Ñawiriqkunapta tapuyninku

Proverbios 24:27 nisqan, ¿imatataq yachachin?

Proverbios libro, juk waynata yuyaychaspa nin: “Jawapi imachus ruwanasniykitaraj allinta wakichiy, campopi ruwanasniykitapis ruwamuy; chaymantaraj wasiykita ruwakunki”, nispa. Kay pʼiti nisqanmanjina juk qhariqa, familiayuq kaspa imastachus ruwanan kasqanta yachanan tiyan, chaypaqtaq niraq casarakuchkaspa wakichikunan tiyan.

Kay pʼitiwan wakin kutisqa, juk tata familian allinta kawsakunanpaq, tukuy imata churanan kasqanta, chantá ‘wasinta ruwakunanta’ nisunman familianman Diosmanta yachachinan kasqanta, kallpachanan kasqanta ima, sutʼinchakuq. Bibliaqa, juk tata familianpaq ajinata ruwananta kamachin, chaywanpis kay pʼitiqa, mana chaymantachu parlachkan. ¿Imarayku chayta ninchik? Qhawarina.

Qallarinapaq, “ruwakunki” rimayqa, juk imata “sayarichinata” niyta munan. Chayrayku, Proverbios libro wasiykita ruwakunki nispaqa, mana juk tata familianta kallpachananmantachu parlachkan. Mana chayqa, juk qhari familiata sayarichinanmanta, nisunman casarakuspa wawasniyuq kananmanta parlachkan.

Chantapis kay pʼitiqa, imapis maychus kananpi ruwakunanta rikuchichkan. Wak rimaykunapi ajinata nichkan: “Kaytaraq ñawpaqta ruway, chantá kaytañataq”, nispa. Ajinata nispa, ¿Diosta yupaychayta qhipaman saqispa, allinta kawsakunanchikpaq imatapis ñawpaqta ruwananchiktachu niyta munachkan? Mana.

Ñawpa tiempopi, ‘wasita ruwakuyta’ munaqqa, nisunman familiayuq kayta munaqqa, ñawpaqta warmita, wawasta ima, uywananpaq wakichisqachus manachus kachkasqanta tapurikunan karqa. Chayrayku, niraq casarakuchkaspa ruwanasninta wakichinan karqa. Juk Bibliaqa, kay pʼitita ajinata tikrachin: “Jawapi trabajoyquita waquichiy, campopi tucuy imata waquichicuytaj, chantaraj wasiyquita wasichay”, nispa (Quechua de Cuzce). ¿Kay kamachiyta kunan tiempopi juntʼanallapunichu tiyan?

Arí. Casarakuyta munaq qhariqa, juk tatap ruwananta ruwananpaq wakichisqa kanan tiyan. Chantapis, familianpaq maykamachus atisqankama llamkʼanan tiyan. Mana chayllachu, Biblia nisqanmanjina juk qusaqa, familianta Diosmanta yachachispa, mikhunata churapuspa, imastachus necesitasqankupi yanapaspa ima, uywanan tiyan, chayta mana ruwaptinqa, mana iñiyniyuq runamantapis aswan mana waliqman tukupunman (1 Tim. 5:8). Chayrayku, juk wayna casarakunanpaqjinaña kaspa, casarakuyta munan chayqa, allin kanman ajinata tapurikunan: “¿Juk familiata uywaymanchu? Diosta yupaychaq tatas ruwasqankuta juntʼanaypaq, ¿wakichisqachu kachkani? ¿Familiaywan sapa semana Bibliata ukhunchayta atisaqchu?”, nispa. Bibliaqa, kay ruwaykunata juntʼanapuni kasqanta niwanchik (Deu. 6:6-8; Efe. 6:4).

Rikunchikjina, casarakuyta munaq qhariqa, kay Proverbios 24:27 nisqanpi, allinta tʼukurinan tiyan. Warmipis, qusayuq warmijina, mamajina ima, ruwayta atinqachus manachus chayta, tapurikunallantaq tiyan. Chantapis qhariwarmi, wawayuq kayta munaptinkuqa, wakichisqachus manachus kasqankuta qhawarikunanku tiyan (Luc. 14:28). Diospa nisqanta ruwaspaqa, achkha chʼampaykunamanta ayqinchik, familianchik kapuwaptinchikpis kusisqas kawsakusunchik.

[12 paginapi sutʼinchaynin]

Casarakuyta munaq wayna, ¿imastataq tapurikunan tiyan?