¿Yacharqankichu?

BIBLIAQA nin, Madianmanta ismaelitas Joseta Egiptoman apakapusqankuta. Aswan qhepamantaj, tatan Jacobqa, familianwan khuska Canaán jallpʼamanta Egiptoman tiyakoj riporqa. Paykunaqa Gosén jallpʼapi tiyakaporqanku. Chay jallpʼaqa Nilo mayoj tukukuyninpi kashan (Gén. 47:1, 6). Biblia nisqanman jina, israelitasqa “ashkhata mirarqanku, may atiyniyojtaj karqanku”. Egipciostaj paykunata manchachikorqanku, esclavosninkumantaj tukucherqanku (Éxo. 1:7-14).

Biblia pantasqa kasqanta nejkunamanta wakenqa, imatachus Biblia israelitasmanta nisqan cuentolla kasqanta ninku. Jinapis yachayniyoj runaspa tarisqankoqa, Sempa mirayninmanta kajkunaa Egiptopi esclavos kasqankuta rikuchin.

Yachayniyoj runasqa, Egiptoj pata ladonpi allaspa, may unayniyoj ranchitosta tarisqanku. Doctor John Bimson nerqa, 20 chayri astawan ranchitosta tarisqankuta, chaypitaj Sempa mirayninmanta kajkuna tiyakusqankuta. Ñaupa tiempo Egiptomanta yachaj runa James Hoffmeier nin: “Jesús niraj jamushajtin, 1800 watamanta 1540 watakama, Sempa mirayninmanta ashkha ayllus, Egiptoman tiyakoj rerqanku. Chay ayllusqa, Asiaj inti yaykuynej ladomanta riporqanku”, nispa. Chantá nillantaj: “Abrahán, Isaac, Jacob ima, kikin tiempollapitaj kausarqanku. Chaytaj rikuchiwanchej, Génesis libro imatachus israelitasmanta nisqan cheqapuni kasqanta”, nispa.

Egiptoj uranejninpi, papiromanta ruwasqa unayniyoj qhelqasqata tarillasqankutaj. Chaytaj kasqa, Jesús niraj jamushajtin, 2000 al 1600 watas chaynejmanta. Chay qhelqasqapeqa, uj wasillamanta esclavospa sutisninku rikhurin. 40 sutismanta astawantaj, Sempa mirayninmanta kajkunajta kasqanku. Paykunaqa waykʼojkuna, awajkuna, peonestaj kasqanku. Hoffmeier sutiyoj runa nillanpuni: “[Egiptoj uranejninpi], kaj Tebaida lugarmanta wasipi, 40 kurajpuni semitas kasqanku. Chaytaj rikuchiwanchej, tukuy Egiptopi ichá may ashkhas Sempa mirayninmanta kasqankuta. Paykunataj ichá Nilo mayoj tukukuynin chaynejpi, astawan tiyakorqanku”, nispa.

Chay unay qhelqasqapeqa, Isacar, Aser, Sifrá sutisman rijchʼakoj sutis rikhurin (Éxo. 1:1-4, 15). Chayrayku David Rohl sutiyoj yachayniyoj runa nisqa: “Wakin sutisqa Bibliamantapis orqhosqa kanman jinapuni”, nispa. Chantá nillasqataj: “Kay qhelqasqaqa, sutʼita rikuchin israelitas Egiptopi esclavos kasqankuta”, nispa.

Bimson nin: “Unay tiempomanta imastachus tarikusqanqa, Bibliaj nisqan cheqapuni kasqanta rikuchin. Israelitasqa Egiptopi esclavospuni karqanku, kacharichisqastaj karqanku”, nispa.