4. Tucui runaunama pactangaj ursarinchi

VIDEO: “Cai pacha puchucai pundagama” Bibliamanda yachachinchi (7:33)

• Jehovahuaj testigoguna yachachingaj rurashcaunamanda ¿imara canda mas gustan?

Leaichi Mateo 22:39; Romanos 10:13-15, huasha catij tapuigunamanda rimaichi:

• ¿Imasnara Bibliamanda yachachina ricuchin runaunara ñucanchi llaquishca?

• ¿Imara Jehová Dios iyan ali gustu cuintashcaunara yachachijcunamanda? (Versículo 15 ricuichi).

4. Manali ruraigunara vinsi

Can tabacura chupaj asha drogara utilizaj asha, intindinguichari caigunara saquingaj shinzhi ashcara. Camba causaibi problemagunara imasna apamushcara ali riparasha iyarinas yanapangami. Leaichi Mateo 22:37-39, huasha catij tapuigunamanda rimaichi:

• ¿Imasna tabacu chupana, drogaguna utilizana Jehová Dioshua amigo tucunara huajlichina ushan?

• ¿Imasna tabacu chupana, drogaguna utilizana camba quiquin aillura, shujcunaras huajlichina ushan?

Iyari imasna saquina ushangui manali ruraigunara.c VIDEORA ricuichi.

VIDEO: Aicha munaira arcashunchi (2:47)

Leaichi Filipenses 4:13, huasha catij tapuimanda rimaichi:

• Diosta mañana, Bibliara estudiana, tandarinaunama rinas ¿imasnara manali ruranara saquingaj yanapan?

5. Manali ruranara, manali iyairas saquingaj ursari

Leaichi Colosenses 3:5, huasha catij tapuigunamanda rimaichi:

• Ucha rasha ricuchishcara ricuna, irus ucha fotogunara, rimaigunara, videogunara, mensaje cachasha, masturbación nishcara rurasha ¿imasnara yachanchi Diospa ñaupai caiguna tucui irus ajta?

• ¿Imarasha Dios munan ñucanchi causaibi ñucanchi iyaibi limpio achu?

Irus iyaigunara imasna saquinara yachangaj cai VIDEORA ricuichi.

VIDEO: Chuyaj iyaigunara charingaj ursarishunchi (1:51)

Ñucanchi causaibi limpio anara yachachingahua Jesús shu ejemplohua yachachica. Leaichi Mateo 5:29, 30, huasha catij tapuimanda rimaichi:

• Jesús mana nicachu ñucanchi aichara llaquichingaj, chi randi manalira shu rai saquingaj ruranara nica. ¿Imara rurana anchi irus iyaigunara ama charingaj?d

Irus iyaigunara saquingaj ursariujpi, Jehová can ursariushcara yapa valichin. Leaichi Salmo 103:13, 14, huasha catij tapuimanda rimaichi:

• Irus iyaigunara saquingaj ursariujpi ¿imasnara cai textoguna canda yanapanga ñaupajma catingaj?

¡Ama sambayaichu! Cuti pandarishas ñaupajma catina ushangui

“Cuti chillaira urmani, yangamanda ursarini” nisha iyanallami. Caita iyari, callpauj runa urmasha mana ninzhu carrerara pirdin o cutillara pundamanda callpana an nisha. Shinallarami can cuti manalira ruranai pandarisha urmajpi mana ninzhu can vinsishca tucungui o yangamanda ursariungui nisha. Caigama rurashcamanda cushiyana ushangui. Cuti pandarishas ama yapajta llaquirichu shinallara manalira saquingaj ursariushcai casna tucun. Chiraigu ¡ama sambayaichu! Jehová yanapaihua ima irus ruranara, iyanaras saquina ushangui.