Jehovaqa Abraham amigon kasqanta nerqa

1, 2. 1) ¿Imaynatá yachanchej Diospa amigosnin kayta atisqanchejta? 2) ¿Imamantataj kay yachaqanapi yachakusunchej?

RUNASQA nacekusqanchejmantapacha, wañupunanchejkama wajkuna munakunawanchejta necesitanchej. Chayrayku warminchej chayri qosanchej, familiaresninchej, amigosninchej ima munakunawanchejta necesitanchej. Chaywanpis Jehová munakunawanchejta astawanraj necesitanchej. Ashkha runas yuyanku Jehová Diosman qayllaykuyta amigosnin kayta mana atisqanchejta, payta mana rikusqanchejrayku, tukuy atiyniyoj kasqanrayku ima. Chaywanpis noqanchejqa Jehovawan amigos kayta atisqanchejta yachanchej.

² Imaraykuchus Bibliaqa ashkha runas Diospa amigosnin kasqankumanta parlan. Paykunamantataj mayta yachakusunman. Imaraykuchus Jehovawan amigos kayqa ni imawan kikinchakunchu. Kay yachaqanapitaj Abrahampa kausayninmanta yachakusunchej (Santiago 2:23 leey). Payqa Jehovapi creesqanrayku paypa amigon karqa. Chayrayku Bibliaqa Abraham “tukuy creejkunaj tatanku” kasqanta nin (Rom. 4:11). Kausayninmanta yachakushaspataj tapurikuna: “¿Imatataj ruwayman Abraham jina creeyniyoj kanaypaj? ¿Imaynatataj Jehovaj amigon kasqayta kallpachayman?”, nispa.

3, 4. 1) ¿Maykʼajtaj Abraham sinchʼi creeyniyoj kasqanta rikucherqa? 2) Abraham creeyniyoj kasqanrayku, ¿imatataj yacharqa?

³ Abrahamta rikushasunmanpis jina tʼukurina. Payqa 125 watasniyoj jinaña kashan, ñakʼaytataj uj orqoman wicharishan.^[1] Qhepantataj wawan Isaac llantʼa qʼepirisqa rishan, payqa 25 watasniyojña. Abrahamtaj uj cuchillota, ninata japʼichinanpaj imastawan apashan. Ichapis chay kutipi Abrahamqa mana riyta atishallanchu, Jehová wawanta qʼolachinanta nisqanrayku. Manataj machitu kasqanraykuchu, imaraykuchus payqa kallpayojraj karqa (Gén. 22:1-8).

⁴ Ichapis chay kutipi Abrahamqa sinchʼi creeyniyoj kasqanta rikuchinan karqa. Wakin runasqa Dios sajra kasqanta ninku, Abrahamman wawanta qʼolachinanta kamachisqanrayku. Wakintaj ninku Isaacta Abraham mana munakusqanrayku qʼolachiyta munasqanta. Runasqa Diospi mana creesqankurayku tukuy imata ninku, nitaj yachankuchu cheqa creeyninchejrayku imastachus ruwayta atisqanchejta (1 Cor. 2:14-16). Chaywanpis Abrahamqa cheqa creeyniyoj karqa, chayrayku imatachus ruwashasqanta yachaspa Jehovata kasukorqa. Chantapis yacharqa Jehová ñakʼarichinanpaj jina ima kamachiytapis mana qonanta. Astawanpis yachallarqataj Jehovata kasukojtin, pay, wawan ima bendecisqa kananta. ¿Imaynatataj chayta yacharqa? Jehovamanta imastachus yachakusqanrayku, kausayninpi yanapasqanrayku ima.

 5. 1) ¿Imaynatá Abraham Jehovamanta yachakorqa? 2) ¿Imaynatá yachakusqan Abrahamta yanaparqa?

⁵ Jehovamanta imastachus yachakusqan. Abrahamqa Ur llajtapi wiñakorqa. Runasqa chay llajtapi llulla diosesta yupaychaj kanku, jinallataj tatanpis (Jos. 24:2). Chaywanpis, ¿imaynatá Abraham Jehovamanta yachakorqa? Bibliaqa Sempa mirayninmanta pay jamusqanta niwanchej, Semtaj Noej wawan karqa. Wañuporqataj Abraham 150 watasniyoj jina kashajtin. Chantapis payqa sinchʼi creeyniyoj karqa, ichá familiaresninmanpis Diosmanta willarerqa. Abrahampis paynejtasina Jehovamanta yachakorqa. Chay yachakusqantaj Abrahamta Jehovata munakunanpaj, sinchʼi creeyniyoj kananpaj ima yanaparqa.

6, 7. ¿Imaynamantataj Abraham sinchʼi creeyniyoj karqa?

⁶ Kausayninpi Jehová yanapasqan. ¿Imaynamantataj Abraham sinchʼi creeyniyoj karqa? Wakenqa imatachus yuyasqanchej sonqonchejman chayasqanta, chantá imachus sonqonchejpi kasqanman jina imatapis ruwasqanchejta ninku. Imastachus Jehovamanta yachakusqan Abrahampa sonqonman chayarqa. Payqa Jehovamanta ashkha imasta yachakorqa. Chay yachakusqantaj “Patapi Kaj Dios[ta], pichus cielotawan, kay pachatawan Ruwaj[ta]” jatunpaj qhawananpaj yanaparqa (Gén. 14:22, 23). Waj parlaypi nisunman Abrahamqa Jehovata ‘manchachikorqa’ chayri sonqonta nanachinanpaj jina imatapis mana ruwayta munarqachu (Heb. 5:7, Qheshwa Biblia). Chaytaj Jehovata tukuy imapi kasukunanpaj yanaparqa. Noqanchejpis Jehovaj amigosnin kayta munanchej chayqa, payta jatunpaj qhawananchej tiyan (Sal. 25:14).

⁷ Jehovaqa Abrahamtawan Saratawan Ur llajtamanta mana rejsisqanku llajtaman ripunankuta nerqa. Paykunaqa niña joveneschu karqanku, chantapis tukuy kausayninkupi toldospi tiyakunanku karqa. Abrahamqa chʼampaykunapi rikukunankuta yachaspapis, Jehovatapuni kasukuyta munarqa. Kasukusqanraykutaj Jehová bendicerqa, jarkʼarqa ima. Sutʼincharinapaj, uj kuti Abrahampa warminta may kʼachita kasqanrayku uj rey japʼikaporqa, chayraykutaj Abrahampa kausaynin wañuy patapi kasharqa. Chaywanpis Jehová uj milagronejta Abrahamta, warminta ima chay kutipipis jarkʼallarqataj (Gén. 12:10-20; 20:2-7, 10-12, 17, 18). Tukuy chaykunataj Abrahamta sinchʼi creeyniyoj kananpaj yanaparqa.

 8. Jehovawan amigosllapuni kanapaj, ¿maypitaj paymanta, imaynatachus kamachisninta yanapasqanmantapis yachakusunman?

⁸ Noqanchejrí, ¿Jehovawan sumaj amigos kayta atisunmanchu? Arí. Abraham jinallataj noqanchejpis Jehovamanta yachakunanchej tiyan. Imatachus Jehovamanta yachakuyta necesitasqanchejta, imaynatachus kamachisninta yanapasqanta Bibliapi leeyta atinchej. Abrahammanta nisqaqa astawan yachakuyta atinchej (Dan. 12:4; Rom. 11:33). Bibliaqa “cielotawan, kay pachatawan Ruwaj[manta]” mayta parlan. Bibliapi yachakusqanchejtaj Jehovata munakunapaj, jatunpaj qhawanapaj ima yanapawanchej. Chaytaj Payta kasukunapaj yanapawanchej. Kasukusqanchejraykutaj payqa bendeciwanchej, jarkʼawanchej ima, ajinamanta rikunchej imaynatachus Jehová kausayninchejpi yanapawasqanchejta. Jehovata tukuy sonqo sirvispaqa, kusikunchej, sonqo tiyasqataj kanchej (Sal. 34:8; Pro. 10:22). Jehovamanta astawan yachakojtinchej, kausayninchejpi yanapawasqanchejta rikojtinchej ima, paywan amigosllapuni kasunchej, creeyninchejpis kallpachakonqa.

9, 10. 1) ¿Imatataj ruwananchej tiyan pillawanpis amigosllapuni kanapaj? 2) ¿Imaynatataj Abraham Jehovaj amigon kasqanta jatunpaj qhawasqanta, kallpachasqanta ima rikucherqa?

⁹ Uj amigoqa may valorniyoj (Proverbios 17:17 leey). Chayta uj plantitawan kikincharina. Uj plantita wiñananpaj, tʼikarinanpaj imaqa sumajta qhawana, qarpana ima. Ajinallataj amigos kaywanpis. Pillawanpis amigosllapuni kanapajqa mayta kallpachakunanchej tiyan. Abrahamqa Jehovaj amigon kasqanta may jatunpaj qhawarqa, kallpachakorqataj amigollanpuni kananpaj. ¿Imaynatá chayta ruwarqa?

¹⁰ Abrahamqa Jehovata kasukunanpaj, jatunpaj qhawananpaj ima mayta kallpachakullarqapuni. Canaanman familianwan, kamachisninwan ima rishaspapis tukuy ima ruwasqanpi Jehová yanapananta saqerqa. Chantá Jehovaqa Isaac nacekunanpaj uj wata faltashajtin, Abrahamman wasinpi tukuy qharista circuncidananta kamacherqa. Chaypachaqa Abraham 99 watasniyoj kasharqa. ¿Imatataj Abraham ruwarqa Jehová kamachejtin? ¿Iskayrayarqachu? Chayrí, ¿imatapis maskʼarqachu mana kasukunanpaj? Mana. Astawanpis Jehovapi atienekorqa, “chay kikin pʼunchaypacha[taj]” kasukorqa (Gén. 17:10-14, 23).

11. 1) ¿Imaraykutaj Abraham Sodoma, Gomorra llajtasmanta llakikorqa? 2) ¿Imaynatataj Jehová Abrahamta yanaparqa?

¹¹ Abrahamqa Jehovawan sumajta masichakorqa tukuy imapi payta kasukusqanrayku. Yacharqataj Jehovawan tukuy imamanta parlariyta atisqanta, mana entiendesqan imasmantapis. Sutʼincharinapaj, Jehová Sodoma, Gomorra llajtasta chinkachinanta nejtin, Abrahamqa kʼacha runas sajra runaswan khuska chinkachisqa kanankuta yuyasqanrayku mayta llakikorqa. Ichapis llakikorqa Sodomapi sobrinon Lot, familianwan tiyakushasqanrayku. Chaywanpis Abrahamqa “pachantinta juzgaj” Jehovapi atienekorqa. Chayraykutaj Jehovawan llakiyninmanta llampʼu sonqowan parlarerqa. ¿Imaynatá Jehová yanaparqa? Paywan pacienciakorqa, khuyakuyniyoj kasqantataj rikucherqa. Nerqataj runasta juzgashaspa, kʼacha runasta maskʼasqanta, salvasqanta ima (Gén. 18:22-33).

12, 13. 1) ¿Imaynatá Abrahamta yanaparqa Jehovamanta yachakusqan, kausayninpi yanapasqan ima? 2) ¿Imaynatá yachanchej Abraham Jehovapi atienekusqanta?

¹² Abrahamtaqa Jehovamanta tukuy imata yachakusqan, kausayninpi yanapasqan ima, Jehovaj amigollanpuni kananpaj yanaparqa. Chayrayku aswan qhepaman wawanta qʼolachinanta Jehová nejtin, yacharqa Jehová pacienciayoj, khuyakuyniyoj ima kasqanta, jarkʼayta atisqanta, atienekunapaj jina kasqanta ima. Ni jaykʼajtaj yuyarqachu Jehová sajraman tukusqanta. ¿Imaraykú chayta ninchej?

¹³ Abrahamqa niraj orqoman Isaacwan wicharishaspa, kamachisninman nerqa: “Qankunaqa kayllapi burrowan qhepakuychej, noqataj churiywan jaqayman rispa, Diosta yupaychaytawan kutimpusqayku”, nispa (Gén. 22:5). ¿Imaraykú Abraham kamachisninta “kutimpusqayku” nispa nerqa? ¿Llullakusharqachu? Mana. Bibliaqa Abraham, Isaacta, Jehová kausarichimunanpi atienekusqanta nin (Hebreos 11:19 leey). Chantapis Abrahamqa yacharqa pay, warmin ima, viejitusña kajtinkupis wawayoj kanankupaj Jehová yanapasqanta (Heb. 11:11, 12, 18). Chayrayku yacharqa Jehovapajqa tukuy ima atikusqanta. Chay pʼunchaypi imachus kananta mana yachaspapis, Isaacta Jehová kausarichimunanpi atienekorqa, Diospa tukuy ima nisqan juntʼakunanpaj. Chayrayku Bibliaqa Abraham “tukuy creejkunaj tatanku” kasqanta nin.

14. 1) Jehovata yupaychayninchejpi, ¿imastataj mana ruwayta atillanchejchu? 2) ¿Imaynatá Abrahampa ruwasqan yanapawasunman?

¹⁴ Kay tiempopi Jehovaqa mana wawasninchejta qʼolachinanchejtachu niwanchej, manaqa leyesninta kasukunanchejta. Wakin kuteqa ichá mana entiendeyta atillasunchu imaraykuchus imatapis kamachiwasqanchejta. Chayri ichá mana kasukuyta atinapaj jinachu kasqanta yuyasunman. Wakenqa ichapis manchalis kasqanchejrayku mana rejsisqa runasman willayta mana atillanchejchu. Wakintaj llankʼayninchejpi, escuelapi ima Jehovaj testigosnin jina rejsichikuyta manchachikunchej (Éxo. 23:2; 1 Tes. 2:2). Ajinapi rikukuspa, Abraham sinchʼi creeyniyoj, mana manchachikoj kasqanpi ima tʼukurisunman. Chantapis ñaupa tiempomanta waj cheqa sonqo runaspi tʼukurillasunmantaj. Ajinamanta paykuna jina ruwasun, Jehovawanpis amigosllapuni kasun (Heb. 12:1, 2).

15. ¿Imaraykutaj ninchej Abraham Jehovata kasukusqanmanta ni jaykʼaj pesachikusqanta?

¹⁵ Abrahamqa Diosta kasukusqanmanta, cheqa sonqo kasqanmanta ima ni jaykʼaj pesachikorqachu. Biblia nin: “Abrahamqa wañuporqa allin wañuypi, allin machuña, ashkha watasniyojtaj [sonqo juntʼasqataj]”, nispa (Gén. 25:8). Abrahamqa 175 watasniyoj kashaspa, kausayninpi imastachus ruwasqanpi tʼukurispa, sonqo juntʼasqa kasharqa. Imaraykuchus paypajqa Jehovaj amigon kay may sumaj karqa. Chaywanpis Bibliapi machituña, sonqo juntʼasqataj kasqanta nisqanqa, mana ninayanchu aswan qhepaman manaña kausakuyta munasqanta.

16. ¿Imasraykutaj Abraham paraisopi kusikonqa?

¹⁶ Biblia nin: “Abraham suyasharqa jaqay sumaj cimientosniyoj llajtata, mayqentachus Dios wakicherqa, sayacherqataj, chayta”, nispa (Heb. 11:10). Chay llajtaqa Diospa Reinonwan ninakun. Abrahamtaj chay Reino uj pʼunchay kay Jallpʼata kamachimunanta yacharqa. Abraham paraisopi kausakushaspa may kusisqa kananpi, Jehovaj amigon kanallanpajpuni kallpachakunanpi ima tʼukurina. Maytachá kusikonqa creeynin Diospa kamachisninta tukuy kay wataspi yanapasqanta yachaspa. Imatachus wawan Isaacwan ruwasqan, aswan qhepaman Jehová ruwasqanwan kikinchakusqantapis yachanqa (Heb. 11:19). Chantapis yachallanqataj wawanta wañuchiyta munashajtin sonqon mayta nanasqan, ashkha cristianosta yanapasqanta, entiendenankupaj imaynatachus Jehovaj sonqon nanasqanta wawanta noqanchejrayku qoshajtin (Juan 3:16). Abrahampa ruwasqanqa Jesuspa wañuyninta astawan jatunpaj qhawanapaj yanapawanchej, imaraykuchus chaynejta Jehová mayta munakuwasqanchejta rikuchiwanchej.

17. 1) ¿Imatataj tukuypis ruwayta munanchej? 2) ¿Imatataj qhepan yachaqanapi yachakusunchej?

¹⁷ Abraham jina creeyniyoj kanapaj mayta kallpachakuna. Chantapis Jehovata astawan rejsinapaj, payman cheqa sonqollapuni kananchejpaj kallpachakusun chayqa, imaynatachus bendeciwasqanchejta, jarkʼawasqanchejta ima rikusunchej (Hebreos 6:10-12 leey). Ajinamanta Jehová amigonchej kanqa. Qhepan yachaqanapitaj kinsa sumaj amigosninmanta yachakusunchej.