“Imaynachus templo kasqanta willay”

1-3. 1) ¿Imajtín nisunman Ezequielta sonqochasqanta mosqoypi jina templota rikusqan? (Qallariypi kaj dibujota qhawariy). 2) ¿Imatá kay capitulopi yachakusunchej?

KAYPI piensariy Ezequielqa 50 watasniyojña kashan, Babiloniapitaj preso jina 25 watasta jinaña kashan. Jerusalén temploqa ashkha watastaña thuñisqa kashan. Sichus Ezequiel chay templopi sacerdote jina llankʼayta munanman karqa chayqa, niña atikunmanchu karqa, 56 watasraj faltarqa kacharichisqa kanankupaj. Ezequielqa manaña kausanmanchu karqa Jehovaj llajtan jallpʼanman kutipojta rikunanpaj, nitaj watejmanta templo sayarichisqa kasqantapis (Jer. 25:11). Ichapis llakikorqa chay imaspi piensarispa.

² Ajina llakisqa kashajtintaj Jehovaqa may kʼacha kasqanrayku uj imata mosqoypi jina Ezequielman rikucherqa, chay rikuchisqantaj Ezequielta mayta kallpacharqa, sonqocharqataj. Jehovaqa mosqoypi jina Ezequielta Israel jallpʼaman aparqa, uj jatun orqo patapitaj sayaykucherqa. Chay orqopitaj ‘cobreman rijchʼasqa runawan’ tinkorqa, chay runaqa uj ángel karqa, rikuchimorqataj tukuynin templota (Ezequiel 40:1-4 leey). Ezequielpa rikusqanqa sutʼipi jina karqa, creeynintataj kallpacharqa, chantapis maytachá tʼukucherqa, ichapis mana creeyta atillarqachu. Mosqoypi jina rikusqan temploqa, Jerusalén temploman rijchʼakojtinpis uj jinapuni karqa.

³ Ezequiel templota mosqoypi jina rikusqanmantaqa, Ezequiel 40–48 capitulosninpi astawan sutʼinchan. Kunan yachakusunchej Ezequiel mosqoypi jina rikusqanta estudiashaspa imaynatachus entiendena kasqanta. Yachakullasuntaj Ezequielpa rikusqan templo, apóstol Pablo parlarqa chay jatun templowan kikinchus manachus kasqanta. Tukunapajtaj sutʼinchasunchej Ezequielpa rikusqan imachus judiospaj niyta munasqanta.

 4. ¿Imaynatataj ñaupajta publicacionesninchej sutʼinchaj kanku Ezequielpa rikusqan templota? Chanta, ¿imaynatataj sutʼinchakunan kasqa?

⁴ Unayqa publicacionesninchej sutʼinchaj kanku Ezequielpa rikusqan templowan, apóstol Pablo hebreosman cartanpi parlarqa chay templowan kikillan kasqankuta.a Chayrayku sutʼinchakorqa wakin imas imawanchus ninakusqanta. Pablo Diosta yupaychana toldomanta sutʼinchasqanrayku, Ezequielpa rikusqan templomantapis ashkha imasninta sutʼinchakoj. Jinapis Bibliata aswan sumajta estudiarispa, Diosmanta mañakuspa, tʼukurispa ima, reparanchej Ezequielpa rikusqan templo ima niytachus munasqanta sutʼinchanapajqa, mana imawanpis kikinchanachu kasqanta.

5, 6. 1) ¿Imaraykutaj ninchej Pablo llampʼu sonqo kasqanta Diosta yupaychana toldomanta sutʼinchashaspa? 2) ¿Imatataj Pablo nerqa Diosta yupaychana toldopi kaj imasmanta? 3) ¿Imaynatataj Pablo jina ruwasunman Ezequielpa rikusqan templomanta sutʼinchashaspa?

⁵ Chayrayku manasina allinchu kanman Ezequiel mosqoypi jina rikusqanmanta sapa imita imachus niyta munasqanta sutʼinchakunan. Chayta qhawarina. Pabloqa Diosta yupaychana toldomanta, mana rikukoj templomantawan parlashaspa, parlarqa qorimanta incienso qʼoshñichinamanta, arcaj tapanmanta, maná nisqa mikhunayoj qori jarramantawan. ¿Chaykunata imawanpis kikincharqachu? Espíritu santoqa manasina chay imasta yuyaycharqachu. Chayrayku payqa qhelqarqa: “Kunanqa mana chay imasmanta parlana tiempochu”, nispa (Heb. 9:4, 5). Pabloqa tukuy sonqo suyakorqa, llampʼu sonqowantaj japʼikorqa imatachus Jehová espíritu santonnejta yuyaychasqanta (Heb. 9:8).

⁶ Noqanchejpis ajinallatataj suyakuna Ezequiel mosqoypi jina rikusqanta entiendenapaj. Chay rikusqanpeqa ashkha imas tiyan. Chayrayku llampʼu sonqowan suyakuna wakin imasta Jehová sutʼinchananraj kajtenqa sutʼinchananta (Miqueas 7:7 leey). Jinapis Jehovaqa Ezequielpa rikusqanmanta llajtanman sutʼinchashallanpuni.

7, 8. 1) ¿Imatataj kay qhepa watasllapi sutʼinchakorqa? 2) ¿Imapitaj mana kikinchu Ezequielpa rikusqan templo, mana rikukoj templowan?

⁷ Nerqanchej jina, ashkha watasta publicacionesninchejqa sutʼincharqanku Ezequielpa rikusqan temploqa, mana rikukoj Jehovaj jatun templon kasqanta. Chay templomantaqa Pablo qhelqarqa Dios yuyaychasqanman jina hebreosman cartanpi. Jinapis imatachus chay mosqoypi rikusqanta astawan estudiarispaqa reparanchej Ezequielqa mana chay mana rikukoj jatun templotachu rikusqanta. ¿Imajtín chayta ninchej?

⁸ Uj kaj, Ezequielpa rikusqan temploqa mana kikinchu Pabloj sutʼinchasqanwan. Pabloqa sutʼita nerqa Moisespa tiemponmanta Diosta yupaychana toldoqa jamoj imaspa llanthullan kasqanta. Salomonpa chantá Zorobabelpa ruwachisqan templosqa kikinkamalla karqanku. Chay templospeqa Diosta yupaychana toldopi jina “Aswan Santo Lugar” karqa. Pabloqa chay lugarmanta nerqa ‘mana runaj ruwasqanchu’ kasqanta. Chantá nillarqataj “Aswan Santo Lugarpa rijchʼaynillan” kasqanta, mana chaypunichu. Chanta, ¿imataj karqa chay “Aswan Santo Lugar”? Pabloqa nerqa cielopuni kasqanta (Heb. 9:3, 24). Ezequielrí, ¿cielotachu rikorqa? Mana. Ezequielqa mana cielopi kaj imasta rikusqantachu nerqa, imaynatachus wajkuna mosqoypi jina cielota rikorqanku ajinataqa (Daniel 7:9, 10, 13, 14, kikinchay).

9, 10. Ezequiel rikorqa chay templopi, chanta mana rikukoj jatun templopipis, ¿kikintachu jaywanasta jaywaj kanku?

⁹ Ezequiel mosqoypi rikusqanwan Pablo sutʼinchasqanwanqa mana kikinchu jaywanasta jaywasqankupi. Ezequielqa uyarerqa imaynatachus uywa wañuchisqasta jaywanamanta kamachiykunata. Chay kamachiykunaqa karqa israelitaspaj, kurajkunasninkupaj, sacerdotespaj ima. Paykunaqa juchasninkurayku uywa wañuchisqasta jaywananku karqa. Chantapis paykunaqa khuska mikhurikuy ofrendasta jaywananku karqa, chaytaqa ichapis tukuyninku temploj comedoresninpi mikhurikoj kanku (Eze. 43:18, 19; 44:11, 15, 27; 45:15-20, 22-25). Chay ofrendasta mana rikukoj jatun templopi, ¿jaywakullantajchu?

¹⁰ Mana. Chay templopeqa uj jaywanallata jaywakorqa, uj kutillata: Chaytaj karqa Jesucristo kausayninta qosqan, paymin Aswan Kuraj kaj Sacerdoteqa. Pabloqa sutʼincharqa: “Cristoqa, karqaña chay allin imasmanta kuraj kaj sacerdote jina jamushaspa, aswan jatun, aswan sumaj kaj toldoman yaykorqa. Chay toldoqa mana runaj ruwasqanchu, nisunman mana kay jallpʼamantachu. Payqa mana chivospa, torillospa yawarninwanchu Aswan Santo Lugarman yaykorqa, manachayqa kikin yawarninwan yaykorqa uj kutillata, wiñaypajtaj. Noqanchejtataj wiñaypaj kacharichiwarqanchej”, nispa (Heb. 9:11, 12). Ezequielpa rikusqan templopeqa jaywaj kanku cabrasta, torosta ofrendata jina, chayrayku nisunman Ezequielqa mana chay mana rikukoj templotachu rikusqanta.

11. ¿Imaraykutaj nisunman Ezequielpa tiemponpi, manaraj mana rikukoj templomanta sutʼinchanapaj tiempochu kasqanta?

¹¹ Iskay kaj. Yachanchej Ezequielqa mana chay mana rikukoj templotachu rikusqanta imaraykuchus niraj tiempochu karqa Dios chay templomanta sutʼinchananpaj. Ezequiel mosqoypi jina rikusqanqa Babiloniaman preso apasqa karqanku chay judiospaj karqa. Paykunaqa Moisespa Leyninta kasukunanku karqa. Jerusalenman kutimuspataj, Jehovallata yupaychaymanta imatachus chay Ley nisqanta juntʼananku karqa. Chaypajqa templota, altarnintawan watejmanta sayarichinanku karqa, chaypi ofrendasta jaywanallankupajpuni. Ajinatapunitaj ruwarqanku 600 watasta jina. Jinapis, ¿imaynataj judiospaj kanman karqa Ezequiel mana rikukoj templomanta paykunaman willajtin? ¿Imatataj yuyankuman karqa kuraj kaj sacerdote pay kikin kausayninta qosqanmanta, tukuy waj ofrendastataj manaña jaywanachu kasqanmanta? ¿Imaynatataj chay willasqanta entiendenkuman karqa? ¿Yanapanmanchu karqa Leyta kasukunallankupajpuni? Yachanchej jina Jehovaqa imatapis tiemponpipuni sutʼinchan, llajtan entiendenanpaj jinaña kajtin.

12-14. ¿Imallapipis kikinchu karqa Ezequielpa rikusqan templo, Pablo mana rikukoj templomanta sutʼinchasqanwan? (“Mana kikin temploschu, nitaj kikin imaschu niyta munan” nisqa recuadrota qhawariy).

¹² Chanta, ¿imallapipis kikinchu Ezequielpa rikusqan templowan, Pablo mana rikukoj templomanta sutʼinchasqanwan? Pabloqa mana Ezequielpa rikusqantachu sutʼincharqa, manachayqa Moisespa tiemponpi Diosta yupaychana toldota. Pablo wakin imasta sutʼinchasqanqa, Salomonwan Zorobabelwan ruwachisqanku templospi karqa, jinallataj Ezequielpa rikusqan templopipis. Jinapis Ezequielwan Pablowanqa mana kikin imasmantachu parlarqanku.b Astawanpis sapa ujpa sutʼinchasqankoqa astawan entiendenapaj yanapawanchej. ¿Imaynataj chay?

¹³ Pabloj sutʼinchasqanqa imatachus Dios payllata yupaychanapaj wakichisqanta entiendenapaj yanapawanchej. Ezequielpa rikusqantaj Jehová payllata yupaychanapaj kamachiykunata churasqanta entiendenapaj yanapawanchej. Pabloqa Jehová payllata yupaychanapaj imatachus wakichisqanta entiendenanchejpaj mana rikukoj templomanta wakin imasta sutʼinchawanchej kuraj kaj sacerdotemanta, ofrendasmanta, altarmanta, Aswan Santo Lugarmanta ima. Ezequieltajrí Jehovallata yupaychanapaj churasqa kamachiykunamanta sutʼinchan. Ezequielpa rikusqanqa aswan sutʼita entiendenapaj yanapawanchej Jehovaj kamachiykunasninta, chaykunata yuyayninchejpi, sonqonchejpi japʼikunapaj.

¹⁴ ¿Imaynatá kay sutʼinchakusqan yanapawanchej? Mana nisunmanchu Ezequielpa rikusqanqa ni imapi yanapawasqanchejta. Chayrayku Ezequielpa rikusqan imaynatachus yanapawasqanchejta entiendenapajqa, ñaupajtaqa yachakuna imaynatachus ñaupa tiempopi kasukoj judiosta yanapasqanta.

15. 1) ¿Ima willaytaj judiospaj karqa Ezequielpa rikusqanpi? 2) ¿Imapitaj mana kikinchu Ezequiel capítulo 8, capítulos 40–48 nisqanwan?

¹⁵ Chay tapuyman kutichinapajqa kinsa imasta qhawarina, ajinamanta sutʼita entiendenapaj. Uj kaj, ¿ima willaytaj judiospaj karqa Ezequielpa rikusqanpi? Jehovallata yupaychay watejmanta sayarichisqa kanan. Chaytaqa Ezequiel sutʼita yacharqa. Payqa Jehová rikuchisqanman jina qhelqarqa ima millay imastachus Jerusalén templopi ruwasqankuta, chaytataj Ezequiel capítulo 8 willan. Chaytaj ni imapi kikinchu capítulos 40–48 nisqanwan. Ezequielqa may kusisqachá qhelqarqa Jehovallata yupaychay mana ima chʼichiyoj kasqanmanta: Tukuypis Jehovallata yupaychasharqanku, Moisespa Leyninpi nisqanman jina.

16. ¿Imatataj Isaías nerqaña Jehovallata yupaychay watejmanta sayarichisqa kananmanta?

¹⁶ Jehovallata yupaychay watejmanta sayarichisqa kananpajqa aswan patapi kanan karqa. Pachaj watas ñaupajtaña profeta Isaiasqa Dios yuyaychasqanman jina qhelqarqa: “Qhepa pʼunchaykunapi, Jehová Diospa wasinpa orqonqa tukuynin orqo puntasmanta aswan patapi sumaj sayachisqa kanqa. Tukuynin lomasmanta aswan patapi kanqa”, nispa (Isa. 2:2). Isaiasqa sutʼita nerqa Jehovallata yupaychayqa watejmanta sayarichisqa kananta, aswan patamanpis churasqa kanman jina, orqo puntapipis sayachisqa kanman jina. ¿Maypitaj Ezequiel kasharqa Dios uj mosqoypi jina templota rikuchishajtin? Uj jatun orqo patapi kasharqa Jehovaj wasin qhawarisqa (Eze. 40:2). Ezequielpa rikusqanqa sutʼita rikuchin Jehovallata yupaychay watejmanta sayarichisqa kananta.

17. ¿Imatataj sutʼinchashan Ezequiel 40–48?

¹⁷ Qhawarina imamantachus capítulos 40–48 parlasqanta. Ezequiel ñaupajta rikorqa uj angelta midishajta punkusta, perqasta, patiosta, temploj santo lugarninta ima (Eze. 40–42). Chaymanta rikorqa imayna tʼukunatachus Jehová uraykamusqanta, rikullarqataj imaynatachus Dios cheqanchasqanta, yanapasqanta ima mana kasukoj llajtanta, sacerdotesta, kurajkunasninkuta ima (Eze. 43:1-12; 44:10-31; 45:9-12). Rikullarqataj santo lugarmanta uj mayuta llojsimushajta. Chay mayutaj Wañusqa qochaman chayaj. Chay mayupeqa kausay karqa, allin imastaj (Eze. 47:1-12). Llajtaqa chhikankama tʼaqasqa kasharqa, chaupinpitaj Jehovallata yupaychaj kanku (Eze. 45:1-8; 47:13–48:35). ¿Ima willaytaj karqa Ezequielpa rikusqanpi? Jehovaqa llajtanman sutʼita rikuchisharqa, payllata yupaychayqa watejmanta sayarichisqa kananta, jatunchasqataj kananta. Jehovaqa yupaychana wasinpi kanan karqa. Templomantapachataj may chhika bendiciones uj mayu jina llojsimunan karqa. Chaytaj sanoyachisqa kayta, kausayta, runaspaj allin kausaytawan apamunan karqa.

18. ¿Imajtintaj mana yuyanachu kanman Ezequielpa rikusqan uj templopuni kasqanta?

¹⁸ Iskay kaj, ¿Ezequielpa rikusqan uj templopunichu karqa? Mana. Ezequielwan, chay preso apasqa judioswanqa ichapis chay rato cuentata qokorqanku, Ezequielpa rikusqanqa mana uj templopunichu kasqanta. ¿Imajtín chayta ninchej? Ezequiel rikorqa chay temploqa jatun orqo patapi kasharqa. Ezequielpa rikusqan templo Isaiaspa qhelqasqan profeciaman rijchʼakojtinpis mana uj templomantapunichu parlashan. Salomonpa ruwachisqan temploqa Jerusalenpi kasharqa, Moria orqopi. Aswan qhepamantaj chay temploqa watejmanta chayllapitaj sayarichisqa kanan karqa. Moria orqo, ¿jatun orqochu karqa? Mana. Muyuyninpi kaj orqosqa chay chhikallantaj karqanku, wakintaj aswan jatunraj. Ezequiel rikorqa chay templotaj jatun karqa. Tukuynin templo, perqasninpis mana Moria orqoman yaykuyta atinmanchu karqa. Salomonpa tiemponmanta Jerusalenmanpis mana yaykuyta atinmanchu karqa. Preso apasqa judiosqa mana suyasharqankuchu temploj santo lugarninmanta uj mayu llojsimunanta, Wañusqa qochamantaj yaykunanta, mana kausayniyoj yakustataj kausayniyojman tukuchinanta. Chantapis Sumaj Jallpʼaqa orqoraralla karqa. Chayrayku mana cheqetanta partikuyta atinmanchu karqa Ezequiel rikusqanman jina. Chayrayku nisunman Ezequielpa rikusqanqa mana uj lugarpi uj templopunichu kasqanta.c

19-21. Ezequiel mosqoypi jina rikusqanmanta uyarispa, ¿imatataj israelitas ruwananku karqa? ¿Imatataj Dios chaypaj ruwarqa?

¹⁹ Kinsa kaj, Ezequielpa tiemponmanta israelitas, ¿imaynataj kasharqanku chay rikusqanta uyarispa? Jehovallata yupaychaymanta churasqa kamachiykunata uyarispa israelitasqa pʼenqakunanku karqa. Jehovaqa Ezequielman nerqa: “Israel nacionman imaynachus templo kasqanta willay”, nispa. Imaynachus chay templo kasqantaqa sumajta willanan karqa, planosninta estudianankupaj jinapuni. Paykunaqa chay temploj planosninpi sumajta tʼukurinanku karqa, mana watejmanta sayarichinankupajchu, manachayqa Jehová nerqa jina juchasninkumanta pʼenqakunankupaj (Ezequiel 43:10-12 leey).

²⁰ ¿Imaraykutaj Ezequielpa rikusqan llampʼu sonqoyoj israelitasta pʼenqacherqa? Ezequielqa kay jina kamachiyta japʼerqa: “Runaj wawan, qhawariy, allinta qhawariy, allintataj uyariy tukuy ima nisusqayta Jehovaj templonpa kamachiykunasninmanta, leyesninmantawan”, nispa (Eze. 44:5). Ashkha kutista Ezequielqa uyarerqa kamachiykunasmanta, leyesmantawan (Eze. 43:11, 12; 44:24; 46:14). Chantapis ashkha kutista Jehovaqa kamachiykunasninta Ezequielman yuyaricherqa. Yuyarichillarqataj mashkhachus uj codo midisqanta, imaynachus peso cabal kasqantapis (Eze. 40:5; 45:10-12; Proverbios 16:11, kikinchay). Ezequiel mosqoypi jina templota rikusqanmanta parlaj versiculospi “midiy”, “miderqa”, chayman rijchʼasqa waj palabraspis rikhurin 50 kutismanta astawan.

²¹ ¿Imatataj Jehová niyta munarqa llajtanman medidasmanta, pesosmanta, leyesmanta, kamachiykunasmanta parlaspa? Chay palabrasta oqharispa Jehovaqa kay yachachiyta japʼikunankuta munarqa: Payllata yupaychanankupajqa payllataj kamachiykunata churasqanta. Chay kamachiykunata mana kasukojkunataj pʼenqakunanku karqa. ¿Imaynatá judíos chay imasta yachakorqanku? Qhepan capitulopi chaymanta yachakusun, sutʼitataj reparasunchej Ezequielpa rikusqan imachus noqanchejpaj niyta munasqanta.