Kausayniykita Diosman jaywapuy, bautizakuytaj

 1. Bibliamanta yachakuspaña, ¿imatawan ruwana kanman?

¹ KUNANKAMAQA ashkhataña Bibliamanta yachakunchej. Yachakorqanchej, Diosninchejqa wiñay kausayta qoyta munawasqanchejta, wañuspa mana maymanpis risqanchejta, wañusqas kausarimunankuta ima (Eclesiastés 9:5; Lucas 23:43; Juan 5:28, 29; Apocalipsis 21:3, 4). Ichapis Jehovaj testigosninpa tantakuyninkuman rishankiña, creenkitaj paykunapuni cheqan religión kasqankuta (Juan 13:35). Chantapis ichá Jehová Diosman qayllaykunkiña, paytataj sirviyta munanki. Chayrayku ichapis yachayta munanki, imatawanchus ruwanayki kasqanta Diosta sirvinaykipaj.

 2. ¿Imajtintaj Etiopía llajtayoj runa bautizakuyta munarqa?

² Jesuspa tiemponpi uj runa karqa. Payqa Etiopía llajtamanta karqa. Jesús kausarimusqanmanta pisi tiemponman, Etiopía llajtayoj runaqa Jesuspa yachachisqan Felipewan parlarqa. Felipetaj chay runaman yachacherqa, Jesusqa suyasharqanku chay Mesías kasqanta. Chayta yachaspa, Etiopía llajtayoj runaqa Diosta sirvikuyta munarqa. Chayrayku nerqa: “¡Qhawariy! Kaypi yaku tiyan. ¿Imajtintaj mana bautizakuymanchuri?”, nispa (Hechos 8:26-36).

 3. 1) ¿Imatataj Jesús yachachisqasninman nisqa? 2) ¿Imaynatá cristianos bautizakunanku kasqa?

³ Bibliaqa sutʼita niwanchej, Jehová Diosta sirvinapajqa bautizakuna kasqanta. Jesusqa yachachisqasninman nerqa: “Tukuy laya runasta yachachisqasniyman tukuchimuychej, bautizaspa”, nispa (Mateo 28:19). Jesusllataj yachachiwanchej imaynatachus bautizakuna kasqanta. Juan Bautistaqa, Jesusta bautizananpaj tukuynin cuerponta yakuman chinkaykucherqa, manataj umallantachu yakuwan chhalluykorqa chayri chhallpaykorqa (Mateo 3:16). Chayrayku kunanpis, cristianosqa bautizachikunku entero cuerponkuta chʼultiykuchikuspa chayri pʼultiykuchikuspa.

 4. Bautizakuspa, ¿imatá rikuchinchej?

⁴ Bautizakuspaqa Diosta munakusqanchejta rikuchinchej, tukuy sonqotaj munayninta ruwayta munasqanchejta (Salmo 40:7, 8). Chayrayku ichapis yachayta munanki, bautizakunaykipaj imatachus ruwanayki kasqanta.

 5. 1) ¿Imatataj bautizakunapaj ruwana kasqa? 2) ¿Imaraykutaj tantakuykunaman jamunaykipuni tiyan?

⁵ Bautizakunapajqa, Jehová Diosta, Jesustawan rejsina tiyan. Bibliata estudiaspataj paykunata rejsishankiña (Juan 17:3 leey). Jinapis mana chayllatachu ruwana tiyan. Bibliaqa nin, Diospa ‘munayninta allinta rejsinanchej kasqanta’ (Colosenses 1:9). Jehovaj testigosninpa tantakuyninkutaj, Diosman astawan qayllaykunaykipaj yanapasonqa. Chayrayku tantakuykunamanqa jamunaykipuni tiyan (Hebreos 10:24, 25).

 6. Bautizakunapaj, ¿Bibliamanta tukuy imatapunichu yachana kasqa?

⁶ Bautizakunapaj, ¿Bibliamanta tukuy imatapunichu yachananchej tiyan? Mana. Jehová Diosninchejqa mana chaytachu niwanchej. Etiopía llajtayoj runapis, bautizakunanpaj mana tukuy imatapunichu yacharqa (Hechos 8:30, 31).  Jehová Diosmantaqa ni jaykʼaj yachayta tukusunchu (Eclesiastés 3:11). Jinapis bautizakunapajqa, “Diospa palabranmanta qallariy yachachiykunata” entiendena tiyan (Hebreos 5:12).

 7. Bibliapi yachakusqanchej, ¿imapajtaj yanapawanchej?

⁷ Bibliaqa nin: “Mana creeyniyoj kaspaqa, manapuni Diospa ñaupaqenpi allinpaj qhawasqa kayta atisunmanchu”, nispa (Hebreos 11:6). Chayrayku bautizakunapajqa Diospi creena tiyan. Bibliaqa Corinto nisqa llajtamanta parlawanchej. Chay llajtamanta runasqa, apóstol Pablota uyarispa “creeyta qallarerqanku, bautizakorqankutaj” (Hechos 18:8). Ajinallatataj kunanpis, Bibliapi yachakusqanchejqa Diospa nisqasninpi creenapaj yanapawanchej. Chantapis yanapallawanchejtaj, Jesús salvanawanchejpaj wañusqanpi creenapaj (Josué 23:14; Hechos 4:12; 2 Timoteo 3:16, 17).

 8. ¿Imataj yanapasonqa Bibliamanta wajkunaman willarinaykipaj?

⁸ Bibliamanta astawan yachakuspaqa, reparanki yachakusqayki yanapasusqanta. Creeyniykitaj aswan sinchʼi kanqa. Creeyniyki sinchʼi kajtintaj, Bibliapi yachakusqaykita  wajkunaman  willariyta  munanki (Jeremías 20:9; 2 Corintios 4:13).

9, 10. 1) Bibliapi yachakusqaykita, ¿pikunamantaj willariwaj? 2) Jehovaj testigosninwan khuska willaj llojsinaykipaj, ¿imatataj ruwanayki tiyan?

⁹ ¿Pikunamantaj Bibliapi yachakusqaykita willariwaj? Familiasniykiman, amigosniykiman, vecinosniykiman, escuelamanta chayri trabajomanta compañerosniykimanpis. Chaytataj ruwanaykipuni tiyan. Jinapis willarishaspaqa kʼachamanta parlariy, respetowantaj. Chanta, ¿imatá ruwawaj Jehovaj testigosninwan khuska runasman willaj llojsinaykipaj? Hermanoswan khuska runasman willamuyta munanki chayqa, pichus Bibliamanta yachachisunki chay hermanoman chayri hermanaman willariy. Paytaj qhawarenqa willamunaykipaj wakichisqañachus manachus kasqaykita. Wakichisqaña kajtiyki, Bibliaj nisqantapis kasukushanki chayqa, iskayniykichej ancianos nisqa hermanoswan parlaj rinkichej.

¹⁰ Paykunamanta iskay ancianostaj qanwan parlarenqanku. Paykunaqa Bibliaj nisqanta entiendesqaykitachus manachus yachayta munanqanku. Chantá qhawarenqanku Bibliaj nisqanpi creesqaykitachus manachus. Chantapis reparanqanku Bibliaj nisqanta kasukushankichus manachus, chayta. Chantá qhawarillanqankutaj, Jehovaj testigon kayta munasqaykitachus manachus. Ajinata parlarisqaykichejtawan, ancianosqa predicacionman llojsiyta atisqaykitachus manachus willasonqanku. Jehová Diosqa ovejasninta ancianospa makisninkuman churan, paykunata qhawanankupaj. Chayrayku mana manchachikuspa paykunawan parlariy (Hechos 20:28; 1 Pedro 5:2, 3).

11. Congregacionwan willaj llojsinaykipaj, ¿imaynatá kausakunayki tiyan?

¹¹ Ancianosqa ichapis nisonqanku, congregacionwan willaj llojsinaykipajqa, kausayniykipi wakin imasta allinchanayki kasqanta. Jinata nisojtinku, ¿cambianaykichu kanman? Arí. Imajtinchus Jehová Diospa sutinpi runasman willaj rinchej. Chayrayku kausayninchejqa Payta jatunchanan tiyan (1 Corintios 6:9, 10; Gálatas 5:19-21).

12. ¿Imaraykutaj tukuyninchejpis juchasninchejmanta pesachikuna kasqa?

¹² Bautizakunapaj, ¿imatawan ruwana tiyan? Apóstol Pedro nerqa: “Juchasniykichejmanta pesachikuychej, Diosmantaj kutirikuychej”, nispa (Hechos 3:19). Ñaupajta khuchichakuy juchapi purerqanki chayqa, pesachikunayki tiyan. Mana sajra imasta ruwankichu chaypis, juchasniykimanta pesachikunallaykitaj tiyan. Imaraykuchus tukuyninchej juchasapas kanchej, Diospa perdonnintataj necesitanchej (Romanos 3:23; 5:12).

13. ¿Imaynatataj Diosman kutirikusunman?

¹³ Bautizakunapajqa, ¿pesachikunallachu tiyan? Mana. Apóstol Pedroqa “Diosmantaj kutirikuychej” nispa nillarqataj. ¿Imaynatataj Diosman kutirikusunman? Chayta ruwasunman, ñaupa kausayninchejta saqespa, allin kajtataj ruwayta qallarispa. Chayta entiendenapaj, mana rejsisqayki lugarman rishasqaykipi tʼukuriy. Unaysituta puriytawan, waj ladoman rishasqaykita reparakunki. ¿Imatá ruwawaj? ¿Manacharí rillawajpunichu? Astawanpis kutirikuwaj, chantataj may ñantachus rinayki kashan chayman kutiriwaj, ¿icharí? Jinallataj Bibliata estudiaspaqa, ichapis reparanki wakin imaspi pantashasqaykita. Jina kajtenqa cambiay, allin kajtataj ruway. Ajinamanta Diosman kutirikunki.

14. ¿Imaynatá niwaj Diosman payllapajña kausanaykita?

¹⁴ Bautizakunapajqa kausayninchejta Diosman jaywapuna chayri entregapuna tiyan. ¿Imaynatá chayta ruwawaj? Uj mañakuypi Diosman ninayki tiyan, payllapajña kausanaykita, payllatañataj yupaychanaykita (Mateo 4:10).

15, 16. Jehová Diosta munakuspa, ¿kausayniykita jaywapuyta atillankichu?

¹⁵ Jehová Diosninchejman kausayninchejta jaywapoyqa, casarakuyman rijchʼakun. Casarakojkunaqa sumajta rejsinakuspa casarakunku. Casarakunanku horatataj ninakunku, wañupunankama munanakunankuta, khuska kanankutataj. Paykunaqa yachanku, casarakusqanmanta qhepaman kausayninku manaña kikinchu kananta. Jinapis munanakusqankurayku casarakunku.

¹⁶ Qanpis Jehová Diosta astawan rejsispaqa, payta astawan munakunki, kasukuytataj munanki. Ajinata Diosta munakuspataj, payman kausayniykita tukuy sonqo jaywapuyta munanki. Jesusqa yachachisqasninman nerqa: “Sichus pipis qhepayta jamuyta munan chayqa, pay kikinta chejnikuchun”, nispa (Marcos 8:34). ¿Imaynatá qan kikiykita chejnikuwaj? Imamanta nisqapis Jehová Diosta astawan kasukuspa. Ajinamanta Jehová Diospa munayninta ruwanaykipaj kausanki, manañataj munaynillaykita ruwanaykipajchu (1 Pedro 4:2 leey).

17. ¿Imajtintaj wakin runas kausayninkuta Diosman jaywapuyta manchachikunku?

¹⁷ ¿Imajtintaj wakin runas kausayninkuta Diosman jaywapuyta manchachikunku? Paykunaqa yuyanku, Diosman nisqankuta mana juntʼayta atinankuta. Wakenqa ninku: “Pantaykojtiy Diosqa manaña perdonawanqachu”, nispa. Wakintaj ninku: “Mana bautizakojteyqa, Diosqa mana cuentata mañawanqachu”, nispa.

18. ¿Manchachikunachu kanman Diosman kausayninchejta qopuyta?

¹⁸ Jehová Diosninchejta munakuspaqa, mana manchachikuspa kausayniykita payman qopunki. Chantapis imatachus payman nisqaykita juntʼanaykipaj kallpachakunki (Eclesiastés 5:4; Colosenses 1:10). Diospa munayninta ruwaytaj, mana trabajochu kanqa. Apóstol Juanqa nerqa: “Diosta munakoyqa kamachisqasninta juntʼaymin, kamachisqasninta juntʼaytaj atina jinalla”, nispa (1 Juan 5:3).

19. Pantaj runa kaspapis, ¿kausayninchejta Diosman jaywapuyta atisunmanchu?

¹⁹ Jehová Diosqa yachan  pantaj runas kasqanchejta, ruwayta atisqallanchejtataj mañawanchej. Chayrayku pantaj runas kaspapis, kausayninchejta payman jaywapuyta atisunman (Salmo 103:14). Jehová Diosninchejqa allin kajta ruwanaykipaj yanapasonqa (Isaías 41:10). Chayrayku “tukuy sonqoykiwan Tata Diospi atienekuy”. “Paymin cheqan ñanta pusasonqa” (Proverbios 3:5, 6).

20. Jehová Diosman kausayniykita qopuytawan, ¿imatá ruwawaj?

²⁰ Ichapis qanqa  kausayniykita  Jehová  Diosman jaywapuyta munankiña. Kausayniykita Jehová Diosman qopuytawanqa, bautizakuyta atinki.

21, 22. Bautizakunki chay día, ¿imatataj ‘tukuy runasman simiykiwan willanki’?

²¹ Sichus kausayniykita Jehová Diosman jaywapunkiña, bautizakuytataj munanki chayqa, congregacionniykimanta mayqen ancianowanpis parlariy. Chantá wakin ancianos, Bibliapi yachakusqaykimanta tapurisonqanku. Sichus paykuna wakichisqaña kasqaykita reparanqanku chayqa, Jehovaj testigosninpa jatun tantakuyninkupi bautizakuyta atisqaykita nisonqanku. Chaypitaj uj hermano, bautizakuymanta astawan sutʼincharimonqa. Chantá payqa chay día bautizakojkunata iskay tapuyta ruwanqa. Chay iskay tapuyman kutichispaqa, sonqoykipi creesqaykita ‘tukuy  runasman  simiykiwan  willanki’ (Romanos 10:10).

²² Chaymantataj bautizakunki. Bautizaj hermanoqa tukuynin cuerpoykita yaku ukhuman chinkaykuchenqa. Bautizakuspaqa tukuy runasman rikuchinki, kausayniykita Jehová Diosman jaywapusqaykita. Chay ratomantapachataj Jehovaj testigon kanki.

23. 1) ¿Imajtintaj “Tata Diospa sutinpi” bautizakuna kasqa? 2) ¿Imajtintaj “Wawanpa sutinpi” bautizakuna kasqa? 3)  ¿Imajtintaj Diospa ‘atiyninpa sutinpi’ bautizakuna kasqa?

²³ Jesusqa yachachisqasninman nerqa, “Tata Diospa sutinpi, Wawanpa sutinpi, atiyninpa sutinpiwan” bautizakunankuta (Mateo 28:19 leey). “Tata Diospa sutinpi” bautizakuspaqa, Jehová Diosninchejta dueñonchejta jina qhawanchej. “Wawanpa sutinpi” bautizakuspataj, Diosninchej munayninta Jesusnejta juntʼasqanta jatunpaj qhawanchej. Jehová Diospa ‘atiyninpa sutinpi’ bautizakusparí, atiyninwan  tukuy  imata  ruwasqanpi creenchej (Salmo 83:18; Mateo 28:18; Gálatas 5:22, 23; 2 Pedro 1:21).

24. ¿Imatá bautizakuspa rikuchinchej?

²⁴ ¿Imatá bautizakuspa rikuchinchej? Yaku ukhuman chinkaykuspaqa, ñaupa kausayninchejpaj wañunchej. Yakumanta llojsimuspataj, uj mosoj kausayta qallarinchej. Chay ratomantapacha,  Jehová Diospa munayninta ruwanallapajña kausanchej. Kausayninchejtaqa Diosman jaywapunchej, manataj uj runamanchu, nitaj uj iglesiamanchu, nillataj uj llankʼaymanchu.

25. ¿Imatá qhepanta yachakusun?

²⁵ Jehová Diosman kausayniykita jaywapuspaqa, payman chimpaykapunki (Salmo 25:14). Jinapis ni pipis bautizakuytawan ninmanchu, “salvasqaña kani” nispaqa. Apóstol Pabloqa, ‘salvacionta tarinanchejpaj’ kallpachakunallapuni kasqanta nerqa (Filipenses 2:12). Bautismoqa qallariylla. Jina kajtin, ¿imatá ruwasunman Jehová Diosmanta mana karunchakunapaj? Chayta qhepanta yachakusun.