakikusqankuta. Chay lugarqa chiri karqa. Aeropuertomanta llojsiytawan ñaupaj kutirayku chirita sienterqani, waqaytataj qallarerqani”, nispa. Oseiqa chay lugarpi ima qallutachus parlaj kanku chayta, mana parlayta atillarqachu. Chayrayku uj watanmanraj uj sumaj llankʼayta tarerqa. Wasinmanta karupi kasqanraykutaj familianta faltachaj, sapayakorqataj.

² Ajinapi rikukuspa imaynatachus runas qhawasunankupi tʼukuriy. May lugarmanta kajtiykipis, Tantakuna Wasipi hermanos kʼachamanta napaykurisusqankumanta, allin jamusqa kasqaykita nisusqankumanta ima, mayta agradecekuwaj, ¿icharí? Bibliaqa yuyaychawanchej “forasterosta” chayri waj llajtayojkunata munakunanchejta (Heb. 13:2). Chayrayku kay tapuykunata ukhuncharina: ¿Imaynatá waj llajtayojkunata Jehová qhawan? ¿Imaynatá waj llajtayojkunata qhawananchej tiyan? ¿Imaynatá waj llajtayojkunata yanapasunman congregacionpi kusisqa kanankupaj?

3, 4. Éxodo 23:9 nisqanman jina, ¿imaynatá Jehová munarqa israelitas waj llajtayojkunata qhawanankuta, imaraykutaj?

³ Jehovaqa israelitasman leyesta qorqa, Egiptomanta orqhomuytawan. Chay leyesnejtataj nerqa Egiptomanta paykunawan khuska llojsimojkunawan kʼachas kanankuta (Éxo. 12:38, 49; 22:21). Waj llajtayojkunapajqa waj llajtapi kausakuy mana atinapaj jinallachu. Chayrayku Jehovaqa forasterosta kʼachamanta qhawaj. Sutʼincharinapaj, waj llajtayojkuna chajmakuyta atej kanku, cosechajkunaj saqesqankuta (Lev. 19:9, 10).

⁴ Jehovaqa israelitasta kamacherqa forasterosta jatunpaj qhawanankuta. Astawantaj munarqa paykuna yuyarikunankuta, runaj llajtanpi tiyakuy imaynachus kasqanta (Éxodo 23:9 leey). Egipciosqa israelitasta chejnikojña kanku niraj esclavosninkuman tukushajtinku (Gén. 43:32; 46:34; Éxo. 1:11-14). Israelitasqa waj llajtapi kashaspa llakiyta kausakorqanku. Chayrayku Jehovaqa munarqa chayta yuyarikunankuta, waj llajtayojkunawan kʼachas kanankuta ima (Lev. 19:33, 34).

 5. ¿Imataj yanapawasun Jehová jina waj llajtayojkunawan kʼachas kanapaj?

⁵ Jehovaqa kasqan jinallapuni. Chayrayku waj llajtayoj hermanos congregacionninchejman jamojtinku, yuyarikuna Jehová paykunawan kʼacha kasqanta (Deu. 10:17-19; Mal. 3:5, 6). Waj llajtayojkuna ima chʼampaykunapichus rikukushasqankupi tʼukurina. Sutʼincharinapaj, ichapis paykunaqa ripusqanku lugarpi parlakusqanta mana entiendeyta atishankuchu chayri kʼumuykachachisqa kashanku. Chayrayku paykunata yanaparinapaj, paykunawan kʼacha kanapaj ima kallpachakuna (1 Ped. 3:8).

6, 7. ¿Imaynatá yachanchej ñaupa judío cristianos waj llajtayojkunata niña pisipaj qhawasqankuta, niñataj chejnikusqankutapis?

⁶ Ñaupa judío cristianosqa, yachakorqanku waj llajtayojkunata mana pisipaj qhawayta, nitaj chejnikuytapis. Sutʼincharinapaj, Pentecostés 33 watapi Jerusalenpi tiyakoj judío cristianosqa, waj llajtayojkuna cristianosman tukojtinku wajyarikorqanku (Hech. 2:5, 44-47). Chaytaj rikuchin judío cristianosqa sumajta entiendesqankuta imachus wajyarikuy ninayasqanta, waj llajtayojkunawan kʼacha kana kasqanta ima.

⁷ Chaywanpis chay tiempopi griegota parlaj wakin judiosqa, hebreota parlaj judiospaj thutuyta qallarerqanku, sapa pʼunchay mikhuna rakʼiypi viudasninkuman mana jaywasqankumanta (Hech. 6:1). Chayrayku apostolesqa, qanchis qharista churarqanku tukuy viudasman mikhunata rakʼinankupaj. Apostolesqa griego sutisniyoj qharista churarqanku, ichapis viudas kusisqa kanankupaj (Hech. 6:2-6).

8, 9. 1) ¿Imataj rikuchinman waj lugarniyoj runasta allinpajchus manachus qhawashasqanchejta? 2) ¿Imatá sonqonchejmanta orqhonanchej tiyan? (1 Ped. 1:22).

⁸ Reparajtinchej chayri manapis tukuyninchej, lugarninchejmanta costumbresman yachasqa kanchej (Rom. 12:2). Ichapis vecinosninchejta, compañerosninchejta, llankʼaj masisninchejta ima, waj lugarniyoj runaspaj sajra imasta parlajta uyarinchej. ¿Paykuna jinachu noqanchejpis yuyanchej? Pillapis suyunchejmanta, costumbresninchejmanta asikojtin, ¿imatá ruwanchej?

⁹ Uj tiempota apóstol Pedroqa mana judío kajkunata, mana allinpajchu qhawarqa. Jinapis pisimanta pisi yachakorqa niña ajinata yuyananpaj (Hech. 10:28, 34, 35; Gál. 2:11-14). Noqanchejpis, waj lugarmanta runasta mana allinpajchu qhawanchej chayqa, mayta kallpachakunanchej tiyan, sonqonchejmanta chayta orqhonapaj (1 Pedro 1:22 leey). ¿Imataj yanapawasun? Yuyarikuna tiyan, maymanta kaspapis tukuyninchej juchasapas kasqanchejta, nitaj salvakunapaj jinachu kasqanchejta ima (Rom. 3:9, 10, 21-24). Chayrayku mana yuyanachu tiyan, wajkunamanta nisqa aswan sumaj kasqanchejta (1 Cor. 4:7). Apóstol Pablo jina yuyananchej tiyan. Payqa cristiano compañerosninman nerqa: “Manaña waj llajtayojchu kankichej, nitaj forasteroschu; manachayqa Diospa [...] wasinpi[...] wawasnin kankichej”, nispa (Efe. 2:19). Tukuypis mayta kallpachakunanchej tiyan, runasta mana pisipaj qhawanapaj, mosoj runamanta pʼachawan jina pʼachallikunapaj ima (Col. 3:10, 11).

10, 11. ¿Imaynatá Jehová jina Booz forasterosta qhawarqa?

¹⁰ Cheqa sonqo Boozqa, Jehová jina forasterosta qhawarqa. ¿Imaynatá? Payqa cosecha tiempopi chajrasninta qhawarej rispa Rutta rikorqa. Rutqa Moab jallpʼamanta karqa, chajmakuspataj mayta llankʼasharqa. Moisespa Leyninman jinaqa, Rut chajmakuyta aterqa. Chayrayku Boozpa kamachinmanta mañarikorqa chajrasninpi chajmakuyta. Chayta Booz yachaytawan tʼukushaj qhepakorqa, cebada marqʼas chaynejpitaj chajmakunanta saqerqa (Rut 2:5-7, 15, 16 leey).

¹¹ Chaymanta qhepaman imachus kasqanqa, sutʼita rikuchin Booz Rutmanta llakikusqanta, forastera jina imaspichus rikukusqanmantapis. Boozqa Rutta nerqa qhepakunanta sipas kamachisninwan khuska, chajranpi llankʼajkuna mana imananankupaj. Chantapis Boozqa Rutman mikhunata, yakuta ima qorqa llankʼajkunasninman jina. Boozqa Rutta respetarqa, kallpacharqataj (Rut 2:8-10, 13, 14).

12. ¿Imaynatá waj llajtayojkunata yanapanman munakuyta rikuchejtinchej?

¹² Boozqa Rutmanta khuyakorqa suegran Noemiman kʼacha munakuyta rikuchisqanrayku. Chantapis khuyakullarqataj Jehovata yupaychasqanrayku, jarkʼayninta maskʼasqanrayku ima. Boozqa Rutta khuyakuspa Jehová jina munakuyta rikucherqa (Rut 2:12, 20; Pro. 19:17). Ajinallatataj kay tiempopipis munakuyta rikuchispaqa “tukuy runas[ta]” cheqa kajmanta yachakunankupaj, Jehová paykunata mayta munakusqanta yachanankupaj ima yanapasun (1 Tim. 2:3, 4).

13, 14. 1) Tantakuypi waj llajtayojkunata, ¿imaraykú allin jamusqa kankichej ninanchej tiyan? 2) Waj costumbresniyoj runaswan parlarinapaj, ¿imatá ruwasunman?

¹³ Tantakuykunapi waj llajtayojkunata “allin jamusqa kankichej” nispa, munakuyninchejta rikuchisunman. Wakin runasqa waj suyuman chayaytawan manchachikunku chayri runasmanta karunchakunku. Ichapis waj suyumanta runaspa ñaupaqenkupi pisipaj qhawakunku costumbresninkurayku chayri wajcha kasqankurayku. Chayrayku paykunaman napaykunapaj qayllaykuna, munakuyninchejta rikuchinapaj, imaynachus kashasqankuta waturinapaj ima. JW Language nisqa programa parlayninchejpi kan chayqa, chay runasta parlayninkupi napaykunapaj yanapawasunman (Filipenses 2:3, 4 leey).

¹⁴ Waj costumbresniyoj runaswan parlarinapaj, ¿imatá ruwasunman? Ichapis noqanchejmanta imallatapis willarisunman. Ajinamanta ichá reparasunman ashkha imaspi kikillantataj yuyasqanchejta. Yuyarikunataj, sapa lugarpi imaymana costumbres kasqanta.

15. ¿Ima yanapawasunchej uj suyuman yachakushanku chaykunata allinta entiendenapaj?

¹⁵ Waj llajtayojkuna congregacionpi kusisqas kanankuta munaspaqa, tapurikunachej: “Waj suyupi kashayman chay, ¿imaynatá runas qhawanawankuta munayman?”, nispa (Mat. 7:12). Uj suyuman yachakushanku chaykunawan pacienciakuna. Ichapis qallariypeqa imaraykuchus imatapis waj jinamanta ruwasqankuta, yuyasqankuta ima, mana allinta entiendeyta atillasunchu. Chayrayku mana suyanachu, noqanchej jinapuni ruwanankuta, yuyanankuta ima (Romanos 15:7 leey).

16, 17. 1) ¿Imatá ruwasunman waj llajtayojkunawan parlarinapaj? 2) ¿Imaynatá yanapasunman congregacionninchejpi waj llajtayojkunata?

¹⁶ Waj llajtayojkunawan parlarinapajqa, allin kanman suyunkumanta, costumbresninkumanta ima yachakunanchej. Congregacionninchejpi chayri predicanchej chay lugarpi waj llajtayojkuna tiyakunku chayqa, familiapi Diosta yupaychashaspa tiempochakusunman paykunamanta astawan yachakunapaj, imayna costumbresniyojchus kasqankuta, ima suyusmantachus kasqankuta ima. Chantapis waj llajtayojkunata wajyarisunman wasinchejman mikhurinapaj. Jehová Diosqa tukuypaj “punkuta kichari[n] Jesuspi creenankupaj”. Noqanchejpis waj llajtayoj “hermanosninchejpaj” wasinchejpa punkunta tukuy sonqo kicharisunman (Hech. 14:27; Gál. 6:10; Job 31:32).

¹⁷ Waj llajtayoj familiawan khuska kaspaqa, costumbresninchejman yachakunankupaj kallpachakushasqankuta jatunpaj qhawasun. Ichapis reparasunman parlayninchejta yachakunankupaj yanapata necesitasqankuta. Chantapis waj jinasmanta yanapayta atillasunmantaj. Sutʼincharinapaj, ichá uj llankʼayta, uj wasita tarinankupaj yanapasunman. Ajinata ruwaytaj hermanosninchejta mayta yanapanqa (Pro. 3:27).

18. ¿Imastá waj llajtayojkuna Rut jina ruwankuman?

¹⁸ Waj llajtayojkunaqa, ima suyumanchus ripunku chay suyoj costumbresninman jina kausakunankupaj mayta kallpachakunanku tiyan. Rutpis chayta ruwarqa. Sutʼincharinapaj, mana rejsisqan llajtaman chayaspa chajmakunanpaj permisota mañakorqa, chayta ruwaspataj chay llajtaj costumbresninta jatunpaj qhawasqanta rikucherqa (Rut 2:7). Nitaj yuyarqachu chajmakunanpaj derechoyoj kasqanta, wajkuna yanapanankupuni kasqanta ima. Chantapis payqa mayta agradecekorqa khuyakusqankurayku (Rut 2:13). Waj llajtayojkuna, Rut jina ruwanqanku chayqa, chay lugarmanta hermanos, waj runaspis respetanqanku.

19. ¿Imatá ruwananchej tiyan waj llajtayojkuna noqanchejwan khuska kusisqa kanankupaj?

¹⁹ Mayta kusikunchej Jehová munakuwasqanchejmanta, tukuy runasta sumaj willaykunata uyarejta saqewasqanchejmanta ima. Ichapis waj llajtayojkunaqa suyunkupi mana Bibliata estudiayta aterqankuchu chayri mana Jehovaj llajtanwan khuska tantakuyta aterqankuchu. Kunantaj chayta ruwayta atinku chayqa, congregacionpi mana waj llajtayojkuna jina sientekunankupaj yanapana. Ichapis paykunata qolqewan chayri munasqanchejman jina yanapayta mana atisunchu. Jinapis paykunawan kʼachas kaspaqa, Jehová jina ruwashanchej. Chayrayku Jehová jina ruwanallapuni, kallpachakunataj waj llajtayojkuna noqanchejwan khuska kusisqa kanankupaj (Efe. 5:1, 2).