Diospa leyesninta, yuyaychaykunasnintawan entiendena

 1. ¿Animalitos jinachu kasqanchej?

JEHOVÁ DIOSQA allin kajta, mana allin kajta reparayta atinapaj jina ruwawarqanchej. Chayrayku mana animalitos jinachu kanchej. Adanwan Evawanpis imachus allin kasqanta, imatajchus mana allin kasqanta reparayta aterqanku. Chayrayku Diosta mana kasukojtinku sonqonku juchacharqa, Diosmantataj pakaykukorqanku.

 2. ¿Imajtintaj Bibliata estudianapuni kasqa? (Patapi kaj dibujota qhawariy).

² Allin kajta, mana allin kajta reparayta atisqanchejrayku, cheqan kajta ruwayta atinchej. Chaywanpis Bibliata mana estudiajtinchejqa, sajra kajta ruwayta qallarisunman. Chayta astawan entiendenapajqa, uj barcomanta parlarina. Barcoj volanten fregasqa kajtenqa, sinchʼi wayra kajtin, yakuspis manchayta qhollchoqeyajtin barcoqa wistʼuykapunman. Barcoj volanten mana fregasqachu kajtinrí, barcoqa cheqanta renqa. Fregasqa volanteqa Bibliata mana estudiasqanchejwan ninakunman. Imajtinchus mana estudiaspaqa chay barco jina wistʼuykapusunman.

 3. ¿Imataj kanman Bibliata mana estudiajtinchej?

³ Bibliata mana estudiasunchu chayqa, sajra kajta mana reparayta atillasunchejchu (1 Tim. 4:1, 2). Chantapis “mana allin kajta” allin kajta jina qhawayta qallarisunman (Isa. 5:20). Jesusqa yachachisqasninman nerqa: “Hora chayamushanña, chaypachataj runasqa qankunata wañuchisonqachej, chayta ruwaspataj yuyanqanku Diosta yupaychashasqankuta”, nispa (Juan 16:2). Estebanta wañuchejkunapis Diosta yupaychashasqankuta yuyarqanku (Hech. 6:8, 12; 7:54-60). Tiempo pasasqanman jinataj, cristiano nichikojkuna ashkha runasta wañucherqanku Diosta yupaychashasqankuta yuyasqankurayku. Chaywanpis paykunaqa, runasta wañuchispa Diospa leyesninta pʼakisharqanku (Éxo. 20:13). Chaytaj reparachiwanchej, chay runasqa imachus allin kasqanta, imatajchus mana allin kasqanta mana reparayta atisqankuta.

 4. ¿Imataj yanapawasunman mana pantanapaj?

⁴ Mana pantanapajqa Diospa leyesnin, yuyaychaykunasnin ima mayta yanapawasunchej. Diospa Palabranqa may sumaj kashan “yachachinapaj, juchata reparachinapaj, tukuy imata cheqanchanapaj, cheqan kajta ruwayta yachachinapaj ima” (2 Tim. 3:16). Chayrayku Bibliataqa estudianapuni, yachakusqanchejpitaj tʼukurina, yachakusqanchejman jinataj kausakuna. Chayta ruwasunchej chayqa, imaynatachus Jehová Dios yuyasqanta entiendesunchej, pay jinataj yuyayta qallarisunchej. Ajinamanta cheqan kajtapuni ruwasunchej, pantajtinchejtaj sonqonchej juchachawasunchej. Kunantaj qhawarinachej imatachus ruwana kasqanta Diospa leyesninwan, yuyaychaykunasninwan ima yanapachikunapaj.

5, 6. ¿Diospa kamachiykunasnin yanapawasunmanchu?

⁵ Diospa leyesninman jina kausakunapajqa, Bibliata leenanchej tiyan, rejsinanchejtaj tiyan. Chantapis Bibliaj nisqasninta kasukunanchej tiyan. Chayrayku Biblia nin: “Sajra kajta chejniychej, allin kajtataj munakuychej”, nispa (Amós 5:15). Chaypajqa Jehová Dios jina yuyayta yachakunanchej tiyan. Imajtinchus Diospa yuyaychaykunasnenqa allinninchejpajpuni kanku. Chayta entiendenapajqa, uj runapi piensarina. Ichá chay runaqa chʼisisnin mana puñuyta atinmanchu. Doctortaj chay runata yanapananpaj ninman ejerciciosta ruwananta, wakin mikhunasta manaña mikhunanta, waj imastawan manaña ruwananta. Chay runataj doctorpa nisqanta kasukunman. Miskʼitataj puñuyta qallarinman. Ajinamantataj chay runaqa reparanqa doctorpa nisqan allinninpajpuni kasqanta.

⁶ Jehová Diosqa chay doctor jinallataj, allinninchejpaj sumaj kamachiykunata churapuwarqanchej. Chay kamachiykunaqa yanapawanchej allinta kausakunapaj, juchapi mana urmanapajtaj. Bibliaqa niwanchej ama llullakunata, ama engañanata, ama suwakunata, ama khuchichakuy juchapi urmanata, runaswan mana maqanakunata, nitaj layqeriosta ruwanata (Proverbios 6:16-19 leey; Apo. 21:8). Jehová Diospa kamachiykunasninta kasukuspaqa, reparasunchej chay kamachiykuna allinninchejpajpuni kasqanta. Ajinamantataj Diospa kamachiykunasninta astawan munakusunchej, kasukuytapunitaj munasunchej.

 7. ¿Diospa kamachisninmanta yachakuy yanapawasunmanchu?

⁷ Biblia niwanchej: “Yachayniyojqa uyarispa, aswan yachayniyoj kanqa”, nispa (Pro. 1:5, 6). Arí, Bibliaj nisqasninta kasukuspaqa Diosta uyarishanchej. Diospa kamachiykunasninta kasukuy allinninchejpajpuni kasqanta yachanapajqa, Diospa kamachisninmanta yachakusunman mana paykuna jina pantanapaj. Bibliaqa niwanchej imaspichus paykuna pantasqankuta. Diospa kamachin Davidmanta parlarina. Payqa mayta ñakʼarerqa, Diosta mana kasukuspa Betsabewan qhenchachakusqanrayku (2 Sam. 12:7-14). David juchallikusqanmanta parlaj versiculosta leeshaspaqa, ichapis piensarisunman, imajtinchus David chay juchapi urmasqanpi. Piensarillasunmantaj David jina juchapi urmanapaj jina kashajtinchej, imatachus ruwananchejpi. Chantá piensarisunman ama David jina juchapi urmanapi, José jinataj juchamanta ayqekunapi (Gén. 39:11-15). Juchallikuy ñakʼariyllaman apawasqanchejta yachaspaqa, ni imarayku sajra kajta ruwayta munasunchu.

8, 9. 1) ¿Tukuy imapajpunichu Diosninchej leyesta churapuwasqanchej? 2) ¿Imajtintaj may sumaj kasqa Bibliaj nisqasninpi tʼukurinanchej?

⁸ Imastachus Jehová Dios chejnikun chaykunata chejnikunchej. Chaywanpis Diosqa Bibliapi mana tukuy imapajpunichu leyesta churapuwarqanchej. Chayrayku imata ruwashaspapis Diosta mana llakichinapaj sumajta qhawarikunanchej tiyan. Bibliaj nisqasnin sonqonchejpi kajtenqa, Diosta kusichinapaj jinapuni imatapis ruwasunchej.

⁹ Jehová Diosqa munakuwasqanchejrayku sumajta yuyaychawanchej. Chayrayku pay niwanchej: “Noqamin Señorniyki Tata Dios kani; noqa yachachiyki imachus qampaj allin kasqanta. Noqa may ñantachus purinaykita rikuchiyki”, nispa (Isa. 48:17, 18). Bibliaj nisqasninpi tʼukureyqa, yanapawanchej kausayninchejta cheqanchanapaj, allin kajtapunitaj ruwanapaj. Ajinamantaqa sumaj yuyaywan imatapis ajllasunchej.

10. 1) ¿Imata ruwanapajtaj Diospa yuyaychaykunasnin yanapawasunman? 2) ¿Imatataj Jesús discipulosninman yuyaychasqa?

¹⁰ Diospa yuyaychaykunasnenqa, yanapawanchej allin kajtapuni ruwanapaj. Diospa yuyaychaykunasninta rejsispaqa, imaynatachus Dios yuyasqanta entiendenchej. Entiendellanchejtaj imaraykuchus wakin leyesta churapuwasqanchejta. Jesuspis discipulosninta yuyaychaspa reparacherqa wakin imasta ruwajtinku problemasllata rikhurichinankuta. Jesús discipulosninman nerqa phiñakuspa chʼajwasllata jatarichinankuta, millay imaspi yuyajtinkutaj khuchichakuy juchapi urmanankuta (Mat. 5:21, 22, 27, 28). Diospa yuyaychaykunasninta kasukuspaqa, tukuy imatapis Diosta jatunchanapaj jina ruwasunchej (1 Cor. 10:31).

11. ¿Tukuypis kikintachu yuyaj kasqanchej?

¹¹ Diospa yuyaychaykunasnin sonqonchejpi kajtinpis, mana tukuy cristianoschu kikinta yuyanchej. Sutʼincharinapaj, machachikoj ujyanasmanta parlarina. Bibliaqa mana ninchu aqhata chayri alcoholta ujyay jucha kasqanta. Manaqa nin machaykuy jucha kasqanta (Pro. 20:1; 1 Tim. 3:8). Maychus kajta tomayta atejtinchejpis waj hermanospi piensarinanchej tiyan, mana pantachinanchejpaj.

12. ¿Imatataj Romanos 14:21 versiculomanta yachakusunman?

¹² Apóstol Pabloqa, wajkunata mana pantachinanchejpaj allinta qhawarikunanchejta nerqa. Pay nerqa: “Sichus aychata mikhusqayki, vinota ujyasqayki chayri waj imata ruwasqaykipis hermanoykita pantachin chayqa, allin kanman chaykunata mana ruwanayki”, nispa (Rom. 14:21). Chayrayku aqhata chayri alcoholta uj chhikanta tomasqanchej hermanonchejta pantachinman chayqa, allin kanman mana tomananchej. Ichapis chay hermanoqa, aqhata chayri alcoholta mana llamiriyta munanmanchu ñaupa kausayninpi borracho kasqanrayku. Chayrayku allinta qhawarikunanchej tiyan, mana chay hermanonchejta ñaupa kausayninman kutirichinapaj (1 Cor. 6:9, 10). Ajina hermanosta wasinchejman wajyarikuspaqa, mana tomayta munajtinkoqa amapuni munajta mana munajta tomachinachu.

13. ¿Imatataj Timoteo ruwasqa judiosman predicananpaj?

¹³ Judiosqa qhari wawitasninkuta circuncidaj kanku, jispʼanitanpa puntitanmanta qaritanta khuchurparispa. Chaytaj judiospajqa may importante karqa. Chayrayku mayta nanajtinpis Timoteoqa, jovenña kashaspa circuncidachikorqa judiosman predicananpaj. Ajinamanta Timoteoqa judiosta mana pantacherqachu (Hech. 16:3; 1 Cor. 9:19-23). Noqanchejpis tukuy atisqanchejta ruwana wajkunaj allinninkuta maskʼanapaj, gustawasqanchej imasta manaña ruwananchej kajtinpis.

14. ¿Imatataj ruwananchej kasqa wiñay tukusqa cristianos kanapaj?

¹⁴ Tukuy cristianosqa “Cristomanta qallariy yachachiykunata” saqepunanchej tiyan, “wiñay tukusqa runasman tukunapaj” (Heb. 6:1). Diosta unaytaña sirvispapis, mana nisunmanchu wiñay tukusqa cristianosña kasqanchejta. Imajtinchus wiñay tukusqa cristianos kanapajqa, Bibliata sumajta rejsinanchej tiyan, entiendenanchejtaj tiyan, chaypajtaj mayta kallpachakunanchej tiyan. Chayrayku Bibliata sapa día leenanchej tiyan (Sal. 1:1-3). Bibliata sapa día leespataj Diospa kamachiykunasninta, yuyaychaykunasnintawan sumajta entiendesunchej.

15. ¿Imaynatataj rikuchisunman wiñay tukusqa cristianos kasqanchejta?

¹⁵ Jehová Diosqa cristianosta kamachiwanchej purajmanta munanakunanchejta. Chayrayku Jesús discipulosninman nerqa: “Qankunachus purajmanta munanakunkichej chayqa, tukuy yachanqanku yachachisqasniy kasqaykichejta”, nispa (Juan 13:35). Santiagopis nerqa runasta munakuy “reypa kamachisqan” kasqanta (Sant. 2:8). Pablotaj nerqa: “Munakuyniyojqa leyta juntʼan”, nispa (Rom. 13:10). Wajkunata munakuy may importante kasqanrayku, Biblia nin: “Diosqa munakuymin”, nispa (1 Juan 4:8). Jehová Diosqa mana munakuyki nillawarqanchejchu, manaqa munakuwasqanchejta ruwasqasninpi rikuchiwarqanchej. Chaymanta parlaspa apóstol Juan nerqa: “Kay jinamanta Diosqa munakuyninta rikuchiwarqanchej: Diosqa kʼata Wawanta kay mundoman kachamorqa paynejta kausayta japʼinanchejpaj”, nispa (1 Juan 4:9). Wiñay tukusqa cristianos kasqanchejta rikuchinchej, Jehová Diosta, Jesusta, hermanosninchejta, waj runastawan munakuspa (Mat. 22:37-39).

16. ¿Diospa yuyaychaykunasninta entiendenapunichu kasqa?

¹⁶ Diospa leyesnenqa wakin imasllapi yanapanawanchejpaj kashan. Yuyaychaykunasninrí tukuy imapi yanapanawanchejpaj kashan. Chayrayku wiñay tukusqa cristianospajqa, Diospa yuyaychaykunasninta kasukuy may importante. Chayta astawan entiendenapajqa uj wawitamanta parlarina. Uj wawitaqa, mana entiendenchu sajra runaswan masichakuy mana allinchu kasqanta. Chayrayku tatasqa, chay wawankuta sajra runasmanta jarkʼanankupaj imastachus mana ruwananta yachachinku (1 Cor. 15:33). Chaywanpis chay wawitaqa, jatunyasqanman jina Diospa yuyaychaykunasninta entiendespa, reparakonqa mana allinchu kasqanta wakin runaswan masichakunan (1 Corintios 13:11; 14:20 leey). Noqanchejpis Diospa yuyaychaykunasninta entiendespaqa, tukuy imata Diosta kusichinapaj jina ruwasunchej. Chantapis Dios jina yuyayta qallarisunchej.

17. ¿Ima yanapastaj tiyapuwasqanchej tukuy imata Diospa munasqanman jinapuni ruwanapaj?

¹⁷ Bibliaqa yanapawanchej tukuy imata Diospa munasqanman jinapuni ruwanapaj. Bibliapeqa Diospa leyesnin, yuyaychaykunasnin ima kashan. Chaykunataj may sumaj kashan “allin yachachisqa” kanapaj, “sumaj wakichisqataj tukuy ima allin kajta” ruwanapaj (2 Tim. 3:16, 17). Arí, Diospa Palabranqa yanapawanchej “imachus Jehová Diospa munaynin kasqanta” reparanapaj. Diospa munayninta reparanapajqa, Bibliata sumajta entiendenanchej tiyan (Efe. 5:17). Chaypajtaj ashkha yanapas tiyapuwanchej. Chay yanapastaj kaykuna kanku: Jehovaj testigosnin yachaqanasta maskʼanankupaj nisqa libro, Watchtower Library nisqa programa, INTERNETPI BIBLIOTECA Watchtower nisqa, JW Library nisqa programa ima. Kay yanapaswanqa Bibliata sumajta entiendesunman sapallanchejpi estudiaspa chayri familianchejwan estudiaspa.

18. ¿Diospa leyesninman jina, yuyaychaykunasninman jinataj kausakuy allinninchejpajchu kasqa?

¹⁸ Jehová Diospa leyesninman jina, yuyaychaykunasninman jinataj kausakojtinchejqa, tukuy imapi allinpuni riwasunchej. Bibliapi nin: “Maytapuni kamachisqasniykita munakuni; tukuy pʼunchaynintin chayllapi unanchani. Kamachisqasniykeqa aswan yachayniyojta ruwawan contraypi kajkunamanta nisqaqa, imaraykuchus kamachisqasniyki noqawampuni kanku. Tukuy yachachiwajkunamanta nisqaqa astawan entiendeni, imaraykuchus kamachisqasniykipi mayta unanchani. Kurajkunamantapis astawan entiendeni, kamachisqasniykita kasusqayrayku”, nispa (Sal. 119:97-100). Diospa yuyaychaykunasninta, leyesninta ima entiendenapaj tiempochakojtinchejqa, sumaj yuyaywan imachus allin, imatajchus mana allin kasqanta reparayta atisunchej. Chantapis “wiñay tukusqa” cristianos kasunchej, “imaynachus Cristo kasqanman jina” (Efe. 4:13).