‘Gog, contraykipi kashani’

1, 2. ¿Ima guerrataj qayllitapiña kashan? Chanta, ¿ima tapuykunataj rikhurin? (Qallariypi kaj dibujota qhawariy).

MAY CHHIKA watastaña runasqa guerraspi wañunku. Ajinallatataj wañorqanku kay Primera Guerra Mundialpi, Segunda Guerra Mundialpipis. Aswan jatun guerrataj qayllitapiña kashan. Chay guerraqa mana runaspa guerranku jinachu kanqa. Nacionesqa guerrapi tinkunku allinnillankuta maskʼaspa. Qayllaykamushan chay guerraqa “Tukuy Atiyniyoj Diospa jatun pʼunchayninpi kanqa” (Apo. 16:14). ¿Imaynapí chay guerra qallarenqa? Uj runaykachaj enemigo Diospa “jallpʼanman” yaykuykonqa. Chayrayku Tukuyta Kamachej Señor Jehovaqa ni jaykʼaj jina tukuchej atiyninta rikuchenqa.

² Chaynejta kay tapuykuna rikhurin: ¿Pitaj chay enemigo? ¿Ima jallpʼamantaj yaykuykonqa? ¿Maykʼajtaj, imaraykutaj, imaynatataj yaykuykonqa? Chay imasqa kanqa kay jallpʼapi Jehovallata yupaychajkunapaj. Chayrayku yachananchej tiyan chay tapuykunaj kutichiykunasninta. Ezequiel 38, 39 capitulospi rikhurisqan profecía chay tapuykunaman kutichin.

 3. ¿Imaynataj pisi parlayllapi Magog jallpʼamanta Gogmanta profecía?

³ (Ezequiel 38:1, 2, 8, 18; 39:4, 11 leey). Chay profecía pisi parlayllapi kay jina kanman: “Watas tukukuyta” ‘Magogmanta Gogqa’ Diospa llajtanpa “jallpʼanman” yaykuykun. Chaytaj Jehovaj ‘sinchʼi phiñakuyninta’ phatachin. Chayraykutaj mana qhawakullanchu, Gogtataj atipan.a Atipaytawantaj Jehovaqa enemigonpata, enemigon parte kajkunaj cuerposninkutapis “tukuy laya aycha mikhu pʼisqosman” qaraykun, “monte animalesmanpis”. Chantá Jehovaqa Gogman “sepulturata” qon. Imaynatachus chay profecía tumpamantawan juntʼakunanta entiendenapajqa yachananchej tiyan pichus Gog kasqanta.

 4. ¿Imatataj kay párrafo yachachiwanchej pichus Gog kasqanmanta?

⁴ ¿Pitaj Magogmanta Gog? Ezequiel libropi nisqanman jina, Gogqa Jehovallata yupaychajkunaj enemigonku. Satanás Jehovallata yupaychajkunaj aswan sinchʼi enemigonku kajtinpis, ¿payllatajchu Gog kanman? May chhika watasta publicacionesninchejpi Satanás Gog kasqanta nej. Astawan ukhunchaspataj Ezequielpa profecianta aswan sutʼita entiendekorqa. Uj Torremanta Qhawaj revistapi sutʼinchakorqa Magogmanta Gogqa mana uj espirituchu kasqanta, manachayqa kay jallpʼapi rikukoj enemigo, nisunman uj qotu ujchasqa naciones, pikunachus Jehovallata yupaychajkunaj contrankupi oqharikonqanku chaykuna.b Niraj chayta ukhunchashaspa, Ezequielpa profecianmanta iskay imasta qhawarina, reparanapaj Gogqa mana uj espirituchu kasqanta.

5, 6. ¿Imaynatataj Ezequielpa profecian reparachiwanchej Gogqa mana uj espirituchu kasqanta?

⁵ “Tukuy laya aycha mikhu pʼisqosman qaraykusqayki” (Eze. 39:4). Runasta Dios castigananta Biblia nejtin, wañusqa cuerposta aycha mikhu pʼisqos mikhukapunankuta niyta yachan. Diosqa chayta ruwananta nerqa israelitasta, waj nacionestapis (Deu. 28:26; Jer. 7:33; Eze. 29:3, 5). Chay castigotaqa mana espiritusmanchu chayachinanta nerqa, manachayqa runasman. Aycha mikhu pʼisqospis monte animalespis aychata mikhunku, mana espiritustachu. Chayrayku Ezequiel profeciamanta Gogqa mana uj espirituchu.

⁶ “Gogman sepulturata qosaj Israelpi” (Eze. 39:11). Bibliaqa ni ujta ninchu espiritusta pʼampakusqanta. Astawanpis nin Satanaspis supaykunasninpis waranqa watasta chinkay ukhupi wisqʼaykusqa kanankuta, nina qochamantaj wijchʼuykusqa kanankuta. Chayqa niyta munan wiñaypaj chinkachisqa kanankuta (Luc. 8:31; Apo. 20:1-3, 10). Profeciapitaj nin Gogman kay jallpʼapi ‘sepultura’ qosqa kasqanta. Chayrayku ninchej Gogqa mana uj espirituchu kasqanta.

7, 8. ¿“Norte ladomanta reypa” tukukuyninwan Magogmanta Gogpa tukukuyninwan kikinchu?

⁷ Gog mana uj espíritu kajtin, ¿pitaj chayri imataj Diospa chay enemigon kanman? Chay enemigoqa Diospa kamachisninpa contranta qhepata sayaykonqa. Kunanqa Bibliaj iskay profeciasninta ukhuncharina pichus Magogmanta Gog kasqanta yachanapaj.

⁸ ‘Norte ladomanta rey’ (Daniel 11:40-45 leey). Profeta Danielqa tiemponmantapacha kay tiemponchejkama atiyniyoj naciones rikhurinankuta nerqaña. Ujnin profecianpeqa parlan ‘sur lado reymanta’, ‘norte lado reymantawan’. Nintaj chay iskaynin reyesqa chejninakunankuta. Watas pasasqanman jina chay iskay reyesqa waj waj nacioneswan ninakorqanku. Iskayninkutaj tinkunku kay jallpʼapi atiyniyoj kayta munaspa, kamachiyta munaspataj. Danielqa ‘tukukuy tiempopi’ norte ladomanta rey imatachus ruwananta nerqa: “Phiñasqa llojsenqa ashkhasta wañuchinanpaj, tukuchinanpaj ima”, nispa. Norte ladomanta reyqa Jehovaj kamachisninpa contranta oqharikonqa.c Jinapis Magogmanta Gog jinallataj “tukuchisqa kanqa” Diospa llajtanta mana tukuchiyta atisqanpi.

 9. ¿Imapitaj rijchʼakun Magogmanta Gogpa tukukuynin ‘jallpʼantinmanta reyespa’ tukukuyninwan?

⁹ ‘Jallpʼantinmanta reyes’ (Apocalipsis 16:14, 16; 17:14; 19:19, 20 leey). Apocalipsis libropeqa nin ‘jallpʼantinmanta reyesqa’ ‘reyespa Reyninpa’ contranta oqharikunankuta, nisunman Jesuspa contranta, cielopi kamachina tiyananpiña tiyasqa kashajtin. Jinapis mana cieloman chayayta atisqankurayku, kay jallpʼapi Diospa Gobiernon parte kajkunaj contranta oqharikonqanku. Chantá ‘jallpʼantinmanta reyesqa’ Armagedón maqanakupi atipachikonqanku. Ajinata tukuchisqa kanqanku Diospa llajtanpa contranta oqharikusqankutawan. Jallpʼantinmanta reyespa tukukuynenqa Magogmanta Gogpa tukukuyninman rijchʼakun.d

10. ¿Imatá nisunman pichus Magogmanta Gog kasqanmanta?

¹⁰ Chay iskay profeciasta ukhunchariytawan, ¿imatá nisunman Gogmanta? Uj kaj, Gogqa mana uj espirituchu. Iskay kaj, Gogqa ninakun tumpamantawan Diospa llajtanpa contranta oqharikoj nacioneswan. Diospa llajtan jallpʼantinpi kasqanrayku, chay qotu nacionesqa ujchaykukunanku kanqa uj yuyaylla contranta oqharikunankupaj (Mat. 24:9). Chayta ruwanankupajtaj Satanás yuyayta qonqa. Payqa ashkha watastaña nacionesta tanqashan Diosllata yupaychajkunaj contranpi churanakunankupaj (1 Juan 5:19; Apo. 12:17). Gogmanta Ezequielpa profecianqa jallpʼantinmanta naciones Diospa llajtanpa contranta oqharikunankumanta astawan sutʼinchan.e

11. ¿Imayna ‘jallpʼamantaj’ Gog yaykuykonqa?

¹¹ Párrafo 3 nin jina, Magogmanta Gogqa Diospa munasqa “jallpʼanman” yaykuykuspa Jehovaj phiñakuyninta phatachenqa. ¿Ima jallpʼamantá parlashan? (Ezequiel 38:8-12 leey). Ezequielpa profecianpeqa nin Gogqa “uj nacionpa jallpʼanman” yaykuykunanta. “Chay nacionqa [...] watejmanta sayarichisqa karqa”, “nacionesmanta tantasqa karqa”. Nillantaj chay jallpʼapi tiyakojkunaqa Jehovata yupaychasqankuta. Paykunaqa “ni imata manchachikuspa tiyakushanku [...] mana jarkʼayniyoj ranchospi. Ranchosninkoqa mana perqasniyoj, mana trancanasniyoj, mana punkusniyoj kanku. [...] Paykunaqa may chhika valorniyoj imasta [...] tantashanku”. Jallpʼantinpi Jehovallata yupaychajkunaqa ajina jallpʼapi tiyakunku. ¿Imaynatá yachasunman imawanchus chay ‘jallpʼa’ ninakusqanta?

12. ¿Imaynatá ñaupa Israelpa jallpʼan watejmanta sayarichisqa karqa?

¹² Ñaupa Israelpa jallpʼan watejmanta sayarichisqa kasqanmanta parlarina. Chay jallpʼapeqa may chhika watasta Diospa ajllakusqan runas tiyakorqanku, llankʼarqanku, Jehovata yupaycharqanku. Israelitas mana kasukusqankurayku Jehovaqa Ezequielwan willacherqa chay jallpʼanku chʼin jallpʼaman tukunanta, saqerpasqa kananta (Eze. 33:27-29). Chantá willachillarqataj arrepientekoj uj qotu judíos Babiloniamanta kutinpunankuta, chay jallpʼapitaj watejmanta Jehovallata yupaychanankuta. Jehová bendecisqanraykutaj Israelpa jallpʼanqa “Edén huertaman jina” tukunan karqa (Eze. 36:34-36). Chaytaj juntʼakuyta qallarerqa 537 watapi Jesús niraj jamushajtin. Chay watapi uj qotu judíos Jerusalenman kuterqanku, munasqa jallpʼankupi Jehovallata watejmanta yupaychanankupaj.

13, 14. 1) ¿Imataj chay sumaj ‘jallpʼa’? 2) ¿Imajtintaj chay sumaj ‘jallpʼa’ Jehovapaj may munasqa?

¹³ Diospa kamachisnenqa kunanpis jaqay tiempopi jinallataj watejmanta sayarichisqa karqanchej. 9 capitulopi yachakorqanchej jina Diospa llajtanqa 1919 watapi Jatun Babiloniapi may chhika watasta preso jina kasqanmanta kacharichisqa karqa. Chay watapi Diospa kamachisnenqa ‘jallpʼankupi’ tiyakuyta qallarerqanku, nisunman Jehovallata yupaychanankupaj llimphuchasqas karqanku. Paykunaqa Diosta tukuy sonqo yupaychanku, payllata cheqa Diosta jina qhawasqankurayku. Diospa llajtantaqa allin rishan, khuskataj tiyakushanku ni imata manchachikuspa, sonqo tiyaykusqastaj (Pro. 1:33). Sumaj yachachiykunata mikhunata jina ashkhata japʼinchej, sumaj llankʼayniyojtaj kanchej, Diospa Gobiernonmanta runasman willamunchej. Bibliapi kay nisqanqa noqanchejpi juntʼakun: “Jehová Diospa bendicionnenqa runata allin kausayman churan, manataj bendicionninwan khuskataqa ima ñakʼariytapis apachimunchu” (Pro. 10:22). Sichus Jehovallata tukuy sonqo yupaychanchej parlasqanchejwan ruwasqanchejwan chayqa, maypi tiyakuspapis chay sumaj ‘jallpʼapi’ kashanchej.

¹⁴ Chay ‘jallpʼaqa’ Jehovapaj may munasqa. Payqa chay ‘jallpʼapi’ tiyakojkunata “tukuy nacionespa valorniyoj” imasninta jina qhawan. Chay runasqa payllata yupaychanankupaj pusamusqan kanku (Ageo 2:7; Juan 6:44). Mayta kallpachakunku mosoj runa kaywan pʼachallikunankupaj, Jehová jina kʼachas kanankupaj (Efe. 4:23, 24; 5:1, 2). Jehovallata yupaychanku, tukuy atisqankutataj payta sirvinku. Chayta ruwanku payta jatunchaspa, munakuyninkutataj rikuchispa (Rom. 12:1, 2; 1 Juan 5:3). Jehovaqa maytachá kusikun kamachisnin mayta trabajashasqankuta rikuspa chay ‘jallpʼata’ kʼachanchanankupaj. Kausayninchejpi Jehovallata yupaychayta ñaupajman churaspaqa mana chay ‘jallpʼallatachu’ kʼachanchanchej, astawanpis Jehovaj sonqonta kusichinchej (Pro. 27:11).

15, 16.  ¿Maykʼajtaj Magogmanta Gog ‘jallpʼanchejman’ yaykuykamonqa?

¹⁵ Tumpamantawan chay ujchasqa nacionesqa kʼachitu jallpʼanchejman yaykuykamonqanku. Jehová Diosllata yupaychajkunaj contranta sayaykonqanku. Chayrayku chaymanta astawan yachakunanchej tiyan. Kunanqa kinsa tapuykunaman kutichisun.

¹⁶ ¿Maykʼajtaj Magogmanta Gog jallpʼanchejman yaykuykamonqa? Ezequielpa profecian kutichiwanchej: “Watas tukukuyta qanqa uj nacionpa jallpʼanman yaykuykunki”, nispa (Eze. 38:8). Chaypi nisqanman jinaqa, Magogmanta Gogqa kay mundoj imasnin niraj tukuchisqa kashajtin yaykuykamonqa. Yachanchej jina manchay ñakʼariy tiempoqa qallarenqa Jatun Babilonia, nisunman tukuynin llulla religiones chinkachisqa kajtin. Tukuy llulla religiones chinkachisqa kasqankutawan, Armagedón niraj qallarishajtin, Gogqa Diospa kamachisninpa contranta sinchʼita sayaykonqa.

17, 18. ¿Imaynatá Jehová manchay ñakʼariy tiempopi munayninta ruwachenqa?

¹⁷ ¿Imaraykutaj Gog Jehovaj kamachisninpa ‘jallpʼankuman’ yaykuykonqa? Ezequielpa profecianpeqa iskay imasta reparanchej. Ñaupaj kaj, Jehová chayta ruwachenqa. Iskay kaj, Gogpuni sajra kajta wakichenqa.

¹⁸ Jehová chayta ruwachenqa (Ezequiel 38:4, 16 leey). Diosqa Gogta nin: “Simiykimanta ganchoswan japʼisqayki”, chantá “jallpʼaypa contranta apamusqayki”, nispa. ¿Chay niyta munanchu Jehovapuni chay nacionesta obligananta kamachisninpa contranta oqharikunankupaj? Mana. Jehovaqa nipuni jaykʼajpis llajtanta sajra kajta ruwanmanchu (Job 34:12). Jinapis enemigosninta sumajta rejsin. Yachantaj kamachisninta mayta chejnikusqankuta, tukuchinankupajtaj mayta wateqashasqankuta (1 Juan 3:13). Jehovaqa Gogta siminmanta ganchoswanpis aysashanman jina munayninta ruwachenqa, ajinamanta munaynin maychus tiemponpi juntʼakunanpaj. Jatun Babilonia tukuchisqa kasqantawan, Jehovaqa ichá imaynamantapis nacionesta aysanqa imatachus ruwaytapuni munarqanku chayta ruwanankupaj, nisunman llajtanpa contranta oqharikunankupaj. Ajinamanta Jehovaqa Armagedón qallarinanpaj wakichenqa, nisunman aswan jatun guerra qallarinanpaj. Chantá llajtanta salvanqa, Jehovalla allinta kamachisqanta pataman churanqa, santo sutintataj jatunchanqa (Eze. 38:23).

19. ¿Imajtintaj Gog Jehovallata yupaychayta qhechuyta munawasun?

¹⁹ Gogpuni sajra kajta wakichenqa. Nacionesqa ‘sajra kajta ruwanankupaj wakichikonqanku’. Jehovaj kamachisninta may chhika watastaña chejnikusqankurayku, paykunapaj phiñasqa kasqankurayku contrankuta sayaykonqanku. Chaypacha Jehovaj kamachisnenqa “mana jarkʼayniyoj” ranchospipis tiyakushankuman jina kanqa, nisunman “mana perqasniyoj, mana trancanasniyoj, mana punkusniyoj” ranchospi. Nacionesqa Diospa llajtan “may chhika valorniyoj imasta” tantasqankuta ‘saqueanankupaj, ashkha imasta suwakapunankupaj’ wakichikonqanku (Eze. 38:10-12). ¿Imataj chay ‘valorniyoj imas’? Jehovaj llajtanpataqa may chhika valorniyoj imas tiyapun, aswan valorniyojtaj Jehovallata yupaychasqanku. Nacionestaj chay aswan valorniyoj kajta qhechuyta munanqanku, mana Jehovallata yupaychayta valorniyojpaj qhawasqankuraykuchu, manachayqa chejnikusqankurayku, Jehovallata yupaychayta rejsichejkunatapis chejnisqankurayku.

20. ¿Imaynatá Gog Jehovallata yupaychajkunaj jallpʼankuman yaykuykonqa?

²⁰ ¿Imaynatá Gog Jehovallata yupaychajkunaj jallpʼankuman yaykuykonqa? Ichapis nacionesqa kausayninchejman satʼikuyta munanqanku, manañataj Jehová Diosta yupaychananchejta munanqankuchu. Chaypajqa ichapis publicacionesninchejta prohibiyta munanqanku, manaña tantakunanchejta niwasun, tʼaqanachiyta munawasun, Diosmantataj manaña willananchejta niwasun. Chay tukuy imasqa paraisonchejwan ninakun. Satanastaj nacionesta tanqanqa chinkasqata chinkachinankupaj Jehovaj kamachisninta, Jehovallata yupaychaytapis.

21. ¿Imajtín Jehovaman agradecekunchej imachus tumpamantawan kananta willawasqanchejmanta?

²¹ Tumpamantawan Magogmanta Gogqa chay sumaj jallpʼapi cheqa cristianos tiyakojkunaj contrankuta oqharikonqa. Mayta Jehovaman agradecekunchej imachus tumpamantawan kananta willawasqanchejmanta. Manchay ñakʼariy chayamunankamaqa Jehovallata yupaychana. Chaytaj kausayninchejpi aswan importante kachun. Chayta kay tiempopi ruwasun chayqa, sumaj jallpʼanchejta aswan kʼachituman tukuchisun. Maytapuni rikuyta munashanchej imatachus tumpamantawan Jehová ruwanqa chayta. Payqa Armagedonpi sayaykonqa llajtanta, santo sutintapis jarkʼakunanpaj. Chaymanta qhepan capitulopi yachakusun.