“Sonqonkuta ujllamanña tukuchisaj”

1-3. 1) ¿Imaraykutaj babilonios Diospa kamachisninmanta burlakoj kanku? 2) ¿Imaynatá paykunamanta burlakoj kanku?

BABILONIAPI kashasqaykipi piensariy. Qanqa Diosta yupaychakushallankipuni, 50 watastañataj preso jina kashanki. Sapa Samarikuna Pʼunchaytaj Jehovata yupaychajkunawan khuska tantakoj rinki. Rishaspataj runa juntʼa callesninta pasanki, jatuchaj templospa ñaupaqenta, santosta yupaychana lugarespa ñaupaqenta ima. Chay lugaresmanqa may chhika runas rinku, Marduk diosninkuman, waj diosesninkumanpis ofrendasninkuta jaywanankupaj, takinankupaj ima.

² Chaykunata pasaytawan uj chʼin lugarman chayanki, ichapis jatuchaj larqʼas llajta chaupinta pasanku chayman. Chaypitaj Jehovata yupaychaj runaswan tinkunki.a Chaypi orakunkichej, salmosta takinkichej, Diospa Palabranpitaj tʼukurinkichej. Orakushajtiykichejtaj larqʼa kantupi sayashaj barcospa sonasqan uyarikun. Mayta kusikunki sapallaykichej chaypi kashasqaykichejmanta, manataj waj kutis jina pipis pantachisusqaykichejmanta.

³ Babiloniosqa ashkha maqanakuspi atiparqanku, piensajtaj kanku diosesninkoj yanapayninwan atipasqankuta. Jerusalenta thuñiykuspaqa piensarqanku diosninku Marduk Jehovamanta aswan kallpayoj kasqanta. Chayrayku babiloniosqa judiosmanta, Diosninkumantawan burlakoj kanku. Wakin kutistaj asikunankupaj nej kanku: “Ujsituta takiripuwayku chay Sionmanta takiykunata”, nispa (Sal. 137:3). Chay takiykunamanta ashkhasqa Sion atipasqanmanta, nisunman Jerusalén Jehovaj enemigosninta atipasqanmanta parlan. Ichapis babiloniosqa chaykunata uyarispa astawan asikoj kanku, jinapis wakin salmosqa paykunamantapis parlallajtaj. Chay salmosmanta ujnintaj nin: “Jerusalentaqa rumi montonesllataña saqerparinku. [...] Muyuyniykupi kaj nacionesqa asipayawayku, burlakuwaykutaj”, nispa (Sal. 79:1, 3, 4).

4, 5. 1) ¿Imaynatataj profeta Ezequielpa qhelqasqan Diospa kamachisninta sonqocharqa? 2) ¿Imatataj kay capitulopi yachakusun? (Qallariypi kaj dibujota qhawariy).

⁴ Diosta wasanchaj judiospis qanmanta burlakunku Jehovapi, profetasninpa nisqasninpi creesqaykirayku. Qanwan familiaykiwantaj Jehovallata yupaychaspa sonqochakunkichej, Jehovaj kamachisninwan khuska orakuspa takispa kusikunkichej. Diospa Palabranmanta leekusqanta uyarispataj sonqo tiyasqa kankichej (Sal. 94:19; Rom. 15:4). Jinallapi uj runa chayamun, Ezequielpa profeciasninmanta kʼuyuna libroyoj. Chay librota leeyta qallarejtinkutaj uyarinki Jehovaqa kamachisninta jallpʼankuman watejmanta kutichinanta. Chayta uyarispa maytapuni kusikunki, ñapis yuyashankiña qanwan familiaykiwan kutipushasqaykichejpi, chaypitaj Jehovallata watejmanta yupaychashasqaykichejpi.

⁵ Ezequiel libroqa Jehovallata yupaychay watejmanta sayarichisqa kananmanta ashkhata parlan. Chaytaj mayta sonqochawanchej. Chaymanta yachakushaspaqa kay tapuykunaman kutichisun: ¿Imaynatataj Diospa nisqasnin judiospaj juntʼakorqa? ¿Imaynatá kunan juntʼakushan? Chantá yachakusun imaynatachus aswan qhepaman Diospa nisqasnin juntʼakunanta.

 6. ¿Imatataj Dios llajtanman kutin kutita nisqa?

⁶ Jehovaqa Ezequielnejta llajtanman nerqa castigasqa kanankuta may chhika watasta contranpi oqharikusqankurayku. Pay nerqa: “Presos apasqa kanqanku, llajtankumanta karuman apasqa kanqanku”, nispa (Eze. 12:11). Kay libromanta capítulo 6 nishan jina, Ezequielqa rikucherqa imaynatachus preso apasqa kanankuta. Jehovaqa mana chay kutillapichu llajtanman chayta willacherqa, manachayqa Moisespa tiemponpiña. Waranqa watas ñaupajta paykunaman sutʼinta nerqa contranpi siga oqharikojtinku, presos apasqa kanankuta (Deu. 28:36, 37). Profeta Isaiaspis, Jeremiaspis chayllatataj nerqanku (Isa. 39:5-7; Jer. 20:3-6).

 7. ¿Imaynatá Jehová llajtanta castigarqa?

⁷ Jinapis israelitasqa manapuni Jehovata kasorqankuchu, astawanpis sonqonta nanacherqanku. Kʼullu runas karqanku, santosta yupaychaymanta wañurej kanku, Diostataj wasancharqanku. Paykunaqa mana allin michejkunasniyoj, nisunman mana allin kamachejkunasniyoj kasqankurayku, imaymana juchasta ruwarqanku. Chayrayku Jehovaqa yarqhay kananta saqellarqa, chaytaj paykunapajqa pʼenqay karqa, ñaupajta jallpʼankupi “lechewan miskʼiwan jinantin” kasqanrayku (Eze. 20:6, 7). Chantá Jehovaqa nisqanman jina saqellarqa Babiloniaman llajtan preso apasqa kananta. Rey Nabucodonosorqa 607 watapi Jesús niraj jamushajtin, Jerusalenta thuñerqa templontinta. May chhika judíos mana wañojtinkupis, Babiloniaman presos apasqa karqanku. Chaypitaj kʼumuykachachisqa karqanku kay capituloj qallariyninpi yachakorqanchej jina.

8, 9. ¿Imatataj Dios nisqa ñaupa cristianosman payta wasanchajkunamanta?

⁸ Cristiana congregaciontapis Babiloniaman preso apasqa judiosta jinallataj pasarqa. ¿Imajtín chayta ninchej? Cristoj discipulosninmanqa judiosman jinallataj ñaupajmantaña willakorqa imachus kananta. Jesusqa willayta qallarishaspallaraj nerqa: “Llulla profetasmanta allinta qhawakuychej, paykunaqa ovejasman tukuspa qankunaman jamunku, ukhunkupitaj yarqhasqa atojkuna kanku”, nispa (Mat. 7:15). Aswan qhepata apóstol Pablopis Dios yuyaychasqanman jina nillarqataj: “Noqa yachani ripusqaytawan chaupiykichejman phiña atojkuna yaykumunankuta, tropatataj mana khuyanankuta. Chantapis qankuna ukhullamantataj runas rikhurenqanku, cheqa kajta qʼewispa creejkunata paykunaj qhepankuta pusanankupaj”, nispa (Hech. 20:29, 30).

⁹ Cristianosmanqa willakorqa imaynatachus chay runasta rejsinankuta, imaynatachus jarkʼakunankutapis. Ancianostataj kamachikorqa Diosta wasanchajkunata congregacionmanta qharqonankuta (1 Tim. 1:19; 2 Tim. 2:16-19; 2 Ped. 2:1-3; 2 Juan 10). Ashkha cristianostaj Israelmanta, Judamanta runas jinallataj mana Jehovaj nisqasninta kasorqankuchu. Pachaj wata qayllata Diosta wasanchajkunaqa congregacionpi rikhurisharqanku. Apostolesmantaqa Juanllaña kausasharqa, paytaj rikorqa congregación mana allinman tukushasqanta, mana kasukojkunataj manchayta miraykushasqankuta. Payllaña kasharqa congregacionta jarkʼananpaj (2 Tes. 2:6-8; 1 Juan 2:18). ¿Imataj karqa Juan wañupusqantawan?

10, 11. ¿Imaynatataj 100 watamantapacha trigomantawan cizaña qhoramantawan kikinchay juntʼakuyta qallarerqa?

¹⁰ Juan wañupusqantawan, trigomantawan cizaña qhoramantawan kikinchay juntʼakuyta qallarerqa (Mateo 13:24-30 leey). Jesús nerqa jina Satanasqa cizaña qhorata congregacionman tarpuykorqa, nisunman llulla cristianos congregacionta mana allinman tukucherqanku. Jehovaqa maytachá llakikorqa. Wawan rikhuricherqa chay congregacionmanqa llulla diosesta yupaychay, imaymana costumbres ima juntʼaykuyta qallarisharqa. Chantapis congregacionpeqa runaspa llulla yuyaychayninkuta japʼikusharqanku, demoniospa yachachiyninkutapis. ¿Imatá Jehová ruwarqa? Imaynatachus ñaupa tiempomanta nacionta saqellarqa presos apasqa kanankuta, ajinallatataj cristiana congregacionta saqellarqa presos jina apasqa kanankuta. Pachaj watamanta qhepaman llulla cristianosqa trigowan ninakoj cristianosta pʼampaykorqanku, ajinamanta llulla religionpa makinman urmarqanku, nisunman Jatun Babiloniaj makinman. Cristiana congregacionqa Jatun Babiloniaj makinpi preso jina karqa, llulla cristianos astawan miraykusqankuman jinataj, cristianos nichikojkuna rikhurerqanku.

¹¹ Cristiano nichikojkunaqa may chhika watasta atiyniyoj karqanku, chay wataspitaj cheqa cristianos karqankuraj, Jesuspa kikinchayninmanta trigowantaj ninakorqanku. Chay cheqa cristianosqa Diosta mana qonqarqankuchu, Ezequiel 6:9 versiculopi parlan chay judíos jina karqanku. Wakenqa mana manchachikuspa nerqanku cristiano nichikojkunaj yachachisqanku llulla kasqanta. Chayrayku asipayasqas, qhatiykachasqastaj karqanku. ¿Jehová saqellarqachu llajtan llulla yachachiykunaj makinpi wiñaypaj kananta? Mana. Israel nacionman jina phiñakuyninta maychus kajllata, uj tiempollapajtaj rikucherqa (Jer. 46:28). Jehovaqa mana llajtanta saqerparerqachu. Kunanqa Babiloniaman preso apasqa judiosmanta parlarinallapuni, yachakunataj Jehová paykunaman kacharichisqa kanankuta nisqanmanta.

12, 13. Ezequielpa tiemponpi, ¿imajtintaj Jehová manaña phiñakorqachu preso apasqa llajtanpaj?

¹² Jehovaqa llajtanman nerqa mana wiñaypajchu paykunapaj phiñakunanta. Pay nerqa: “Phiñakuyneyqa tukukaponqa, paykunaj contrankupi rabiaypis chinkaponqa, noqataj sonqo juntʼasqa kasaj. Paykunaj contrankupi phiñakuyniyta kachaykuyta tukusqaytawan, paykuna yachanqanku noqa Jehová Dios parlamusqayta. Noqaqa munani noqallata yupaychanawankuta”, nispa (Eze. 5:13). ¿Imajtín Jehová niña phiñakorqachu?

¹³ Judíos presos apasqa kashajtinkoqa Diosta kasukojkuna, mana kasukojkunapis presos apasqa karqanku. Chantapis wakin mana kasukoj judiosqa preso apasqa kaytawan pesachikorqanku, imaynatachus Jehová Ezequielnejta nerqa ajinata. Chay pesachikoj judiosqa Diospa contranta oqharikuspa ima pʼenqay imastachus ruwasqankumanta parlananku karqa, Jehovamantataj perdonta mañakunanku karqa, watejmanta allinpaj qhawasqa kanankupaj (Eze. 6:8-10; 12:16). Ezequielpis, profeta Danielpis, kinsantin amigosninpis Diosta kasukoj judíos karqanku. Danielqa judíos presos apasqa kasqankuta, kacharichisqa kasqankutapis rikorqa. Daniel libromanta capítulo 9 willawanchej, Danielqa uj oracionpi perdonta mañakusqanta Israel nacionpa juchasninmanta. Daniel jinallatajchá may chhika preso apasqa judíos munarqanku Jehová perdonananta, watejmantataj bendecinanta. Chayrayku paykunaqa maytachá kusikorqanku Ezequiel kacharichisqa kanankuta, llajtankumantaj kutipunankuta willajtin.

14. ¿Imajtintaj Jehová llajtanta kacharicherqa?

¹⁴ Jehovaqa llajtanta kacharicherqa, payllata yupaychaytapis watejmanta sayaricherqa, mana judíos kacharichisqa kanankupaj ima allintapis ruwasqankuraykuchu, manachayqa nacionespa ñaupaqenpi sutin jatunchasqa kananpaj tiempo chayamusqanrayku (Eze. 36:22). Babiloniosqa yachananku karqa supaymanta jamoj diosesninku, Marduk jina, ni imapis Tukuyta Kamachej Señor Jehovaj ñaupaqenpi kasqankuta. Kunantaj yachakuna 5 imasta Ezequiel preso apasqa judiosman willasqanmanta. Ñaupajtaqa yachakusun imaynatachus chaykuna Diosta kasukoj judiospaj juntʼakusqanta, chantá imaynatachus kay tiempopi juntʼakushasqantapis.

15. Jallpʼankuman kutipoj judíos, ¿imaynatataj Diosta yupaychananku karqa?

¹⁵ DIOSPA NISQAN 1 KAJ. Llulla diosesta yupaychay, llulla religionespa millay ruwasqasninku chinkanqa (Ezequiel 11:18; 12:24 leey). Kay libromanta capítulo 5 nin jina, Jerusalenpipis templopipis santosta yupaycharqanku llulla religiones jina. Diospa llajtanqa chʼichichakorqa, Jehovamantataj karunchakorqa. Diosqa Ezequielnejta nerqa preso apasqa judiosqa uj pʼunchay payllata watejmanta yupaychanankuta. Ima bendicionestachus Dios qonanta nerqa chayta japʼinankupajqa, chaytaraj ñaupajta ruwananku karqa.

16. ¿Imatataj nerqa Jehová llajtanpa jallpʼanmanta?

¹⁶ DIOSPA NISQAN 2 KAJ. Llajtankuman kutipunku. Jehovaqa preso apasqa kamachisninman nerqa: “Israel jallpʼata paykunaman qosaj”, nispa (Eze. 11:17). Chayta Dios llajtanman nisqanqa sumajpuni karqa. Babiloniosqa paykunamanta burlakoj kanku, nitaj jallpʼankuman kutinankupaj jinachu karqanku (Isa. 14:4, 17). Jallpʼankuman kutipojkuna Diosta kasukojtinkutaj jallpʼa sumajta poqonman karqa, ashkha mikhuna kanman karqa, tukuypis trabajoyoj kankuman karqa. Yarqhay kasqan, pʼenqaypi kasqanku, pisichikusqankupis qonqasqa kanman karqa (Ezequiel 36:30 leey).

17. ¿Imatataj Diospa llajtan watejmanta ruwanan karqa?

¹⁷ DIOSPA NISQAN 3 KAJ. Jehovaj altarninpi watejmanta ofrendasta jaywanku. Kay libromanta capítulo 2 nin jina, Jehovallata yupaychajkunaqa Ley nisqanman jina ofrendasta, uywa wañuchisqasta jaywanankupuni karqa. Jehovaqa jallpʼankuman kutipoj judiospa ofrendankuta japʼikunman karqa, paykuna kasukojtinku, yupaychayninkupitaj llimphusllapuni kajtinku. Ajinamanta juchasninkumanta perdonta tarinkuman karqa, Diospa qayllallanpipuni kankuman karqa. Jehová nerqa: “Tukuy israelitas, tukuyniykichejpuni yupaychawankichej. Chaypi noqa qankunata allinpaj qhawasqaykichej, mañasqaykichej imastachus qoyta munawasqaykichejta, ofrendasniykichejmanta ñaupaj kaj imastawan, noqapaj tukuy tʼaqasqa imasta mañasqaykichej”, nispa (Eze. 20:40). Jehovallata yupaychay watejmanta sayarichisqa kanman karqa, llajtanpajpis bendiciones kanman karqa.

18. ¿Imayna runastataj Jehová churanan karqa llajtanta michinankupaj?

¹⁸ DIOSPA NISQAN 4 KAJ. Sajra michejkunamanta kacharichisqa. Diospa kamachisninta kamachejkunaqa mana ruwanasta ruwarqanku. Juchankurayku Diospa llajtanqa jatuchaj juchasta ruwarqanku. Jehovataj mana qhawakullarqachu, chay michejkunamantaqa nerqa: “Mana saqesajchu ovejasniyta mikhuchinankuta [...]. Ovejasniyta siminkumanta qhechusaj”, nispa. Kamachisninmantaj nerqa: “Ovejasniyta cuidasaj”, nispa (Eze. 34:10, 12). Chayta ruwarqa sumaj michejkunata churaspa.

19. ¿Imatataj Jehová nerqa llajtan ujchasqa kananmanta?

¹⁹ DIOSPA NISQAN 5 KAJ. Jehovata yupaychajkuna ujchasqa kananku. Diosta kasukojkunaqa maytachá llakikorqanku, manaraj preso apasqa kashajtinku Diospa llajtan tʼaqanasqa kasqanmanta. Llulla profetaspis sajra kamachejkunapis, runasta oqharicherqanku Diospa churasqan profetaspa contranpi. Diospa llajtanqa paykunapura churanakusharqanku. Chayrayku may sumajpuni karqa Jehovallata yupaychay watejmanta sayarejtin, Dios kayta ruwananta nisqan: “Sonqonkuta ujllamanña tukuchisaj, paykunamanqa uj mosoj yuyayta qosaj”, nispa (Eze. 11:19). Sichus judiosqa jallpʼankuman kutipuspa ujchasqallapuni Jehovata yupaychankuman karqa chayqa, ni mayqen enemigonkupis atipayta atinmanchu karqa. Nacionnintin watejmanta Jehovata jatunchankuman karqa, niña pʼenqaypi rikhurichinkunmanchu karqa, niña pisipaj qhawachinkumanchu karqa.

20, 21. ¿Imaynatá Jehovaj nisqasnin jallpʼankuman kutipoj judiospaj juntʼakorqa?

²⁰ Jallpʼankuman kutinpoj judíos Diospa nisqasnin juntʼakusqanta, ¿rikorqankuchu? Josueqa unayña kayta nerqa: “Yachankichej [...] Jehová Diosniykichej sumaj imasta qosunaykichejta nisqanta tukuyninta juntʼasqanta. Tukuy ima nisqanpuni qankunaj allinniykichejpaj juntʼakorqa, ni ujpis qhepakorqachu mana juntʼakuspaqa”, nispa (Jos. 23:14). Ajina karqa Josuej tiemponpi, ajinallataj karqa judíos jallpʼankuman kutinpojtinpis.

²¹ Judiosqa santosta yupaychayta, waj religionespa costumbresnintapis saqeporqanku, Jehovamanta karunchachisqanrayku. Mana atikunanpaj jina kajtinpis, llajtankuman kutiporqanku, jallpʼasninkuta tarporqanku, sumajtataj kausakorqanku. Kutipuytawanqa Jehovaj altarnintaraj Jerusalenpi watejmanta ruwarqanku, ofrendastataj Diosman jaywarqanku, payta kusichej ofrendasta (Esd. 3:2-6). Jehovaqa paykunaman sumaj michejkunata qorqa. Chaykunamanta wakin karqanku sumajta copiayta yachaj sacerdote Esdras, kamachejkuna Nehemías, Zorobabel, kuraj kaj sacerdote Josué, profetas Ageo, Zacarías, Malaquías ima. Sichus Jehovaj llajtan kamachiykunasninta, yuyaychaykunasninta kasukunkuman karqa chayqa, watejmanta ujchasqas kankuman karqa, unayta tʼaqanasqas kajtinkupis (Isa. 61:1-4; Jeremías 3:15 leey).

22. ¿Imaraykutaj ninchej Diospa nisqasnin mana unay tiempollachu juntʼakusqanta?

²² Jehovaj nisqasnin ñaupaj kutirayku juntʼakusqanqa llajtanpaj may kusiypuni karqa. Jinapis chayqa imachus aswan qhepaman jamunanmanta uj chhikallan karqa. ¿Imajtín chayta ninchej? Jehovaqa nisqanta juntʼanman karqa kamachisnin kasukullajtinkupuni, makinmanpis churakullajtinkupuni. Judiostajrí tiemponmanqa niña Diosta kasorqankuchu, contranpitaj oqharikorqanku. Jinapis Josué nerqa jina Jehovaj nisqasnenqa juntʼakunpuni. Chayrayku Diospa nisqasnenqa aswan allinninmanta juntʼakunanraj kasharqa, aswan unaypajtaj. Chayta qhawarina.

23, 24. ‘Tukuy imata Dios allinchanan tiempo’, ¿imaynatataj chanta maykʼajtaj qallarerqa?

²³ Bibliata estudiaspa yachakunchej 1914 watapi kay sajra mundoj tukukuynin qallarisqanta. Diospa kamachisnintaj yachanchej 1914 watapi sumaj tiempo qallarisqanta, ‘tukuy imata Dios allinchanan tiempo’ (Hech. 3:21). ¿Imaynapitaj chayta yachanchej? Chay wataqa Jesucristo kamachina tiyananpi tiyaykorqa, rey jinataj churasqa karqa. ¿Imajtín ninchej Dios chayta ruwaspa allinchasqanta? Kayta yuyarikuna, Jehovaqa rey Davidman nerqa miraynin wiñaypaj kamachinanta (1 Cró. 17:11-14). Miraynintaj 607 watakamalla kamacherqa Jesús niraj jamushajtin. Chay wataqa babilonios Jerusalenta thuñiykorqanku, niñataj Davidpa familianmanta reyes karqachu.

²⁴ Jesusqa runa jina kashaspa, chayri Runaj Wawan jina kashaspa rey Davidpa mirayninmanta karqa. Chayrayku kamachina tiyanata japʼinanpaj derechoyoj karqa (Mat. 1:1; 16:13-16, sutʼinchaynin; Luc. 1:32, 33). Jehovaqa 1914 watapi Jesusman kamachina tiyanata cielopi qorqa. Chay wata ‘tukuy imata Dios allinchanan tiempo’ qallarerqa. Chaymantapacha Jehovaqa Jesuspa yanapayninwan waj imasta allinchallarqapuni.

25, 26. 1) ¿Maykʼajtaj Diospa llajtan Jatun Babiloniamanta kacharichisqa karqa? Chanta, ¿imaynatá chayta yachanchej? (“¿Imajtintaj 1919?”, nisqa recuadrota leeriy). 2) ¿Imataj juntʼakuyta qallarerqa 1919 watamantapacha?

²⁵ Jesucristoqa rey kaytawan ñaupajta Tatanwan khuska kay jallpʼaman jamorqa, Jehovallata yupaychayta qhawarej (Mal. 3:1-5). Jesús kikinchayninpi nerqa jina, ashkha watasta mana yachakuyta aterqachu pikunachus trigo kasqankuta, nisunman ajllasqa cristianos, pikunatajchus cizaña qhora kasqankuta, nisunman llulla cristianos.b Cosecha tiempo 1914 watapi qallarejtintaj sutʼi yachakorqa pikunachus cheqa cristianos kasqankuta. Bibliamanta Yachaqajkunaqa 1914 watapaj ashkha watasraj faltashajtin, cristiano nichikojkunaj millay juchasninkuta sutʼiman orqhorqanku, paykunamantataj tʼaqakapuyta qallarerqanku. Jehovaqa repararqa payllata yupaychayta watejmanta sayarichinanpaj tiempoña kasqanta. Chayrayku 1919 wata qallariyta, cosecha tiempo qallarisqanmanta pisi tiemponman Diospa llajtanqa Jatun Babiloniamanta kacharichisqa karqa (Mat. 13:30). ¡Niña presoschu karqanku!

²⁶ Jehovallata yupaychay watejmanta sayarichisqa kananmanta Ezequielpa profeciasnenqa, aswan allinninmanta juntʼakuyta qallarerqa, mana unay tiempopi jinallachu. Kunantaj qhawarina imaynatachus Diospa chay phishqa nisqasnin kay tiempopi juntʼakushasqanta.

27. ¿Imaynatataj Diospa llajtan santosta yupaychayta saqeporqa?

²⁷ DIOSPA NISQAN 1 KAJ. Llulla diosesta yupaychay, llulla religionespa millay ruwasqasninku chinkanqa. Diosta kasukoj cristianosqa 1900 watas chaynejta juchʼuy grupitospi tantakoj kanku, llulla religionpa costumbresnintataj saqepuyta qallarerqanku. Manaña creerqankuchu Trinidad yachachiypi, alma mana wañusqanpi, infiernopipis, llulla religionesmanta jamusqanrayku, nitaj Bibliamantachu kasqanrayku. Sutʼimantaj orqhorqanku santoswan Diosta yupaychayqa manapuni allinchu kasqanta. Diospa llajtanqa pisimanta pisi entienderqa cruzta apaykachaypis santosta yupaychaywan ninakusqanta (Eze. 14:6).

28. ¿Imaynataj Diospa llajtan kasharqa Jatun Babiloniamanta llojsipuytawan?

²⁸ DIOSPA NISQAN 2 KAJ. Diospa llajtanqa watejmanta payllata yupaychan. Cristianosqa Jatun Babiloniaj religionesninmanta llojsipusqankuman jina, Jehovallata yupaychayta aterqankuña, Diospa yachachiykunasninmantapis ni jaykʼaj piserqankuñachu (Ezequiel 34:13, 14 leey). Kay libromanta capítulo 19 nin jina, Jehovaqa llajtanta bendicerqa. Chayrayku llajtanpeqa ni jaykʼaj jina Diosmanta ashkha yachachiykuna tiyan (Eze. 11:17).

29. ¿Imaynatá 1919 watapi astawan willayta qallarikorqa?

²⁹ DIOSPA NISQAN 3 KAJ. Jehovaj altarninpi watejmanta ofrendasta jaywanku. Ñaupa tiempo cristianostaqa kamachikorqa amaña uywa wañuchisqasta jaywanankuta. Astawanpis Jehovata yupaychasqanku, paymanta wajkunaman willasqankupis aswan valorniyoj ofrendas jina karqa (Heb. 13:15). Diospa llajtan Jatun Babiloniaj makinpi kashajtintaj mana chay jina ofrendasta jaywayta aterqankuchu. Kacharichisqa kananku tiempo qayllapiña kashajtintaj, Diospa llajtanqa ofrendasta jina jaywasharqankuña, runasman willaspa, tantakuykunapipis Diosta alabaspa. ‘Allin kamachi yuyayniyojqa’ 1919 watamantapacha predicacionta aswan ñaupajman churarqa, aswan sumajtataj wakichiyta qallarerqa (Mat. 24:45-47). Chaypachaqa Jehovaj altarnin uywa wañuchisqaswanpis juntʼa kashanman jina karqa, may chhika kamachisnin santo sutinta yupaychasqankuwan.

30. ¿Imatataj Jesús ruwarqa ovejitasnin sumaj qhawasqa kanankupaj?

³⁰ DIOSPA NISQAN 4 KAJ. Sajra kamachejkunamanta kacharichisqa. Cristoqa Diospa llajtanta cristiano nichikojkunaj michejkunasninmanta kacharicherqa, paykunaqa allinnillankuta maskʼanku, nitaj ovejitasta khuyankuchu. Sichus Cristoj ovejitasnin ukhupi, mayqen michejllapis, chay sajra michejkuna jina ruwaj chayqa, niña michejchu kaj (Eze. 20:38). Jesusqa Sumaj Michej kasqanrayku 1919 watapi allin kamachi yuyayniyojta churarqa, ovejitasnin sumaj cuidasqa kanankupaj. Chay allin kamacheqa Diosta kasukoj ajllasqa cristianos kanku, Diospa kamachisninmantaj yachachiykunata mikhunata jina qorqanku sumaj cuidasqa kanankupaj. Tiemponmantaj ancianosta wakicherqanku “Diospa ovejasninta” qhawaypi yanapakunankupaj (1 Ped. 5:1, 2). Ezequiel 34:15, 16 versiculostaqa ashkha kutista oqharikun ancianosta yuyarichinanpaj imaynatachus ovejitasta cuidanankuta, Jehovawan Jesucristowan nisqankuman jina.

31. ¿Imaraykutaj ninchej imatachus Ezequiel 11:19 nisqanta Jehová juntʼasqanta?

³¹ DIOSPA NISQAN 5 KAJ. Jehovata yupaychajkuna ujchasqa kananku. Watas pasasqanman jina cristiano nichikojkunamanta ashkha religiones llojserqanku. Chaykunamantataj may chhika grupos, sectas llojsinku, chaykunataj mana uj yuyayllachu kashanku. Jehovatajrí kacharichisqan llajtanwan tʼukuna milagrota ruwarqa. Diospa nisqan juntʼakorqapuni, pay nerqa: “Sonqonkuta ujllamanña tukuchisaj”, nispa (Eze. 11:19). Cristojtaqa mundontinpi may chhika discipulosnin tiyan, paykunataj imaymana ayllusmanta, religionesmanta llojsimorqanku, wakenqa qhapajkuna, wajchas ima kanku. Jinapis tukuyninchej kikin imasta Diosmanta yachakunchej, sumaj ujchasqastaj uj llankʼayllata ruwanchej. Jesusqa wañuchinankupaj niraj presochashajtinku Tatanmanta mañakorqa payta qhatikojkuna ujchasqas kanankupaj (Juan 17:11, 20-23 leey). Jehovataj mañakusqanman jinapuni kay tiempo may tʼukunata llajtanta ujchashan.

32. Jehovallata yupaychay watejmanta sayarichisqa kasqanta rikuspa, ¿imaynataj kashanki? (“Preso apasqasmanta, Jehovallata yupaychaymanta profecías”, nisqa recuadrota leeriy).

³² May sumajpuni kay tiempopi kausakoyqa, Jehovallata yupaychay watejmanta sayarichisqa kasqanta rikuypis. Jehová Diosta yupaychayninchejpeqa Ezequielpa profeciasnin juntʼakusqanta rikushanchej. Jehovaqa llajtanwan may kusisqachá kashan, pay nerqa: “Qankunata allinpaj qhawasqaykichej”, nispa (Eze. 20:41). Jehová Diospa llajtanqa may chhika watasta Jatun Babiloniaj makinpi preso jina kasharqa. Kunantaj chaymanta kacharichisqa kaspa, jallpʼantinpi Jehovallata alabashanku, ujchasqa kashanku, sumaj yachachiykunata mikhunata jina japʼinku. May sumajpuni chay llajtanpi kayqa. Chantapis mayta suyakushanchej Jehovallata yupaychay watejmanta sayarichisqa kananmanta wakin profecías juntʼakunantaraj.

33-35. 1) Ezequiel 36:35 versiculoj nisqanta, ¿imaynatá preso apasqa judíos entienderqanku? 2) Kay tiempopi Diospa llajtan, ¿imaynatataj chay versiculota entienden? (“Tukuy imata Dios allinchanan tiempo”, nisqa recuadrota leeriy).

³³ Yachakorqanchej jina ‘tukuy imata Dios allinchanan tiempoqa’, 1914 watapi qallarerqa Jesús rey jina churasqa kashajtin (Eze. 37:24). Chay qhepata Jehovaqa Cristoman atiyta qorqa Jehovallata yupaychay watejmanta sayarichisqa kananpaj, llajtan Jatun Babiloniamanta kacharichisqa kajtin. ¿Chayllatachu Jesús ruwarqa? Mana. Aswan qhepamanpis Jehovallata yupaychayta sayarichillanqapuni, profeta Ezequielpa qhelqasqantaj waj tʼukuna imastawan ruwananta willawanchej.

³⁴ Profeta Ezequiel nerqa: “Runastaj nenqanku: ‘Saqerasqa jallpʼaqa Edén huertaman jina tukun’”, nispa (Eze. 36:35). Profeta Ezequielwan, preso apasqa judioswanqa mana suyarqankuchu jallpʼanku Edén huerta jinapuni kananta (Gén. 2:8). Astawanpis paykunaqa yacharqanku Jehová jallpʼankuta sumaj jallpʼaman tukuchinanta, kʼachitumantaj tukuchinanta nishasqanta.

³⁵ Noqanchejpis mana suyakushanchejchu kay mundota Satanás gobernashajtin, kay jallpʼa Edén huertaman jina tukunanta. Jinapis yachanchej Jehovallata yupaychay watejmanta sayarichisqaña kasqanrayku kay tiempopi paraisopi jinaña kausakushasqanchejta, wajkunata yanapaspa, Diosta kausayninchejpi ñaupajman churaspa. Paraisopi jina kausakusqanchejqa aswan kʼachituman tukushan. Chanta, ¿ima nisunmantaj qhepa tiempomanta?

36, 37. ¿Imastaj aswan qhepaman paraisopi juntʼakonqa?

³⁶ Armagedón pasasqantawan Jesusqa Jehovallata yupaychayta sayarichillanqapuni, kay jallpʼatapis uj paraisoman tukuchenqa. Cristoqa waranqa watasta kamachimushajtin runasta yanapanqa kay jallpʼata Edén huertaman jina tukuchinankupaj, uj paraisoman. ¡Jehovaqa qallariymantapacha chaytapuni munarqa! (Luc. 23:43). Tukuywan allinta kausakusunchej, jallpʼanchejtapis sumajta cuidasunchej, maypi kaspapis ni imata manchachikusunchu. Piensarina Jehovaj kay nisqan juntʼakusqanpi: “Paykunawan allinyakuy tratota ruwasaj, nacionmantataj phiña animalesta tukuchisaj, ovejasniy chʼin jallpʼaspi ni imata manchachikuspa tiyakunankupaj, montespipis puñurikunankupaj” (Eze. 34:25).

³⁷ Mundontinta purimunaykipi piensariy. Animalesqa mana imanawasunñachu, nitaj ima pasanawanchejtapis manchachikusunñachu. Montemanpis sapallanchej yaykuyta atisunchej aswan ukhukama, qhawaytataj atisunchej imayna kʼachitupunichus kasqanta. Chantapis chaypi puñukuyta atillasunchej, ni imata manchachikuspa, qʼayantintaj sanitos rijchʼarisunchej.

38. Ezequiel 28:26 juntʼakojtin, ¿imaynataj kausay kanqa?

³⁸ Chantapis Jehovaj kay nisqanta juntʼakojta rikusunchej: “Chaypeqa ni imamanta manchachikuspa kausakonqanku. Wasista ruwakonqanku, uva sachʼastapis churakonqanku. Muyuyninkupi tiyakojkunata, paykunata pisipaj qhawanku chaykunata juchachasqayman jina castigajtiy, ni imata manchachikuspa tiyakonqanku. Chaypi yachanqanku noqa Jehová Diosninku kasqayta”, nispa (Eze. 28:26). Jehovaj tukuy enemigosnin chinkachisqa kajtin, jallpʼantinpi allinta kausakusun, ni imata manchachikuspa. Mana kay jallpʼallatachu cuidasun, manachayqa necesitasqanchejta, imatachus familianchej necesitasqantapis tariyta atillasun, tiyakunapaj jina sumaj wasista ruwakusunchej, uvasta plantasunchej, poqoynintataj mikhusunchej.

39. ¿Imaraykutaj seguros kashanchej Dios uj paraíso kananta nisqan juntʼakunanmanta?

³⁹ Tukuy kay yachakusqanchej, ¿uj cuentollachu? Rikunkiña imastachus Dios ruwasqanta ‘tukuy imata allinchanan tiempopi’. Satanás Diospa contranpi tukuy imata ruwajtinpis, Jesusqa Jehovamanta atiyta japʼerqa, Jehovallata yupaychaytataj watejmanta kay tiempopi sayaricherqa, runas Diosmanta allin karunchasqa kashajtinkupis. Chaytaj sutʼita rikuchiwanchej Ezequielpa qhelqasqan imasta Jehová juntʼanantapuni.