7 YACHAQANA
¿Imastataj Diospa Gobiernon ruwanqa?
1. ¿Imastataj Diospa Gobiernon ruwanqa?
¿Imaraykutaj Jesús uj sumaj kamachej? (MARCOS 1:40-42.)
Diospa Gobiernonqa cielopi kashan, tukuy gobiernostataj chinkachenqa. Chantá cielopi jinallataj kay jallpʼapi Diospa munayninta ruwanqa. Tukuypis Diospa Gobiernonta necesitanchej. Chay gobiernoqa jallpʼantinmanta tukuy runasta ujchanqa. Daniel 2:44; Mateo 6:9, 10; 24:14 leey.
Sapa nacionpeqa uj gobierno tiyan. Diostajrí jallpʼa enterota gobernananpaj Jesucristota presidenteta jina churan. Apocalipsis 11:15 leey.
Kay ¿Imastataj Diospa Gobiernon ruwanqa? nisqa videota qhawariy.
2. ¿Imaraykutaj Jesús sumaj kamachej?
Imaraykuchus Jesusqa kʼacha, cheqan kajtataj ruwan (Mateo 11:28-30). Chantapis payqa cielomantapacha gobernamuspa runasta yanapawasunchej. Payqa kausarimuytawan cieloman riporqa. Chantá Diospa pañanpi atiyta japʼinankama tiyaykukorqa (Hebreos 10:12, 13). Kunantaj Jesusqa kamachinanpaj atiyta japʼinña. Daniel 7:13, 14 leey.
3. ¿Mashkha runastaj Jesuswan kamachimonqanku?
‘Diospa ajllakusqasnin’ cielomanta Jesuswan khuska gobernamonqanku (Daniel 7:27). Ñaupaj ajllasqasqa, Jesuspa apostolesnin karqanku. Kunanpis Jehová Diosqa creeyniyoj qharista, warmista ima ajllashallanpuni. Paykuna wañupojtinkutaj, Diosqa Jesusta jina mana rikukoj cuerpoyojta kausarichimun. Juan 14:1-3; 1 Corintios 15:42-44 leey.
¿Mashkha runastaj cieloman renqanku? 144.000 runas. Paykunatataj Jesusqa “juchʼuy tropa” nispa suticharqa (Lucas 12:32). Chay 144.000 runastaj Jesuswan khuska gobernamonqanku. Apocalipsis 14:1 leey.
4. Jesús kamachiyta qallarishajtin, ¿imataj karqa?
Jesusqa 1914 watapi presidente jina churasqa karqa.a Kamachiyta qallariytawantaj, Satanasta, supaykunasnintawan cielomanta wijchʼumorqa. Satanastaj manchay phiñasqa kasqanrayku, runasta ñakʼarichiyta qallarerqa (Apocalipsis 12:7-10, 12). Chaymantapachataj guerras, onqoykuna, yarqhaykuna, terremotos ima mayta yapakorqa. Chaykunataj rikuchiwanchej Diospa Gobiernon pisimantawan kamachimunanta. Lucas 21:7, 10, 11, 31 leey.
5. ¿Imastawantaj Diospa Gobiernon ruwanqa?
Jallpʼantinpi willakusqanrayku, tukuy nacionesmanta ‘may chhika runas’ Diospa llajtanman yaykushanku. Paykunaqa Jesuspa kamachiyninpi kashanku, Diospa Gobiernon kay mundoj sajra imasninta chinkachishajtintaj salvakonqanku. Diospa Gobiernonpi kausakunapajqa, Jesusta kasukuna tiyan. Apocalipsis 7:9, 14, 16, 17 leey.
Diospa Gobiernonqa, 1.000 wataspi jallpʼata paraisoman tukuchenqa. Chaymantataj Jesusqa Tatanman Gobiernota jaywaponqa (1 Corintios 15:24-26). Allin kanman Diospa Gobiernonmanta wajkunaman willarinanchej. Salmo 37:10, 11, 29 leey.
a Kay 1914 watapi Diospa Gobiernon sayarichisqa kasqanta yachanaykipajqa, ¿Imastá Biblia yachachiwanchej? libropi 248, 249 paginasta leeriy.