¿Maimandara Jehovahuaj testigoguna cullquira charinun Bibliamanda yachachingaj?

Intiru mundumanda Jehovahuaj testigoguna shungumanda cushca cullquihua Bibliamanda yachachinchi.a Ñucanchi tandarina huasiunai cajagunara charinchi, chibi maicans munasha cullquira churana ushan, shinallara jw.org ñucanchi página internetpi cullquira cuyanchi. Chibi maican tunuunara ricuchin, ajllana ushanchi intiru mundui Bibliamanda yachachingaj cunara, shinallara quiquin llacta congregaciombi ministishcara pagangaj cuyanara, manajpi ishquindij.

Jehovahuaj testigoguna diezmo, ofrenda nishca cullquira mana cunun. Shinallara mana pis rimanzhu masna cullqui cuyana ashcara (2 Corintios 9:7). Ñucanchi tandarinaunai cullquira mana mañanchichu. Ñucanchira pushaj huauquiuna cullquira mana cobranun bautisarinamanda, huañushcara pambangaj ruraigunamanda, casaranamanda, shuj tunu Diosta sirvingaj rurashcaunamandas. Astaumbas cullquira tandachingaj micunara mana catunchi, shinallara shuj ruraigunaras imasna lotería, rifas, programagunaras runaunara cullquira mana mañanchi. Shinallara cullquira cuj shutiunara mana rimanchi (Mateo 6:2-4). Astaumbas, ñucanchi Internet paginagunai publicaciongunais catungaj anunciogunara mana charin.

Tucui congregacionguna shu tandarinai caran quilla imasna cullquira gastashcara rimanun. Shinallara caran huaquin quillaunai cullquira ali gastaushcara imasna charishcaras yachangaj maicanguna formulariora quillcasha ricunun, shina rurasha cuyashca cullquira imasna utilizashcara yachanchi (2 Corintios 8:20, 21).

• Tandarina huasii tiaj cajagunai churasha: Camba shungumanda cuyangaj cullquiunara, chequegunaras churana ushangui chi cajagunai, Reinomanda Yachana Huasiunai, Asamblea Huasiunai, shuj tandarina huasiunai tian.

• Internetpi cullquira cuyasha: Ashca llactaunai “Jehovahuaj testigogunama cullquira cuyangaj” página internetpi cullquira cuyana ushangui, tarjetas de crédito o débito nishcahua shuj tunuunahuas.b Huaquin Jehovahuaj testigoguna cullquira “chicanyachisha huacachinun” caran quillaunai, shina rurasha caran quilla mana cungarisha cunun (1 Corintios 16:2).

  

• Timpuhua puruntusha, tapusha cuyana: Cai tunuhua cuyangaj abogadoguna yanapaira mascana ushangui. Chita rurana can causaushca llactai ima yanapaiguna tiashcara yachasha valirina ushangui. Ashcaunara yanapashca yachangaj causausha ima tunu cuyanara cuna ushashcara, shinallara huañushca huasha charishca cosasgunara cullquiras yanapangaj imasna cuyanara. Camba llactai tiaj Jehovahuaj testigoguna sucursalda cayana ushangui, cai catij cuyangaj tunuunamanda mas yachangaj:

  • cuentas bancarias

  • seguros y planes de jubilación

  • bienes raíces

  • acciones y bonos

  • testamentos y fideicomisos

Can causaushca llactaibi ima cuyangaj tunuuna tiajta mas yachangaj “Jehovahuaj testigogunama cullquira cuyangaj” nishca paginara ricui.