¿Imaynatá llakiyninchejta atipasunman?

 1. ¿Imataj kanman llakisqalla kajtinchej?

RUNASQA sapa día problemasniyoj kanchej, tukuy atisqanchejtataj kallpachakunchej chaywan mana atipachikunapaj. Jinapis llakisqa kashaspaqa, mana problemasninchejta aguantayta atillanchejchu. Chantapis llakikuspaqa, ni imapaj valesqanchejta yuyasunman, niñataj kusisqachu kasunman. Proverbios 24:10 nin: ‘Sichus ima llakiypi rikhurispa llauchʼiyawaj chayqa, kallpayki pisiyanqa’, nispa. Arí, llakisqa kajtinchejqa kallpanchej pisiyan, nitaj problemasta aguantayta atillasunmanchu.

 2. ¿Imasmantá llakikunchej, chanta imatá kay yachaqanapi yachakusun?

² Noqanchejqa ashkha imasmanta llakikunchej. Wakenqa llakikunchej pantasqanchejmanta, mana tukuy imatapunichu ruwayta atisqanchejmanta, chayri onqosqa kasqanchejmanta. Wakintaj llakikunchej, Diospa llajtanpi munasqanchej llankʼayta mana japʼisqanchejmanta. Llakikullanchejtaj predicanchej chaypi runas, mana uyariwajtinchej. Kay yachaqanapeqa, chay llakiykunata atipanapaj imatachus ruwanata yachakusun.

 3. Pantanchej chay, ¿imatataj mana qonqanachu?

³ Pantasqanchejrayku, chayri imatapis mana allintachu ruwasqanchejrayku, ni imapaj valesqanchejta yuyasunman. Ajinata yuyaspaqa, Jehová Dios ni jaykʼaj mosoj mundoman yaykuchinawanchejta piensasunman. Chay jinata yuyayqa mana allinchu. Chayrayku pantanchej chayqa, ama kayta qonqanachu: Bibliaqa ‘tukuyninchej juchallikusqanchejta’ nin. Jesuslla mana juchallikorqachu (Rom. 3:23). Jinapis Jehová Diosqa, mana pantasqasninchejtachu qhawan, nitaj suyanchu ni imapi pantananchejta. Astawanpis payqa, manchay munakuyniyoj Tata jina yanapayta munawanchej. Chantapis payqa pacienciakuwanchej. Jehová Diosqa yachan, allin kajta ruwanapaj mayta kallpachakusqanchejta. Yachallantaj wakin kutis ni imapaj valesqanchejta yuyasqanchejta. Chayrayku payqa yanapayta munawanchej (Rom. 7:18, 19).

4, 5. Kay 1 Juan 3:19, 20 nisqanman jina, ¿imaraykutaj iskay hermanas mana llakiyninkuwan atipachikorqankuchu?

⁴ Deboramantawan Mariamantawan parlarina.b Deborataqa wawa kashajtin, familian mana munakojchu, kʼumuykachachejtaj kanku. Chantapis maypi jinalla imatapis allinta ruwasqanta nej kanku. Chayrayku wiñarqospaqa, ni imata allinta ruwayta atisqanta yuyaj. Imitapi pantaspapis, ni imapaj valesqanta yuyaj. Mariatapis ajinallatataj familiaresnin kʼumuykachachej kanku. Chayrayku payqa ni imapaj valesqanta yuyakoj. Bautizakuytawanñapis mana Jehovaj testigon kananpaj jinachu kasqanta yuyarqa.

⁵ Jinapis chay iskay hermanasqa, Jehová Diosta sirvillarqankupuni. Paykunaqa Jehová Diosmanta sinchʼita mañakuspa, paypa makinman llakiyninkuta saqerqanku (Sal. 55:22). Chantapis repararqanku munakuyniyoj Tatanchej Jehovaqa, ñaupajta imaynatachus kausakusqanchejta yachasqanta, jinallataj chay imas mayta llakichiwasqanchejtapis. Chantapis Jehovaqa, sonqonchejpi allin kajta qhawan, noqanchej chayta mana rikojtinchejpis (1 Juan 3:19, 20 leey).

 6. ¿Imatataj ruwasunman juchapi urmaspa?

⁶ Ichá Diospa chejnisqan imasta mana ruwanapaj, mayta kallpachakushanchej. Jinapis ichá pantanchejpuni, chaytaj mayta llakichiwanchej. Juchapi urmaspaqa llakikunchejpuni (2 Cor. 7:10). Jinapis ama yuyanachu niña ni imapaj valesqanchejta, Jehová Diospis niña perdonanawanchejta. Ajinata yuyayqa mana Bibliaj nisqanman jinachu. Chantapis Jehová Diosmanta karunchawasunman. Proverbios 24:10 niwanchej, anchata llakikojtinchej kallpanchej pisiyananta. Astawanpis pantasqanchejmanta Jehovawan parlarina, perdontataj mañakuna (Isa. 1:18). Pantasqanchejmanta arrepientekusun, cambianapajtaj kallpachakusun chayqa, Jehová Diosqa perdonawasunpuni. Chantapis ancianoswan parlarisunman. Paykunaqa pacienciawan yanapawasun, Jehovaman watejmanta qayllaykunapaj (Sant. 5:14, 15).

 7. Allin kajta ruwanapaj mayta kallpachakushanchej chay, ¿imaraykutaj mana llakikunachu tiyan?

⁷ Franciamanta Juan sutiyoj ancianoqa, allin kajta ruwanankupaj mayta kallpachakojkunaman nin: “Jehová Diosqa mana ni jaykʼaj pantaj runastachu cheqan runaspaj qhawan. Payqa cheqan runaspaj qhawan, pantasqankumanta tukuy sonqo arrepientekojkunata”, nispa (Rom. 7:21-25). Chayrayku imapi pantanchej chayqa, ama yuyanachu ni imapaj valesqanchejta. Chantapis sapallanchejmantaqa, mana Diospa ñaupaqenpi allinpaj qhawasqa kayta atisunmanchu. Chayrayku Jesuspa wañuyninnejta Jehová khuyakunawanchejta necesitanchej (Efe. 1:7; 1 Juan 4:10).

 8. Llakisqa kashaspa, ¿pikunawantaj parlarinanchej kanman?

⁸ Hermanospis, hermanaspis mayta kallpachawanchej. Paykunaqa imallamantapis parlayta necesitajtinchej uyariwanchej, parlasqankuwantaj kallpachawanchej (Pro. 12:25; 1 Tes. 5:14). Nigeriamanta hermana Julia, llakiyninwan mana atipachikunanpaj mayta kallpachakorqa. Pay nin: “Manachus hermanosqa, imachus kayman karqa. Jehová Diosqa mañakusqayta hermanosnejta uyariwan. Hermanosmanta yachakorqani imaynatachus llakiypi tarikoj hermanosta kallpachariyta”, nispa. Hermanosninchejqa mana yachayta atillankuchu, maykʼajchus kallpachanata necesitasqanchejta. Chayrayku llakisqa kashaspaqa, noqanchejpuni creeypi sinchʼi sayasqa hermanoswan parlarina, yanapatataj mañakuna.

 9. ¿Imaynatataj Salmo 41:3; 94:19 kallpachawanchej?

⁹ Jehová Diosmanta yanapata mañakuna. Imanchej nanawajtinchej, chayri unaytaña onqosqa kajtinchej, llakiynillanchejpi yuyasunman. Jehová Diosqa kay tiempopi mana uj milagronejta sanoyachiwasunchu. Jinapis payqa sonqochawanchej, onqoyninchejta aguantanapajtaj kallpata qowanchej (Salmo 41:3; 94:19 leey). Jehová Diosqa hermanosninchejnejta yanapawasunman. Payqa hermanospa sonqonkuta kuyurichinman wasinchejpi yanaparinawanchejpaj, chayri imatapis rantinpunawanchejpaj. Chantapis Jehová Diosqa hermanospa sonqonkuta kuyurichinman, noqanchejrayku paymanta mañapunawanchejpaj. Payqa yanapallawasunmantaj, sonqocharinawanchejpaj jina textosta yuyarikunapaj. Chaytaj kanman, mosoj mundopi mana onqospa kausananchejmanta parlaj textos (Rom. 15:4).

10. ¿Imataj Isaacta yanaparqa mana llakisqallapuni kananpaj?

¹⁰ Nigeriamanta hermano Isaacqa accidentakorqa, niñataj chakisninta kuyurichiyta aterqachu. Doctortaj payman nerqa niña ujtawan puriyta atinanta. Isaac nin: “Doctor manaña purinayta niwajtin, mayta llakikorqani, qʼala sonqo pʼakisqataj karqani”, nispa. Jinapis, ¿llakisqallapunichu karqa? Mana. ¿Imataj payta yanaparqa? Pay nin: “Señoraywanqa Jehová Diosman orakullarqaykupuni, Palabrantapis estudiallarqaykupuni. Chantapis ima bendicionestachus japʼisqaykupi piensarerqayku. Piensarillarqaykutaj mosoj mundopi kausakuyta suyakushasqaykupi”, nispa.

11. ¿Imatataj Cindy ruwarqa kusisqallapuni kananpaj?

¹¹ Mexicomanta hermananchej Cindyta doctor nerqa: “Onqoyniykeqa niña jampinapaj jinachu”, nispa. ¿Imataj yanaparqa llakiywan mana atipachikunanpaj? Payqa tratamientota ruwashajtin, doctoresman sapa día predicananta nikorqa. Pay nin: “Predicaspaqa wajkunata yanapariypi yuyaj kani, manataj operanallawankupichu, nanaynillaypichu, chayri onqosqa kasqallaypichu. Doctoreswan chayri enfermeraswan parlaspaqa, imaynachus familianku kashasqanta tapurej kani. Tapurillajtaj kani imaraykuchus doctorpaj estudiasqankuta, chay trabajo mana facilchu kajtinpis. Ajinamanta yachaj kani imasmantachus paykunawan parlarinayta. Wakin doctores, enfermeraspis niwaj kanku: ‘Onqosqasqa mana tapuyta yachawaykuchu imaynachus kashasqaykuta’, nispa. Chayrayku wakenqa, agradecekuwarqanku paykunamanta llakikusqaymanta. Wakin doctores, enfermeraspis, numeronkuta qowarqanku astawan yacharichinaypaj. Ajina llakiypi kashajtiypis, Jehová Diosqa kusisqallapuni kanaypaj yanapawan”, nispa (Pro. 15:15).

12, 13. ¿Imaynatá wakin onqosqas predicanku, chanta imaynataj paykunata rin?

¹² Onqosqa chayri mana kallpayoj kaspaqa, niña anchata predicayta atisqanchejmanta llakikusunman. Jinapis ashkha hermanosqa, onqosqa kaspapis predicallankupuni. Estados Unidosmanta Laurel sutiyoj hermanaqa, sinchʼi onqosqa kasqanrayku uj máquina ukhupi 37 watasta karqa. Chay maquinaqa samayta atinanpaj yanaparqa. Chantapis payqa cancerniyoj karqa, ashkha kutista operachikorqa, aycha qaranpitaj waj onqoykunasniyoj karqa. Ajina onqosqeta kaspapis, predicallarqapuni. Payqa enfermeras, chayri waj runas wasinman yanapaj rejtinku, paykunaman predicaj. Ajinata predicaspa, 17 runasta yanaparqa Bibliamanta yachakunankupaj.c

¹³ Ashkha hermanitosqa, onqosqa kasqankurayku mana wasinkumanta llojsiyta atinkuchu. Wakin hermanitostaj, hospitalespi jina tiyakunku. Francia suyumanta Ricardo sutiyoj anciano, paykunaman nin: “Librosta chayri revistasta, runas rikunankupaj jina sutʼiman churawajchej. Runasqa chay publicacionesta rikuspa, chaymanta parlariyta munanqanku. Ajinata ruwaspaqa, mana wasimanta wasi predicaspapis kusisqallapuni kankichej”, nispa. Mana wasinkumanta llojsiyta atejkunaqa, cartasnejta chayri telefononejta predicayta atillankumantaj.

14. ¿Imatataj rey Davidmanta yachakusunman?

¹⁴ Machitusña kasqanchejrayku, onqosqa kasqanchejrayku, chayri waj imasrayku, ichá mana Diospa llajtanpi wakin imasta ruwayta atinchejchu. Ajina kajtin, rey Davidmanta mayta yachakusunman. Davidqa Diospa templonta mayta ruwayta munarqa. Jehová Diostajrí mana paychu templota ruwananta nerqa, manaqa wajta ajllarqa ruwananpaj. Jina kajtinpis, Davidqa tukuy atisqanta yanaparqa pitachus Jehová ajllasqanta. Chantapis payqa ashkha qoriwan, qolqewan ima yanapakorqa. Davidmantaqa maytapuni yachakusunman (2 Sam. 7:12, 13; 1 Cró. 29:1, 3-5).

15. ¿Imatá hermanonchej Hugo ruwarqa mana llakiyninwan atipachikunanpaj?

¹⁵ Franciamanta hermano Hugoqa, sinchʼi onqosqa kasqanrayku manaña anciano jina yanapakuyta aterqachu. Wasinpipis manaña ruwanasninta ruwayta aterqachu. Pay nin: “Qallariypeqa ni imapaj valesqayta yuyarqani, maytataj llakikorqani. Jinapis tiemponmanqa, entienderqani imastachus manaña ruwayta atisqaymanta mana llakikunaychu kasqanta. Astawanpis imastachus Jehovapaj ruwayta atisqaymanta kusikorqani. Jehová Diostaqa sirvillasajpuni. Gedeonwan kinsa pachaj runasninwanqa, saykʼusqa kaspapis maqanakullarqankupuni. Ajinallatataj noqapis ruwasaj”, nispa (Jue. 8:4).

16. ¿Imatataj angelesmanta yachakusunman?

¹⁶ Diosta tukuy sonqo sirvej angelesmanta, mayta yachakusunman. Uj pacha rey Achab kamachishajtin, Jehová Diosqa angelesninta tapurerqa imaynatachus Achabta chʼaukiyanankuta. Angelesqa imatachus ruwanankuta tukuy imaynamanta nerqanku. Jehová Diostaj ujnin angelpa nisqanta uyarispa, payman nerqa: “Rispa, ajinata ruwamuy”, nispa. Chantapis angelman nerqa, chay ruwasqanpi allin rinanta (1 Rey. 22:19-22). Ujnin angelesrí, ¿“qhasita imatapis nini” nispachu ninkuman karqa? Paykunaqa ni imarayku ajinata yuyarqankuchu. Angelesqa kʼumuykukoj sonqos kanku, Jehová Diosllatataj jatunchayta munanku (Jue. 13:16-18; Apo. 19:10).

17. ¿Imatá ruwasunman Diospa llajtanpi ima llankʼaytapis niña ruwasqanchejmanta llakikojtinchej?

¹⁷ Jehovaj testigosnin jina rejsisqa kayta, Gobiernonmantataj willamuyta jatunpaj qhawana. Diospa llajtanpi ima llankʼaytapis japʼisqanchejqa mana wiñaypajchu. Jinapis Diospajqa, mana uj llankʼayta ruwasqanchejraykuchu munasqa kanchej. Jehová Diosqa munakuwanchej, kʼumuykukoj sonqo kajtinchej chayri maykamallachus ruwayta atisqanchejta reparakojtinchej. Hermanospajpis chayraykullataj munasqa kanchej. Chayrayku Diosmanta mañakuna, kʼumuykukoj sonqo kanapaj, llampʼu sonqo kanapaj ima. Piensarina Jehová Diospa kʼumuykukoj sonqo kamachisninpi. Bibliaqa Diospa ashkha kamachisninmanta parlan. Chantapis hermanosninchejta tukuy atisqanchejta yanaparina (Sal. 138:6; 1 Ped. 5:5).

18, 19. Predicacionpi runas mana uyariwajtinchej, ¿imatá ruwasunman mana llakikunapaj?

¹⁸ Wakin kutisqa ichá llakikunchej, predicanchej chaypi runas mana uyariwajtinchej chayri pisi runasllata wasinkupi taripajtinchej. Jina kajtin, ¿imatataj ruwasunman kusisqallapuni kanapaj? “Predicaspa aswan kusiyta tarinapaj” nisqa recuadroqa, imastachus ruwanata yuyaychariwanchej. Chantapis predicacionmanta maychus kajllata yuyana. Qhawarina imaynatachus chayta ruwanata.

¹⁹ Runasman Diospa sutinta rejsichinallapuni, Gobiernonmantataj willanallapuni. Jesús nerqa, kausayman pusaj ñanta pisi runaslla rinankuta (Mat. 7:13, 14). Predicashaspaqa Jehová Dioswan, Jesuswan, angeleswan khuska llankʼashanchej (Mat. 28:19, 20; 1 Cor. 3:9; Apo. 14:6, 7). Jehová Diosqa allin sonqoyoj runasta payman pusamun (Juan 6:44). Chayrayku uj runa mana uyariwajtinchejqa, ama llakikunachu. Ichá qhepanpi rejtinchej uyariwasun.

20. ¿Imatataj yachakusunman Jeremías 20:8, 9 versiculosmanta?

²⁰ Profeta Jeremiasmanta mayta yachakusunman. Paytaqa maymanchus Jehová Dios willajta kacharqa chaypi, ni pi uyarerqachu. Runasqa “sapa kuti” toreyaj kanku, asiykukojtaj kanku (Jeremías 20:8, 9 leey). Jeremiasqa uj pacha mayta llakikusqanrayku, niña Diosmanta willayta munarqachu. Jinapis Jehová Diospa nisqasnenqa, nina jina paypa sonqonta ruphaykorqa. Chayrayku Diosmanta willallarqapuni. Noqanchejpis Diospa Palabranta yuyayninchejman, sonqonchejman ima juntʼachisun chayqa, predicallasunpuni. Chayrayku Bibliata sapa día estudiana, chaypitaj tʼukurina. Chayta ruwasun chayqa, kusisqallapuni predicasun, runaspis ichá astawan uyariwasun (Jer. 15:16).

21. ¿Imatá ruwasunman llakiyninchejta atipanapaj?

²¹ Deboramanta parlarerqanchejña. Pay nin: “Satanasqa llakiywan tukuchiyta munawanchej”, nispa. Jinapis Jehová Diosqa, Satanasmanta nisqa aswan atiyniyoj. Chayrayku imallamantapis llakikunchej chayqa, Jehovamanta yanapata mañakuna. Payqa yanapawasunchej pantajtinchej chayri wakin imasta mana ruwayta atejtinchej. Chantapis onqosqa kashajtinchej yanapawasun. Jehovaqa yanapallawasuntaj, llajtanpi ruwanasninchejmanta maychus kajllata yuyanapaj. Payqa kusisqallapuni predicanapajpis yanapawasun. Chayrayku tukuy llakiyninchejta Tatanchej Jehovaman saqena. Paypa yanapayninwanqa llakiyninchejta atipasun.