KAY MUNDOPEQA LLAKIYLLA TIYAN

1 | Mana onqonapaj cuidakuna

¿IMAJTINTAJ CUIDAKUNA?

Kay mundomanta llakiykunaqa imaynallamantapis onqochiwasunmanpuni.

Runasqa llakiykunapi rikukuspa mayta phutikunku. Ajinata phutikusqankuraykutaj facilta onqoykunkuman.
Onqoykuna kajtin, jatun llakiykuna kajtenqa hospitales juntʼa, jampispis mana tarikullanchu.
Llakiykuna kajtenqa qolqe pisiyan, nitaj alcanzawasunmanchu mikhunapaj chayri doctorman rinapaj.

Kay imasta yuyarikunapuni

Sinchʼita onqoykojtinchej, phutisqallapunitaj kajtinchejqa, mana mikhuytapis munasunmanchu, ni puñuypis chayawasunmanchu, chaytaj astawan onqoykuchiwasunman.
Onqoykuspa mana jampichikusunmanchu chayqa, astawan onqoykusunman chayri wañupusunman.
Sanitos kaspaqa jatun llakiykuna kajtinpis tukuy imata allin yuyaywan ruwayta atisunman.
Qhapajpis wajchapis kaspaqa cuidakuyta atinchej mana onqonanchejpaj.

¿Imatá ruwasunman?

Yachayniyoj runa kasun chayqa, imaschus onqochiwasunman chaykunamanta sumajta cuidakunapaj kallpachakusun. Tukuy imapi llimphitus kasun chayqa, mana onqollasunchu, onqospapis sanoyapuyta atillasun. Cuidakojtinchejqa mana onqollasunchu.

Andrésa nin: “Cuerpoykuta, wasiykuta ima llimphituta japʼispaqa, mana qolqeta gastaykuchu doctorman rispa chayri jampista rantispa”, nispa.

a Kay revistamanta wakin sutisqa cambiakun.

¿IMATÁ RUWASUNMAN? Kayta ruwana

Kay mundopi llakiykuna kajtinpis mana onqonapaj kay imasta ruwana

LLIMPHUS KANA

Llimphus kana

Biblia nin: “Allin yuyayniyoj runaqa sajra kajta rikuspa pakakun”, nispa (Proverbios 22:3). Imaschus onqochinawanchejta reparankichej chayqa chaykunamanta cuidakuna.

Makisninchejta jabonwan mayllakunapuni, bañoman rispa chayri niraj imata mikhushaspapis.
Wasinchejta llimphutapuni japʼina astawanqa imastachus tupanchej, imastachus tʼojpinchej chaykunata.
Atikojtenqa onqosqa runaman ama chimpanachu.

SUMAJTA ALIMENTAKUNA

Sumajta alimentakuna

Biblia nin: “Manapuni pipis kikin cuerpontaqa chejnikunchu. Astawanpis cuerponta mikhunawan kallpachan, munakuntaj”, nispa (Efesios 5:29). Cuerponchejta munakunchej chayqa, mana imatapis mikhuykullasunchu, nitaj imatapis tomaykullasunchu.

Ashkha yakuta tomana.
Tukuy laya frutasta, verdurasta ima mikhuna.
Ama anchata mikhunachu wirasta, ashkha kachiyojta, miskʼista ima.
Ama cigarrota pitanachu, nitaj machachej ujyanasta ujyanachu, nillataj drogastapis.

Carlos nin: “Mana onqonaykupajqa sumajta alimentakuyku. Mana alimentakuykumanchu chayqa, pisita ganakusqaykutaqa jampichikuspalla tukurpaykuman. Qolqesituykutaqa sumajta alimentakunaykupaj gastayta munayku”, nispa.

SUMAJTA SAMARIKUNA, EJERCICIOSTAPIS RUWANA

Ejerciciosta ruwana

Biblia nin: “Aswan allin uj chhikallantapis samarikoyqa, sinchʼita trabajaspa wayrallata japʼiyta munanamantaqa”, nispa (Eclesiastés 4:6). Tiempo kanan tiyan trabajanapaj, samarikunapajpis.

Ejerciciosta ruwanapuni. Ichapis uj chhikanta puriykacharispa qallarisunman. Mayorcitos kajtinchejpis, suchitus chayri onqosqetas kajtinchejpis cuerponchejta kuyucheyqa sumajta yanapawasunman.
Sumajta samarikuna

Sumajta samarikuna. Mana allinta puñojtinchejqa imitallamantapis llakikusunmanpacha, imatapis qonqarpallasunman ima. Chaytaj tiemponmanqa sinchʼita onqoykuchiwasunman.
Ima horatachus puñunanchejta nerqanchej chay horatapuni puñukapuna. Ima horatachus rijchʼarinchej chay horallatapuni rijchʼarina.
Puñukapunapaj camapiña kanchej chayqa, ama teleta nitaj celulartapis qhawanachu.
Niraj puñukapushaspa ama ashkhata mikhunachu, nitaj mana puñuchej imasta mikhunachu chayri ujyanachu, nillataj machachej ujyanastapis tomanachu.

Justin nin: “Mana allinta puñojteyqa malaganapacha kani, umay nanawan, cuerpoypis tʼunapacha. Allinta puñuspaqa tukuy imata ruwanaypaj wapu kani, manataj anchata onqoyta yachanichu”, nispa.