Ancianosqa Kusisqa Kanapaj Yanapawanchej

 1. ¿Corintopi hermanosmanta imata yachasqantaj Pablota mayta kusicherqa?

APÓSTOL Pabloqa 55 wata kashajtin, Troas llajtapi barco sayana karqa chaypi kasharqa. Corintopi cristianosmantataj mayta llakikusharqa. Imajtinchus aswan ñaupajta, paykuna ukhupi churanakuykuna kasqanta uyarerqa. Chayrayku, paykunaman uj cartata yuyaychananpaj qhelqarqa, imaynatachus uj tata wawasninmanta llakikun ajinata (1 Cor. 1:11; 4:15). Chantapis, amigon Titota paykunata waturimunanta nerqa, chaymantataj Troaspi tinkunankuta nerqa, ajinamanta imaynachus hermanos kashasqankuta yachanman karqa. Chayrayku, Corintopi hermanosmanta mayta yachayta munaspa, Troaspi Titota suyasharqa. Chaywanpis, Titoqa ni jaykʼaj chayarqachu. ¿Imatataj Pablo ruwanman karqa? Barcopi Macedoniaman kachaykukorqa. Chaypiraj Titowan tinkuspa imaynachus Corintomanta hermanos kashasqankuta yacharqa. Chay hermanosqa Pabloj yuyaychasqanta kusiywan japʼikusqanku, Pablotataj ujtawan rikuyta munashasqanku. Pabloqa chayta uyarispa astawanraj kusikorqa (2 Cor. 2:12, 13; 7:5-9).

 2. 1) ¿Imatataj Pablo Corintopi hermanospa creeyninkumanta, kusikuyninkumanta ima qhelqarqa? 2) ¿Ima tapuykunatataj ukhuncharisun?

² Pabloqa pisi tiemponman Corintomanta hermanosman iskay kaj cartanta qhelqashaspa, jinata nerqa: “Mana noqaykoqa creesqaykichejmanta patrones jinachu kayta munayku; astawanqa qankunata yanapayta munayku kusisqa kanaykichejpaj, imaraykuchus creeyrayku sinchʼita sayashankichej”, nispa (2 Cor. 1:24). ¿Imatataj Pablo niyta munarqa? ¿Imatataj kay tiempomanta ancianos chay nisqanmanta yachakunkuman?

 3. 1) ¿Imatataj Pablo niyta munarqa “creeyrayku sinchʼita sayashankichej” nispa? 2) ¿Imaynatataj kay tiempo ancianos Pablo jinallataj ruwanku?

³ Pabloqa cristianospa iskay kʼacha kaykunasninkumanta parlarqa. Ujqa creey, ujnintaj kusikuy. Creeymanta parlaspa kayta qhelqarqa: “Mana noqaykoqa creesqaykichejmanta patrones jinachu kayta munayku; [...] imaraykuchus creeyrayku sinchʼita sayashankichej”, nispa. Pabloqa Corintomanta cristianos Diospi creesqankurayku sinchʼita sayashasqankuta repararqa, mana payraykuchu, nitaj wajkunaraykuchu. Chantapis, mana hermanospa creeyninkumanta patrón jina kayta munarqachu. Astawanqa chay cristianos allin kajta ruwashasqankupi atienekorqa (2 Cor. 2:3). Kay tiempo ancianospis, Pablo jina ruwanku. Imajtinchus, hermanosqa creeyninkurayku, munakuyninkuraykutaj Diosta yupaychasqankuta yachanku (2 Tes. 3:4). Chantapis, qotuchakuypi kamachiykunata rikhurichinankumantaqa, Biblia yuyaychasqanman jina, Jehovaj llajtanpi kamachikusqanman jinataj ruwanku. Imaraykuchus, ancianosqa mana hermanospa creeyninkumanta patrón jinachu kanku (1 Ped. 5:2, 3).

 4. 1) ¿Imatataj Pablo niyta munarqa “qankunata yanapayta munayku kusisqa kanaykichejpaj” nispa? 2) ¿Imatataj kay tiempo ancianos Pablo jina ruwayta munanku?

⁴ Pablo nillarqataj: “Qankunata yanapayta munayku kusisqa kanaykichejpaj”, nispa. Chayta nispaqa paymanta, yanapaysikojkunamantawan parlasharqa. ¿Imaynatá chayta yachanchej? Chay cartallanpitaj, paywan llankʼajkunaj iskaypa sutisninkuta oqharerqa. Pay qhelqarqa: “Jesucristoqa, pimantachus willarqayku qankuna ukhupi noqa, Silvano, Timoteo ima”, nispa (2 Cor. 1:19). Chantapis yanapawajkuna nispaqa, paywan khuska mayta llankʼajkunamanta parlasharqa, nisunman Apolosmanta, Aquilamanta, Priscamanta, Timoteomanta chayri Titomanta (Rom. 16:3, 21; 1 Cor. 3:6-9; 2 Cor. 8:23). “Qankunata yanapayta munayku kusisqa kanaykichejpaj” nispataj, qotuchakuymanta hermanos aswan kusisqa kanankupaj mayta yanapayta munasqankuta nisharqa. Kay tiempo ancianospis kikillantataj ruwayta munanku. Arí, hermanos “kusiywan Tata Diosta” sirvinankupaj mayta yanapayta munanku (Sal. 100:2; Fili. 1:25).

 5. ¿Imatataj kay yachaqanapi ukhuncharisunchej, imapitaj tʼukurinanchej tiyan?

⁵ Jallpʼantinpi sonqo kʼajaywan willaj ashkha hermanosta, hermanasta ima, ancianosmanta parlaspa kunallanraj kayta tapukorqa: “¿Ima nisqantaj chayri ima ruwasqantaj aswan kusisqa kanaykipaj yanapasorqa?”, nispa. Imatachus kutichisqankuta ukhuncharishaspataj, tapurikuna: “¿Imatataj noqa kutichiyman karqa?”, nispa. Chantapis, qotuchakuymanta hermanosninchej aswan kusisqa kanankupaj, imatachus sapa ujninchej ruwayta atisqanchejpi tʼukurina.a

6, 7. 1) ¿Imaynamantataj ancianos Jesús jina, Pablo jina chantá Diospa waj kamachisnin jina ruwankuman? 2) ¿Imaraykutaj hermanos aswan kusisqa kanku sutisninkuta yuyarikojtinchej?

⁶ Ashkha hermanosqa ancianos paykunamanta llakikojtinku, aswan kusisqa kasqankuta ninku. Ancianosqa David jina, Elihú jina, Jesús jina ima ruwaspa, hermanosmanta llakikusqankuta rikuchinkuman (2 Samuel 9:6; Job 33:1; Lucas 19:5 leey). Paykunaqa pitapis sutisninkumanta parlapayaj kanku. Pablopis hermanospa sutisninkuta yuyarikunan, oqharinan ima kasqanta yacharqa. Romapi cristianosman qhelqasqan cartata tukuchashajtin 25 kurajta sutisninkumanta napaykorqa, hermanosta, hermanasta ima. Sutʼincharinapaj, kayta qhelqarqa: “Munasqa Persidata napaykapuwaychej”, nispa (Rom. 16:3-15).

⁷ Wakin ancianosqa qotuchakuymanta hermanospa sutisninkuta mana yuyarikuyta atinkuchu. Chaywanpis, kallpachakojtinkoqa sapa hermanomanpis kayta ninkuman jina: “Qanmantapis llakikuni”, nispa (Éxo. 33:17). Ancianosqa Torremanta Qhawaj revistata ukhunchanapaj tantakuypi, waj tantakuykunapipis sutisninkuta oqharispa, hermanos aswan kusisqa kanankupaj yanapanku (Juan 10:3, kikinchay).

 8. ¿Imaynamantataj Jehová jina, Jesús jina ima Pablo ruwarqa?

⁸ ¿Imaynamantawantaj Pablo hermanosta aswan kusisqa kanankupaj yanaparqa? Sumajta ruwashasqankuta nispa. Chaytaj, Corintopi hermanosman iskay kaj cartanta qhelqasqanpi sutʼi rikukun. Chaypi nerqa: “Qankunamanta may sonqo juntʼasqa kani”, nispa (2 Cor. 7:4). Chay nisqanqa chay hermanosta maytachá kusicherqa. Pabloqa waj qotuchakuykunamanpis allinta ruwasqankuta nerqa (Rom. 1:8; Fili. 1:3-5; 1 Tes. 1:8). Romapi qotuchakuyman qhelqashaspa, Persidaj sutinta oqhariytawan jinata nerqa: “Paypis may jinata Señorpaj trabajallarqataj”, nispa (Rom. 16:12). Chay hermananchejqa, ¡maytachá chaymanta kusikorqa! Pabloqa wajkunata sumajta ruwashasqankuta nispa Jehová jina, Jesús jina ima ruwarqa (Marcos 1:9-11; Juan 1:47 leey; Apo. 2:2, 13, 19).

 9. Wajkunata kallpachajtinchej chayri pillapis kallpachawajtinchej, ¿imaraykutaj qotuchakuypi aswan kusisqa kanapaj yanapawanchej?

⁹ Kay tiempo ancianospis, hermanosta sumajta ruwashasqankuta ninanku kasqanta yachanku (Pro. 3:27; 15:23). Chayta nispaqa, kaytapis ninkuman jina: “Sumajta ruwashasqaykita reparani, imaraykuchus qanmanta llakikuni”, nispa. Uj hermana, pichus 55 watasniyoj, imatachus nisqan wajkunapis kikinta yuyasqankuta rikuchin. Pay nerqa: “Llankʼaypeqa mana pipis sumajta ruwanki nispaqa nisunkuchu. Chaypeqa mana pimantapis llakikunkuchu, astawanqa atipanakuyllapi yuyanku. Chayrayku, uj anciano qotuchakuypi sumajta ruwashasqayta niwajtin, mayta kusikuni. Chaytaj, ¡mayta kallpachawan! Noqapajqa Jehová munakuyninta rikuchishawanman jina”, nispa. Niraj unaychu, uj anciano kʼacha rimaykunata uj tataman nerqa, pichus wawasninta sapallan uywashan. Chay nisqan, ¿yanaparqachu? Chay tata nin: “Niwasqanqa mayta kallpachawarqa”, nispa. Arí, ancianos hermanosta sumajta ruwashasqankuta tukuy sonqo nisqankoqa mayta kallpachan, aswan kusisqa kanankupajtaj yanapan. Ajinamanta, Jehovata mana saykʼuspa yupaychanankupaj aswan kallpachasqas kanku (Isa. 40:31).

10, 11. 1) ¿Imaynatataj ancianos Nehemías jina ruwankuman? 2) Hermanosta waturishajtinku “espíritoj ima yanapaynillantapis” qonankupaj, ¿imatataj ancianos ruwankuman?

¹⁰ ¿Imaynamantawantaj ancianos hermanosta aswan kusisqa kanankupaj yanapankuman? Necesitajkunata kallpachanankupaj ñaupajpi kaspa (Hechos 20:28 leey). Ajinata ruwaspaqa, ñaupa tiempopi Diospa kamachisninta kallpachajkuna jina ruwanku. Sutʼincharinapaj, Biblia nisqanman jina, Nehemiasqa judío hermanosnin mancharikusqankuta reparaspa, sayarikuytawan paykunata kallpacharqa (Neh. 4:14). Kay tiempo ancianospis, sayarikunku nisunman hermanospa creeyninkuta kallpachaj rinku. Chayrayku, atikojtenqa wasinkupi waturimunku. Ajinamanta, “espíritoj ima yanapaynillantapis” paykunaman qonankupaj (Rom. 1:11). ¿Imaynatataj ancianos chayta ruwankuman?

¹¹ Ancianosqa niraj waturej rishaspa, piwanchus parlariyta munanku chay hermanopi tʼukurinanku tiyan. Kaykunata tapukunkuman: “¿Ima chʼampaypitaj chay hermano rikukushan? ¿Imatataj niykuman kallpacharinaykupaj? ¿Bibliamanta ima textostaj yanapanman? ¿Bibliamanta pejpa kausaynintaj paypa kausaynin jina?”, nispa. Chay tapuykunapi tʼukurinankoqa paywan sumajta parlarinankupaj, kallpacharinankupaj ima yanapanqa. Waturishaspataj, hermanosta parlarejta saqenku, nisqankutataj sumajta uyarinku (Sant. 1:19, 20). Uj hermana nerqa: “Uj anciano sumajta uyariwasqanqa mayta kallpachawan”, nispa (Luc. 8:18).

12. ¿Qotuchakuypi pikunataj kallpacharinata necesitanku, imaraykutaj?

¹² ¿Pikunatataj waturinanku kanman? Ancianosman Pablo jinata yuyaycharqa: “Qhawakuychej, jinallatataj tukuy hermanostapis”, nispa. Arí, qotuchakuymanta tukuy hermanos kallpacharinata necesitanku, watastaña willajkunapis kachunku chayri precursorespis kachunku. ¿Imaraykutaj chay sinchʼi sayasqa hermanos ancianos kallpacharinankuta necesitanku? Imaraykuchus wakin kuteqa paykunatapis kay pachaj imasnin saykʼuchinman. Davidwan uj kuti imachus kasqan, cheqa sonqo hermanospis wakin kuti kallpacharinata necesitasqankuta rikuchin.

13. 1) ¿Imatataj Isbi-benob repararqa Davidta wañuchiyta munananpaj? 2) ¿Imaraykutaj Abisai Davidta wañuy patapiña kashajtin salvayta aterqa?

¹³ David Israelpi rey kananpaj ajllasqa kasqanmanta pisi tiemponman, jatunkaray Goliatwan maqanakoj rerqa, pichus Refaj mirayninmanta karqa. Chay kutipeqa mana manchachikuspa payta wañurpacherqa (1 Sam. 17:4, 48-51; 1 Crón. 20:5, 8). Watasninmantaj, filisteoswan maqanakushajtin waj jatunkaray runawan tinkullarqataj, pichus chay mirayllamantataj karqa, sutintaj Isbi-benob karqa (2 Sam. 21:16). Chaywanpis, chay kutipeqa chay jatunkaray runa Davidta wañuchinanpajña kasharqa. Mana wapu kayninta chinkachisqanraykuchu, manaqa kallpan pisiyasqanrayku. Bibliaqa David sinchʼita saykʼurparisqanta nin, Isbi-benobtaj chayta reparaspa wañuchiyta munarqa. “Sarviaj churin Abisaitajrí Davidta yanapaj rispa, chay filisteota wañurparicherqa” (2 Sam. 21:15-17). Davidqa tumpitapi wañuymanta lluspʼerqa. Abisai chayta reparasqanmanta maytachá agradecekorqa, imajtinchus reparasqanrayku wañuy patamanta salvarqa. ¿Imatá chaymanta yachakunchej?

14. 1) ¿Imaynatataj jatun chʼampaykunata atipasunman? 2) ¿Imaynatataj ancianos kusisqallapuni kanapaj, kallpachakunapaj ima yanapawasunman? Sutʼinchariy.

¹⁴ Jehovaj kamachisnenqa Jallpʼantinpi willashallanchejpuni, Satanaswan, payta yanapajkunawan ima tojllasta churawajtinchejpis. Noqanchejmanta wakenqa jatun chʼampaykunawan tinkorqanchej. Jehovapi tukuy sonqo atienekusqanchejraykutaj chaykunata atiparqanchej, imaynatachus David jatunkaray Goliatta atiparqa ajinata. Chaywanpis, wakin kuteqa kay pachaj imasnin sinchʼi saykʼusqata, sonqo pʼakisqatataj saqewasunman. Ajinapi rikukuspataj, urmanapaj jina kasunman, ima chʼampaywanpis atipachikullasunman. Chay kutispeqa uj anciano mayta yanapawasunman kusisqallapuni, kallpachasqataj kanapaj. Uj precursora, pichus 65 watasniyoj, nin: “Uj kutipi mana allinchu kasharqani, willaypipis saykʼupoj kani. Uj anciano chayta reparaspa, noqamanta llakikusqanta rikuchiwarqa. Sumajta paywan parlarikorqayku, Bibliawantaj kallpachariwarqa. Yuyaychawasqanman jina ruwasqayrayku, allin riwarqa. Chay anciano imaynachus kashasqayta reparasqanmanta, yanapariwasqanmantapis, ¡mayta agradecekuni!”, nispa. Noqanchejmanta llakikoj ancianos kasqanku, Abisai jinataj yanapanawanchejpaj wakichisqa kasqankoqa sumaj bendición.

15, 16. 1) ¿Imaraykutaj hermanos Pablota mayta munakoj kanku? 2) ¿Imaraykutaj ancianosninchejta mayta munakunchej?

¹⁵ Ancianosqa qotuchakuyta qhawanankupaj mayta kallpachakunku. Wakin kuteqa mana puñusqa sutʼiyanku, Diospa tropanta yanapanankupaj mañakuspa chayri hermanosta ñaupajllamanpuni rinankupaj yanapaspa (2 Cor. 11:27, 28). Jinapis, Pablo jina sumajta, tukuy sonqowantaj ruwayninkuta juntʼanku. Pabloqa Corintomanta cristianosman kayta qhelqarqa: “Noqaqa may kusiywan [...] kawsayniytapis tukuchillasajtaj qankunarayku”, nispa (2 Cor. 12:15). Payqa hermanosta mayta munakusqanrayku, kausaynintapis paykunata kallpachananpaj tukuchiyta munarqa (2 Corintios 2:4 leey; Fili. 2:17; 1 Tes. 2:8). ¡Chayraykuchá hermanos mayta munakoj kanku! (Hech. 20:31-38.)

¹⁶ Kunanpis, ancianosninchejta mayta munakullanchejtaj. Jehovamantaj paykunata churasqanmanta mayta agradecekunchej. Ancianos noqanchejmanta mayta llakikusqankoqa aswan kusisqa kanapaj yanapawanchej, waturikuwasqanchejpis mayta kallpachawanchej. Paykunaqa kay pachaj imasninrayku llakisqa kasqanchejta reparanku, yanapanawanchejpajtaj wakichisqa kanku, chaytataj sumajpaj qhawanchej. Arí, paykunaqa Pablo jina kayta ninku: “Qankunata yanapayta munayku kusisqa kanaykichejpaj”, nispa.