36 YACHAQANA

¿Imaynatá Diospi creesqaymanta sutʼinchayman?

¿Imaraykutaq compañerosniykiwan imapichus creesqaykimanta mana parlayta munallawaqchu?

□ Bibliamanta mana allinta yachasqaykirayku

□ Asipayasunankuta manchikusqaykirayku

□ Imaynamantachus qallarinaykita mana yachasqaykirayku

¿Ima kutispitaq compañerosniykiwan imapichus creesqaykimanta parlayta atillawaq?

□ Juknin compañerollaykiwan kachkaspa

□ Clasespi juk tareaykimanta sutʼinchanayki kaptin

□ Juk materiapaq qillqanayki kaptin

¿Mayqin compañeroykitaq imapichus creesqaykimanta sutʼinchaptiyki allinta uyarisunkiman? ․․․․․

ICHÁ compañerosniykimanqa, Diosmanta parlayqa mana gustallanchu. Paykunataqa, pukllaymanta, sipaskunamanta, kunallanraq rikhuriq pʼachasmanta ima, astawan parlay gustan. Chayrayku paykunawan parlachkaspa Diosmanta parlayta qallariptiykiqa mana ni pi parlankumanñachu.

Paykunaqa Dios kasqanta creespapis, Diosmanta parlayta pʼinqakunku. Ichá yuyanku: “¿Pitaq Diosmanta parlayta munanmanri?”, nispa.

¿Qamri? ¿Diosmanta parlayta atillankichu?

Qhisach asqa chayri asipayasqa kayta ni pi munallanmanchu, chayrayku ichá compañerosniykiwan Diosmanta mana parlayta atillankichu. Chaywanpis, ¿jinatapuni ruwasunankuta yachankichu? Ichapis chayta ruwanankumantaqa sumaqta uyarisunkuman, imaraykuchus achkha waynas jinata tapukunku: “¿Imaraykutaq Jallpʼantinpi achkha chʼampaykunas kanrí?” “¿Maykʼaqllapis ñakʼariykuna chinkanqachu?”, nispa. Ichá paykunaqa kaykunamanta juk machu runawan parlanankumantaqa, qamwan astawan parlayta munankuman.

Imatapis compañerosniyki yuyachunku, ichá paykunawan religionmanta parlayta manchachikunki. Ichá pantayta chayri Bibliallamanta parlasqaykita yuyanankuta manchachikunki. Chaywanpis ama anchata manchachikuychu. Imaptinchus, creesqaykimanta parlayqa, guitarrata tocaywan kikinchakunman. ¿Qallariypi tocayta atillawaqchu? Mana, ¿icharí? Chaywanpis sapa kuti tocarispaqa, tiempo pasasqanmanjina astawan sumaqta tocayta yachakunki. Chaywanpis: ¿imaynamantá Bibliamanta parlayta qallariwaq?

Chayta ruwayqa atinapaqjinalla. Sutʼinchanapaq; compañerosniyki juk noticiamanta parlachkaptinku, chay noticiamanta Bibliawan sutʼinchariwaq. Chayri ichá juknin compañerollaykiwan chaymanta parlariwaq. ¿Astawan sumaq yuyaychayta munankichu? Ichá qampis achkha cristiano waynasjina, mesayki patapi Bibliap yuyaychasqanmanjina wakichisqa revistasta churawaq, jinamanta compañerosniyki chay revistasta rikuspa imamantachus kasqanta yachayta munanankupaq. Ajinata ruwaspaqa kay yuyaychay may sumaq kasqanta reparanki.

Kay yuyaychaykunamanta, ¿mayqin yuyaychaymanjinataq Bibliamanta parlayta munawaq? ․․․․․

¿Wakjinamanta juknin compañeroykiwan parlayta qallariwaqchu? ¿Imaynamantá?

․․․․․

Chantapis clasespi imapichus creesqaykimanta parlayta atillawaqtaq. Sutʼinchanapaq; cursoykipi evolucionmanta sutʼinchanayki kasqanpi tʼukuriy. ¿Imatá ruwanki? ¿Imaynamantá Ruwawaqninchikpi iñisqaykita sutʼinchanki?

Dios tukuy imata ruwasqanta sutʼinchanayki kaptin

Juk wayna Reynaldo sutiyuq nirqa: “Juk pʼunchay clasespiqa, evolucionmanta parlayta qallarirqanku. Chay nisqankuqa tatasniy yachachiwasqankumanta jukjina karqa. Chiqapunipis kasqantajina sutʼincharqanku. Lluqsipuyta munanaypaqjina karqa”. Raquel kikin chʼampayllapitaq rikukusqanta nirqa: “Yachachiqniy evolucionmanta ukhunchasunchik nisqantawan, mayta mancharikurqani; imatachus yuyasqayta paykunaman sutʼinchanay kasqanta yacharqani”, nispa.

¿Qamri? Clasespi evolucionmanta parlayta qallariptinku, ¿manchachikunkichu? Qamqa, Jehová Dios “tucuy imata” ruwasqanta yachanki (Apocalipsis 4:11, Mosoj Testamentoj). Tukuy imata rikusqaykipitaq, may yachaywan ruwasqa kasqankuta rikunki. Chaywanpis evolucionmanta librospiqa, kawsay jinallamanta rikhurisqanta sutʼinchakun, kikillantataq yachachiqniykipis sutʼinchan. Chayrayku ichá yuyanki: “¿Pitaq ñuqa kaniri ‘yachayniyuq’ runaspa yachachiyninman churanakunaypaqri?”, nispa.

Chaywanpis ama mancharikuychu. Imaraykuchus mana qamllachu evolución nisqa, mana chiqachu kasqanta yuyanki. Manaqa wakin científicos, yachachiqkuna, yachakuqkunapis jinallatataq yuyanku.

Dios tukuy imata ruwasqanta sutʼinchanaykipaq, ñawpaqtaqa imatachus Biblia chaymanta sutʼinchasqanta yachanayki tiyan. Chaywanpis Biblia juk imamanta mana allinta sutʼinchaptinqa, ama churanakuychu. Astawan reparanapaq kaykunapi tʼukurina.

Cienciamanta libroyqa, kay Pacha, janaqpacha ima, may chhika watas ñawpaqmantapacha kasqanta sutʼinchan. Bibliaqa, Dios niraq kay Pachapi imastapis ruwachkaptin, ñawpaqtaqa, janaqpachata, kay Pachata ima ruwasqanta nin. Chayrayku may chhika watasniyuqña kasqanta nisqankuqa, ichapis chiqapuni kanman (Génesis 1:1).

Yachachiqniyqa, Jallpʼanchik suqta pʼunchaykunallapi ruwasqa kasqanta mana ni imaynamanta creenchu. Bibliaqa, mana ninchu chay pʼunchaykuna 24 horasniyuqlla kasqanta.

Clasespiqa, tukuy imaymanamanta sutʼinchakurqa, runas jinallataq animalespis, tiempo pasasqanmanjina jukjinaman tukusqankuta. Bibliaqa, “layankuman jina” tukuy ima kawsaqkunata Dios ruwasqanta nin (Génesis 1:20, 21). Mana ninchu kawsay jinallamanta rikhurisqanta, nitaq ninchu Dios juk celulallata ruwasqanta, chay celulallamantataq tukuy ima rikhurisqanta. Chaywanpis, “layankumanjina” imaymana animales rikhuriyta atillankuman. Bibliapitaq ni maypi ninchu, tiempo pasasqanmanjina animales “layankumanjina” mana jukjinayasqankuta.

Kaypi nisqanchikmanjina, yachachiqniykiman chayri juknin compañeroykiman, imaynatachus sutʼinchanaykipi tʼukuriy, paykuna kayta nisuptinku:

“Cienciaqa, evolución nisqa chiqapuni kasqanta rikuchirqa.” ․․․․․

“Diospi mana creenichu imaraykuchus ñuqaqa, rikusqallaypi creeni.” ․․․․․

Imapichus creesqaykimanta ama iskaychakuychu

Tatasniyki Jehovata yupaychanku chayqa, ichá wawita kasqaykimantapacha Dios tukuy imata ruwasqanta yachachisurqanku. Chaywanpis kunanqa, manaña wawitachu kanki, chayrayku, “cheqan yuyaywan”, nisunman, imaraykuchus Diospi creesqaykita sutʼita yachaspa, Diosta yupaychanayki tiyan (Romanos 12:1, Qheshwa Biblia). Chayrayku tapukuy: “¿Imaraykutaq Diospuni tukuy imata ruwasqanta niyman?”. Samuel, 14 watayuq, cuerponchik imayna ruwasqachus kasqanta rikuspalla, Dios tukuy imata ruwasqanta reparan, pay nin: “Cuerponchikqa sumaq jukchasqa, ankuswan sumaq tʼinkisqataq kachkan. Ajinamanta tukuy imanchik, imatachus ruwananta juntʼan. Kayqa mana jinallamanta rikhurinmanchu karqa”. Yolanda, 16 watayuq kikillantataq nin: “Diabeteswan unqusqa kachkasqayta yachasqaymantapacha, cuerponchik imaynatachus ruwayninta juntʼasqanmanta astawan yachakuyta maskʼarqani. Cuerponchikpa wakin imasninqa tʼukurinapaqjina. Sutʼinchanapaq páncreas nisqaqa, kʼiwichamanta aswan juchʼuysitu kaptinpis, yawarninchik, ukhunchikmanta wakin imasninchik ima, allin kanankupaq yanapan”.

Kunantaq Dios kasqantapuni, imaspichus reparasqaykita kaypi qillqariy.

1. ․․․․․

2. ․․․․․

3. ․․․․․

Diospi creesqaykimanta, pay tukuy imata ruwasqanta creesqaykimanta ima, ama pʼinqakuychu. Kunan tiemponchikkama cuerponchik imayna ruwasqachus kasqanmanta yachakusqanqa, rikuchin juk Ruwaqniyuqpuni kasqanchikta.

Chiqamanta parlaspa, Dios tukuy imata ruwasqanta creenamanta nisqaqa, evolución nisqa chiqapuni kasqanta creenapaqqa may jatun iñiyniyuq kana tiyan. Tʼukuriy: evolucionpi creeyqa jinallamanta tukuy ima rikhurisqanta creeywan kikinchakun. Chiqan yuyaywan kaypi tʼukurispaqa, imaraykuchus Diospi creesqaykita sutʼinchanayki kaptin, mana iskaychakuspa sutʼinchayta atinki.

BIBLIAMANTA

“Mana pʼenqakunichu evangeliomanta, imaraykuchus evangelioqa Diospa atiynin tukuy creejkunata salvanampaj.” (Romanos 1:16)

JUK YUYAYCHAY

Imapichus creesqaykimanta compañerosniykiwan parlachkaspaqa, ama pʼinqasqajina, nitaq iskaychasqajina parlaychu. Jinamanta paykunaqa mana asipayasunqankuchu, manaqa, jatunpaq qhawasunqanku.

¿YACHARQANKICHU?

Pillapis juk yachachiqta evolución nisqa chiqapuni kasqanta rikuchinanta niptinqa, yachachiqqa, mana sutʼinchayta atisqanta, wakkuna chayta payman yachachisqanraykulla ima creesqanta, reparakun.

¡RUWAYTA QALLARIY!

Juknin compañeroywan Bibliamanta parlayta munani. Chaypaqtaq kayta ruwasaq... ․․․․․

Imaraykuchus Diospi creesqayta pillapis tapuwaptinqa, jinata kutichisaq... ․․․․․

Kay yachaqanamanta, ¿imatá tatayta chayri mamayta tapuyta munani? ․․․․․

QHAWASQAYKIMANJINA

● ¿Imaraykutaq may allin imapichus creesqaykimanta wakkunaman parlanayki?

● ¿Imaynasmantá Dios tukuy imata ruwasqanmanta compañerosniykiman sutʼinchawaq?

● ¿Imaynamantá Diosman agradecekusqaykita rikuchiwaq? (Hechos 17:26, 27.)

[299 paginapi sutʼinchaynin]

Yachaywasipiqa, compañerosninchikman Diosmanta willayta atinchik.” (Iraida)

[298 paginapi dibujo/foto]

Imapichus creesqaykimanta parlayqa, juk guitarrata tocaywan kikinchakunman: allinta tocanaykipaqqa, sapa kuti tocanayki tiyan

[300, 301 paginaspi dibujo/foto]

Imapichus creesqaykita sutʼinchanaykimanta manchikuyniykita atipayta atinki