“Noqa kikiy ovejasniyta maskʼaj risaj”

 1. ¿Imaraykutaj Jehová Diosninchej uj mamawan kikinchakorqa?

PROFETA Isaiaspa tiemponpi, Jehová Diosqa llajtanman nerqa: “Uj warmeqa wawitanta qonqarparinmanchu?”, nispa. Chantá nillarqataj: “Pay qonqapunman chaypis, noqaqa ni jaykʼaj qonqasqaykichu”, nispa (Isa. 49:15). Jehová Diosqa chay kutillapi uj mamawan kikinchakorqa. ¿Imaraykutaj chayta ruwarqa? Imaynatachus uj mama ñuñoj wawitanta mayta munakun, ajinallatataj kamachisninta munakusqanta rikuchiyta munarqa. Hermananchej Jasmín nin: “Uj mama wawitanta ñuñuchejtin, astawan ujchasqa kanku. Purajmanta munanakusqankutaj ni jaykʼaj tukukunchu”, nispa. Ashkha hermanaspis pay jinallatajchá ninkuman.

 2. ¿Jehová Dios llakikunchu ujnin wawan chiriyapojtin?

² Jehová Diosqa sumajta yachan, sichus uj wawan tantakuykunaman, predicacionman ima manaña rinchu chayqa. Chayrayku sapa wata may chhika hermanos chiriyapojtinku,b Jehová Diosqa mayta llakikun.

 3. ¿Imatataj Jehová Dios mayta munan?

³ Chiriyapoj hermanosmanta ashkhasqa, Jehová Diospa llajtanman kutinpunku. Chaytaj mayta kusichiwanchej. Jehová Diosqa mayta munan chay hermanos kutinpunankuta. Noqanchejpis chayta munallanchejtaj (1 Ped. 2:25). ¿Imaynatá chay hermanosta yanapasunman congregacionman kutinpunankupaj? Niraj chay tapuyman kutichishaspa, ñaupajtaqa yachakuna imaraykuchus chay hermanos congregacionmanta karunchakapusqankuta.

 4. ¿Imapitaj wakin hermanos rikukunku trabajollaman satʼisqa kasqankurayku?

⁴ Ashkha hermanosqa trabajonkurayku congregacionmanta karunchakunku. Asiamanta hermanonchej Joelc nin: “Trabajollaypi satʼisqa kasharqani. Yuyarqani qhapaj kaspa Jehová Diosta sumajta sirvinayta. Ajinata yuyaspaqa mayta pantarqani. Qolqeyoj kanayrayku ashkha horasta trabajaj kani. Pisimanta pisitaj reunionesman faltakuyta qallarerqani. Jinamantataj congregacionmanta karunchakaporqani. Satanasqa sajra mundonmanta valekuspa, Diosmanta pisimanta pisi karunchawanchej”, nispa.

 5. ¿Imaraykutaj hermananchej Anne chiriyaporqa?

⁵ Wakin hermanosninchejqa, problemasninkurayku sinchʼi llakisqas kanku. Gran Bretaña suyumanta hermananchej Anneqa, phishqa wawasniyoj. Paytaj nin: “Ujnin wawayqa sinchʼi onqosqeta nacekusqanrayku, tukuy tiempo qhawanata necesitan. Chantá warmi wawayqa congregacionmanta qharqochikorqa. Ujnin qhari wawaytaj umitanmanta onqoykorqa. Anchatapuni llakikorqani. Chayrayku niña reunionesman, nitaj predicacionmanpis rerqaniñachu. Ajinapi chiriyaporqani”, nispa. Hermananchej Annemanta familianmantawan, mayta llakikunchej. Ashkha hermanosninchej, kikin llakiykunasniyojllataj kanku. Paykunamantapis llakikullanchejtaj.

 6. ¿Imataj kanman Colosenses 3:13 nisqanta mana juntʼajtinchej?

⁶ (Colosenses 3:13 leey). Wakin hermanosqa, waj hermano sonqonkuta nanachisqanrayku Jehová Diosmanta karunchakapunku. Apóstol Pablo nerqa, wakin kutis ‘wajkuna contranchejpi imatapis ruwanankutapuni’. Ichapis uj hermanoqa, qhasimanta imatapis niwasun chayri ruwawasun. Chay hermanota mana perdonaspaqa phiñasqallapuni kasunman. Chay phiñakuyta sonqonchejmanta mana wijchʼojtinchejtaj, congregacionmanta karunchakusunman. Sudamericapi tiyakoj hermanonchej Pablomanta parlarina. Paytaqa qhasimanta tumparqanku. Ancianostaj chayta creespa, congregacionpi ruwanasninta qhechorqanku. ¿Imatá hermanonchej Pablo ruwarqa? Pay nin: “Maytapuni phiñakorqani. Chantá pisimanta pisi congregacionmanta karunchakaporqani”, nispa.

 7. ¿Imapitaj uj hermano rikukunman sonqon juchachallajtinpuni?

⁷ Wakin hermanosninchejtaqa, jatun juchapi urmasqankurayku sonqonku juchachallanpuni. Yuyankutaj Jehová Diosninchej manaña paykunata munakusqanta. Chay hermanosqa ichapis juchankumanta pesachikunkuña, Jehová Diostaj paykunata perdonanña. Jinapis paykunaqa, manaña Diospa llajtanpi kanankupaj jinachu kasqankuta yuyanku. Hermano Franciscopis ajinallatataj yuyaj. Pay nin: “Khuchichakuy juchapi urmasqayrayku, congregacionpi kʼamisqa karqani. Jinapis reunionesman rishallarqanipuni. Pantasqayrayku sinchʼita llakikorqani. Yuyarqanitaj manaña Diospa llajtanpi kanaypaj jinachu kasqayta. Sonqoyqa juchachallawajpuni, piensarqanitaj Jehová Dios mana perdonawasqanta. Tiemponmanqa niña reunionesman, nitaj predicacionmanpis rerqaniñachu”, nispa. Chay tawa hermanosninchejmanta, ¿llakikunchejchu? ¿Paykunata entiendenchejchu? Jehová Diosninchejrí, ¿paykunamanta llakikunchu?

 8. Jehová Dios, ¿payta sirvejkunamanta qonqakunchu?

⁸ Ashkha hermanosqa, Jehová Diosta tukuy sonqo uj tiempota sirverqanku. Jinapis paymanta karunchakapunku. Jehová Diosqa mana paykunamanta qonqakunchu, nillataj paypaj llankʼasqankumantapis (Heb. 6:10). Profeta Isaiasqa Jehová Diosta uj sumaj michejwan kikincharqa, nerqataj chay michej jina llajtanta qhawasqanta. Pay nerqa: “Uj michej jina ovejasninta michenqa; corderosta makisninwan marqʼarikonqa”, nispa (Isa. 40:11). Sumaj Michejninchej Jehovaqa, mayqen ovejitallanpis paymanta karunchakojtin, mayta llakikun. Chaytataj Jesuspa ujnin kikinchaynin rikuchiwanchej. Jesusqa yachachisqasninman nerqa: “¿Ima niwajchejtaj qankuna? Uj runa 100 ovejasniyoj kashajtin, sichus uj ovejan chinkanman chayqa, ¿manachu 99 ovejasninta orqopi saqespa, chinkasqa ovejanta maskʼamunman? Cheqatapuni niykichej, chinkasqa ovejanta tarikapuspaqa, chay ovejanmanta astawan kusikun, 99 mana chinkajkunamanta nisqaqa”, nispa (Mat. 18:12, 13).

 9. Ñaupa tiempomanta sumaj michejkuna, ¿imaynatá ovejitasninkuta qhawaj kanku? (Tapapi dibujota qhawariy).

⁹ ¿Imajtintaj Jehová Diosninchej uj sumaj michej jina? Ñaupa tiempomanta sumaj michejkunaqa, ovejitasninkuta sumajta qhawaj kanku. Chay michejkunamanta ujqa, David karqa. Payqa ovejitasninta jarkʼananrayku, leonwan jukumariwanpis maqanakorqa (1 Sam. 17:34, 35). Sumaj ovejeroqa, uj ovejitan faltajtin chay rato reparan (Juan 10:3, 14). Ajina ovejeroqa 99 ovejitasninta corralman wisqʼaykuytawan, chayri waj ovejeroman saqeytawan, chinkaj ovejitanta maskʼaj rin. Jesusqa chay kikinchaywan, mashkhatachus Jehová Dios ovejitasninta munakusqanta yachacherqa. Pay nerqa: “Cielopi kashaj Tatayqa, mana munanchu ni ujpis kay juchʼuykunamanta chinkananta”, nispa (Mat. 18:14).

10. Ezequiel 34:11-16 nisqanman jina, ¿imaynatá Jehová Dios chinkasqa ovejitasninta maskʼananta nin?

¹⁰ Jehová Diosninchejqa sapa ujninchejta mayta munakuwanchej. Payqa tropamanta karunchakoj ovejitasnintapis mayta munakun. Chayrayku profeta Ezequielnejta nerqa, chinkasqa ovejitasninta maskʼananta, kutichikanpunantataj. Jehová Diosqa imaynatachus chayta ruwananta sutʼinchananpaj, imatachus uj sumaj michej ruwasqanmanta parlarqa (Ezequiel 34:11-16 leey). Sumaj michejqa kinsa imasta ruwaj. Ñaupajtaqa, chinkasqa ovejitanta maskʼaj rej. Chaypajtaj tiempochakoj, saykʼusqa kaspapis maskʼallajpuni. Ovejitanta tarikapuspataj tropaman watejmanta kutichej. Chantá ovejitan imanasqa kajtenqa, nanasqetanta jampiykoj, marqʼarikojtaj. Yarqhasqeta kajtintaj, mikhunata qoj. Ancianospis ajinallatataj ‘Diospa ovejitasninta’ qhawananku tiyan. Paykunaqa chinkasqa ovejitasta, chay michej jinallataj yanapananku tiyan (1 Ped. 5:2, 3). Mayqen hermanollapis congregacionmanta karunchakun chayqa, ancianosqa payta waturikoj rinku, congregacionman kutinpunanpajtaj yanapanku. Chantapis chay hermanota munakuywan yanapanku, Jehová Diosman watejmanta qayllaykunanpaj.d

11. ¿Imatataj sumaj michej yachan?

¹¹ Sumaj michejqa yachan, ovejitasqa chinkaytapuni yachasqankuta. Chayrayku uj ovejita tropamanta karunchakojtin, mana chay ovejitanta jasutʼinchu. Qhepan parrafospi Diospa kinsa kamachisninmanta parlarisun. Yachakusuntaj paykunaj creeyninku uj tiempota pisiyajtin, imaynatachus Jehová Dios paykunata yanapasqanta.

12. ¿Imaynatá Jehová Dios Jonasta yanaparqa?

¹² Jehová Dios profeta Jonasta Nínive llajtaman rinanta nejtin, Jonasqa mana kasukorqachu, waj ladomantaj riporqa. Jinapis Jehovaqa mana Jonasmanta nerqachu: “Kay runaqa mana ni imapaj valenchu”, nispa. Astawanpis Sumaj Michej kasqanrayku payta yanaparqa, kamachisqanta juntʼananpajtaj kallpacharqa (Jon. 2:7; 3:1, 2). Chaymanta qhepaman, Jehová Diosqa Jonaspaj uj “mathi yurata” wiñachiporqa. Chaywantaj entiendecherqa, runaspa kausayninkuta may valorniyojpaj qhawasqanta (Jon. 4:10, 11). ¿Imatá chaymanta yachakusunman? Ancianosqa chiriyapoj hermanosmanta mana ninankuchu tiyan: “Kay hermanota yanapanayqa qhasillaña kanman, jina kachun”, nispa. Astawanpis paykunaqa, imaraykuchus chay hermano chiriyapusqanta entiendenankupaj kallpachakunku. Congregacionman kutinpojtintaj, chay hermanota munakuywan yanapallankupuni.

13. ¿Imatá yachakunchej imaynatachus Jehová Dios salmistata yanapasqanmanta?

¹³ Bibliamanta 73 Salmota qhelqaj salmistaqa, sajra runasta allin risqanmanta envidiakorqa. Yuyarqataj Jehová Diosta kasukoyqa qhasilla kasqanta (Sal. 73:12, 13, 16). Ajinata yuyajtinpis, Jehová Diosqa mana paypaj phiñakorqachu. Astawanpis salmistaj nisqanta Bibliapi qhelqacherqa. Aswan qhepaman, salmistaqa manaña ajinatachu yuyarqa. Payqa reparakorqa, Jehová Diospa qayllanpi kayqa tukuy imamanta aswan sumaj kasqanta (Sal. 73:23, 24, 26, 28). ¿Imatá chaymanta yachakusunman? Wakin hermanosqa, Jehová Diosta sirviy allinninchejpaj kasqanmanta iskayrayanku. Ancianosqa mana chay hermanospaj phiñakunankuchu tiyan. Astawanpis imaraykuchus iskayrayasqankuta entiendenankupaj kallpachakunanku tiyan. Chay hermanosta entiendespaqa, Bibliawan sumajta yanapariyta atenqanku.

14. ¿Imajtintaj profeta Elías yanapata necesitarqa, chanta imaynatá Jehová Dios payta yanaparqa?

¹⁴ Profeta Eliasqa reina Jezabel wañuchinanta manchachikusqanrayku ayqekorqa (1 Rey. 19:1-4). Payqa yuyarqa, Diospa profetasninmanta payllaña kausashasqanta. Chantapis Jehová Diospaj llankʼasqan qhasilla kasqanta piensarqa. Mayta llakikusqanraykutaj wañupullaytaña munarqa (1 Rey. 19:3, 4, 10). Jinapis Jehová Diosqa, mana Eliaspaj phiñakorqachu. Astawanpis payman nerqa, mana sapanchu kashasqanta, atiyninwan yanapananta, waj llankʼaykunatawan qonanta. Jehová Diosqa Elías llakiyninta willarejtin, pacienciawan uyarerqa. Chantapis waj llankʼaykunata qorqa (1 Rey. 19:11-16, 18). ¿Imatá chaymanta yachakusunman? Tukuyninchej Jehová Diospa ovejitasninwan kʼachas kananchej tiyan. Ancianostaj astawanraj chayta ruwananku tiyan. Ichapis uj hermanoqa llakisqa kasqanrayku, rabianpi imatapis parlarparillanman. Waj hermanotaj Jehová Dios ni jaykʼaj perdonananta ninman. Ajinata parlajtinkupis, ancianosqa chay hermanosta pacienciawan uyarinanku tiyan. Chantá Jehová Diospaj may munasqa kasqankuta reparachinanku tiyan.

15. Juan 6:39 nisqanman jina, ¿imapajtaj Jesús kallpachakorqa?

¹⁵ Jehová Diosninchej, ¿chinkasqa ovejitasninmanta llakikunanchejta munanchu? Arí. Jesusqa chayta yachachiwanchej. Payqa yacharqa, Jehová Diospajqa tukuy ovejitasnin may valorniyoj kasqankuta. Chayrayku tukuy atisqanta ruwarqa, ‘Israelmanta chinkasqa ovejasta’ Jehová Diosman kutirichinanpaj (Mat. 15:24; Luc. 19:9, 10). Jesusqa Sumaj Michej kasqanrayku, mayta kallpachakorqa Tatanpa ovejitasninmanta ni ujta chinkachinanpaj (Juan 6:39 leey).

16, 17. ¿Imaynatá ancianos Diospa chinkasqa ovejitasninta yanapananku tiyan? (“¿Imaynataj chinkasqa ovejitas kashanku?” nisqa recuadrota leeriy).

¹⁶ Apóstol Pabloqa Éfeso llajtamanta ancianosman, Jesús jina ruwanankuta nerqa. Pay nerqa: ‘Pisi kallpayojkunata yanapariychej. Señor Jesuspa nisqantapis yuyarikuychej. Pay nerqa: “Aswan kusiy wajman qoriy, qorichikunamanta nisqaqa”, nispa’ (Hech. 20:17, 35). Pabloj nisqanqa sutʼita rikuchiwanchej, ancianosqa Diospa chinkasqa ovejitasninta yanapananku kasqanta. Españamanta hermanonchej Salvadorqa anciano. Paytaj nin: “Jehová Diosqa chinkasqa ovejitasninta may valorniyojpaj qhawan. Chaypi piensarispaqa paykunata tukuy atisqayta yanapani. Jehová Diosqa ovejitasninta yanaparinaytapuni munan”, nispa.

¹⁷ Kay yachaqanapeqa, congregacionmanta karunchakoj wakin hermanosmanta parlarerqanchej. Paykunaqa yanapachikusqankurayku, Jehová Diosman kutinpunkuña. Jinapis ashkha hermanosraj chinkasqa ovejitas jina kashanku. Paykunataj congregacionman kutinpuyta munashanku. Qhepan yachaqanapi yachakusun, imaynatachus paykunata yanaparinata.