Jehová Diosllata yupaychana

 1. ¿Imaraykutaj Jehová Dioslla yupaychasqa kanan tiyan?

JEHOVÁ DIOSQA tukuy imata ruwarqa, kausaytapis qowanchej. Chayrayku paylla yupaychasqa kanan tiyan (Apo. 4:11). Jinapis Jehovallata yupaychayqa mana atikullanchu. Imaraykuchus Jehová Diosta munakuspapis, respetaspapis, waj imasta kausayninchejpi ñaupajman churayta qallarisunman. Chay imasta ruwaspataj, niña Jehová Diosllatachu yupaychasunman. Chayrayku reparakunanchej tiyan, imastachus kausayninchejpi ñaupajman churashasqanchejta. Jinapis ñaupajtaqa, Jehová Diosllata yupaychay imachus niyta munasqanta yachakusun.

 2. Mateo 4:10 nisqanman jina, ¿imatataj ruwananchej tiyan?

² Biblia nisqanman jina, Jehová Diosta tukuy sonqo munakunchej chayqa payllata yupaychanchej. Chayrayku ni pita, nitaj imatapis Jehová Diosmanta astawan munakunchejchu (Mateo 4:10 leey).

 3. ¿Imaraykutaj Jehová Diosta yupaychanchej?

³ Jehová Diostaqa rejsisqanchejrayku yupaychanchej. Bibliapi yachakorqanchej imayna kʼacha Diospunichus kasqanta. Chantapis imachus kusichisqanta, imatajchus llakichisqanta yachanchej, pay jinataj yuyanchej. Yachallanchejtaj Jehová Diosninchejqa, wiñaypaj kusisqa sirvinanchejta munasqanta. Chayrayku kamachiykunasninman jina kausakunchej. Chantapis paypa qayllanpi kajta saqewasqanchejmanta, may kusisqa kanchej (Pro. 3:32). Tatanchej Jehovamanta imastachus yachakusqanchejqa, payman astawan kʼaskaykunapaj yanapawanchej (Sant. 4:8).

 4. 1) ¿Imamantá Kuraj Supay valekun? 2) ¿Imatá kay yachaqanapi yachakusun?

⁴ Kay mundoqa Kuraj Supaypa makinpi kashan. Chayrayku payqa imaschus mundonpi kasqanmanta valekuspa, munaynillanchejta maskʼachiwanchej, tanqawanchejtaj aychanchejpa sajra munayninta ruwanapaj (Efe. 2:1-3; 1 Juan 5:19). Supayqa mana munanchu Jehová Diosllata yupaychananchejta, astawanpis waj imasta munakunanchejta munan. Chaypajtaj iskay imasta ruwashan. Ñaupajtaqa qolqellata maskʼanapaj tanqawanchej. Chantá millay imaswan kusirikunanchejpaj tanqawanchej. Chaykunamantataj kay yachaqanapi yachakusun.

 5. ¿Imaraykutaj sumajta qhawarikunanchej tiyan qolqeta mana munakunapaj?

⁵ Tukuypis mikhunayoj, ropayoj, wasisituyoj ima kayta munanchej. Jinapis sumajta qhawarikunanchej tiyan, qolqeta mana munakunapaj. Kay tiempopeqa ashkha runas “qolqeta munakojkuna” kanku, chaywan rantisqanku imastapis munakullankutaj (2 Tim. 3:2). Jesusqa yacharqa, yachachisqasninpis qolqeta munakuypi urmayta atisqankuta. Chayrayku paykunaman nerqa: “Mana pipis iskay patronesta ujllapi sirviyta atinmanchu, imaraykuchus ujninta chejnenqa ujnintataj munakonqa, ujninman kʼaskakonqa ujnintataj pisipaj qhawanqa. Qankunaqa mana atinkichejchu ujllapi Diostawan qolqetawan sirviyta”, nispa (Mat. 6:24). Jehová Diosta yupaychashaspa qhapajyayta maskʼasunman chayqa, iskay patronesta sirvishasunman. Chayta ruwaspataj, niña Jehová Diosllatachu sirvishanchej.

 6. ¿Imatataj yachakusunman Laodicea llajtayoj cristianosmanta?

⁶ Laodicea llajtamanta cristianosqa, qhapaj kasqankumanta runaykacharqanku. Paykunaqa nej kanku: “Qhapaj kani, tukuy imata sayachikuni, nitaj imapis pisiwanchu”, nispa. Jinapis Jehová Diospa, jinallataj Jesuspa ñaupaqenpeqa, “mana imayoj, khuyana, wajcha, ciego, qʼalallataj” kasharqanku. Jesusqa mana qhapaj kasqankumantachu kʼamerqa, manaqa qolqenkurayku Jehová Diosmanta qonqakapushasqankumanta (Apo. 3:14-17). Noqanchejpis ichá sonqonchejpi qhapajyayta munashasunman. Chayta reparakuspaqa, usqhayllata chay munayta sonqonchejmanta orqhonanchej tiyan (1 Tim. 6:7, 8). Mana chayta ruwajtinchejqa, Jehová Diosta niña tukuy sonqochu sirvisun. Paytaj yupaychasqanchejta mana allinpajchu qhawanqa. Imaraykuchus payqa ‘tukuy sonqonchejwan’ munakunanchejta munan (Mar. 12:30). Qhepan parrafospi yachakusun, imaschus qolqellata maskʼanapaj tanqawasqanchejta.

7-9. ¿Imatataj hermanonchej Davidmanta yachakusunman?

⁷ Estados Unidosmanta David sutiyoj ancianomanta parlarina. Payqa sumaj trabajador kasqanta yuyan. Trabajasharqa chay empresapeqa, payman aswan sumaj trabajota qosqanku, sueldontapis yapasqanku. Suyunpeqa pisi runaslla chay trabajota pay jina sumajta ruwayta yachanku. Pay nin: “Jehová Dios bendeciwasqanrayku trabajoypi sumaj rishawasqanta yuyarqani”, nispa. Jinapis, ¿Jehová Dioschu bendecishanman karqa?

⁸ Hermanonchej Davidqa trabajon Jehová Diosmanta karunchashasqanta repararqa. Pay nin: “Reunionpi, predicacionpipis trabajollapi yuyaj kani. Sumajta ganakusharqani. Jinapis llakisqalla, phiñasqallataj kasharqani. Señoraywanpis phiñanakuyta qallarerqayku”, nispa.

⁹ Davidqa reparakorqa, imatachus ñaupajman churananta ajllanan kasqanta. Pay nin: “Imatachus ruwashasqayta usqhayllata allinchanay karqa”, nispa. Chayrayku pisi horasllataña trabajananpaj uj horariota ruwakorqa, chaytataj patronninman willarqa. Patronnintajrí trabajonmanta wijchʼuporqa. ¿Imatataj hermanonchej ruwarqa? Pay nin: “Qʼayantinpacha precursor auxiliar kanaypaj solicitudta juntʼacherqani”, nispa. Paywan señoranwanqa, wasista llimphuchaspa trabajakuyta qallarerqanku. Chaymanta qhepaman, hermano Davidqa precursor regulartañataj orqhorqa. Aswan qhepamantaj señoranpis precursorallataj karqa. Ñaupaj trabajonkumanta nisqa, mosoj trabajonkupeqa may pisillataña ganakunku. Jinapis sapa killa gastosninkupaj mana pisinchu. Trabajonku wajkunapaj pisipaj qhawasqa kajtinpis, paykunaqa mana chaypichu yuyanku. Astawanpis Jehová Diosta kausayninkupi ñaupajman churayta munanku. Sutʼitataj rikunku, Jehová Diosqa Gobiernonta ñaupajman churajkunaman ni imata pisichisqanta (Mat. 6:31-33).

10. ¿Imatá ruwasunman sonqonchejta jarkʼanapaj?

¹⁰ Qhapaj chayri pisi qolqellayoj kaspapis, tukuyninchej sonqonchejta jarkʼananchej tiyan. Chaypajtaj ama qolqeta munakunachu. Amallataj trabajonchejta Jehová Diosta yupaychaymanta nisqa, aswan ñaupajman churanachu. ¿Imaynatá yachasunman chayta ruwashasqanchejtachus manachus? Chayta yachanapaj, kay tapuykunapi piensarina: “Reunionpi chayri predicacionpi kashaspa, ¿trabajo yuyayllachu kanchej? ¿Tukuy tiempochu llakikunchej qhepapaj qolqenchej kanqachus manachus chaymanta? Qosanchejwan chayri warminchejwan, ¿qolqerayku chayri kapuyninchejrayku phiñanakunchejchu? Jehová Diosta astawan sirvinapaj, ¿pisipaj qhawasqa trabajota japʼikusunmanchu?” (1 Tim. 6:9-12). Chay tapuykunapi piensarishaspa, Jehová Diosninchej munakuwasqanchejta yuyarikuna. Payqa tukuy sonqo sirvejkunaman jinata nin: “Mana jaykʼajpis saqerparisqaykichu. Nitaj jaykʼajpis wijchʼurparisqaykichu”, nispa. Chayrayku apóstol Pablo yuyaychawanchej: “Kausayniykichejpi amapuni qolqemanta wañusqa kaychejchu”, nispa (Heb. 13:5, 6).

11. Kusirikunanchejpaj imaschus kasqan, ¿imaraykutaj mana tukuyninchu allinninchejpaj?

¹¹ Jehová Diosqa kusisqa kausakunanchejta munan. Chaypajtaj imallawanpis kusirikunapuni kanman. Bibliapis nin: “Runapajqa chay tukuy imasmanta nisqaqa aswan allimpuni mikhunan, ujyanan, tukuy ruwasqanwan kusikunan ima”, nispa (Ecl. 2:24). Kusirikunapaj ashkha imas kajtinpis, mana tukuyninchu allinninchejpaj. Imajtinchus kay mundopi kusirikunapaj imasqa, yuyayninchejta chʼichichanman. Chantapis Diospa Palabran juchachasqan ruwaykunata allinpaj qhawachiwasunman, chayri chaykunata munakunapaj tanqawasunman.

12. 1 Corintios 10:21, 22 nisqanman jina, ¿imaraykutaj imawanchus kusirikunanchejta sumajta ajllana?

¹² Noqanchejqa Jehová Diosllata yupaychayta munanchej. Chayrayku mana atinchejchu “Jehová Diospa mesanmanta mikhushaspa, supaykunaj mesanmantapis mikhuyta” (1 Corintios 10:21, 22 leey). Piwanpis khuska mikhunchej chayqa, paywan amigos kasqanchejta rikuchinchej. Kusirikunapaj ashkha imasqa, runasta tanqan maqanakuyman, layqeriosman, khuchichakuyman, sajra munayninkuta ruwayman, chayri pantasqata yuyayman. Chay imaswan kusirikuyta ajllasunman chayqa, Diospa enemigosninwan mikhushasunman, paykunaj waykʼusqankuwantaj miskʼirichikushasunman. Chayta ruwaspaqa, noqallanchej ñakʼarisunman, Jehová Diosmantataj karunchakusunman.

13, 14. 1) ¿Imapitaj imaswanchus kusirikusqanchej mikhunaman rijchʼakun? 2) Santiago 1:14, 15 nisqanpi tʼukurispa, ¿imaraykutaj imawanchus kusirikunanchejta sumajta ajllananchej tiyan?

¹³ Imaswanchus kusirikusqanchej, ¿imapitaj mikhunaman rijchʼakun? Mikhushaspaqa imatachus mikhunanchejta noqanchej ajllanchej. Jinapis mikhuykusqanchejtawanqa, cuerponchejqa sapallanmantaña chay mikhunaj alimentosninta chʼonqakapun. Sumajta alimentakuspaqa sanolla kanchej. Imatapis mikhullanchej chayrí onqoykunchej. Imatachus mikhusqanchej allinchus manachus kasqanqa, mana chay ratochu yachakun, manaqa tiemponmanraj.

¹⁴ Kusirikunapaj imaswanpis kikillantaj. Imawanchus kusirikunanchejta ajllaspaqa, imachus yuyayninchejman yaykunanta noqanchej ajllashanchej. Jinapis ajllasqanchejtawanqa, chay ajllasqanchej sapallanmantaña sonqonchejpi, yuyayninchejpiwan trabajan. Imawanchus kusirikunata sumajta ajllasun chayqa, kallpachasqa kasun. Mana allinta ajllajtinchejrí, mana allinninchejpajchu kanqa (Santiago 1:14, 15 leey). Chaytaj ichá mana chay ratochu yachakonqa, jinapis qhepaman yachakonqapuni. Chayrayku Biblia niwanchej: “Ama pantaychejchu, Dioswanqa mana pujllakuy kanchu. Imatachá uj runa tarpun, chayllatataj oqharenqa. Pichus aychaj munayninman jina tarpojqa, wañuyta oqharenqa”, nispa (Gál. 6:7, 8). Chayrayku Jehovaj chejnisqan imaswanqa, amapuni kusirikunachu (Sal. 97:10).

15. ¿Imatataj Jehová Dios regalota jina qowanchej?

¹⁵ Jehová Diosqa, Internetpi JW Broadcasting^® nisqata sumaj regalota jina qowanchej. Chaypeqa ashkha videosta qhawayta atikun. May chhika hermanosmantaj chay videosta qhaway gustan. Marilyn sutiyoj hermana nerqa: “Broadcastingqa aswan kusisqa kanaypaj yanapawan. Chaypitaj tukuy imata qhawayta atini. Llakisqa kashaspa chayri sapitay kasqayta yuyaspa, uj discursota, chayri Betelpi Bibliamanta sutʼinchakusqanta qhawani. Chayqa maytapuni kallpachawan. Chantapis Jehová Diosman, llajtanman ima astawan kʼaskasqa kani. Broadcastingqa kausayniypi maytapuni yanapawan”, nispa. ¿JW Broadcastingwan yanapachikushanchejchu? Broadcasting sapa killa llojsejtinpis, chaypi ashkha videospiwan tiyan. Chaypi kallantaj Bibliamanta dramapi jina leerisqas, kallpachanawanchejpaj kʼachitu takiykuna ima.

16. ¿Imaraykutaj qhawarikunanchej tiyan mashkha unaytachus kusirikusqanchejta?

¹⁶ Mana imaswanchus kusirikusqallanchejtachu ajllananchej tiyan. Mashkha unaytachus kusirikusqanchejtapis, qhawarikunallanchejtaj tiyan. Mana allinta qhawarikuspaqa, kusirikuyllapi tiemponchejta usuchisunman. Jehová Diosta yupaychanapajtaj niña tiemponchej kanmanchu. Ashkha hermanos ajinapi rikukunku. Hermananchej Abigailmanta parlarina. Payqa 18 watasniyoj, nintaj: “Diantinta ashkha imasta ruwaytawanqa, samarikunaypaj teleta qhawani. Jinapis mana reparakuspaqa, horasta teleta qhawaspa kayman”, nispa. Samuel sutiyoj joventaj nin: “Wakin kutisqa Internetpi ashkha juchʼuy videosta qhawani. Ujsitullata qhawayta qallarini, chantá niña sayanichu. Reparakunaypajqa kinsa chayri tawa horaña pasan”, nispa.

17. ¿Imatá ruwasunman mana kusirikuyllapi tiemponchejta usuchinapaj?

¹⁷ ¿Imatá ruwasunman mana kusirikuyllapi tiemponchejta usuchinapaj? Ñaupajtaqa mashkha unaytachus kusirikusqanchejta yachana. Chaypajqa uj calendariopi anotakuna: mashkha horastachus teleta qhawasqanchejta, Internetman yaykusqanchejta, celularpi pujllasqanchejta ima. Chay imaspi ashkha tiempota usuchishanchej chayqa, uj horariota ruwakuna. Chay horariopeqa, imastachus ruwananchejpuni kasqanta ñaupajta anotana. Chaymantaraj kusirikunapaj tiempota tʼaqana. Chantá Jehová Diosmanta yanapata mañakuna chay anotakusqanchejman jina ruwanapaj. Ajinamanta tiemponchejpis kallpanchejpis kanqa: Bibliata sapallanchejpi estudianapaj, familianchejwan Diosta yupaychanapaj, tantakuykunapaj, predicanapaj, yachachimunapaj ima. Chantapis sonqonchejqa, uj rato kusirikusqanchejmanta mana juchachawasunchu.

18, 19. ¿Imaynatá Jehová Diosllata yupaychasqanchejta rikuchisunman?

¹⁸ Apóstol Pedroqa, Satanaspa mundonpa tukukuyninmanta, mosoj kausay kananmanta ima qhelqaytawan, nerqa: “Munasqa hermanosníy, chay imasta suyakushasqaykichejrayku, tukuy atisqaykichejta ruwaychej Diosqa llimphusta, mana imanasqasta, paywan allinpi kashajkunatataj taripasunaykichejpaj”, nispa (2 Ped. 3:14). Apóstol Pedroj yuyaychasqanta kasukuna. Tukuy atisqanchejtataj kallpachakuna llimphu kausayniyoj kanapaj, Jehovata munayninman jina yupaychanapaj ima. Ajinamanta Jehová Diosllata yupaychasqanchejta rikuchisun.

¹⁹ Satanaswan mundonwanqa, waj imasta ñaupajman churanapaj tanqallawasunpuni (Luc. 4:13). Jinapis imapi rikukuspapis, ni pita, nitaj imatapis Jehová Diosmanta astawan munakunachu. Astawanpis Jehová Diosllata yupaychana. Imaraykuchus payllamin yupaychanapaj jinaqa.