¿Imaynatá bautizakunaykipaj wakichikuwaj?

1, 2. 1) ¿Imaraykutaj bautizakuy mana pujllakuy jinallachu? 2) ¿Imapitaj tʼukurinayki tiyan niraj bautizakushaspa?

¿BAUTIZAKUYTACHU munashanki? Bautizakoyqa ni imawan kikinchakunchu. Ñaupaj yachaqanapi yachakorqanchej jina bautizakoyqa mana pujllakuy jinallachu. Bautizakuspaqa Jehová Diosman kausayninchejta qosqanchejta, wiñaypaj sirvinanchejta, payta sirviy ni imawan kikinchakusqanta ima nisqanchejta wajkunaman rikuchinchej. Chayta ruway may sumaj kasqanrayku, niraj bautizakushaspa imaraykuchus bautizakuyta munasqaykipi sumajta tʼukurinayki tiyan, imaynatachus Diosman kausayninchejta qona kasqantataj entiendenayki tiyan.

² ¿Bautizakunaykipaj wakichisqachu kashanki? Ichá yuyanki wakichisqaña kashasqaykita. Chayri yuyanki niraj wakichisqachu kashasqaykita. Jinapis tatasniykeqa bautizakunaykipaj edadniyoj kanaykita, astawan yachakunaykita ima nisunku. Jinapis ama llakikuychu. Astawanpis kallpachakullaypuni ñaupajman rinaykipaj, ajinamanta bautizakunaykipaj wakichisqa kanki. Kay yachaqanataj imaspichus creesqaykipi, imastachus ruwasqaykipi, Jehovata munakusqaykipi ima yanapasonqa.

3, 4. ¿Imatataj jóvenes Timoteoj kausayninmanta yachakunkuman?

³ Kaykunata tapurikuy: “¿Imaraykú Diospi creeni? ¿Imaraykú niyman Biblia Diospa Palabran kasqanta? ¿Imaraykú Diospa kamachiykunasninta kasukuni, kay pachamanta runas jina ruwanaymanta nisqa?”, nispa. Kay tapuykunaqa apóstol Pabloj yuyaychasqanta kasukunaykipaj yanapasonqa. Pay nerqa: “Ajinapi [qankunallataj reparankichej, NM] Diospa munaynin kasqanta kʼacha, Diosta kusichej, juntʼasqataj”, nispa (Rom. 12:2). Kay yuyaychayqa Jehovaj nisqanta ruway allinniykipajpuni kasqanta reparanaykipaj yanapasonqa. ¿Imaraykú chayta reparanayki tiyan?

⁴ Timoteoj kausayninpi tʼukuriy. Payqa Diospa Palabranmanta sumajta yacharqa maman, abuelan ima yachachisqankurayku. Chaywanpis Pablo payman nerqa: “Allinta sayay imatachus yachaqakusqaykipi, creesqaykipi ima”, nispa (2 Tim. 3:14, 15). Timoteoqa imatachus mamanwan abuelanwan yachachisqanku cheqapuni kasqanta yacharqa. Japʼikorqataj mana mamanwan abuelanwan japʼikunanta nisqankuraykullachu, manaqa pay kikin yachakusqanpi tʼukurisqanrayku, cheqa kaj kasqanta reparasqanrayku ima (Hebreos 5:14 leey).

5, 6. ¿Imaraykutaj imachus allin, imatajchus mana allin kasqanta reparayta yachakunayki tiyan?

⁵ ¿Imatá Timoteoj kausayninmanta yachakuwaj? Ichapis Bibliaj yachachiykunasninmanta may unayña yachakushanki. Jina kajtenqa Timoteo jina ruway, chantá imaraykuchus imapipis creesqaykipi tʼukuriy. Imapichus creesqaykita aswan sutʼita yachajtiykeqa, creeyniyki aswan sinchʼi kanqa. Nitaj compañerosniyki, nitaj kay sajra pachapis creeyniykimanta iskayrayachisonqankuchu. Nitaj qanpis imapichus creesqaykimanta iskayrayankichu.

⁶ Chayrayku may sumaj kanman qan kikiykimanta imachus allin, imatajchus mana allin kasqanta reparayta yachakunayki. Imaraykuchus chayqa compañerosniyki imatapis tapusojtinku kutichinaykipaj yanapasonqa. Ichá paykunaqa tapurisunkuman: “¿Imaraykú yachanki Dios kasqantapuni? Dios munakuyniyoj chay, ¿imaraykú sajra ruwaykuna kananta saqen? Dios tukuy imata ruwarqa chay, ¿pitaj payta ruwarqa?”, nispa. Imachus allin, imatajchus mana allin kasqanta reparayta yachanki chayqa, ajina tapusojtinku imapichus creesqaykimanta mana iskayrayankichu. Astawanpis Bibliata sumajta estudianaykipaj yanapasonqa.

7-9. ¿Imaynatá “¿Qué enseña realmente la Biblia?” nisqapi kaj yanapas creeyniykita sinchʼiyachinaykipaj yanapasunkiman?

⁷ Bibliata sumajta estudianki chayqa, ima tapuykunamanpis kutichiyta atillanki, nitaj imamantapis iskayrayankichu, imapichus creesqaykitapis sutʼita yachanki (Hech. 17:11). Chayta ruwanaykipajtaj Jehová Diosqa llajtannejta ashkha yanapasta qowanchej. Ashkhas yanapachikunku Jehovamanta, ruwasqasninmanta ima parlaj publicacioneswan. Chantapis ashkha jóvenes yanapachikunku Internetpi “¿Qué enseña realmente la Biblia?” nisqapi, ashkha yanapas orqhokusqanwan. Chaytaj tarikun jw.org/es > ENSEÑANZAS BÍBLICAS nisqapi. Chaykunapi yanapas kasqanqa, Bibliaj yachachiykunasninmanta mana iskayrayanaykipaj yanapasonqa.

⁸ Bibliamanta yachakushasqaykirayku, ichapis “¿Qué enseña realmente la Biblia?” nisqapi wakin tapuykunaj kutichiyninta yachankiña. Chaywanpis, ¿chay kutichiykuna cheqapunichu qanpaj? “¿Qué enseña realmente la Biblia?” nisqapi kaj yanapasqa, Bibliaj ashkha versiculosninpi tʼukurinaykipaj, imatachus chaykunamanta creesqaykita qhelqanaykipaj ima yanapasonqa. Chantapis imaynatachus wajkunaman sutʼinchanaykipi tʼukurinaykipaj yanapallasonqataj. “¿Qué enseña realmente la Biblia?” nisqaman yaykuyta atispaqa, chaypi kaj yanapaswan Bibliata sumajta estudianaykipaj, imatachus yachakusqaykipi astawan atienekunaykipaj ima yanapachikuy.

⁹ Bibliamanta yachakusqayki cheqachus manachus kasqanta qan kikiykimanta reparanaykeqa may sumaj. Imaraykuchus chayqa bautizakunaykipaj wakichisqa kanaykipaj yanapasonqa. Uj sipas hermana nin: “Niraj bautizakushaspa Bibliata sumajta estudiarqani, repararqanitaj Jehovaj testigosnin cheqa religión kasqankuta. Sapa pʼunchaytaj chay astawan sutʼi kasqanta reparani”, nispa.

10. ¿Imaraykú may sumaj uj bautizasqa hermano ruwasqasninwan creeyniyoj kasqanta rikuchinan?

¹⁰ Biblia nin: “Sichus runaqa ruwasqasninwan mana rikuchin[chu] creesqanta chayqa, chay creesqanqa wañusqa”, nispa (Sant. 2:17). Chayrayku creeyniyoj kanki, imapichus creesqaykitataj sutʼita yachanki chayqa, ruwasqasniykiwan creesqaykita rikuchinayki tiyan. Chantá Biblia “juchamanta tʼaqasqa, cheqan kajman jina kawsanaykichej tiyan” nisqanta ruwanki (2 Pedro 3:11 leey).

11. ¿Imaynataj kanchej juchamanta tʼaqasqa kaspa?

¹¹ Juchamanta tʼaqasqa kanaykipajqa llimphu kausayniyoj kanayki tiyan. Sutʼincharinapaj, imatachus kay qhepa sojta killaspi ruwasqaykipi tʼukuriy. Imatapis ajllanayki kajtin, ¿reparayta atillarqankichu imachus allin, imatajchus mana allin kasqanta? (Heb. 5:14.) ¿Aychaj sajra munayninta atipayta atillarqankichu? Chayrí, ¿waj jóvenes sajra ruwayman tanqasojtinku sinchʼita sayayta atillarqankichu? ¿Jehovaj testigon jinachu rejsichikunki chayri compañerosniyki jinachu ruwanki paykuna mana asipayasunankupaj? (1 Ped. 4:3, 4.) Tukuypis pantaj runas kanchej. Jehovata ashkha watastaña sirvejkunapis ichá wakin kuti manchachikunku Jehovaj testigosnin jina rejsichikuyta. Chaywanpis Jehovaman kausayninkuta qojkunaqa, Jehovaj testigon kasqankuta jatunpaj qhawananku tiyan, chaytataj llimphu kausayniyoj kaspa rikuchinanku tiyan.

12. 1) ¿Imaynatá cheqan kajman jina kausasqaykita rikuchiwaj? 2) ¿Imaynatá chaykunata ruwanayki tiyan?

¹² Cheqan kajman jina kausasqaykita rikuchinki, tantakuykunaman, willayman ima rispa, Diosmanta mañakuspa, Bibliata estudiaspa ima. Kausayninchejta Diosman qospaqa chaykunata ruwaspa kusisqa kanchej, nitaj tanqasqa jinallachu ruwanchej. Rey David jinataj ninchej, pay nerqa: “Diosníy, tukuy sonqo munayniykita ruwayta munani. Yachachiwasqasniykita sonqoypi waqaychani”, nispa (Sal. 40:8).

13, 14. 1) ¿Imataj yanapasunkiman ‘cheqan kajman jina kausakunaykipaj’? 2) ¿Imaynatá Waynaspata Sipaskunapta libro wakin jovenesta yanapan?

¹³ ‘Cheqan kajman jina kausakunaykipaj’ Waynaspata Sipaskunapta tapukuyninku, iskay kaq libro yanapallasunkimantaj, chay libroj 308, 309 paginasninta leeriy. Chay paginaspitaj kay tapuykunaj kutichiyninta anotay: “Jehová Diosmanta mañakushaspa, ¿imapichus yanapasunanta sutʼitachu mañakunki? Imatachus Diosman nisqayki, ¿payta munakusqaykitachu rikuchin?”. “Sapallayki Bibliamanta yachakushaspa, ¿imamantá yachakunki?”. “Tatasniyki willaj mana llojsejtinkupis, ¿qan llojsinkipunichu?”. Chantá chay paginaspi anotakuwaj imastachus ruwanaykita Diosmanta aswan sumajta mañakunaykipaj, Bibliata aswan sumajta estudianaykipaj, aswan sumajta willanaykipaj ima.

¹⁴ Bautizakuyta munaj ashkha jóvenes ninku chay libroj 308, 309 paginasnin sumajta yanapasqanta. Tilda sutiyoj uj sipas hermana nin: “Chay libropi tapuykunaqa Diosta yupaychaypi imastachus ruwanaypaj yanapawarqa. Pisimanta pisitaj imastachus ruwayta munasqayta juntʼayta qallarerqani, watanman jinataj bautizakunaypaj wakichisqaña kasharqani”, nispa. Uj joven hermano Patrick sutiyoj chayman rijchʼakojllatataj nin: “Imatachus ruwanayta yacharqaniña, jinapis chaykunata anotakusqayqa, yanapawarqa astawan kallpachakunaypaj imatachus ruwayta munasqayta juntʼanaypaj”, nispa.

15. ¿Imaraykú Jehovaman kausayniykita qoyta qan ajllanayki tiyan?

¹⁵ Waynaspata Sipaskunapta nisqa libropi “Tatasniyki chayri amigosniyki Diospa llajtanmanta llojsipojtinku, ¿Diosta yupaychallawajpunichu?”, nisqa tapuy kallantaj. Yuyarikuytaj Jehovaman ruwasqasninchejmanta sapa uj cuentata qona kasqanta. Chantapis Jehovawan masichakunaykeqa qanmanta kashan, manataj tatasniykej chayri wajkunaj ruwasqankumantachu. Juchamanta tʼaqakunki, cheqan kajman jinataj kausakunki chayqa, cheqa kajta tarisqaykita, Diospa kamachiykunasninta jatunpaj qhawasqaykita ima rikuchinki. Ajinamantataj bautizakunaykipaj wakichisqa kasqaykita rikuchinki.

16, 17. 1) Pillapis bautizakuyta munan chay, ¿imaraykú chayta ruwanan tiyan? 2) ¿Imataj yanapasonqa Jehová wawanta qosqanmanta agradecekunaykipaj? Uj kikinchaywan sutʼinchay.

¹⁶ Moisesman qosqa leyta sumajta rejsej uj runa, Jesusta taporqa: “Leypa kamachisqasninmanta mayqentaj aswan kurajri?, nispa. Jesustaj kuticherqa: “Señor Diosniykitaqa munakunki tukuy sonqoykiwan, tukuy almaykiwan, tukuy yuyayniykiwantaj”, nispa (Mat. 22:35-37). Rikunchej jina pillapis bautizakuyta, cheqa cristianotaj kayta munan chayqa, Jehovata tukuy sonqo munakusqanrayku chayta ruwanan tiyan. Jehovata mayta munakunaykipajqa, wawanta salvanawanchejpaj qosqanpi tʼukurinayki tiyan (2 Corintios 5:14, 15; 1 Juan 4:9, 19 leey). Jehová wawanta noqanchejrayku qosqanpi tʼukurinaykipaj tiempochakunki chayqa, Jehovaman chayta ruwasqanmanta mayta agradecekunki.

¹⁷ Tʼukuriy pillapis yakuman chinkaykushajtiyki salvasusqanpi. ¿Imatá ruwawaj? ¿Salvasoj runata mana agradecekuspachu wasiykiman pʼachaykita cambiakoj ripuwaj? Mana, ¿icharí? Astawanpis chay runaman maytachá agradecekuwaj. Ajinallatataj noqanchejpis Jehovaman, Jesusman ima mayta agradecekunanchej tiyan. Imaraykuchus paykunaqa juchamanta, wañuymanta ima salvawanchej. Paykuna mayta munakuwasqanchejrayku kay Jallpʼa uj paraisoman tukojtin wiñaypaj kausakuyta atisunchej.

18, 19. 1) ¿Imaraykú Jehovaman kausayniykita qoyta mana manchachikunaykichu tiyan? 2) ¿Imaraykú bautizakojtiyki kausayniyki aswan sumaj kanqa?

¹⁸ Imatachus Jehová qanrayku ruwasqanmanta agradecesqa kashanki chayqa, Jehovaman kausayniykita qoy, bautizakuy ima. Yachanki jina Jehovaman kausayniykita qospaqa, munaynintapuni wiñaypaj ruwanaykita nishanki. Jinapis Jehovaman chayta niyta mana manchachikunaykichu tiyan. Imaraykuchus Jehovaqa allinniykitapuni munan, payta kasukojkunatataj bendecinanta nin (Heb. 11:6). Jehovaman kausayniykita qojtiyki, bautizakojtiyki ima, kausayniykeqa aswan sumaj kanqa. Uj hermano waynuchitu kashaspa bautizakorqa, kunantaj 24 watasniyojña kashan, pay nin: “Jovenyasparaj bautizakuyman karqa chayqa, imatachus ruwashasqayta sutʼita yachayman karqa. Jinapis bautizakusqayqa kay pachaj tojllasninpi mana urmanaypaj jarkʼawarqa”, nispa.

¹⁹ Rikunchej jina Jehovaqa allinniykitapuni munan. Satanastajrí mana, imaraykuchus payqa munaynillanta maskʼan. Satanaspa munayninta ruwanki chayqa, mana ima allin kajtapis qosonqachu. ¿Imaynatataj Satanás allin imasta qosunkiman, sajra imaslla paypi kajtinrí? Kuraj Supaymantaqa allin imasta mana suyasunmanchu, nillataj ima suyakuytapis qoyta atiwasunmanchu. Payqa mana atinmanchu qhepaman uj sumaj kausayta qosuyta, imajtinchus chinkachisqa kanqa (Apo. 20:10).

20. ¿Imatataj ruwawaj Jehovaman kausayniykita qonaykipaj, bautizakunaykipaj ima? (“Jehovaj amigollanpuni kanaykipaj yanapas”, nisqa recuadrota leey).

²⁰ Jehovaman kausayniykita qonaykeqa ni imawan kikinchakunchu. ¿Wakichisqachu kashanki chayta ruwanaykipaj? Wakichisqaña kashanki chayqa, ama manchachikuychu bautizakuyta. Manaraj wakichisqa kashasqaykita reparanki chaytaj, kay yachaqanapi yuyaychakusqanman jina ruwallaypuni. Apóstol Pabloqa Filipos llajtamanta hermanosman yuyaycharqa ñauparinallankutapuni (Fili. 3:16). Kay yuyaychayman jina ruwanki chayqa, Jehovaman kausayniykita qonaykipaj, bautizakunaykipaj ima wakichisqa kanki.