LECCIÓN 17
¿Imaynataj Jesús?
Jesuspa nisqasninta, ruwasqasninta ima yachaspaqa Jesusta astawan rejsisun. Chayta yachaspataj payman, Tatan Jehovaman ima astawan qayllaykusun. Kaypi yachakusun Jesús imaynachus kasqanta, pay jina kanapaj imatachus ruwanatapis.
1. ¿Imaspitaj Jesús Tatanman rijchʼakun?
Jesusqa munakuyniyoj Tatanwan cielopi may unayta tiyakusqanrayku, pay jina piensan, pay jina ruwan, pay jina munakuyniyojtaj (Juan 5:19 leey). Jesusqa Tatan Jehovaman tukuy imapipuni rijchʼakun. Chayrayku payllataj nerqa: “Noqata rikuwajqa Tataytapis rikullantaj”, nispa (Juan 14:9). Jesusta astawan rejsispaqa, Jehová Diostapis astawan rejsillasuntaj. Jesús khuyakuyniyoj kasqanqa, rikuchiwanchej Jehová Diospis khuyakuyniyoj kasqanta.
2. ¿Imaynatá Jesús Tatanta munakusqanta rikucherqa?
Jesús nerqa: “Kay mundomanta runasqa yachananku tiyan Tatayta munakusqayta. Chayrayku imaynatachus Tatay kamachiwarqa ruwanayta ajinata ruwashani”, nispa (Juan 14:31). Jesusqa kay jallpʼapi kashaspa Tatanta munakusqanrayku payta tukuy imapi kasukorqa. Chaytataj ruwarqa llakiykunapi rikukuspapis. Chantapis Jesusqa Tatanta munakusqanrayku paymanta parlarerqa, runastapis payman qayllaykunankupaj yanaparqa (Juan 14:23).
3. ¿Imaynatá Jesús runasta munakusqanta rikucherqa?
Jesuspajqa ‘runas allin munasqa karqanku’ (Proverbios 8:31). Payqa runasta munakusqanrayku kallpacharqa, tukuy sonqotaj paykunata yanaparerqa. Chantapis runasta khuyakusqanrayku milagrosta ruwarqa, manataj atiyninta rikuchinallanpajchu chayta ruwarqa (Marcos 1:40-42). Jesusqa may kʼachapuni karqa, tukuytataj uj rejllata qhawaj. Jesuspa yachachisqanqa allin sonqoyoj runasta sonqocharqa, sumaj kausayta suyakunankupajtaj yanaparqa. Chantapis Jesusqa tukuy runasta munakusqanrayku ñakʼarerqa, kausaynintapis qorqa. Payqa yachachisqanman jina kausakojkunata astawanraj munakun (Juan 15:13, 14 leey).
ASTAWAN YACHAKUNA
Kaypi astawan yachakusun Jesús imaynachus kasqanta. Chantá yachakullasuntaj imaynatachus Jesús jina wajkunata munakunata, qorikuyta yachanata ima.
4. Jesusqa Tatanta munakorqa
Jesusqa imaynatachus Diosta munakunata yachachiwanchej. Lucas 6:12; Juan 15:10; 17:26 leeriychej, chantá yachakojta tapuriy:
¿Imaynatataj Jehová Diosta munakusqanchejta Jesús jina rikuchisunman?
Jesusqa Tatan Jehovata mayta munakorqa. Chayrayku sapa kuti paymanta mañakoj.
5. Jesusqa wajkunaj allinninkuta maskʼarqa
Jesusqa mana paypa allinnillantachu maskʼarqa, manaqa wajkunaj allinninkuta maskʼarqa. Manchay saykʼusqa kaspapis, runasta yanapananpaj tiempochakorqa, samarikuytapis qonqaporqa. Marcos 6:30-44 leeriychej, chantá yachakojta tapuriy:
¿Imaynasmantataj Jesús wajkunaj allinninkuta maskʼasqa? (31, 34, 41, 42 versiculosta qhawariy).
¿Imaraykutaj Jesús runasta yanapasqa? (34 versiculota qhawariy).
Jesús Tatan Jehovaman mayta rijchʼakusqan, ¿yanapawanchejchu imaynachus Jehová Dios kasqanta yachanapaj?
¿Imaynatataj Jesús jina wajkunaj allinninkuta maskʼasunman?
6. Jesusqa qorikuyta yacharqa
Jesusqa mana ashkha imasniyoj kaspapis qorikuyta yachaj. Noqanchejtapis kikinta ruwananchejta niwanchej. Hechos 20:35 leeriychej, chantá yachakojta tapuriy:
¿Imata ruwaspataj kusisqa kasunman?
VIDEOTA qhawariychej, chantá yachakojta tapuriy:
Pobres kaspapis, ¿imastataj wajkunaman qorisunman?
Astawan yachanaykipaj
Bibliaqa yachachiwanchej Jesuspa sutinpi Jehovamanta mañakunata (Juan 16:23, 24 leey). Ajinata mañakuspaqa Jesuspa ruwasqanta jatunpaj qhawasqanchejta rikuchinchej. Imaraykuchus payqa Diosman qayllaykunapaj yanapawanchej.
WAKIN RUNAS NINKU: “Dios castigawasqanchejrayku sufrinchej”, nispa.
¿Jinachu kanman, imasta ruwaspataj Jesús rikucherqa Diosninchej noqanchejmanta llakikusqanta?
¿IMASTÁ YACHAKUNCHEJ?
Kaypi yachakunchej Jesusqa Jehová Diosta, runastapis munakusqanta. Payqa Tatan Jehovaman rijchʼakun. Chayrayku Jesusta rejsispaqa, Jehová Diostapis astawan rejsisun.
Yuyarikunapaj
¿Imaynatataj Jesús jina Jehová Diosta munakusqanchejta rikuchisunman?
¿Imaynatataj Jesús jina runasta munakusqanchejta rikuchisunman?
Jesús imaynachus kasqanmanta, ¿imataj astawan gustasunki?
ASTAWAN YACHAKUNAYKIPAJ
¿Imaynataj Jesús karqa? ¿Atisunmanchu pay jina kayta? Chayta yachanaykipaj kayta leeriy.
“Jesús jina kana” (Jesusmin ñan, cheqa kajtaj, kausaytaj, página 317)
¿Imaraykutaj Jesuspa sutinpi Diosmanta mañakuna tiyan? Chayta yachanaykipaj kayta leeriy.
“¿Imaraykutaj Jesuspa sutinpi mañakuna tiyan?” (La Atalaya, 1 de febrero de 2008)
¿Biblia willawanchejchu imayna rijchʼayniyojchus Jesús kasqanta? Chayta yachanaykipaj kayta leeriy.
“¿Imayna rijchʼayniyojtaj Jesús karqa?” (Chaytaqa Internetpi jw.org nisqapi tarinki)
¿Imatá yachakusunman Jesús warmista allinpaj qhawasqanmanta? Chayta yachanaykipaj kayta leeriy.
“Diosqa warmista allinpaj qhawan” (La Atalaya, 1 de septiembre de 2012)