LECCIÓN 18
¿Imasnara yachana ushanchi pigunara Jesusta sirtu catijcuna ajta?
Huaranga huaranga runauna quirijcuna anchi nishas, mana chi tunullai quirinun, mana chi mandashcaunara tucuiguna pactachinun. Shinajpi ¿imasnara Jesusta sirtu catijcuna ajta yachana ushanchi?
1. ¿Imara an sirtu quirij?
Jesusta catijcuna anun (leai Hechos 11:26). ¿Imasnara sirtu catishcara ricuchinun? Jesús nica: “Canguna ñuca shimiunara pactachisha causausha, sirtu pacha ñuca yachachishca runauna tucunguichimi” (Juan 8:31). Cai ricuchinmi sirtu quirijcuna Jesús mandashcara casuna anun shinallara Biblia rimashcara yachachinun, imasna Jesús Diospa Shimira yachachishca cuinta (leai Lucas 24:27).
2. ¿Imasnara llaquinara ricuchinun Jesusta sirtu catijcuna?
Jesús paita catijcunara casna mandaca: “Canguna parijumanda llaquinuichi, ñuca cangunara llaquishcasna” (Juan 15:12). ¿Imasnara Jesús paita catijcunara llaquishcara ricuchica? Paigunahua timpu pasaca, animachica, yanapaca, paigunamandas huañuca (1 Juan 3:16). Jesús cuinta sirtu catijcuna mana llaquinamandalla rimanun, parijumanda caran shuj llaquinara ricuchinun rimanai, ruranais.
3. Jesusta sirtu catijcuna ¿maican mas valij tarbanara ruranun?
Jesús paita catijcunara shu tarbanara mingaca “Dios mandana pacha shimira rimangaj paigunara cachaca” (Lucas 9:2). Punda Jesusta catijcuna mana adurana huasiunallai yachachinuca shinallara runauna tiashca partii, runauna huasiunais yachachinuca (leai Hechos 5:42; 17:17). Cuna punzhaunai shinallara Jesusta sirtu catijcuna Diospa Shimimanda yachachinun maibis runauna tiashcai. Runaunara llaquishcamanda timpura llucchinun, ursarinun runaunara animangaj, Diospa Shimimanda yachachingaj (Marcos 12:31).
MAS YACHAI
Ricushun imasna shuj tunu ricurin Jesusta sirtu catijcuna, Jesús yachachishcara rurashcaras mana catijcunamanda.
4. Diospa sirtu shimira mascanun
Punda Jesusta catijcuna Diospa Shimira valichinuj aca.
Mana tucui Jesusta catij nijcuna, Diospa sirtu shimira chasquinunzhu. VIDEORA ricuichi, huasha catij tapuimanda rimaichi:
Huaquin Iglesiaguna: “Quirijcuna anchi” nijcuna ¿imasnara arcanuca runauna Jesucristo yachachishcara ricsingaj?
Jesús, Diospa Shimii tiaj sirtu shimira yachachica. Leaichi Juan 18:37, huasha catij tapuimanda rimaichi:
Jesús rimashca shina ¿imasnara yachana ushanchi pigunara “sirtu shimira chasquij” ashcara?
5. Bibliamanda sirtu shimira yachachinun
Punda Jesusta catijcuna Diospa Shimira yachachinuj aca.
Manara ahua pachama rishcallaira Jesús paita catijcunara shu tarbanara mandaca, cai tarbanara cunagama tarbarianun. Leaichi Mateo 28:19, 20; Hechos 1:8, huasha catij tapuimanda rimaichi:
¿Ima hurasgama, maigama Diospa Shimi yachachishca ana an?
6. Pactachinun paiguna yachachishcara
¿Imarasha Tom sirtu quirica sirtu quirijcunara tupashcani nisha? VIDEORA ricuichi, huasha catij tapuigunamanda rimaichi:
Video ricushcasna ¿imarasha Tom religiombi ña mana quirica?
¿Imarasha Tom sirtu quirin, sirtu shimira tupashcani nisha?
Rimashcaunara ruraigunahua ricuchina an. Leaichi Mateo 7:21, huasha catij tapuimanda rimaichi:
Jesús ¿imara mas valichin: ñucanchi quirina nishcaunara o ñucanchi rurashcaunara?
7. Parijumanda llaquinunun
Punda Jesusta catijcuna paigunapura llaquinujpas aca.
¿Jesusta catijcuna paiguna huauqui paniunamanda huañunara munanushca? VIDEORA ricuichi, huasha catij tapuigunamanda rimaichi:
¿Imarasha huauqui Lloyd huauqui Johansson randimanda huañuna munaca?
¿Imara iyangui, Lloyd sirtu quirij cuinta rurarcachu?
Leaichi Juan 13:34, 35, huasha catij tapuigunamanda rimaichi:
¿Imasnara llaquina anuca Jesusta sirtu catijcuna shuj tunu runaunara, shuj llactamanda ajcunaras?
¿Imasnara llaquinara ricuchina ushanun guerra timpui?
RUNAUNA CASNA NINUJPI: “Quirijcuna irusta rurashaga ¿imasnara ali religionda charinunga?”.
¿Maican textora leanguima ricuchingaj pigunara Jesusta sirtu catijcuna ajta?
IMARA YACHASHCANGUI
Jesusta sirtu catijcuna Biblia yachachishcara catinun, shujcunara llaquishcamanda yanapangahua ashca ursarinun, Diospa sirtu shimimanda shujcunara yachachinun.
Iyaringaj
Jesusta sirtu catijcuna ¿pi yachachishcara chasquinun?
Jesusta sirtu catijcuna ¿imasnara paigunapura causanun?
¿Ima tarbanara ruranun?
RICUNGUI
Jesucristo ricuchishcara, yachachishcaras pactachingahua ursarijcunara ricsi.
Leai shu monja huarmi aj imasnara tupaca “Diosta sirvij turi ñañaunara”.
“Tucui ñuca tapuigunara Bibliahua cutipanuca” (La Atalaya, 1 de abril de 2014)
Ricui Jesusta sirtu catijcuna imasnara paiguna huauqui paniunara llaquinara ricuchinun ministishca huraspi.
Ñucanchi huauqui paniunara yanapanchi shu llaqui tiashcai (Ansa parti) (3:57)
Jesús rimacami imasnara paita catijcunara ricsina ushanchi. Ricui pai rimashca imasnara pactarica Jesuspa timpui catijcunahua, cuna timpui sirtu catijcunahuas.
“¿Imasnara yachana ushanchi pigunara Jesusta sirtu catijcuna anun?” (La Atalaya, 1 de marzo de 2012)