Forasterosllapuni kanachej

1, 2. ¿Pikunatataj Pedro ajllasqa kasqankuta nerqa, imaraykutaj kay pachapi “forasteros” kasqankuta nerqa?

JESÚS janaj pachaman ripusqanmanta 30 watasninman jina, apóstol Pedro nerqa: “Kay cartata qhelqamuni llajtasninkumanta qharqosqa hermanosman, pikunachus chʼeqerasqa kashanku Pontopi, Galaciapi, Capadociapi, Asiapi, Bitiniapi ima, chaykunaman. Dios Tataqa qankunata ajllakusorqachej”, nispa (1 Ped. 1:1, 2). Yachanchej jina, paykunaqa Pedro jina espíritu santowan ajllasqa karqanku, paykunamantaj nerqa: “Watejmanta nacechiwarqanchej [...] wiñay kusiy kawsayta suyananchejpaj”, nispa, chaytaj janaj pachapi Cristowan khuska kamachinankupaj karqa (1 Pedro 1:3, 4 leey). Chaywanpis pisi tiemponman, Pedroqa ajllasqa cristianos “waj llajtayojkuna, kay pachapi forasteros” ima kasqankuta nerqa (1 Ped. 2:11). ¿Imaraykutaj ajinata nerqa? Kay tiempopi Jehovaj testigosninmanta pisilla ajllasqa kasqankuta nejtinkupis, ¿imaraykutaj chaymanta yachakunanchej tiyan?

² Pedro, chay tiempomanta ajllasqa cristianos “forasteros” jinalla kasqankuta nispaqa cheqata parlasharqa, imaraykuchus paykunaqa mana wiñaypajchu Jallpʼapi kausanqanku. Kay tiempopi ajllasqa cristianosmantapis kikillantataj nisunman. Apóstol Pablopis “juchʼuy tropa” ovejasmanta kaspa, ajinata nerqa: “Janaj pacha llajtayojkuna kaspa, tukuy sonqo suyarishanchej Salvawajninchej Señor Jesucristo janaj pachamanta jamunanta”, nispa (Luc. 12:32; Fili. 3:20). Ajllasqa cristianosqa “janaj pacha llajtayojkuna” kasqankurayku, Jallpʼapi wañupusqankutawan mana chinkachiy atina kausayta janaj pachapi japʼinku (Filipenses 1:21-23 leey). Chayrayku, Satanaspa sajra pachanpi “forasteros” kanku.

 3. ¿Imatataj “waj ovejas” kajkunamanta ukhuncharisun?

³ ¿Imatataj “waj ovejas” kajkunamanta nisunman? (Juan 10:16.) Paykunaqa Biblia nisqanman jina, Jallpʼapi wiñaypaj kausakuyta suyashanku. Chantá, ¿imaraykutaj forasteros jinallataj kasqankuta nisunman? Chayta ukhuncharina.

 4. ¿Imatataj kay pachamanta kamachejkuna mana ruwayta atenqankuchu?

⁴ Kay sajra pacha chinkachisqa kanankamaqa Jehovaj contranpi Satanás oqharikusqanrayku, tukuy runas, cristianospis ñakʼarillanqankupuni. Romanos 8:22 nin: “Yachanchej jina, kunankama Diospa tukuy ruwasqan nanaywan ayqoshan”, nispa. Kay pachamanta kamachejkuna, yachayniyoj runas, runasmanta khuyakojkuna imaqa, mayta munaspapis nipuni ñakʼariyta chinkachiyta atenqankuchu.

 5. ¿Imatataj may chhika runas 1914 watamantapacha ajllanku, imaraykú?

⁵ Chayta yachaspa may chhika runas, 1914 watamantapacha Diospa churasqan reypa kamachiyninpi kayta ajllanku, chay reytaj Jesucristo. Paykunaqa ni imarayku Satanaspa pachamanta kayta munankuchu, nitaj yanapaytapis. Astawanqa kausayninkuta, kapuyninkuta, kallpankuta ima Diospa Reinonpaj churanku (Rom. 14:7, 8).

 6. ¿Imaynapitaj Jehovaj testigosnin kay pachapi “forasteros” jina kanchej?

⁶ Jehovaj testigosnenqa 200 kuraj suyuspi kashanku, kʼacha runastaj kanku. Chaywanpis, tukuyninku maypi tiyakuspapis “forasteros” jina kanku. Chayrayku politicaman, chʼajwasmanpis ni imarayku satʼikunkuchu. Arí, Diospa mosoj pachanmantaña kasqankuta yuyanku, chantapis kay sajra pachapi pisi tiempollataña kausanankuta yachaspa kusikunku.

 7. ¿Maypitaj Diospa kamachisnin wiñaypaj tiyakonqanku, maykʼajtaj chay kanqa?

⁷ Cristoqa tumpamantawan, Supaypa sajra pachanta chinkachenqa. Kamachiyninpeqa juchata, ñakʼariyta ima Jallpʼamanta chinkachenqa. Chantapis, Jehovalla kamachej kasqanman tukuy churanakojkunata qʼalata chinkarpachenqa. Chantataj Diospa cheqa sonqo kamachisnenqa Paraisopi wiñaypaj kausayta atenqanku (Apocalipsis 21:1-5 leey). Runaqa “ismuypa atiyninmanta kacharichisqa kanqa, Diospa kacharichisqa wawasninwan khuska jatun kusiypi kanampaj” (Rom. 8:21).

8, 9. ¿Imamantataj Pedro parlasharqa “aychaj sajra munasqasninta” mana kasunata nispa?

⁸ Apóstol Pedroqa cristianosman nerqa: “Kay pachapi forasteros kasqaykichejrayku, tukuy sonqo mañakuykichej ama aychaj sajra munasqasninta kasunaykichejta, imaraykuchus chaykunaqa almanchejpa contranta sayaykuspa, atipaytapuni munanku”, nispa (1 Ped. 2:11). Chay yuyaychayqa ajllasqa cristianospaj karqa. Chaywanpis, Cristoj waj ovejasnin kasukunallankutaj tiyan.

⁹ ¿Tukuy ima munasqanchejchu jucha? Diospa kamachisqanman jina ruwajtinchejqa mana. Astawanpis, aswan kusisqa kanapaj yanapawanchej. Sutʼincharinapaj, miskʼi mikhunasta mikhurikuyta, ujyarikuyta, kusirikuyta, amigosninchejwan karikuyta ima munayqa, mana juchachu. Casarasqa kajkuna qosankuwan chayri warminkuwan puñuykuyta munasqankupis, nillataj juchachu (1 Cor. 7:3-5). Chaywanpis, Pedroqa “aychaj sajra munasqasninta” mana kasunamanta parlarqa, mayqenkunachus “almanchejpa contranta sayaykuspa, atipaytapuni munanku”. Chayrayku, uj cristianoqa Diospa munayninman churanakoj sajra munayninwan mana atipachikunanchu tiyan, imajtinchus Dioswan masichakusqanta chinkachinman. Chantapis, sajra munayninwan atipachikuspaqa mana wiñay kausayta japʼinmanchu.

10. ¿Ima tojllastataj Satanás churawanchej pachanmanta kananchejpaj?

¹⁰ Satanasqa tukuy imaymanamanta urmachiyta munawanchej, ajinamanta niña kay pachapi “forasteros” jinachu kananchejpaj. Satanaspa tojllasnenqa kaykuna kanku: kay pachaj imasninta munapayay, noqallanchejpaj imatapis munay, allinpaj qhawachikuyta munay, suyuta jatunchayta munay ima. Chay sajra munaykunata qhesachasun chayqa, mana Satanaspa pachanmantachu kayta munasqanchejta, forasteros jinalla kasqanchejta ima rikuchisun. Noqanchejqa Diospa mosoj pachanpi wiñaypaj kausakuyta astawan munanchej, chaypajtaj mayta kallpachakushanchej.

11, 12. ¿Imatataj runas waj nacionniyoj kajkunamanta yuyanku, imatataj Jehovaj testigosninmanta nisunman?

¹¹ Pedroqa cristianos “forasteros” kasqankurayku, kaytawan ruwanankuta nerqa: “Allinta kawsakuychej mana creejkuna ukhupi. Paykunaqa kunan sajrata qankunapaj rimanku, sajra runaspis kawajchej jina. Chaywampis Diospa watukunan pʼunchaypi payta jatunchanqanku, allin ruwasqasniykichejta rikuspa”, nispa (1 Ped. 2:12). Wakin kuteqa, waj nacionmanta kajkunata “sajra runaspis” chayri suwaspis kankuman jina qhawakun. Imaraykuchus, waj jina rijchʼayniyoj, uj jina costumbresniyoj kanku chayri waj jinata parlanku, uj jinatataj pʼachallikunku. Chaywanpis, ruwasqasninkuwanqa mana sajra runaschu kasqankuta rikuchinku.

¹² Cheqa cristianospis, wakin imaspi mana vecinosninku jinachu kanku. Sutʼincharinapaj, imaynatachus parlasqanku, pʼachallikusqanku, kʼachanchakusqanku, imaswanchus kusirikusqankupis waj jina. Chayrayku, wakin runasqa mana allinta yachaspalla paykunata qhawaranku. Chaywanpis, wakenqa imaynatachus kausakusqankuta sumajpaj qhawanku.

13, 14. ¿Imaynatataj “Diospa yachaynenqa ruwasqasnimpi rejsichikun”? Sutʼinchay.

¹³ Allin ruwaykunasninchejqa qhasillamanta imatapis parlasqankuta rikuchinman. Jesusmantapis, juntʼa runa kashajtin sajrata rimarqanku. “Kay runaqa anchata mikhun, vinotataj ujyan, impuesteroswan, juchasapaswan imataj kawsakun”, nispa paymanta nerqanku. Chaywanpis yachayniyoj kasqanrayku, Diostataj cheqa sonqowan yupaychasqanrayku, mana sajra runachu kasqanta rikucherqa. Pay kikin nerqa: “Diospa yachaynenqa ruwasqasnimpi rejsichikun”, nispa (Mat. 11:19). Kay tiempopipis kikillantaj. Sutʼincharinapaj, Alemania Betel qayllapi tiyakoj runas, Betelpi llankʼajkuna waj jinitas kasqankuta yuyanku. Chaywanpis, chay llajtapi alcaldeqa paykunaman kutikuspa nerqa: “Chaypi llankʼaj Testigosqa waj jina kausayniyoj kaspapis, mana ima chʼajwatapis kay llajtapi rikhurichinkuchu”, nispa.

¹⁴ Rusia suyumanta Moscú llajtanpipis Jehovaj testigosnenqa, ashkha kutispi qhasimanta tumpasqa karqanku. Wakenqa familiasta tʼaqanachisqankuta, wañojta saqellasqankuta, jampichikuyta qhesachasqankuta ima nerqanku. Chaywanpis, 2010 watamanta junio killapi, Franciapi kaj Tribunal Europeo de Derechos Humanos nisqa juzgana wasipi nikusqanman jina, Moscú llajtapi kamachejkuna Jehovaj testigosninpa religionninkuta sayachiyta munasqanku mana allinchu karqa, nitaj tantakuykunasninkuta sayachinankuchu karqa. Chantá, Rusiamanta juecesqa Jehovaj testigosninta tumpasqankutapis mana sutʼinchayta aterqankuchu; Moscupi kamachiykuna kasqantataj, Jehovaj testigosninpaj mana allintachu apaykacharqanku.

15. ¿Ima yuyaychaytataj Jallpʼantinmanta cheqa cristianos kasukunchej?

¹⁵ Jallpʼantinmanta Jehovaj testigosnenqa Moscú llajtapi jina, Pedroj nisqanta kasukunchej, pay nerqa: “Señorninchejrayku runas ukhupi kamachejkunata kʼumuykukoj sonqowan kasuychej, reypis chayri waj kamachejkunapis kachun”, nispa (1 Ped. 2:13, 14). Cheqa cristianosqa mana kay pachamantachu kaspapis, kamachejkunata kasukunchej, imajtinchus Pablo nerqa jina “kamachejkunapis Diospa churasqallantaj kanku” (Romanos 13:1, 5-7 leey).

16, 17. a) ¿Imataj rikuchin mana kamachejkunaj contrankupichu kasqanchejta? b) ¿Imatataj wakin kamachejkuna reparanku?

¹⁶ Jehovaj testigosnenqa kay pachapi “forasteros” jinalla kausakunchej. Chaywanpis, mana kamachejkunaman churanakusqanchejraykuchu, nitaj wajkunaj ajllasqankuta qhawarasqanchejraykuchu. Pichus kamachinanmanta, imaynatachus chʼampaykunata allinchanamanta ima, mana tukuychu kikinta yuyasqankuta yachanchej. Wakin religionesqa politicaman satʼikunku, noqanchejrí mana, nitaj wajkunata yuyasqanchejman jina ruwanankupaj tanqanchejchu. Ni jaykʼaj uj chʼajwata rikhurichiyta chayri gobiernoj contranpi oqharikuyta yuyasunmanchu.

¹⁷ Kamachejkunata kasukuspaqa jatunpaj qhawasqanchejta rikuchinchej, imajtinchus Pedro nerqa: “Reytataj jatumpaj qhawaychej”, nispa (1 Ped. 2:17). Wakin kamachejkunaqa Jehovaj testigosnin qhasillamanta tumpasqa kasqankuta reparanku. Alemaniamanta uj politicopis chayta repararqa. Payqa chay suyuj ujnin llajtanpa gobiernonpi llankʼarqa, qhepamantaj Alemaniaj parlamentonpi llankʼarqa. Payqa Jehovaj testigosnin Hitlerpa kamachiyninpi presochasqa kashajtinku ñakʼarichisqa kaspapis, mana oqharikoj runaschu kasqankuta nerqa. Chantá, ajinapi rikukuspapis mana creeyninkuta tijrachisqankuta, paykunawan presochasqa kajkunatapis mana chejnisqankuta nerqa. Chay político nillarqataj: “Kay tiempo runasqa waj suyusmanta kajkunata, waj jinata yuyajkunatapis mayta chejninku. Suyunchejpi tiyakojkuna, paykuna jina kʼacha kaykunata rikuchinankoqa sumaj kanman”, nispa.

18. a) ¿Imaraykutaj tukuy hermanosta munakunchej? b) ¿Imaraykutaj wakin runas tʼukulla qhepakunku?

¹⁸ Apóstol Pedro qhelqarqa: “Hermanosta munakuychej. Diosta manchachikuychej”, nispa (1 Ped. 2:17). Jehovaj testigosnenqa Payta manchachikusqanchejrayku, sonqonta nanachinanpaj jina imasta mana ruwanchejchu. Chaytaj, munayninta ruwanapaj tanqawanchej. Astawanpis, Jallpʼantinpi uj sonqolla Jehovata yupaychasqanchejmanta kusikunchej. Chayraykumin tukuy hermanosta munakunchej. Kay pacha runasqa paykunallapaj imatapis munanku, munanakusqanchejta rikuspataj tʼukulla qhepakunku. Sutʼincharinapaj, kay 2009 watapi ashkha suyuspaj jatun tantakuy ruwakushajtin, uj empresapi Alemaniata rejsichispa llankʼaj warmi, tʼukulla qhepakorqa. ¿Imaraykú? Alemaniamanta hermanos, waj suyusmanta chayamoj hermanoswan may kʼachas kasqankuta rikuspa. Chay warmeqa unaytaña chaypi llankʼasqanpi, ni jaykʼaj chayta rikusqachu. Aswan qhepaman, uj hermano sutʼincharqa: “Imaynatachus noqaykumanta parlasqanpeqa tʼukulla, kusisqataj kashasqan sutʼi rikukorqa”, nispa. Qanrí, ¿uyarerqankichu waj runas jatun tantakuyninchejta rikuspa tʼukulla qhepakusqankumanta?

19. ¿Imatataj ruwayta munanchej, imaraykú?

¹⁹ Rikunchej jina, Jehovaj testigosnenqa Satanaspa sajra pachanpi “forasteros” jinalla kasqanchejta rikuchinchej. Chayraykutaj kusisqa kanchej, forasteros jinallapunitaj kayta munanchej. Chantapis, tumpamantawan Diospa mosoj pachanpi wiñaypaj kausakuyta suyakushanchej. ¿Maytacharí chay pʼunchayta suyashanchej?