LECCIÓN 28
¿Imastataj ruwasunman Jehovata, Jesustapis agradecekunapaj?
Sumaj amigonchej uj regalota qowajtinchejqa mayta kusikunchej, agradecekunchejtaj. Jehová Dioswan Jesuswanqa mana chay regalota jinallachu qowanchej, manaqa aswan sumaj regalotaraj. Chaytaj kashan Jesús noqanchejrayku wañusqan. Chayrayku, ¿imatá ruwasunman Jehovaman, Jesusman ima agradecekunapaj? Chayta kaypi yachakusun.
1. ¿Imatá ruwasunman Jehovatawan Jesustawan agradecekunapaj?
Bibliaqa niwanchej pichus Jesuspi “creejqa” wiñaypaj kausananta (Juan 3:16). Jesuspi creeyqa mana “paypi creeni” niyllachu. Manaqa ruwayninchejwan, kausayninchejpi allin kajta ajllasqanchejwan rikuchinanchej tiyan (Santiago 2:17). Ruwasqanchejwan parlasqanchejwan Jesuspi creesqanchejta rikuchisun chayqa, Jehovaman, Jesusman ima astawan qayllaykusun (Juan 14:21 leey).
2. ¿Ima kutipitaj rikuchillanchejtaj Jehovaman Jesusman agradecekusqanchejta?
Jesuspa Wañuyninta Yuyarinapaj tantakuyman rispa. Chay tantakuyta ruwaspaqa Jehová mayta munakuwasqanchejmanta, Jesús noqanchejrayku wañusqanmanta agradecekusqanchejta rikuchinchej. Jesuspuni apostolesninman nerqa: “Kayta ruwallaychejpuni noqamanta yuyarikuspa”, nispa (Lucas 22:19). ¿Maykʼajtaj chayta nerqa? Wañuchinankupaj uj chʼisi faltashajtin. Chay chʼiseqa Jesús apostolesninwan tantakorqa. Chay tantakuytataj Biblia nin ‘Señorpa Cenan’ nispa (1 Corintios 11:20). Chay tantakuytaqa kunankama ruwashallanchejpuni Jesús noqanchejrayku kausayninta qosqanta yuyarinapaj.
ASTAWAN YACHAKUNA
Kaypi yachakusun Jehovawan Jesuswan munakuwasqanchejmanta imaynasmantawanchus agradecekunata. Chantá yachakullasuntaj imaraykuchus Jesuspa wañuyninta yuyarinapuni kasqanta.
3. Agradecekunapajqa imatapis ruwanchejpuni
Yakuman chinkaykushajtinchej pipis salvawasqanchejpi piensarina. Pichus salvawarqanchej chay runamantaqa manachá qonqapusunmanchu, astawanpis imaynamantapis agradecekuyta maskʼasunman.
Jehová Diosmanqa astawanraj agradecekunanchej tiyan. Imaraykuchus payqa wiñay kausayta qowasun. 1 Juan 4:8-10 leeriychej, chantá yachakojta tapuriy:
Jesús noqanchejrayku kausayninta qosqan, ¿imaraykutaj may valorniyoj?
Jehovawan Jesuswan noqanchejrayku imatachus ruwasqankuta yachaspa, ¿imatataj ruwayta munanchej?
Jehovawan Jesuswan noqanchejrayku imastachus ruwasqankumanta agradecekunapaj waj imastawan ruwananchej tiyan. 2 Corintios 5:15; 1 Juan 4:11; 5:3 leeriychej, chantá yachakojta tapuriy:
¿Imastataj ruwananchej kasqa Jehovaman, Jesusman ima agradecekunapaj?
4. Jesús jina ruwana
Jesusman agradecekusqanchejta rikuchillanchejtaj pay jina ruwaspa. 1 Pedro 2:21 leeriychej, chantá yachakojta tapuriy:
¿Imaynatataj Jesuspa purisqanta sumajta qhatisunman?
Jesusqa Diospa Palabranta jatunpaj qhawaj, sumaj willaykunata wajkunaman willarej, runastapis sanoyachej.
5. Jesuspa wañuyninta yuyarina
Ñaupaj kutipi imaynachus Señorpa Cenan ruwakusqanta yachanapaj Lucas 22:14, 19, 20 leeriychej. Chantá yachakojta tapuriy:
¿Imastaj ruwakusqa Señorpa Cenanpi?
¿Imawantaj tʼanta ninakun? Chanta, ¿imawantaj vino ninakun? (19, 20 versiculosta qhawariy).
Jesusqa munarqa wañuyninta watapi uj kutita discipulosnin yuyarikunankuta. Chayrayku Jehovaj testigosninpis, sapa wata tantakuyku Jesuspa wañuyninta yuyarikunaykupaj. Chaytataj ruwayku Jesús kamachisqanman jina. Imaynatachus chay tantakuyta ruwasqaykuta yachanapaj VIDEOTA qhawariychej. Chantá yachakojta tapuriy:
¿Imastaj Jesuspa Wañuyninta Yuyarinapaj tantakuypi ruwakoj kasqa?
Tʼantaqa ninakun Jesuspa mana juchayoj cuerponwan, mayqentachus noqanchejrayku qorqa chaywan. Vinotaj yawarninwan ninakun.
WAKIN RUNAS NINKU: “Jesuspi creespaqa salvasqaña kanchej”, nispa.
Ajinata nisojtinku, ¿imaynatá Juan 3:16 chanta Santiago 2:17 versiculoswan sutʼinchariwaj?
¿IMASTÁ YACHAKUNCHEJ?
Kaypi yachakunchej Jesús noqanchejrayku wañusqanmanta agradecekunapajqa, paypi creena kasqanta, wañuyninta yuyarinapaj tantakuymanpis rina kasqanta.
Yuyarikunapaj
¿Jesuspi creesqanchej imaspitaj rikukunan tiyan?
Jehová Diosman, Jesusman ima agradecekunapaj, ¿imastataj ruwananchej kanman?
¿Imajtintaj Jesuspa wañuyninta yuyarinapuni tiyan?
ASTAWAN YACHAKUNAYKIPAJ
Jesuspa wañuyninpi tʼukuriy, ¿imata ruwanapajtaj tanqawanchej? Chayta yachanaykipaj kay videota qhawariy.
¿Imaynataj creeyniyoj runa? Chanta, ¿imaynatá creeyninta rikuchin? Chayta yachanaykipaj kayta leeriy.
“Jehovaj nisqasninpi creesqanchejta rikuchina” (Torremanta Qhawaj, octubre de 2016)
Uj warmita Jesús payrayku wañusqanta yachay yanaparqa. Paymanta yachanaykipaj “Manaña chʼichipajchu qhawakuni, kusisqataj kausakuni” nisqata leeriy.
“Bibliaqa cambianankupaj yanaparqa” (La Atalaya, 1 de agosto de 2011)
¿Señorpa Cenanpi tukuychu tʼantata mikhunku, vinotapis ujyanku? Chayta yachanaykipaj kayta leeriy.