17 YACHAQANA
May kusisqa kawaj
¿Imaraykú Jehová “kusikuyniyoj Dios”?
TUKUY kusisqa kayta munanchej, ¿icharí?... Jinapis pisi runaslla kusisqa kanku. ¿Yachankichu imajtinchus?... Runasqa mana yachankuchu kusisqa kanapaj imatachus ruwanata. Yuyankutaj tukuy imayoj kaspalla kusisqa kanankuta. Tukuy imayoj kajtinkutaj kusiyninkoqa mana unaypajchu.
Jesusqa, imata ruwaspachus kusisqa kananchejta yacharqa. Pay nerqa: “Aswan kusiy wajman qoriy qorichikunamanta nisqaqa”, nispa (Hechos 20:35). ¿Imatataj ruwananchej kasqa kusisqa kanapaj?... Arí, wajkunaman imallatapis qorina manachayri yanaparina. ¿Chayta yacharqankichu?...
Jesús imatachus niyta munasqanmanta parlarina. ¿Nerqachu Jesús qorichikoj mana kusikunanta?... Mana, mana chaytachu nerqa. Imallatapis regalasojtinku kusikunki, ¿icharí?... Tukuypuni kusikunchej regalosta japʼispaqa.
Jesustajrí wajkunaman qorispa, aswan kusisqa kananchejta nerqa. ¿Pitaj runasman astawan regalosta qorqa?... Arí, Jehová Dios.
Biblia nisqanman jina, Diosqa “tukuyman kawsayta qon, samayta, tukuy imastawan”. Payqa parachimun, intitapis llojsichimun. Ajinamantataj mikhunanchejpaj tukuy imata poqochipuwanchej (Hechos 14:17; 17:25). Chayraykuchá Bibliaqa, Jehová “kusikuyniyoj Dios” kasqanta nin (1 Timoteo 1:11, NM). Jehovaqa wajkunaman qorispa mayta kusikun, noqanchejpis mayta kusikullasunmantaj.
¿Sapa wijsa kaspachu chayrí qorikuspachu aswan kusisqa kawaj?
Chantá, ¿imatá wajkunaman qorisunman? ¿Imatá qan niwaj?... Wakin kuti, uj regaloqa ichá qolqepaj kanqa. Ajina regalota qoyta munaspaqa, qolqesituta tantakunayki tiyan rantinaykipaj.
Imallatapis regalanapajqa mana rantinapunichu tiyan. Sutʼincharinapaj, mayta ruphamojtin qhasa yakitoqa chʼakiypaj may sumaj. Chʼakichikojman qhasa yakituta jaywarispaqa, mayta kusikuwaj.
Ichapis uj pʼunchay, mamayki buñuelosta ruwashajtin yanapaysikunki. Chay buñuelosta, ¿sapallayki mikhuykuspachu chayri wajkunaman qorispachu aswan kusisqa kawaj?... Arí, amiguitoykiman chayri amiguitaykiman qorispa. ¿Chayta ruwayta munawajchu?...
Jesús, apóstoles ima, wajkunaman qorispa kusikoj kanku. ¿Yachankichu imatachus runasman qorisqankuta?... Aswan sumaj kajta. Paykunaqa sumaj willaykunata yacharqanku, nisunman Diosmanta cheqa yachachiykunata. Chaytataj mana qolqeta mañaspalla runasman yachacherqanku.
Uj kuti, apóstol Pablo, amigon Lucaswan, uj warmita mayu kantupi tariparqanku. Chay warmipis qorikuspa kusisqa kayta munallarqataj. Pablowan Lucaswanqa uyarisqanku chay mayu kantupi runas Diosmanta mañakusqankuta. Chayraykutaj paykuna chayman rerqanku. Ajinapunitaj karqa, chaypeqa ashkha warmista Diosmanta mañakushajta tariparqanku.
Pabloqa, Jehová Diosmanta, Gobiernonmantawan sumaj willaykunata chay warmisman willayta qallarerqa. Chay warmismanta ujnenqa Lidia karqa. Payqa chay sumaj willaykunata sumajta uyarerqa. Chantá yachachisqankumanta agradecesqa kasqanta rikuchinanpaj, Pablota Lucastawan nerqa: “Sichus qankuna yuyankichej tukuy sonqo Señorpi creesqayta chayqa, wasiyman jamuychejpuni karikunaykichejpaj”, nispa. Ajinamanta Lidiaqa wasinpi paykunata qhepacherqa (Hechos 16:13-15).
¿Imatá Lidia Pabloman, Lucasmanwan nishan?
Lidiaqa kusikorqa Diospa kamachisninta wasinman wajyarikuspa. Paykunaqa yachacherqanku Jehovamanta, Jesusmanta, imaynatachus wiñay kausayta tarinamantawan. Chayrayku paykunaqa Lidiapaj munasqa karqanku. Lidiaqa paykunaman mikhunata qorispa, samarikunankupaj wasinman wajyarispa ima, mayta kusikorqa. Tukuy sonqo qorikusqanraykutaj kusisqa karqa. Ichá pipis wajman imallatapis qorinanchejta niwasunman. Mana tukuy sonqochu qorisun chaytaj, mana kusisqachu kasun. Chayta mana qonqanachu.
¿Imaraykú Lidia Pablota Lucastawan wajyarikuspa kusikorqa?
Kunanqa kaypi tʼukuriy, ashkha miskʼisniyki kapusunkiman, maytataj chʼonqayta munashawaj. Waj wawaman qorinaykita nisojtiy, ¿kusisqachu qoriwaj?... Chay wawa munasqa amiguitoyki kanman chayrí, ¿qoriwajchu? Amiguitoykiman mana kamachisqalla qorispaqa, ¿astawancharí kusikuwaj?...
Pillatapis mayta munakuspaqa, tukuy imanchejta jaywaykunanchejpaj jina kanchej. Diosta astawan munakusun chayqa, kikillantataj ruwayta munasun.
¿Imaraykú kay warmi kapuyninta qospa kusisqa kashan?
Sumaj Yachachej Jesusqa, ajina munakuyniyoj warmita Jerusalén templopi rikorqa. Chay warmeqa wajcha karqa, iskay phatasnillantaj tiyaporqa. Chaytataj templopaj qolqe churanaman churaykorqa. Mana pipis chay qolqeta munajta mana munajta churacherqachu. Wakin runasqa nichá churajta rikullarqankupischu. Chay wajcha warmeqa, Jehovata munakusqanrayku tukuy sonqo churarqa. Ajinata qosqanraykutaj kusisqa kasharqa (Lucas 21:1-4).
¿Imastataj wajkunaman qorisunman?... Wajkunaman imatapis tukuy sonqo qorisun chayqa kusisqa kasun. Chayrayku Jesusqa, qorikuyta yachananchejta kamachiwanchej (Lucas 6:38). Chayta ruwasun chayqa wajkunata kusichisun. Noqanchejtaj astawanraj kusikusun.
Wajkunaman qoriy kusiypuni kasqanta astawan yachanapaj leerina: Mateo 6:1-4; Lucas 14:12-14; 2 Corintios 9:7.