Diospa Reinollanta yanapanchej

1, 2. 1) ¿Imataj kay tiempokama Jesuspa kamachisninta yanapan? 2) ¿Imaynamantataj enemigosninchej chinkachiyta munawarqanchej, aterqankutajchu?

JESUSQA kamachej Pilatoj ñaupaqenpi kasharqa, pichus judiospa aswan kuraj kamachejninku karqa. Jesús, Pilatoman imatachus nisqanqa, kay tiempopipis yanapallawanchejtaj. Jesús nerqa: “Reinoyqa mana kay pachamantachu. Reinoychus kay pachamanta kanman chayqa, kamachisniy noqarayku maqanakunkuman judioswan ama japʼichisqa kanaypaj; chaywampis reinoyqa mana kay pachamantachu”, nispa (Juan 18:36). Pilatoqa, Jesusta wañuchinankuta kamacherqa, wañuchejtinkupis Jesusqa kausarichisqa karqa. Romamanta kamachejkunaqa, Cristoj yachachisqasninta qhasillata chinkachiyta munarqanku. Imajtinchus Cristoj yachachisqasnenqa, Diospa Reinonmanta tukuynejpi willarqanku (Col. 1:23).

² Diospa Reinon 1914 watapi sayachisqa kasqanmantapacha, kay pachamanta wakin aswan atiyniyoj soldadosqa, Diospa llajtanta chinkachiyta munarqanku. Nitaj aterqankuchu. Ashkha gobiernos, políticos ima chʼampaykunasninkupi yanapanapaj tanqayta munawanchej. Jinapis mana tʼaqanachiyta atiwanchejchu. Kay tiempopeqa, tukuynejpi tiyan Diospa Reinonpa kamachiyninpi kajkuna. Jinapis Jallpʼantinpi ujchasqa kashanchej, nitaj kay pachapi politicaman satʼikunchejchu. Ujchasqa kasqanchejqa rikuchin, Diospa Reinon kamachishasqanta, Rey Jesucristotaj kamachisninta yanapashasqanta, llimphuchashasqanta, jarkʼashasqanta ima. ¿Imaynamantá? Chayta yachayqa, creeyninchejta kallpachan. Kunanqa demandaspi atipasqanchejmanta wakillanta qhawarina. Chaykunapitaj Jesús yanapawarqanchej “mana kay pachajpatachu” kasqanchejrayku (Juan 17:14).

3, 4. 1) ¿Imataj karqa Diospa Reinon kamachiyta qallarisqantawan? 2) ¿Sutʼitachu Diospa llajtan entienderqa mana kay pachaman chhapukunata? Sutʼinchay.

³ Diospa Reinon kamachiyta qallarisqantawan, janaj pachapi jatun maqanaku karqa, Satanastataj Jallpʼaman wijchʼukamorqa (Apocalipsis 12:7-10, 12 leey). Jallpʼapipis Diospa llajtanpa contranpi churanakuy qallarerqa. Cristianosqa, Cristo jina ruwayta munarqanku nitaj kay pachaman chhapukuyta munarqankuchu. Jinapis qallariypeqa, mana sutʼitachu entienderqanku politicaman mana chhapukuy, ima niytachus munasqanta.

⁴ Sutʼincharinapaj, Aurora del Milenio,a nisqa libromanta sojta kaj libron, mayqenchus 1904 watapi orqhokorqa, cristianosta nerqa mana guerraspi chhapukunankuta. Jinapis guerraman wajyasqa kaspaqa, waj llankʼayta mañakunankuta yuyaycharqa. Maqanakuman kachajtinkupunitaj, ni pita wañuchinankuchu karqa. Herbert Senior pichus Gran Bretaña suyupi tiyakorqa 1905 watapitaj bautizakorqa, chay tiempomanta jinata nerqa: “Hermanosqa mana allinta entienderqaykuchu waj llankʼayta ruwanapaj guerraman riy allinchus manachus kasqanta”, nispa.

 5. ¿Imaynatataj 1915 watapi Torremanta Qhawaj revista yuyasqanchejta cheqanyacherqa?

⁵ Chaywanpis 1915 watapi 1 septiembre killamanta Torremanta Qhawaj revistaqa, yuyasqanchejta cheqanyacherqa. Chantapis Estudios de las Escrituras nisqa libropi yuyaychashasqanmanta, jinata nerqa: “Ichá chayman reyqa, Diosta wasanchay jina kanman”, nispa. ¿Uj hermanota soldado pʼachata mana churakuyta munajtin, nitaj guerraman riyta munajtin wañuchiyta munajtinkurí? Chay yachaqana jinata sutʼincharqa: “¿Imataj aswan allin kanman: Allin Kausayta Apamoj Reyman cheqa sonqo kasqanchejrayku, Diospa kamachiykunasninta kasukusqanchejrayku wañuychu? Chayri ¿Reyninchejpa yachachisqasninta qhesachaspa, kay pacha gobiernosta yanapasqanchejrayku wañuychu? Reyninchejman cheqa sonqo kasqanchejrayku astawanqa wañuyta munasunman”, nispa. Chay yachaqana sutʼita nispapis, jinata nerqa: “Mana kayman jinapuni ruwanaykichejpaj tanqaykuchu, manaqa uj yuyaychaylla”, nispa.

 6. ¿Imatá hermano Herbertmanta yachakunchej?

⁶ Wakin hermanosqa chayta sutʼita entiendespa, ima llakiypajpis wakichisqa kasharqanku. Herbert Senior, pimantachus parlarerqanchejña nerqa: “Noqapajqa kikillan karqa uj barcomanta balasta apaqaywan [waj llankʼay] chantá baleanapaj chay balasta pistolaman churaywan”, nispa (Luc. 16:10). Herbertqa, conciencian llimphu kananta munasqanrayku mana guerraman rerqachu, chayraykutaj wisqʼachikorqa. Chantapis conciencianku llimphu kananta munasqankurayku, Gran Bretaña suyupi Richmond carcelpi, 16 runas kasharqanku. Paykunaqa karqanku Herbert, waj tawa hermanos, chantá waj religionniyoj runaspiwan. Herbertta, wajkunatawan pakayllamanta Franciaman maqanakunankupaj kacharqanku. Chaypitaj, wañuchisqa kanankuta nikorqa. Pay, wajkuna ima wañuchisqa kanankupajña kashajtinku, 10 watata carcelpi kanankuta nikorqa.

 7. Iskay kaj Guerra Mundial qallarejtin, ¿imatá Diospa llajtan sutʼitaña entienderqa?

⁷ ¿Imatataj Jehovaj llajtanmanta kajkuna Iskay kaj Guerra Mundial qallarishajtin sutʼitaña entienderqanku? Kay pachaman mana chhapukuy ima niytachus munasqanta, Jesús jina kanankupajtaj imatachus ruwanankuta (Mat. 26:51-53; Juan 17:14-16; 1 Ped. 2:21). Sutʼincharinapaj, 1940 watapi marzo killamanta Torremanta Qhawaj revistapi “Neutralidad” nisqa yachaqana llojserqa. Chaypitaj nerqa: “Jehovawan tratopi kaj llajtaqa, manapuni guerrapi chhapukunanchu tiyan”, nispa. Hermano Simon Kraker pichus aswan qhepaman Brooklyn (Nueva York, Estados Unidos) Betel wasipi llankʼarqa, chay yachaqanamanta nerqa: “Diospa kamachisnenqa tukuywan allinpi kananku kasqanta entienderqani, guerras kanayajtinpis”, nispa. Diosmanta yachachiykunaqa, mikhuna jina maychus tiemponpi chayarqa. Chaytaj Diospa llajtanta wakicherqa, ima llakiy qallarejtinpis Diospa Reinonman cheqa sonqollapuni kanankupaj.

8, 9. ¿Imaynatá apóstol Juanpa profecian juntʼakorqa?

⁸ Juanqa profecianpi nerqa, 1914 watapi Diospa Reinon kamachiyta qallarisqantawan, jatun sierpe nisunman Satanás, Diospa Reinonpa kamachiyninpi kajkunata chinkachiyta munananta siminmanta yakuta phullchichimuspab (Apocalipsis 12:9, 15 leey). ¿Imaynatá chay profecía juntʼakorqa? Kay 1920 wata chaynejmantapacha Diospa llajtanqa sinchʼi qhatiykachasqa karqa. Hermano Krakerqa, Norteamericapi Jehovaj testigosnin jinallataj, Iskay kaj Guerra Mundial kashajtin Diospa Reinonman cheqa sonqo kasqanrayku wisqʼachikorqa. Chantapis guerra kashajtenqa, Estados Unidospa jatuchaj carcelesninpi wisqʼasqa kajkunamanta khuskan kurajqa Testigos karqanku. Imajtinchus mana guerraman riyta munarqankuchu religionninkurayku.

⁹ Kuraj Supaywan sajra runaswanqa, Diospa Reinonman cheqa sonqo kajkunata maypi tiyakojtinkupis pantachiyta munarqanku. Chayrayku paykunataqa tribunalesman aparqanku, chantapis uj qotu runas juzgarqanku Africapi, Estados Unidospi, Europapi ima. Cheqa sonqollapuni kasqankuraykutaj, wisqʼasqas, maqasqas karqanku, cuerponkumantataj imallankupis khuchurpasqa karqa. Alemaniapeqa Diospa llajtanta sinchʼita ñakʼaricherqanku, mana “Heil Hitler” nispa nisqankurayku, nitaj guerraman riyta munasqankurayku. Yachakusqanman jina, Hitler kamachishajtin Jehovaj testigosnin 6.000 jina, carcelespi karqanku, 1.600 kurajtaj wañuchisqas karqanku Alemaniamanta kajkuna, waj suyusmanta kajkuna ima. Jinapis Kuraj Supay, Diospa llajtanta ñakʼarichisqanqa mana wiñaypajchu karqa (Mar. 8:34, 35).

10. ¿Imataj niyta munan kay pacha, imaynatataj Diospa llajtanta yanaparqa?

¹⁰ Apóstol Juanpa profecianqa rikucherqa kay pacha nisunman wakin atiyniyoj runas chayri khuyakoj runas, qhatiykachay mayu yakuta chʼonqaykakapunanta, ajinamantataj Diospa llajtanta yanapananta. ¿Imaynatá chay profeciamanta wakin imas juntʼakunña? Iskay kaj Guerra Mundial kasqanmanta watasninman, kay pacha ashkha kutispi Diospa Reinonpa kamachiyninpi kajkunata yanaparqa (Apocalipsis 12:16 leey). Sutʼincharinapaj ashkha jatuchaj tribunalesqa Jehovaj testigosninta yanaparqanku cuartelman mana riyta munajtinku, suyoj fiestasninta mana ruwayta munajtinku ima. Kunanqa, Jehová llajtanta demandaspi atipananpaj yanapasqanmanta wakillanta qhawarina. Chay demandasqa cuartelman mana riyta munasqankumanta (Sal. 68:20).

11, 12. ¿Ima chʼampaykunapitaj rikukorqanku Anthony, Iakovos ima, imataj chayrayku karqa?

¹¹ Estados Unidos. Anthony Sicurella hermanoj tatasnenqa, Jehovaj testigosnin karqanku. Payqa 15 watayoj kashaspa bautizakorqa, 21 watanta juntʼaytawantaj cuartelman anotachikoj rerqa Diosta sirvej jina. Iskay watanmanqa 1950 watapi watejmanta anotachikoj rerqa, llimphu concienciayoj kayta munajkunamanta jina. Departamento Federal de Investigaciones nisqa, hermanoj mañakusqan allillan kasqanta nejtinpis, Departamento de Justicia nisqaqa qhesacharqa. Ashkha juicios ruwakusqantawan, Estados Unidospi Tribunal Supremo nisqaqa, hermanoj quejanta uyarerqa, chay waj tribunalpi nikusqantataj mana valecherqachu, ajinamanta hermano Anthony chay juiciopi atiparqa. Chay tribunalpi nikusqanqa, Estados Unidospi waj runastapis yanaparqa, pikunachus religionninkurayku mana cuartelman riyta munankuchu chaykunata.

¹² Grecia. Iakovos Thlimmenos hermanota, 1983 watapi soldado pʼachata mana churakusqanrayku juchacharqanku, wisqʼaykorqankutaj. Paytaqa, carcelmanta llojsimusqanrayku contador jina llankʼayta munajtin mana llankʼachiyta munarqankuchu. Iakovosqa, suyunmanta tribunalesman quejakorqa qhasillataj. Chayrayku Tribunal Europeo de Derechos Humanos nisqaman quejakorqa. Kay 2000 watapi Gran Sala del Tribunal nisqapi mayqenpichus 17 jueces llankʼarqanku, atipacherqanku, chaytaj chejninakuyta pisiyachinapaj yanapa jina karqa. Chayta niraj jueces nishajtinku, Grecia suyupi 3.500 hermanosmanta astawan carcelmanta llojsimojkuna karqanku, paykunaqa mana kay pachaj imasninpi chhapukusqankurayku wisqʼachikusqanku. Jueces nisqankumantawan Greciapi uj ley orqhokorqa, chaytaj yanaparqa chay hermanos niña juchachasqachu kanankupaj. Chantapis Greciapi leyesta qhawarikushajtin ñaupaj wataspi orqhokusqan leyta ujtawan valechikunanta nikorqa. Chay leyqa parlasharqa Greciapi tiyakoj runas llajtapaj waj llankʼayta ruwayta atisqankumanta.

13, 14. ¿Imatá yachakunchej Ivailo Stefanov, Vahan Bayatyan hermanospa demandankumanta?

¹³ Bulgaria. Ivailo Stefanov hermano 1994 watapi 19 watayoj kashajtin soldado kananpaj wajyasqa karqa. Payqa mana munarqachu chayman riyta, nitaj soldadospa kamachisqanku llankʼaykunata ruwaytapis. Chayrayku paytaqa 18 killasta wisqʼaykunankuta nerqanku, chaywanpis demandakorqa llimphu concienciayoj kayta atisqanta yachasqanrayku. Demandanqa Tribunal Europeo de Derechos Humanos nisqaman chayarqa. Kay 2001 watapi niraj chay juicio kashajtin Bulgaria suyumanta gobiernoqa, Ivailo hermanowan uj yuyayllaman chayarqanku. Chayta ruwakusqantaj mana Ivailo hermanollatachu yanaparqa, manaqa tukuy Bulgaria suyupi tiyakojkunatapis, pikunachus llajtapaj waj llankʼayta ruwayta munarqanku chaykunata.c

¹⁴ Armenia. Vahan Bayatyan hermanoqa 2001 watapi cuartelman rinanpaj edadniyojña karqa.d Conciencian llimphu kananta munasqanrayku cuartelman mana rinanta nejtinpis, suyunmanta tribunalespi ni mayqenpi atiparqachu. Kay 2002 watapi septiembre killapi iskay wata khuskanniyojpaj wisqʼasqa karqa, jinapis 10 killa khuskanniyojmanta llojsinporqa. Llojsinpuspataj Tribunal Europeo de Derechos Humanos nisqaman demandakorqa, chaypitaj uyarerqanku. Kay 2009 watapi 27 octubre killapi nillataj chay Tribunalpi atiparqachu. Chay tribunalpi nikusqanqa, Armenia suyumanta kikin chʼampaypi rikukoj hermanospaj mana allinchu karqa. Chantataj Gran Sala del Tribunal nisqa chay demandata qhawaykurerqa, 2011 watapi 7 julio killapitaj hermano Vahan Bayatyan atiparqa. Chay Tribunalqa ñaupaj kutirayku nerqa, uj runaqa conciencian llimphu kananta munasqanrayku cuartelman riyta qhesachasqanta. Chaytaj churakunan karqa, sapa uj yuyayta atisqanta, conciencianta, religionninta ima valechikusqanmanta leyman. Chayta nikusqantaj mana Jehovaj testigosnillantachu yanapan, manaqa Consejo de Europa nisqa suyuspi tiyakoj runastapis.e

15. ¿Imaraykutaj Jehovaj llajtan mana suyoj fiestasninta ruwanchu?

¹⁵ Jehovaj llajtanqa cuartelman riyta, suyoj fiestasninta ima qhesachaspa Diospa Reinonman cheqa sonqollapuni. Iskay kaj Guerra Mundial kasqanmantataj Jallpʼantinpi runasta astawan tanqakun suyuta jatunchayman. Ashkha suyuspeqa, runasta tanqanku suyunkurayku juranankupaj, himno nacionalta takinankupaj chayri banderata napaykunankupaj. Noqanchejtajrí, Jehovallata yupaychanchej (Éxo. 20:4, 5). Chayrayku sinchʼi qhatiykachasqas kanchej. Jehovataj kay pachanejta chayta pisiyachin. Kunanqa, Jehová llajtanta demandaspi atipananpaj Cristonejta yanapasqanmanta wakillanta qhawarina (Sal. 3:8).

16, 17. ¿Imapitaj Lillian, William Gobitas rikukorqanku, imatataj chaymanta yachakunchej?

¹⁶ Estados Unidos. Kay 1940 watapi Jehovaj testigosnin Estados Unidospi Tribunal Supremo nisqapi Distrito escolar de Minersville contra Gobitis nisqa demandapi 8 votosrayku atipachikorqanku, paykunapajtaj uj votolla karqa. Lillian Gobitasf 12 watayoj, hermanontaj William 10 watayoj. Paykunaqa Jehovaman cheqa sonqo kayta munaspa, mana munarqankuchu banderata napaykuyta nitaj suyunkurayku uj juramentota ruwaytapis. Chayta mana ruwasqankurayku escuelamanta wijchʼuchikorqanku. Demandankutaj Tribunal Supremo nisqakama chayarqa, juecestaj nerqanku escuela chayta ruwasqanqa, leyesman jina kasqanta, chaytaj “suyuntinpi ujchasqa” kanapaj kasqanta. Chayta tribunalpi nikusqanrayku Jehovaj testigosninta sinchʼita qhatiykachayta qallarikorqa: ashkha wawasta escuelamanta wijchʼukorqa, tatastataj llankʼayninkumanta, sajra runastaj ashkha hermanosta ñakʼaricherqanku. Uj libro nerqa: “Kay 1941 watamanta 1943 watakama Jehovaj testigosninta Estados Unidospi religionninkurayku qhatiykachakusqanqa 1900 watamanta qhepaman anchapuni karqa”, nispa (The Lustre of Our Country).

¹⁷ Jinapis, Diospa enemigosnin atipasqankoqa mana unaypajchu karqa. Kay 1943 watapi Tribunal Supremo nisqaqa, La Junta Escolar del Estado de Virginia Occidental contra Barnette nisqa demandata qhawaykurerqa, chayqa Gobitis nisqa demanda jinallataj karqa. Chay kutipitaj Jehovaj testigosnin atiparqanku. Estados Unidospi Tribunal Supremo nisqaqa ñaupaj kutirayku paypa nisqallantataj mana valecherqachu. Chay kasqanmantapachataj Jehovaj llajtanta pisillataña qhatiykachakorqa. Chantapis Estados Unidosmanta runaspa derechosninkuta aswan jatunpaj qhawakorqa.

18, 19. Pablo Barros nisqanman jina, ¿imataj cheqa sonqollapuni kananpaj yanaparqa? ¿Imaynatataj Jehovaj kamachisnin kikillantataj ruwankuman?

¹⁸ Argentina. Pablo Barros 8 watayoj chantá Hugo Barros 7 watayoj, banderata aysakushajtin mana chaypi kayta munarqankuchu. Chayrayku 1976 watapi escuelamanta wijchʼuchikorqanku. Uj kuti escuelamanta directoraqa, Pablota tanqarparqa, umanpitaj takarparqa. Clases tukukusqantawan, iskayninkuta uj horata qhepacherqa suyuta yupaychanapaj costumbresta ruwanankuta munaspa. Pablo chaymanta yuyarikuspa jinata nin: “Mana Jehovaj yanapayninwanqa, nichá cheqa sonqollapuni kayta atiymanchu karqa”.

¹⁹ Chay demanda tribunalesman chayajtin, juezqa, Pablota Hugotawan wijchʼunankuta nillarqataj. Chaywanpis quejankoqa Corte Suprema de Justicia nisqaman chayarqa, chaypitaj 1979 watapi ñaupaj tribunalpa nisqanta niña valecherqachu. Kaytataj nerqa: “Chay jinamanta castigakusqanqa [wijchʼukusqanqa] [...] mana leypi yachakuyta atisqankuta nisqanman jinachu, (art. 14) nitaj escuelaman yaykuyta atisqankuta gobierno nisqanman jinachu (art. 5)”. Chaypi atipakusqanqa 1.000 jina Testigo wawasta mayta yanaparqa. Wakintaqa niña wijchʼukorqachu, wakintaj Pablo, Hugo jina wijchʼusqasña kaspapis, escuelaman kutiykaporqanku.

20, 21. ¿Imaynatá creeyninchejta sinchʼiyachin Roel, Emily ima demandapi atipasqanku?

²⁰ Filipinas. Kay 1990 watapi Roel Embralinagg 9 watayoj, Emily hermanantaj 10 watayoj, chantá casi 66 Testigo wawaspiwan banderata mana napaykusqankurayku, escuelamanta wijchʼuchikorqanku. Leonardo pichus chay iskay wawaspa tatanku karqa, escuelamanta autoridadeswan parlarqa, qhasillataj karqa. Chay chʼampay sinchʼiyasqanrayku Leonardoqa, Tribunal Supremo nisqaman demandakorqa. Leonardojtaqa mana qolqen karqachu, nitaj abogadonpis. Chayrayku chay familiaqa tukuy sonqo Jehovamanta yanapata mañakorqanku. Chaykamataj wawasnintaqa compañerosnin asipayarqanku, pʼenqaypitaj rikhuricherqanku. Leonardoqa ni imata leyesmanta yachasqanrayku, mana yuyarqachu demandapi atipananta.

²¹ Chayllapi uj abogado yanaparqa, Felino Ganal sutiyoj. Payqa, chay suyumanta may rejsisqa oficinaspi llankʼaj abogadoswan llankʼaj. Chay kutipajtaj Felinoqa niña chay oficinaspichu llankʼasharqa, Jehovaj testigonñataj karqa. Tribunal Supremo nisqapeqa Jehovaj testigosnin atiparqanku, escuelamanta wijchʼuyta kamachikusqantataj niña valechikorqachu. Arí, Diosta cheqa sonqowan yupaychajkunata urmachiyta munasqankoqa qhasilla karqa.

22, 23. 1) ¿Imaraykutaj jatuchaj demandaspi atiparqanchej? 2) ¿Imatá rikuchin Jallpʼantinpi Diospa llajtanpi mana chʼajwa kasqan?

²² ¿Imaraykutaj Jehovaj testigosnin jatuchaj demandaspi atiparqanchej? Mana políticos yanapawasqanchejraykuchu. Chaywanpis ashkha suyuspi, enemigosninchej sapa kuti ñakʼarichiwajtinchej tribunalespi cheqanta ruwaj juecesqa jarkʼawarqanchej. Chantapis demandaspi atipakusqanqa leyes allinchakunanpaj yanaparqa. Chaytaj rikuchin Cristo yanapawasqanchejta (Apocalipsis 6:2 leey). ¿Imaraykutaj demandakunchej? Mana leyesta allinyachiyta munaspachu, manaqa Rey Jesucristota sirvisqanchejta ni pi pantachinawanchejta munaspa (Hech. 4:29, 30).

²³ Kay pachaqa, politicarayku tʼaqanasqa kashan, chejninakuyraykutaj mana allinchu. Chay jinapi kausakojtinchejpis Rey Jesucristoqa bendeciwanchej, mana kay pachaman chhapukusqanchejrayku. Satanás tʼaqanachiyta, atipayta munawasqanchejtaj qhasillapaj. Diospa Reinonqa ashkha runasta ujchan, pikunachus maqanakuyta chejninku. Jallpʼantinpi Diospa llajtanpi mana chʼajwa kasqanqa tʼukunapaj. Chaytaj sutʼita rikuchin Diospa Reinon kamachishasqantaña (Isa. 2:4).