Mateo

25 Shinajpi ahua pacha mandana chunga huanra huarmiuna cuintami. Huarmiuna paiguna vila puruunara apisha, carira tupangaj llucshinauca. 2 Paigunamanda, pichca iyaiyujcuna anauca, chishu pichcaga upauna. 3 Upauna paiguna vila purura sindina yacu illajta apanauca. 4 Iyaiyujcunaga sindina yacura butii apanauca vilahua pariju. 5 Cari unaiyajpi, tucui puñunaipi puñunauca. 6 Chaupi tutai shu shimi caparishca uyarica: ‘Cari shamun, llucshichi paita tupangaj.’ 7 Shinajpi tucui chi huanra huarmiuna liccharisha, vila puruunara alichinauca. 8 Upauna iyaiyujcunara ninauca: ‘Sindina yacura cuhuai, ñucanchi vila puruuna huañurinaunmi.’ 9 Iyaiyujcunaga cutipasha ninauca: ‘Ñucanchi sindina yacu mana pactangachu ñucanchijpas cangunajpas. Richi catujcunara randingaj canguna quiquimbajta.’ 10 Paiguna randingaj rishcallai, cari shamuca. Puruntushcauna paihua pariju burai icunauca. Pungura ishcanauca. 11 Huasha chishu huanra huarmiunas shamunauca. ‘Señor, señor, pungura pascapai,’ ninauca. 12 Paiga cutipasha nica: ‘Sirtu pacha,’ nini, ‘mana ansas ricsinichu cangunara.’ 13 Ricusha chapaichi, Runa Churi shamuna punzhara pai shamuna hurastas mana yachanguichichu.

14 “Ahua pacha mandana shu runa cuintami. Pai caruma ringarausha, sirvijcunara cayasha, pai charishcaunara paiguna maquiunai saquica. 15 Shujma pichca cullquira cuca, shujma ishquira, shujmas shujllara, caran duiñu ushana tupura cusha. Chi huasha caru llactama rica. 16 Pichca cullquira apijca, chi cullquihua tarabasha, shu pichca cullquira mas ganaca. 17 Shinallara ishquira apijca ishquira mas ganaca. 18 Shujllara apijca, allpara allasha, paihua patrumba cullquira pambaca allpa ucui. 19 Unai timpo huasha, chi sirvijcuna patrún tigramuca, paigunahua cullquimanda alichica. 20 Pichca cullquira apij runa shamusha, shu pichcara apamuca, casna nisha: ‘Señor, pichca cullquira cuhuacangui, pichcara mas ganashcani.’ 21 Patrún paita nica: ‘Alimi, ali mana quillasha sirvij runa. Ansallahua alira rashcangui, ashcara cuirangaj canda churasha. Camba señorba cushi causanai icui.’ 22 Ishqui cullquira apij runa shamusha, ‘Señor,’ nica, ‘ishqui cullquira cuhuacangui, ishquira mas ganashcani.’ 23 Patrún paita nica: ‘Alimi, ali mana quillasha sirvij runa. Ansallahua alira rashcangui, ashcara cuirangaj canda churasha. Camba señorba cushi causanai icui.’ 24 Randi shuj cullquira apij runa shamusha, ‘Señor,’ nica, ‘can shinzhi shungu runa ajta ricsicani, can mana tarpushcais pallaj, mana can ichashca muyumanda tandachij; 25 chiraigu manzhasha, camba cullquira pambacani allpa ucui. Caiga, camba quiquin cullqui.’ 26 Paihua patrún cutipasha nica: ‘Mana valij quilla runa, ñuca mana tarpushcai pallashcara yachacangui, ñuca mana ichashca muyumanda tandachishcaras. 27 Chiraigumanda ñuca cullquira bancui churanami acangui, ñuca tigrajpi ñucajta apingaj pai ganashcandi. 28 Quichuichi paimanda chi cullquira, chungara charijma cuichi. 29 Charij mas charingami, yalira charingaj; mana charijmandaga pai charishcahuaras quichushca anga. 30 Manali sirvij runara canzha llandui shitaichi. Chihuimi llaqui huacanas quiru mucurinas tianga.’

31 “Runa Churi paihua sumajhua shamushcai, tucui santu angelgunahua pariju, paihua gustu sumaj rey apu tiarinai tiaringami. 32 Paihua ñaupajpi tucui llactauna tandarinaungami. Chicanyachingami shujcunara chishucunamanda, imasna shu cuiraj runa buriguunara chivuunamanda chicanyachin. 33 Buriguunara paihua ali maqui partima churanga, chivuunara paihua lluqui partima. 34 Shinajpi Rey Apu ali maqui partima tiajcunama ninga: ‘Shamichi, ñuca Yaya bindisiashcauna, mundu callarishca pundamanda cangunajta puruntushca mandana pachara apichi. 35 Yarcachicani, carahuacanguichi; upinaichicani, upichihuacanguichi; carumanda purij acani, apihuacanguichi. 36 Llatan acani, churachihuacanguichi. Ungushca acani, ñucajma ricui shamuhuacanguichi. Chunda cularbi tiaucani, ñucajma ricui shamuhuacanguichi. 37 Shinajpi ali runauna cutipasha ninaunga: ‘Señor, ¿ima hurasta canda yarcachijta ricucanchi carangaj, upinaichijta upichingaj? 38 ¿Ima hurasta canda carumanda shamujta ricucanchi canda apingaj? ¿Ima hurasta canda llatanda ricucanchi churachingaj? 39 ¿Ima hurasta canda ungushcara ricucanchi, chunda cularbi tiajtas, cambajma shamucanchi ricungaj?’ 40 Rey Apu cutipasha ninga: ‘Sirtu pacha cangunara nini, imasna casna rarcanguichi shu ñuca ichilla uquiunara, ñucarami rarcanguichi.’ 41 Shinajpi shinallara lluqui partima tiajcunamas ninga: ‘Anzhurichi ñucajmanda, maldisiashcauna, huiñaigama duraj ninama, supai apujta paihua angelgunajta puruntushcama. 42 Ñuca yarcachicani, mana carahuacanguichi. Upinaichicani, mana upichihuacanguichi. 43 Carumanda shamuj acani, mana apihuacanguichi; llatan acani, mana churachihuacanguichi; ungushca acani, chunda cularbi tiaucani, ñucajma mana shamucanguichi ñucara ricungaj.’ 44 Shinajpi paiguna shinallara cutipasha ninaunga: ‘Señor, ¿ima hurasta canda yarcachijta, upinaichijta, carumanda shamujta, llatanda, ungushcara, chunda cularbi tiauta ricushcanchi, canda mana sirvicanchi?’ 45 Shinajpi cutipasha ninga, ‘Sirtu pacha cangunara nini, imasna caita mana rarcanguichi shu cai ichillaunahua, ñucahua mana rarcanguichi.’ 46 Caiguna huiñaigama duraj turmindarinama rinaungami, randi aliuna huiñai causanama rinaungami.”