Wakin runaspa creesqanku

Kay religionmanta kajkunaqa creenku uj runa wañupuspa ashkha kutista waj runapi kutimusqanta. Ninkutaj, uj runa ñakʼarisqanta kay kausaypi chayri ñaupa kausayninpi imastachus ruwasqanrayku. Creesqankuman jinaqa, runaj ñakʼariynin tukukapun moksha nisqaman chayasqantawan, nisunman manaña waj runapi kutimojtin. Ñakʼariynin tukukunanpajqa manaña kay mundoj imasninmanta llakikunanchu tiyan.

Musulmanesqa creenku, uj runaqa jucharayku castigasqa kasqanta, creeyninraykutaj uj pruebapi kasqanta. Sociólogo Sayyid Syeed, presidente de la Sociedad Islámica de América del Norte nisqanman jina, ñakʼarisqanchejqa yuyarichiwanchej “Diosman agradecekunanchejpuni kasqanta bendeciwasqanchejmanta, necesitajkunatataj yanapananchej kasqanta”.

Judiospa costumbresninkuman jinaqa, imastachus ruwasqanchejrayku sufrinchej. Wakin judiostaj ninku wañusqas kausarimunankuta, paykunapajtaj justicia kananta qhasillamanta ñakʼarisqankurayku. Chaywanpis wakin judiosqa creenku, uj runa wañuspa waj imaman tukuspa sapa kuti kutirimusqanta mana juchayojman tukunankama.

Budistaspis creenku, uj runa wañupuspa ashkha kutista waj runapi kutimusqanta. Ninkutaj sapa kausaypi ñakʼarisqanchejta sajra imasta kausayninchejmanta chinkachinanchejkama. Yuyankutaj, uj runaqa kusiy kausayta taripananta yachayniyoj kaspa, allin imasta ruwaspa, mana sajra yuyayninwan atipachikuspa ima.

Diccionario de religiones comparadas nisqa libropi nisqanman jina, confucianosqa creenku ñakʼarisqanchejta “mana allinta ruwasqanchejrayku, pantasqanchejraykutaj”. Allinta kausakuspa ñakʼariyta pisiyachiyta atikusqanta reparaspapis, creenku astawanqa “atiyniyoj espíritus kasqanrayku sufrisqankuta. Ajinapi rikukuspataj runasqa, ni imata ruwayta atinkuchu chay espirituspa contranpi”.

Wakin religionesqa ninku layqeriosrayku ñakʼarisqanchejta. Wakin runasqa creenku runasta, brujos yanapayta atisqankuta chayri ñakʼarichiyta atisqankuta, brujospa layqasqankutataj jampiris chinkachiyta atisqankuta. Chayrayku chay runasqa onqoykuspa jampichikunankupaj jampirisman rinku, brujospa layqasqankuwan mana ñakʼarinankupaj.

Cristianosqa creenku Bibliapi Génesis libropi nisqanman jina, ñaupa tatasninchej juchallikusqankurayku ñakʼarisqanchejta. Chaywanpis ashkha religionesqa, waj imastawan creenku. Wakin catolicosqa creenku ñakʼarisqankuta, Dios iglesiankuta bendecinanpaj chayri Dios waj runata salvananpaj.