Creejwanpuni casarakuy kamachiyta ¿juntʼayta atikullanchu?

Diospa wakin kamachisninpis kikillantataj ninku. Yachankutaj creejwanpuni Jehová casarakunankuta munasqanta (1 Cor. 7:39). Jina kajtin, ¿imaraykú wakin cristianos jinata ninku?

Wakin cristianos ajinata ninku, ichapis qotuchakuykunapi hermanosmanta nisqa astawan hermanas kasqanta rikusqankurayku. Ashkha suyuspi chayqa jinapuni. Sutʼincharinapaj, Coreapi sapa 100 soltero hermanosmanta 57 warmis kanku, qharistaj 43 kanku. Colombiapitaj sapa 100 soltero hermanosmanta 66 warmis kanku, qharistaj 34 kanku.

Wakin lugarespeqa casarakuyta munaj qhareqa, warmej tatasninman qolqeta, valorniyoj imasta ima qonan tiyan. Warmej tatasnin mana testigos kajtinkoqa ichá suyanqanku ashkha qolqeta, may valorniyoj imasta ima qonanta. Wakin soltero hermanostaj ichapis ajinata pagayta mana atillankuchu. Chayrayku chay suyusmanta hermanasqa uj cristianowan ni jaykʼaj casarakuyta atinankuta yuyaspa llakikunku.a

Maykʼajllapis ajinata llakikorqanki chayqa, Jehová imaynachus kashasqaykita yachasqanta yuyarikuy (2 Cró. 6:28-30).

Jehovaqa Biblianejta kamachiwanchej, paypi creej runallawan casarakunata. Imaraykuchus Payqa yachan imachus noqanchejpaj allin kasqanta, jarkʼaytataj munawanchej. Payqa munan allin kajta ajllananchejta mana ñakʼarinanchejpaj. Nehemiaspa tiemponpeqa ashkha judíos Diosta mana yupaychaj warmiswan casarakorqanku. Chayrayku Nehemiasqa Salomón mana allintachu ruwasqanmanta parlaspa, nerqa: “Diosqa payta munakorqa, tukuynin israelitasmantataj rey kanampaj churaykorqa. Chaywampis chay waj llajtayoj kaj warmis paytaqa juchallicherqanku”, nispa (Neh. 13:23-26). Jehovaqa allinninchejrayku, payta yupaychajllawan casarakunata kamachiwanchej (Sal. 19:7-10; Isa. 48:17, 18). Jehovaman mayta agradecekunchej munakuywan yuyaychawasqanchejmanta, atienekunapaj jina kasqanmanta ima. Jehovata Kamachejninchejta jina kasukuspataj, paylla imatachus ruwananchejta niyta atiwasqanchejta rikuchinchej (Pro. 1:5, 6).

Cheqamantachá Diosta mana munakoj runawanqa mana casarakuyta munawajchu, imaraykuchus Diosmanta karunchasunkiman (2 Cor. 6:14). Jehovaj yuyaychaykunasnenqa allinninchejpajpuni. Kunanpis ashkha cristianos Jehovata kasukuyta ajllanku.

Australiamanta Maggy sutiyoj hermana Diosta mana yupaychaj runawan rejsinakuyta qallarerqa.b Pay nin: “Chay runawan khuska kanayrayku ashkha tantakuykunaman mana rejchu kani, creeyniypitaj llauchʼiyarqani”, nispa. Indiamanta Ratana sutiyoj warmi yachaywasimanta compañeronwan rejsinakuyta qallarerqa, chay waynaqa payraykulla Bibliamanta yachakuyta qallarerqa. Pisimanta, pisitaj chay warmeqa Jehovata yupaychayta saqeporqa, chay waynawan casarakunanraykutaj llulla religionman riporqa.

Camerunmanta Ndenguè sutiyoj hermana 19 watayoj kashaspa, Jehovata mana yupaychaj runawan casarakorqa. Niraj casarakushajtintaj, chay runaqa Jehovata yupaychajta saqenallanta nerqa. Casarakusqankumanta iskay semananmantaj manaña tantakuykunaman rejta saqenanta nerqa. Chayrayku hermanaqa ni imata ruwayta atispa mayta waqarqa. Repararqataj mayta pantasqanta, Jehovata mana kasukusqanmantataj pesachikorqa.

Ichapis Diosta mana yupaychajkunamanta uj kʼacha runata tariwaj. Chaywanpis chay runawan casarakuspa, ¿Jehovawan allinpi kayta atillankipunichu? Jehovaj kamachiyninta mana kasukusqaykirayku, ¿kusisqachu kanki? ¿Chay ruwasqaykiwan Jehová kusikonqachu? (Pro. 1:33.)

Ashkha hermanosqa creejllawan casarakuymanta kamachiyta kasukunku, chayta ruwasqanku may sumaj kasqantataj reparanku. Soltero hermanos, hermanas ima Jehovata kusichinankupaj creejllawan casarakuyta munanku. Japonmanta Michiko sutiyoj hermanaqa, Jehovatapuni kasukuyta munarqa, familiaresnin Jehovata mana yupaychajwan casarakunanta nejtinkupis. Payqa mayta llakikorqa solterallapuni kashasqanmanta, amigasninta casarakojta rikuspa. Ajinapi kashaspataj kusisqa kanapaj mana casarakunapunichu kasqanta, manaqa kusikuyniyoj Diosta sirviy aswan sumaj kasqanta yuyarikoj (1 Tim. 1:11, NM). Yachantaj Jehová imatachus necesitasqanchejta qonawanchejta. Chayrayku pay nin: “Uj hermanota casarakunanchejpaj mana tarejtinchejqa, aswan allin sapallanchej kakunanchej”, nispa. Hermananchejqa aswan qhepaman uj sumaj hermanowan casarakorqa, may kusisqataj kashan Jehovaj yuyaychasqanta kasukusqanrayku.

Wakin soltero hermanosninchejpis, kikillantataj suyakunku uj allin hermanata casarakunankupaj tarinankukama. Sutʼincharinapaj, Australia suyumanta Billqa Jehovata mana yupaychaj warmis wakin kutis gustasqanta nerqa. Chaywanpis ni jaykʼaj ni mayqen warmiwan anchata masichakorqachu, rejsinakuyta mana qallarinanpaj. Watas pasasqanman jina Billqa, qotuchakuymanta wakin hermanaswan rejsinakuyta munarqa, paykunataj mana munarqankuchu. Payqa 30 watasta suyarqa, pay jina ruwayta yuyaj hermanawan casarakunanpaj. Bill nin: “Chay chhika watasta suyakusqaymanta mana pesachikunichu, imaraykuchus warmiywan khuska willaj riyku, Bibliata ukhunchayku, khuskallataj Diostapis yupaychayku. Chantapis mayta kusikuni warmiypa amigosninwan kaspa, imaraykuchus paykunaqa noqayku jinallataj Diosta yupaychanku. Bibliaj yuyaychaykunasninwantaj qhariwarmi kausayniykuta kallpachayku”, nispa.

Jehovata kasukusqaykirayku solterollapuni kashanki chay, ¿imataj yanapasunkiman suyakunallaykipajpuni? Kasukusqaykirayku Jehová kusisqallapuni kasqanpi tʼukuriy (1 Sam. 15:22; Pro. 27:11). Chantapis Diosmanta mañakushaspa imaynachus kashasqaykita willay (Sal. 62:8). Sajra munaykunata atipanaykipaj mayta kallpachakullankipuni chayqa, Jehovaman astawan qayllaykunki. Yuyarikuytaj Jehová qanmanta llakikusqanta, imaraykuchus paypajqa may valorniyoj kanki. Jehovaqa mana pimanpis ninchu uj qosata chayri uj warmita qonanta. Chaywanpis casarakuytapuni munanki chayqa, Jehová yachan imaynatachus yanapasunanta (Sal. 145:16; Mat. 6:32).

Wakin kutisqa ichapis David jina sientekuwaj, pay nerqa: “Tata Dios, usqhayllata uyariway, imaraykuchus samayniy tukukapushanña; ama uyaykita pakaykuwaychu”, nispa (Sal. 143:5-7, 10). Ama saykʼuychu, suyaytaj Jehová mañakuykunasniykiman kutichisunanta. Chantapis Bibliata sapa pʼunchay leey, leesqaykipitaj tʼukuriy. Ajinamanta yachanki imatachus Jehová ruwanaykita munasqanta, imaynatachus ñaupa tiempopi kamachisninta yanapasqantapis. Chaytaj yanapasonqa Jehovapi atienekunaykipaj, kasukunaykipaj ima.

Kusisqallapuni kanaykipajtaj, Jehovawan allinpi kasqaykita kallpachallaypuni, wajkuna allinpaj qhawasunankupajpis kallpachakullaypuni. Yachakullaytaj qorikoj kayta, sumaj llankʼaj kayta, wajkunawan allinta kausakuyta, Jehovaman cheqa sonqo kayta ima. Kay kʼacha kaykunaqa casarakojtiyki kusisqa kanaykipaj yanapasonqa (Gén. 24:16-21; Rut 1:16, 17; 2:6, 7, 11, 12; Pro. 31:10-27). Diospa Reinonta ñaupajta maskʼay, willayman llojsiy, qotuchakuypi ruwanastapis ruway. Chaytaj allin kajta ajllanaykipaj yanapasonqa. Billqa soltero kausayninmanta nin: “Watasqa uj ima jinalla riporqa. Jehovata sirvinaypajtaj precursor jina llankʼarqani”, nispa.

Diospi creejllawan casarakunamanta kamacheyqa, kay tiempopipis yanapashallawanchejpuni. Imaraykuchus chay kamachiyta kasukoyqa Jehovata jatunchan, noqanchejtapis kusichiwanchej. Biblia nin: “Kusikuyniyojmin Tata Diosta manchachikoj runaqa, kamachisqasninwantaj miskʼirichikoj runaqa. Wasimpi payqa tukuy imasniyoj; cheqan kaynenqa mana tukukuyniyojmin”, nispa (Sal. 112:1, 3). Chayrayku Jehová kamachisqanman jina, paypi creejllawan casarakuy.