“Qayllamushanña kacharisqa kanaykichej pʼunchayqa”

 1. ¿Imataj karqa 66 watapi? (Patapi kaj dibujota qhawariy.)

KAY 66 watapi Roma suyumanta soldadosta kamachej Floro sutiyoj runa ashkha qolqeta Jerusalén templomanta suwaykorqa. Chayraykutaj judiosqa mayta phiñakuspa ashkha romano soldadosta wañucherqanku, Romaj contranpitaj churanakuyta qallarerqanku. Chaymanta kinsa killasninman jinataj Roma suyuta kamachej Cestio Galo, 30.000 soldadosninwan Jerusalenta muyuykorqa. Romaj contranpi churanakoj judiostaj temploj ukhunpi pakaykukorqanku. Romamanta soldadostajrí, temploj perqasninkama chayarqanku. Jerusalenmanta runastaj mancharisqas kasharqanku. Chaypi kashawaj karqa chay, ¿imatataj ruwawaj karqa?

 2. 1) ¿Imatataj cristianos ruwayta aterqanku Jerusalenta soldadoswan muyurisqata rikuspa? 2) ¿Imaynatataj llajtamanta ayqekorqanku?

² Ashkha watas ñaupajta Jesusqa yachachisqasninman imachus kananta willarqa. Nerqataj: “Jerusalén llajtata soldadoswan muyurisqata rikuspa, yachaychej thuñikunan chayamusqanta. Chaypacha Judeapi kajkuna orqosman ayqechunku, Jerusalenpi kajkunataj llajtamanta jawaman llojsichunku”, nispa (Luc. 21:20-22). Llajta soldadoswan muyurisqa kashajtin, ¿imaynatá cristianos ayqekunkuman karqarí? Jesusqa chay pʼunchaykuna pisiyachisqa kananta nerqa, nisunman manaña soldados muyuykunankuta (Mat. 24:22). Jesús nisqanman jinapunitaj karqa. Imaraykuchus mana suyashajtillanku, romano soldados Jerusalenmanta riporqanku. Ajina kajtintaj cheqa sonqo cristianosqa Jesuspa nisqanta kasukuspa orqosman ayqekuyta aterqanku.a Kay 70 watapi romano soldadosqa Jerusalenman watejmanta kuterqanku. Chay kutipitaj Jerusalén llajtata chinkacherqanku. Jesuspa nisqanta kasukojkunalla mana wañorqankuchu.

 3. 1) ¿Imataj tumpamantawan kanqa? 2) ¿Imamantataj kay yachaqanapi yachakusunchej?

³ Noqanchejpis tumpamantawan kikillanpitaj rikukusunchej. ¿Imataj kanqa? Manchay ñakʼariy tiempo ujllata qallarenqa. Jesusqa yachachisqasninman imachus Jerusalenpi rikukunanta, imatachus paykuna mana wañunankupaj ruwanankuta nispaqa, imachus kay tiemponchejpi kananmanta parlasharqa (Mat. 24:3, 21, 29). Ñaupa tiempopi cheqa sonqo cristianosqa mana wañorqankuchu Jerusalén chinkachisqa kashajtin, jinallatataj kay tiempopipis may chhika runas mana wañonqankuchu Satanaspa sajra pachan chinkachisqa kashajtin (Apocalipsis 7:9, 13, 14 leey). Mana wañuyta munanchejchu chayqa, manchay ñakʼariy tiempomanta imatachus Biblia nisqanta sumajta entiendenanchej tiyan. Kay yachaqanapeqa tumpamantawan imaschus kananmanta, imatachus ruwananchejmanta ima yachakusunchej.

 4. ¿Imaynatataj manchay ñakʼariy tiempo qallarenqa?

⁴ Manchay ñakʼariy tiempoqa, tukuy llulla religionesta chinkachispa qallarenqa. Bibliaqa llulla religiones “Jatun Babilonia, Phisu Warmispa Maman” kasqanta nin (Apo. 17:5-7). ¿Imaraykutaj llulla religionesta phisu warmiwan kikinchan? Imaraykuchus chay llulla religionespi yachachejkunaqa Diosman mana cheqa sonqoschu kanku. Jesusta, Reinonta ima yanapanankumantaqa, kay pachamanta kamachejkunata yanapanku. Chantapis Bibliaj yachachiykunasninta qhesachanku, astawan atiyniyoj kanankupaj. Paykunaqa mana ajllasqa cristianos jinachu Diosta llimphu sonqowan yupaychanku (2 Cor. 11:2; Sant. 1:27; Apo. 14:4). Chantá, ¿pitaj tukuy llulla religionesta chinkachenqa? Bibliaqa puka phiña animalpa chunka wajrasnin chinkachinanta nin. Chay phiña animalqa, Naciones Unidas nisqawan ninakun, chunka wajrasnintaj kay pachamanta tukuy kamachejkunawan ninakun, pikunachus Naciones Unidas nisqata yanapashanku. Biblia nin jinataj chay kamachejkunata llulla religionesta chinkachinankupaj Dios tanqanqa (Apocalipsis 17:3, 16-18 leey).

5, 6. ¿Imaraykutaj ninchej llulla religiones chinkachisqa kashajtinku chay religionespi kajkuna mana tukuychu chinkachisqa kanankuta?

⁵ Llulla religiones chinkachisqa kajtinku, chay religionespi kajkuna mana tukuychu chinkachisqa kanqanku. ¿Imaraykutaj chayta ninchej? Imaraykuchus Jehová profeta Zacariasman imachus kananmanta qhelqananpaj yuyaycharqa. Chay tiempopi, llulla religionpi kajkunamanta ujnin nenqa: “Noqaqa mana profetachu kani, manachayqa llankʼaj runalla. Wawamantapacha campopi llankʼaj kani, nispa. Sichus pipis payta taponqa: Chantá imanakorqankitaj cuerpoykipi chay nanasqas kanampaj? nispa chayqa, pay kutichenqa: Kawsaqesniypa wasinkupi kayta ruwawarqanku”, nispa (Zac. 13:4-6). Kaytaj rikuchiwanchej religionta kamachejkunamanta wakin, chay llulla religionespi ni jaykʼaj kasqankuta ninankuta.

⁶ ¿Imataj Diospa llajtanwan kanqa llulla religionesta chinkachikushajtin? Jesús nerqa: “Chay pʼunchaykunachus mana pisiyachisqa kankuman chayqa, mana pipis salvasqachu kanman. Ajllasqasraykutaj chay pʼunchaykuna pisiyachisqa kanqanku”, nispa (Mat. 24:22). Kay 66 watapi romano soldados Jerusalenta muyuykuytawan, uj pisi tiempota riporqanku. Chay kutipitaj ajllasqa cristianosqa ayqekuyta aterqanku. Kay tiempopis kikillantaj kanqa, imaraykuchus manchay ñakʼariy tiempoqa ajllasqa cristianosrayku pisiyachisqa kanqa. Jehovaqa mana saqenqachu kay pachamanta kamachejkuna Diospa llajtanta chinkachinankuta. Astawanpis uj pisi tiempota mana ima ñakʼariypis kanqachu.

7, 8. 1) Llulla religionespa contranpi churanakuy qallarejtin, ¿imatataj ruwananchej kanqa? 2) Chay tiempopi, ¿pikunallataj Diosta yupaychanqanku?

⁷ ¿Imataj kanqa llulla religiones chinkachisqa kasqankutawan? Chay tiempopeqa Jehovata cheqamantapunichus manachus munakusqanchejta rikuchinanchej kanqa. Ashkha runasqa kay pachamanta organizacionespi, nisunman “qaqa juskʼuspi, orqo juskʼuspi ima” jarkʼakuyta maskʼanqanku (Apo. 6:15-17). Noqanchejtajrí Jehovapi jarkʼakuyta maskʼasunchej. ¿Suyasunmanchu ajinallamanta ashkha runas Diospa kamachisninman tukunankuta? Mana. Jerusalenmanta soldados ripojtinku, ashkha judíos mana cristianosmanchu tukorqanku. Astawanpis cheqa cristianoslla Jesuspa nisqanta kasukuspa Jerusalenmanta jawaman llojserqanku. Ajinallatataj llulla religionespa contranpi churanakuy qallarejtin, mana suyasunchu tukuy runas cristianosman tukunankuta. Astawanpis chay tiempopi Jehová Diosta munakusqanchejta, ajllasqa cristianosta tukuy sonqo yanapashasqanchejta ima rikuchinanchej kanqa (Mat. 25:34-40).

⁸ ¿Imataj chay tiempopi kanqa? Mana yachanchejchu. Ichapis mayta ñakʼarisun, wakin imastapis ichá waj jinamanta ruwananchej kanqa. Jerusalén chinkachisqa kashajtin, cristianosqa wasisninkuta saqerqanku, mana wañunankupajtaj ashkha llakiykunata atiparqanku (Mar. 13:15-18). Chayrayku tapurikunachej: “¿Wakichisqachu kashani kapusqallaywan kausakunaypaj? Diosman cheqa sonqollapuni kanaypaj, ¿tukuy imatachu ruwayta munani?”, nispa. Chaywanpis chay tiempopeqa ima llakiy kajtinpis noqallanchej profeta Daniel jina Diosta yupaychasunchej (Dan. 6:10, 11).

9, 10. 1) ¿Imatataj manchay ñakʼariy tiempopi willasunchej? 2) ¿Imatataj enemigosninchej ruwanqanku?

⁹ Manchay ñakʼariy tiempopeqa manaña “janaj pacha reinomanta” willasunchu, imaraykuchus tukukuy tiempo kanqa (Mat. 24:14). Astawanpis mana manchachikuspa runasman juchachana willayta willamusunchej. Ichapis chay willayqa kanqa Satanaspa pachan wiñaypaj chinkachisqa kananmanta. Bibliaqa runas chay willayta granizoj ñakʼarichisqanta jina qhawanankuta, Diospajtaj sajrata rimanankuta nin (Apo. 16:21).

¹⁰ Enemigosninchej chay willayta uyarispa, ¿imatataj ruwanqanku? Profeta Ezequielqa, uj qotu ujchasqa nacioneswan ninakoj Magogmanta Gog imatachus ruwananta nerqa: “Tukuyta Kamachej Tata Diosqa kay jinata nillantaj: Chay tiempospi sonqoykiman mana allin yuyay jamusonqa, sajra ruwanasta wakichinaykipaj. Chantá qan ninki: Chay mana kutichikuy atej runaspa contrankupi wicharisaj. Mana imata manchachikuspa tiyakushanku, chay runaspa contrankuta risaj, maypichus mana perqawan muyuykuchisqa llajtaspi tiyakunku, mana punkusniyoj, nitaj llavenasniyoj, chayman. Kapuyninkuta suwaspa, apakampusaj; raqaykunamanta watejmanta sayarichisqa llajtaspi runas tiyakushanku, chaykunata tʼunaykamusaj. Waj nacionesmanta orqhomusqa kanku, chay runasmantaj makiyta churaykusaj. Paykunaqa ashkha uywasta mirachishanku, jallpʼasniyojtaj kanku chay jallpʼaj chawpimpi tiyakushaspa, nispa sonqoykipi yuyaychakunki”, nispa (Eze. 38:10-12). Chay tiempopeqa Diospa llajtallanpis kay Jallpʼaj chaupinpi kashanman jina kanqa. Chayraykutaj kay pachamanta nacionesqa manchay phiñakuywan ajllasqa cristianosta, waj ovejasmanta kajkunata ima chinkachiyta munanqanku.

11. 1) Manchay ñakʼariy tiempo kashajtin, ¿imastaj kanqa? 2) Diospa enemigosnin cielopi señalesta rikuspa, ¿imatá ruwanqanku?

¹¹ ¿Imataj chaymanta kanqa? Bibliaqa ashkha imas kananta niwanchej, chaywanpis mana niwanchejchu imawanchus qallarinanta. Ichapis wakin imasqa uj tiempollapi kanqa. Jesusqa Satanaspa sajra pachan tukukunanmanta parlashaspa nerqa: “Chaypacha intipi, killapi, chʼaskaspi ima señales kanqa. Jallpʼa patapitaj kanqa runas ukhupi manchay llakiy, ñakʼariy ima; musphaykachanqankutaj mancharisqa, mama qocha qhollchoqeyaspa yaku moqos oqharikusqanmanta. Runasqa uj jinayanqanku manchariywan, imachus kay pachaman jamunanmanta, imaraykuchus janaj pacha atiykuna chaypacha kharkatirenqanku. Chaypacha rikonqanku Runaj Churinta phuyupi, manchay atiywan, jatun kaynimpa kʼanchayninwan ima [jamushajta]”, nispa (Luc. 21:25-27; Marcos 13:24-26 leey). ¿Imastaj chay señales kanqa? ¿Chay señales cielopipunichu rikukonqa? Chaytaqa tiempollanpi yachasunchej. Ima señaleschus kananta mana yachaspapis, Diospa enemigosnin chay señalesta rikuspa kharkatitinankuta yachanchej.

12, 13. 1) ¿Imatá Jesús ruwanqa “manchay atiywan, jatun kaynimpa kʼanchayninwan ima” jamojtin? 2) ¿Imatataj Diospa kamachisnin chay tiempopi ruwanqanku?

¹² ¿Imatá Jesús ruwanqa “manchay atiywan, jatun kaynimpa kʼanchayninwan ima” jamojtin? Jesusqa Diosman cheqa sonqo kajkunaman mayta tʼinkanqa, mana cheqa sonqo kajkunatataj jasutʼenqa (Mat. 24:46, 47, 50, 51; 25:19, 28-30). ¿Imaynatataj chayta ruwanqa? Jesusllataj sutʼincharqa: “Maypachachus Runaj Churenqa Rey jina jatun kaynimpa kʼanchaynimpi tukuy angelesninwan jamonqa chaypacha, lliphipej kamachina tiyanampi tiyaykukonqa. Tukuynejmantataj tukuy laya runas ñawpaqenman tantakamonqanku. Paytaj ujkunata ujkunamanta tʼaqanqa, imaynatachus michejpis ovejasta cabrasmanta wajman tʼaqan, ajinata. Ovejasta pañanman churanqa, cabrastataj lloqʼenman” (Mat. 25:31-33). Kaytaj niyta munan Jesús tukuy runasta juzgananta. Uj runata Diosman mana cheqa sonqochu kasqanta rikuspataj, uj cabrawan ninakusqanta nenqa, wiñaypaj chinkachisqa kananpajtaj juchachanqa. Chaywanpis uj runata Diosman cheqa sonqo kasqanta rikuspaqa, uj ovejawan ninakusqanta nenqa, wiñaypajtaj kausananta saqenqa (Mat. 25:46).

¹³ Bibliaqa cabraswan ninakoj runas, chinkachisqa kanankuta yachaspa ‘manchayta waqanankuta’ nin (Mat. 24:30). Chaywanpis, ¿imatá ajllasqa cristianos, kay Jallpʼapi kausakuyta suyakoj cristianos ima ruwanqanku? Jesús nisqanman jina ruwanqanku, pay nerqa: “Tukuy ima ruwakuyta qallarejtin, sayaykukuychej umaykichejta oqharispa, imaraykuchus qayllamushanña kacharisqa kanaykichej pʼunchayqa”, nispa (Luc. 21:28).

14, 15. 1) ¿Imataj kanqa Magogmanta Gog Diospa llajtanpa contranpi churanakusqanmanta qhepaman? 2) ¿Imatá niyta munashan Biblia Jesús ajllakusqasninta tantaykonqa nispa?

¹⁴ Magogmanta Gog Diospa llajtanpa contranpi sayaykojtin, ¿imataj kanqa? Biblia nin jina, Jesusqa angelesta kachamonqa “ajllakusqasninta kay pachaj tawantin cheqasmanta tantanankupaj, jallpʼaj ujnin kantunmanta janaj pachaj ujnin kantunkama” (Mar. 13:27; Mat. 24:31). Kayqa mana chay tiempopiraj ajllasqa cristianos ajllasqa kanankumantachu parlashan. Nillataj kay Jallpʼallapiraj kaj ajllasqa cristianos wiñaypaj sellasqa kanankumantachu parlashan. Imaraykuchus ajllasqa cristianosqa manchay ñakʼariy tiempo niraj qallarishajtin wiñaypaj sellasqas kanqanku (Mat. 13:37, 38; Apo. 7:1-4). Chantá, ¿imatá niyta munan Biblia Jesús “ajllakusqasninta” tantaykonqa nispa? Kay Jallpʼallapiraj kaj ajllasqa cristianos tʼinkankuta japʼinankuta, cielomantaj apasqa kanankuta niyta munan (1 Tes. 4:15-17; Apo. 14:1). Kaytaj Magogmanta Gog Diospa llajtanpa contranpi churanakuyta qallarisqanmanta ima ratollapis kanqa (Eze. 38:11). Chantá Jesús nerqa jina “cheqan kaj runas[qa] inti jina lliphipenqanku Tatankoj reinompi” (Mat. 13:43).b

¹⁵ Kayqa, ¿ninayanchu ajllasqa cristianos arrebatasqas kanankuta? Ashkha runas creenku cristianos aycha cuerpopi janaj pachaman apasqas kanankuta. Chantapis creellankutaj Jesús kay Jallpʼata kamachinanpaj aycha cuerpopi jamunanta. Chaywanpis Bibliaqa sutʼita rikuchin mana aycha cuerpopichu jamunanta. Biblia nin: “Runaj Churimpa señalnin cielopi rikhurenqa [...] cielo phuyus patapi jam[onqa]”, nispa (Mat. 24:30). Chantapis Bibliaqa nillantaj: “Aycha cuerpollaqa mana atinchu Diospa reinonta herenciapaj japʼiyta”, nispa. Pikunachus cieloman apasqa kanqanku chaykunaqa “uj jinaman tukuchisqa ka[nanku tiyan], ujllata, uj ñawi chʼirmiypi, cornetaj waqaynimpa tukukuynimpi” (1 Corintios 15:50-53 leey).c Cieloman apasqa kajkunamanta mana nisunmanchu arrebatasqas kanankuta, imaraykuchus chayta nispaqa llulla religiones jina yachachishasunman. Chaywanpis Jallpʼallapiraj kaj cheqa sonqo ajllasqa cristianosqa, uj ñawi chʼirmiypi cieloman apasqa kanqanku, nitaj aycha cuerpopichu.

16, 17. ¿Imataj kanqa Corderoj casamienton niraj kashajtin?

¹⁶ Cielopi 144.000 ajllasqa cristianos tukuyninkuña tantasqa kasqankutawan, Corderoj casamientonpaj wakichikuyta tukuchakonqa (Apo. 19:9). Chaywanpis manaraj chay casamiento ruwakushajtin wakin imas ruwakunanraj tiyan. Diospa llajtanpa contranpi Gog churanakuyta qallarishajtin, wakin ajllasqa cristianos kay Jallpʼallapiraj kashanqanku (Eze. 38:16). Diospa llajtanpa contranpi churanakuy kajtin, ¿imatataj ruwasunchej? Biblia nin: “Kay kutipeqa manamin qankunachu maqanakunkichej. Chaynejpi allinta sayakuspa, kakullaychej mana kuyukuspa, rikunkichejtaj imaynatachus Tata Dios qankunata librasunaykichejta [...] ama manchachikuychejchu, nitaj kharkaychejchu”, nispa (2 Cró. 20:17). Rikunchej jina, Magogmanta Gog Diospa llajtanpa contranpi churanakuyta qallarejtinña Jallpʼallapiraj kaj cristianos cieloman apasqas kanqanku. ¿Imataj chantá kanqa? Apocalipsis 17:14 versículo sutʼinchan, Diospa llajtanpa enemigosnin “Corderoj contrampi maqanak[unankuta], Corderotaj[...] paykunata atipayk[unanta], imaraykuchus payqa señorkunaj Señornin, reyespa Reynintaj. Paywan khuska kanqanku paypa wajyasqasnin, ajllakusqasnin, payta mana wasanchajkunataj”. Ajinamanta Jesuswan, 144.000 reyeswan ima, kay Jallpʼapi kaj Diospa llajtanta salvanqanku.

¹⁷ Armagedón maqanakoyqa Diospa santo sutinta jatunchanqa (Apo. 16:16). Cabraswan ninakoj runasqa chinkachisqas kanqanku. Chantapis kay Jallpʼamanta sajra ruwaykunaqa chinkanqa, may chhika runastaj mana wañonqankuchu. Chay kutipiraj Apocalipsis libro nisqanman jina Corderoj casamienton kanqa (Apo. 21:1-4).d Armagedón maqanakuypi mana wañojkunamanqa Jehová munakuyninta rikuchenqa, allin imastataj qonqa. Chay tiempotataj may kusiywan suyakushanchej (2 Pedro 3:13 leey).

18. Tukuy kay imas tumpamantawan kananta yachaspa, ¿imatataj ruwananchej tiyan?

¹⁸ Tukuy kay imas tumpamantawan kananta yachaspa, ¿imatataj ruwananchej tiyan? Apóstol Pedro nerqa: “Ajinata tukuy ima [...] tukuchisqa kananta yachaspa, astawanraj juchamanta tʼaqasqa, cheqan kajman jina kawsanaykichej tiyan. Ajinata Señorpa jamunan pʼunchayta suyaspa, chay jamunanta aswan usqhayta chayachimunkichej [...]. Chayrayku munasqa hermanosníy, chay imasta suyaspaqa, atisqaykichejta kallpakuychej Diospa ñawpaqempi mana juchayoj, mana kʼamina, paywan allimpi kawsakushaj tarisqa kanaykichejpaj”, nispa (2 Ped. 3:11, 12, 14). Chayrayku Diosta yupaychayninchejqa llimphu kanan tiyan, nitaj llulla religionpa yachachiyninwan chʼichichasqachu. Chantapis allin kausayta apamoj rey Jesucristota yanapanallapuni.