“Uj nacionllaman tukuchisaj”

1, 2. 1) ¿Imaraykutaj preso apasqa judíos mancharerqanku? 2) ¿Imaraykutaj chay profecía uj jina karqa? 3) ¿Ima tapuykunatataj kutichisun?

EZEQUIELQA Babiloniapi presos kasharqanku chay judiosman uj rikuchiyta ruwaspa profeciasta willarqa. Ñaupaj profeciaqa castigomanta willay karqa, iskay kajpis, kinsa kajpis, chay waj profeciaspis kikillantaj karqanku (Eze. 3:24-26; 4:1-7; 5:1; 12:3-6). Ezequielqa judiosman castigosllamantapuni willarqa.

² Preso apasqa judiosqa mancharerqanku, Ezequiel ñaupaqenkupi waj profeciamantañataj uj rikuchiyta ruwayta qallarejtin. Ichapis nerqanku: “¿Kunanri ima castigotaj chayawasunri?”, nispa. Jinapis Ezequiel willarqa chay profeciaqa mana castigo willaychu karqa, astawanqa sumaj willay karqa (Eze. 37:23). ¿Imatá Ezequiel willarqa preso apasqa judiosman? Chay profecía, ¿ima niytá munan? ¿Imata ruwananchejpajtaj chay profecía kallpachawanchej? Chayta qhawarina.

 3. 1) ¿Imawantaj ninakorqa “Judapaj” nisqa kʼaspi? 2) ¿Imaynapí yachanchej “Efrainpa kʼaspin” nisqa chunka ayllusniyoj Israel nacionwan ninakusqanta?

³ Jehovaqa Ezequielta nerqa iskay kʼaspispi qhelqananta. Ujninpi “Judapaj” nispa qhelqananta, ujninpitaj “Efrainpa kʼaspin Josepaj” nispa (Ezequiel 37:15, 16 leey). ¿Imawantaj chay iskay kʼaspis ninakorqa? “Judapaj” nisqa kʼaspeqa iskay aylluswan ninakorqa: Judawan Benjaminwan. Chay iskay ayllustaqa Judaj mirayninmanta reyes kamacherqanku. Chantapis chay reyesqa sacerdoteswan sumajta yanapanakoj kanku. Sacerdotesqa Jerusalenpi kaj templopi sirvej kanku (2 Cró. 11:13, 14; 34:30). Chayrayku nisunman Judá nacionpi Davidpa familianmanta reyes kasqankuta, jinallataj Leví ayllumanta sacerdotes. ‘Efrainpa kʼaspintaj’ chunka ayllusniyoj Israel nacionwan ninakoj. ¿Imaynapi chayta yachanchej? Chay chunka ayllusmanta ñaupaj kaj reyqa Jeroboán karqa, Efraín ayllumanta. Tiemponmantaj Efraín aylloqa Israelpi aswan atiyniyojman tukorqa (Deu. 33:17; 1 Rey. 11:26). Jinapis chunka aylluspi kaj reyesqa, mana Davidpa familianmantachu karqanku, nillataj chay aylluspi kaj sacerdotespis Leví ayllumantachu karqanku.

 4. Ezequiel chay iskay kʼaspismanta uj rikuchiyta ruwasqanman jina, ¿imatá Jehová ruwanan karqa? (Qallariypi kaj dibujota qhawariy).

⁴ Chantá Jehovaqa Ezequielta nerqa chay iskay kʼaspista ujchaykunanta, “uj kʼaspilla” kanankupaj. Preso apasqa judiosqa Ezequiel ruwashasqanta rikuspa imatachus niyta munasqanta yachayta munaspa taporqanku: “¿Nichu willawasqayku imaschus chay imas niyta munasqanta?”, nispa. Ezequielqa nerqa chay ruwasqanqa imatachus Jehová ruwananta rikuchisqanta. Jehovaqa nerqa: “Chay kʼaspistaqa uj kʼaspillaman tukuchisaj, makiypi uj kʼaspillaña kanqanku”, nispa (Eze. 37:17-19).

 5. ¿Ima niytá munasqa Ezequiel uj rikuchiyta ruwasqan? (“Iskay kʼaspis ujchakunku” nisqa recuadrota leeriy).

⁵ Chaymanta Jehovaqa sutʼincharqa chay iskay kʼaspis ujchakusqan imachus niyta munasqanta (Ezequiel 37:21, 22 leey). Chunka ayllusniyoj Israel nacionmanta preso apasqa kajkunaqa, llajtankuman kutinpunanku karqa, iskay ayllusniyoj Judá nacionmanta preso apasqa kajkunapis llajtankuman kutinpunallankutaj karqa. Ajinamanta iskayninku ‘uj nacionllaña’ kananku karqa (Jer. 30:1-3; 31:2-9; 33:7).

 6. Ezequiel capítulo 37 nisqanman jina, ¿ima iskay profeciastaj ujchaykusqa kashanku?

⁶ Ezequiel capítulo 37 willan iskay ujchasqa profeciasta, Jehovallata yupaychay watejmanta sayarichisqa kananmanta. Jehovaqa rikuchenqa llajtanta watejmanta sayarichiyta atisqanta, wañusqamantapis kausarichinman jina (versículos 1-14), watejmanta ujchaykuyta atisqantapis (versículos 15-28). Kay iskay profeciasmanta kayta yachakunchej: Jehovaqa watejmanta kausarichiyta atisqanta, ujchaykuytapis. Chaytaj mayta sonqochawanchej.

 7. ¿Imaynatá rikuchin 1 Crónicas 9:2, 3 versiculospi nisqan ‘Diospajqa tukuy imapis atikullasqanta’?

⁷ Runaspa qhawayninpeqa mana atikunanpaj jinachu karqa preso apasqa judíos kacharichisqa kananku, ujchasqa kanankupis.a “Diospajrí tukuy imapis atikullan” (Mat. 19:26). Jehovataj nisqanta juntʼarqa. Preso apasqa judiosqa Babiloniamanta kacharisqa karqanku 537 watapi, Jesús niraj jamushajtin. Tiemponmantaj iskaynin naciones Jerusalenman kutinporqanku, Jehovallata yupaychay watejmanta sayarichisqa kananpaj. Bibliapis chayllatataj nin: “Judaj mirayninmanta, Benjaminpa mirayninmanta, Efrainpa mirayninmanta, Manasespa mirayninmantapis wakenqa Jerusalenpi tiyakorqanku”, nispa (1 Cró. 9:2, 3; Esd. 6:17). Jehová nisqanman jinataj chunka ayllusmanta kajkuna, iskay ayllusmanta kajkuna ujchaykukorqanku.

 8. 1) ¿Imatá Isaías ñaupajmantaña willasqa? 2) ¿Ima iskay imastataj yachakunchej Ezequiel 37:21 versiculopi?

⁸ Profeta Isaiasqa 200 watas ñaupajta willarqa Israelpis Judapis kacharichisqa kasqankumanta imachus kananta. Pay nerqa Jehovaqa tantamunanta “Israelmanta chʼeqerasqa kajkunata”, “Judamanta chʼeqarasqa kajkunatapis jallpʼaj tawantin kʼuchusninmantapacha”, ‘Asiriamantapis’ (Isa. 11:12, 13, 16). Jehovaqa nisqanman jinapuni ruwarqa, ‘israelitasta orqhomorqa may nacionesmanchus rerqanku chaykunamanta’ (Eze. 37:21). Kaypi sutʼita reparana iskay imasta. Uj kaj, Jehovaqa preso apasqa kajkunamanta parlaspa mana ninchu “Judá” ayllu, “Efraín” ayllu nispa, manaqa uj grupota jinallaña oqharin ‘israelitas’ nispa. Iskay kaj, israelitasqa mana Babiloniallamantachu jamunanku karqa, manaqa ashkha nacionesmanta, nisunman “tukuynejmanta”.

 9. ¿Imatá ruwarqa Jehová Jerusalenman kutinpojkuna ujchasqa kanankupaj?

⁹ Jehovaqa Jerusalenman kutinpojkunaman tukuy necesitasqankuta qorqa ujchasqas kanankupaj. Churaporqa kay sumaj michejkunata: Zorobabelta, kuraj kaj sacerdote Josueta, Esdrasta, Nehemiasta ima. Churapullarqataj kay profetasta: Ageota, Zacariasta, Malaquiasta ima. Tukuyninku Jehovata tukuy sonqo kasukoj kanku. Tukuy Israel naciontataj kallpacharqanku Jehovaj kamachisqasninta kasukunankupaj (Neh. 8:2, 3). Chantapis Jehovaqa llajtanta enemigosninmanta jarkʼarqa, enemigosnin contranpi manchayta oqharikojtinkupis (Est. 9:24, 25; Zac. 4:6).

10. ¿Imatataj Satanás ruwarqa Diospa llajtanta?

¹⁰ Tukuy chay imasta Jehová israelitasman munakuywan qoshajtinpis, ashkhas Jehovallata yupaychayta saqeporqanku. Chaytaj qhelqasqa kashan Jerusalenman kutipusqankumanta qhepata qhelqakorqa chay librospi (Esd. 9:1-3; Neh. 13:1, 2, 15). Jerusalenman kutinpusqankumanta ni 100 wataspis pasarqachu, israelitastaj Diosllata yupaychaymanta karunchakorqanku. Chayrayku Jehová paykunata nerqa: “Noqaman kutirikamuychej”, nispa (Mal. 3:7). Jesús jallpʼaman jamunanpajtaj judiospa religionninkoqa ashkha grupospi tʼaqanasqa kasharqanku. Chaytataj Diosta mana kasukoj michejkuna pusaykachasharqanku (Mat. 16:6; Mar. 7:5-8). Satanasqa munasqantapuni ruwasharqa, Diospa llajtanta tʼaqanachisharqa. Jinapis Jehová llajtanta ujchananta nisqanqa juntʼakorqapuni, ¿imaynata?

11. 1) ¿Imatá Jehová sutʼincharqa llajtanta ujchananmanta? 2) Satanás cielomanta wijchʼuchikamusqantawan, ¿imatá ruwayta munarqa Diospa llajtanwan?

¹¹ (Ezequiel 37:24 leey). Jehovaqa llajtanta ujchananmanta profecía maykʼajchus tukuynin juntʼakunanta willarqa. Chaytaj karqa 1914 watapi ‘kamachin David’, nisunman Jesús Reyña kajtin (2 Sam. 7:16; Luc. 1:32).b Chay tiempopajqa Israel nacionpa cuentanmanta ‘Diospa llajtan Israel’ kasharqa, nisunman ajllasqa cristianos (Jer. 31:33; Gál. 3:29; 6:16). Satanasqa cielomanta wijchʼumojtinku astawanraj Diospa llajtanta tʼaqanachiyta munarqa (Apo. 12:7-10). Chayrayku hermanonchej Russell wañupusqanmanta qhepata, 1916 watapi Diosta wasanchajkunamanta valekuspa ajllasqa cristianosta tʼaqanachiyta munarqa. Pisi tiemponmantaj chay wasanchajkunaqa Diospa llajtanmanta llojsiporqanku. Chantapis Diabloqa Diospa llajtanta ñaupajman apaj hermanosta carcelman wisqʼaykucherqa. Chaywanpis nipuni Diospa llajtanta tʼaqanacherqachu. Ajllasqa cristianosqa Jehovata kasukusqankurayku ujchasqallapuni kasharqanku.

12. ¿Imaraykutaj Satanás kay tiempopi ‘Diospa llajtan Israelta’ mana tʼaqanachiyta atillanchu?

¹² Ñaupa tiempo Israelmanta nisqaqa, kay tiempomanta ‘Diospa llajtan Israelqa’ Satanás tʼaqanachinanpaj tukuy imata ruwajtinpis, sinchʼita sayarqa. ¿Imajtintaj Diablo mana tʼaqanachiyta aterqachu? Ajllasqa cristianosqa Jehová kamachisqanman jinapuni tukuy atisqankuta ruwanku. Chayrayku paykunataqa Reyninku Jesucristo jarkʼashan. Payqa ñaupajllamanpuni rishan, Satanasta atipasqata atipananpaj (Apo. 6:2).

13. Iskay kʼaspis ujchaykukusqankumanta profecía, ¿imatá astawan sutʼinchan?

¹³ Iskay kʼaspis ujchaykukusqankumanta profecía, ¿imaynatá kunan juntʼakushan? Yuyarikuna, chay profeciaqa rikuchin imaynatachus iskay grupos ujchaykukunankuta, chay ujchaykukusqankutaj Jehovaj yanapaynillanwan kasqanta. Chantá chay profecía Diosllata yupaychaymanta, ¿imatá astawan sutʼinchan? Sutʼita rikuchin Jehovalla kamachisninta ujchaykuyta atisqanta (Eze. 37:19).

14. Iskay kʼaspismanta profecía, ¿imaynatá 1919 watapi astawan juntʼakuyta qallarerqa?

¹⁴ Iskay kʼaspismanta profeciaqa 1919 watamantapacha, astawan juntʼakuyta qallarerqa. Chay watakama Diospa llajtanqa llimphuchasqa karqa, chaymantapachataj Diosta yupaychaypi uj paraisopi jina kausakuyta qallarerqanku. Jaqay tiempopi, chay ujchasqa grupomanta casi tukuyninku reyes jina, sacerdotes jina cielopi sirvinankupaj suyakuyniyoj karqanku (Apo. 20:6). Kay ajllasqa cristianosqa “Judapaj” kʼaspiwan ninakorqa, chay nacionpi kasharqa Davidpa familianmanta reyes, Leví ayllumanta sacerdotes ima. Ajinapi tiempo pasasqanman jina chay ajllasqa cristianosman, kay jallpʼapi wiñay kausayta suyakoj cristianos astawan astawan yapakuyta qallarerqanku. Paykunaqa ‘Efrainpa kʼaspiwan’ ninakorqanku, chay nacionpeqa mana Davidpa familianmanta reyes karqachu, nitaj Leví ayllumanta sacerdotespis. Iskaynin grupostaj Diospa llajtan kanku, paykunaqa ujchasqas Jehovata sirvishanku uj Reyniyojlla, Jesucristoj kamachiyninpi (Eze. 37:24).

15. ¿Imaynatá kunan tiempopi juntʼakushan Ezequiel 37:26, 27 versiculospi nisqan profecía?

¹⁵ Ezequielpa profecianqa sutʼita rikuchin ashkha runas ajllasqa cristianosman ujchaykukunankuta Diosllata yupaychanankupaj. Jehovaqa llajtanmanta nerqa: “Ashkhaman tukuchisaj”, nispa. Chantá nillarqataj: “Toldo waseyqa paykunawan kanqa”, nispa (Eze. 37:26, 27, sutʼinchaynin). Kay palabras yuyarichiwanchej apóstol Juanpa willasqanta. Juanqa Ezequielpa tiemponmanta 700 watasninman jina, may chhika runasmanta parlaspa kayta nerqa: “Kamachina tiyanapi tiyasqa kajtaj toldonta aysarenqa paykunaj patankuman”, nispa (Apo. 7:9, 15). Kunantaj ajllasqa cristianos, may chhika runaswan khuska uj nacionlla kanku, nisunman Jehovaj llajtan. Paykunaqa Diospa toldon urapi jarkʼasqa kashanku.

16. ¿Imatá Zacarías nerqa ajllasqa cristianoswan, kay jallpʼapi wiñay kausayta suyakoj cristianoswan ujchasqa kanankumanta?

¹⁶ Zacariaspis ajllasqa cristianoswan, kay jallpʼapi wiñay kausayta suyakoj cristianoswan ujchasqa kanankumanta willarqa. Payqa ‘nacionesmanta tukuy laya parlayniyoj chunka runasmanta’ parlaspa nerqa: “Uj judío runaj ropanmanta kallpawan japʼiykukonqanku, nenqankutaj: ‘Qankunawan riyta munayku. Uyariyku Dios qankunawan kashasqanta’”, nispa (Zac. 8:23). “Uj judío” runa nispaqa mana uj runallamantachu parlashan, manaqa uj grupo runasmanta. Chayrayku ashkhasmanta parlaspa “qankunawan” nispa nin (Rom. 2:28, 29). Chay ‘chunka runasqa’ kay jallpʼapi wiñay kausayta suyakojkunawan ninakun. Paykunaqa ajllasqa cristianosmanta kallpawan japʼiykukunku, paykunawantaj rishanku (Isa. 2:2, 3; Mat. 25:40). “Kallpawan japʼiykukonqanku” chantá “qankunawan riyta munayku” nisqa palabrasqa sutʼita rikuchin kay iskay gruposqa ujchasqa kasqankuta.

17. ¿Imatá Jesús nerqa ujchasqa kananchejmanta?

¹⁷ Jesusqa uj Michej kasqanta nishajtin, ichapis piensasharqa Ezequiel ujchasqa kaymanta qhelqasqanpi. Pay nerqa iskay tropa ovejaspa michejnin kasqanta, chay iskay tropastaj ‘uj tropallaña’ kasqankuta. Uj tropaqa ajllasqa cristianos, ‘waj ovejasnintaj’ kay jallpʼapi wiñay kausayta suyakoj cristianos (Juan 10:16; Eze. 34:23; 37:24, 25). Jesuspa chay nisqan, waj profetaspa nisqankupis, sutʼita rikuchin kunan tiempo Diospa kamachisnin ujchasqa kasqanchejta, cielopi chayri kay jallpʼapi kausakuyta suyakojtinchejpis. Llulla religionesqa sapa kuti ashkha gruposman tʼaqanakunku, noqanchejtaj ujchasqa kanchej. Chayqa uj milagropuni.

18. Ezequiel 37:28 nisqanman jina, ¿imaraykutaj Diospa llajtan mana kay mundomantachu kanan tiyan?

¹⁸ Ujchasqa kanamanta Ezequielpa profecianpa tukukuynenqa sutʼita rikuchin wiñaypaj ujchasqa kananchejta (Ezequiel 37:28 leey). Jehovaj llajtanqa ujchasqa kashan templon paykunaj “chaupinkupi” kasqanrayku, nisunman payllata yupaychasqankurayku. Templonqa paykunaj “chaupinkupi” kallanqapuni paykuna llimphusllapuni kajtinku, nisunman Satanaspa mundonmanta tʼaqakojtinku (1 Cor. 6:11; Apo. 7:14). Jesusqa nerqa mana kay mundomanta kanata. Tatanmanta discipulosninpaj tukuy sonqo mañapushaspa nerqa: “Santo Tatáy, [...] paykunata qhawariy, ajinamanta ujchasqa kanankupaj [...]. Paykunaqa mana kay mundomanta runas jinachu kanku [...]. Paykunataqa cheqa kajnejta qanpaj tʼaqay”, nispa (Juan 17:11, 16, 17). Jesusqa kaypi nisharqa ujchasqa kanankupajqa mana kay mundomantachu kananku kasqanta.

19. 1) ¿Imaynatá Dios jina ruwasunman? 2) ¿Imatá Jesús ujchasqa kanamanta nerqa niraj wañuchisqa kashajtin?

¹⁹ Jesusqa kay versiculollapi Diosta nin “Santo Tatáy” nispa. Jehová Diosqa tukuy imapi llimphu, cheqantaj, payqa unay israelitasta nerqa: “Noqaqa llimphu kani, chayrayku qankunapis llimphus kanaykichej tiyan”, nispa (Lev. 11:45). Dios jina ruwayta munasqanchejrayku chay kamachisqanta kasukuyta munanchej tukuy kausayninchejpi (Efe. 5:1; 1 Ped. 1:14, 15). Runas ‘llimphu’ kanankuta nispaqa ‘tʼaqasqa’ kanankuta nishan. Jesusqa niraj wañuchisqa kashajtin discipulosninta nerqa ujchasqa kanankupajqa kay mundomanta tʼaqasqa kanankuta, kay mundopeqa tʼaqanakuylla tiyan.

20, 21. 1) ¿Imata yachaytaj Jehovapi astawan atienekunapaj yanapawanchej? 2) ¿Imatataj sapa ujninchej ruwasunman?

²⁰ Jehovaj testigosnin mundontinpi ujchasqa kasqanchejqa sutʼita rikuchin Jehová Jesuspa mañakusqanta uyarisqanta, pay nerqa: “Mañakuyki Diablomanta jarkʼanaykita”, nispa (Juan 17:14, 15 leey). Satanás Diospa llajtanta mana tʼaqanachiyta atisqanta rikuspa Jehová Diospa nisqanpi astawan atienekunchej. Ezequielpa profecianpi Jehovaqa nerqa chay iskay kʼaspis makinpi ujllaña kasqankuta. Jehovapuni llajtanta may tʼukunata ujchaykun, may atiyniyoj makinwan, Satanastaj mana imatapis ruwayta atinchu.

²¹ Chayrayku sapa uj mayta kallpachakunallapuni Diospa llajtan ujchasqallapuni kananpaj. ¿Imaynatá chayta ruwasunman? Mana rikukoj templonpi Jehovallata yupaychayta ñaupajman churaspa. Chaymanta qhepan capitulospi yachakusun.