Kallpanchakuy rimayta qallarinaykipaq

¿SASACHAKUNKICHU piwanpas rimanaykipaq? Achka runakunam sasachakunku piwanpas rimanankupaq, aswanraqmi mana reqsinakusqankuwanqa. Penqapakuq kasqankuraykupaschá kaynata tapukunku: “¿Imamantataq rimasaq? ¿Imaynatataq qallarisaq? Chaymantaqa, ¿imatataq rimasaq?”, nispa. Mana penqapakuspa rimaqñataqmi mana upallaykuspa piwanpas rimayta qallaykun. Chayna kaqqa kallpanchakunanmi hukkunapa rimasqanta uyarinanpaq. Penqapakuq kaspa otaq rimaysapa kaspapas llapanchikmi kallpanchakunanchik piwanpas parlayta yachanapaq.

Kallpanchanapaq kaqkunamanta rimayqa yanapanmi familiapi kusisqa kawsakunapaq. ¿Atiwaqchu familiaykiwan allin kaqkunamanta rimayta?

Chaypaqqa tukuy sonqoykiwanmi familiaykipi interesakunayki (Deut. 6:6, 7; Prov. 4:1-4). Runamasinpi interesakuqqa uyariqninpa ima nisqantapas uyarinmi paylla rimananmantaqa. Chaymantapas allin kaqkunamantam rimanayki. Bibliata chaynataq qellqanchikkunata leespaykiqa otaq estudiaspaykiqa atinkim imamantapas rimayta. Hinaspapas Diospa Palabranta sapa punchaw estudianapaq folletota leesqaykim yanapasunki imamantapas rimarinaykipaq. Predicasqaykipi imapas pasasusqaykimanta otaq imamantapas leesqaykitam servichikuwaq. Kaykunamanta familiaykiwan rimanaykipaq kallpanchakusqaykiqa yanapasunkim hukkunawan rimarinaykipaqpas.

Achka runakunam rimayta mana munankuchu mana reqsisqanku runakunawanqa, chayna kaptinpas Diosta hinaspa runamasinkuta kuyasqankum Jehova Diospa testigonkunata kallpanchan runakunaman Bibliamanta yachachinankupaq. ¿Imataq yanapasunkiman hukkunawan allinta rimarinaykipaq?

Filipenses 2:4 nisqanmi allintapuni yanapawanchik, chaypim nin: “Amayá kikillaykichikpaqchu allintaqa munaychik aswanqa wakinkunapaqwanyá”, nispa. Mana reqsisqanchik runata parlapayaptinchikqa manapaschá allintachu chaskiwasunchik. ¿Imatataq rurachwan uyariwananchikpaq? Amistadninchikta hinam saludaykuna, ichaqa manam chayllatachu rurana uyariwananchikpaqqa.

Ichapas imapipas yuyaymanachkaptin rimapayanchik. Piensasqanpi mana reparaspa munasqanchikmanta rimayta qallaykuptinchikqa, ¿allintachu uyariwasun? ¿Imatataq Jesusqa rurarqa Samaria pozopa waqtanpi huk warmiwan tuparuspan? Warmiqa yaku horqoqmi hamurqa, chaymi Jesusqa yakumanta rimayta qallaykurqa, hinaptinmi mana sasachakuspallan Diosmanta yachachirqa (Juan 4:7-26).

Cuentata qokuq kaspaqa yaqapasmi yachasun runamasinchik imayna tarikusqanta. ¿Kusisqachu icha llakisqachu kachkan? ¿Yuyaqñachu icha onqochkanchu? ¿Sutillachu wasiyoqpa warmachankuna kasqan? ¿Sutillachu kapuqniyoq kasqan otaq imapas necesitasqankunapaqchu afanakun? ¿Religionniyoq kasqantachu qawachin wasinpi imakunapas kasqan otaq alhajankunawan churakusqanpas? Chaykunamanta cuentata qokuspa rimayta qallaykuptikiqa wasiyoqmi musyanqa paypi reparasqaykita.

¿Imatam piensawaq wasin ukullamanta contestamusuptikiqa? Yaqapaschá wasiyoqqa manchakusqanrayku mana kichasunkimanchu. Chayna kaptinqa, ¿imaynatataq paywan rimawaq?

Wakin llaqtakunapiqa allinpaschá kanman wasiyoq uyarisunaykipaq pim kasqaykita willayniki, maymanta kasqaykita, imanasqa watukusqaykita, imanasqa Diospi creesqaykita hinaspa imanasqa Biblia estudiasqaykita otaq imayna yanapasusqaykimantapas (Hech. 26:4-23). Ichaqa tanteowanmi chaykunamanta rimana, imarayku watukusqanchikta ama qonqaspa. Wasiyoqqa yaqapaschá willawasun ima piensasqanmanta otaq ima preocupasqanmantapas.

Wakin llaqtakunapiqa mana reqsisqanku runamasinkutam chaskiykunku, chaymi wasinkuman chaylla yaykuchispan tiyaykachinku. Imayna tarikusqankumanta respetowan tapuspa allinta uyariptikiqa wasiyoqpas chaynatam uyarisunki. Huk llaqtakunapiqa aswan allintaraqmi watukuqninkutaqa chaskinku. Saludanakuykuspa rimayta qallaykuptikiqa yaqapaschá wasiyoqqa cuentata qokunqa piensasqanwan piensasqayki tupasqanta, chayqa yanapasunkim Diosmanta willanaykipaq.

Huk llaqtapi mana rimasqayki idiomata rimaptinkuqa, ¿imaynatataq paykunawan rimayta qallariwaq? Idiomanpi saludakuyllatapas yachay, chaywanmi cuentata qokunqaku paykuna kuyapayasqaykita hinaptinmi paykunawan astawan rimayta atinki.

Uyariwaqninchikwan hinalla rimanapaqqa imayna piensasqanpim reparana. Rimayta munaptinqa rimananpaq kallpanchay. Piensarispa tapuyqa ancha allinmi aswan allinraqmi imam piensasqanmanta tapuyqa, mana chaynata ruraptikiqa arí otaq manam nispallam nisunkiman. Ejemplopaq, llaqtanpi imawan sasachakusqankumanta rimaspaqa tapuwaqmi: “¿Imanasqataq kaykuna pasachkan?”, otaq “¿imaynam kay sasachakuykunaqa allichasqa kanman?”, nispa.

Tapuspaykiqa allinta uyariy imam nisusqaykita. Hinaspa sumaq uyarisqaykita qawachiy imapas rimasqaykiwan otaq imapas rurasqaykiwan. Manaraq rimayta tukuchkaptinqa amaraq rimaychu, aswanqa reparay imamanta rimasqanpi. Chaynata ruraspam qawachinki ‘chaylla uyariq kasqaykita’ chaynataq allinta tanteaspa rimasqaykitapas (Sant. 1:19). Contestaspaykiñataq qawachiy rimasqankunapi reparasqaykita.

Ichaqa manam lliwchu tapusqaykikunataqa kutichisunki. Wakinqa contestanmankum umanta aywispa otaq asirispallanku, hukkunañataqmi arí otaq manam nispalla. Hukmanyanaykimantaqa pacienciakuy hinaspa ama hikutaychu rimananpaqqa. Parlariyta munaptinkuqa kallpanchakuy Bibliamanta yachachinaykipaq. Tiempopa risqanman hinaqa yaqapaschá amistadninpaq hinaña hapisunki hinaspa confianzawanña rimanqa.

Piwanpas rimaspaykiqa sumaqllata rimapayay. Tukuy imamanta tapusuptikiqa wakillanta contestay, wakintañataq astawan yachaykamuspaña yapapi yachachinaykipaq niy. Mana imatapas tapusuptikiqa tapuwaqmi imapas yachay munasqanmanta hinaspam niwaq kutispaykiña chaymanta astawan willarinaykipaq. Chayna tapuykunawan piensarichinaykipaqqa yanapasunkimanmi Razonamiento a partir de las Escrituras nisqa libro otaq chayllaraq chaskisqayki Willakuq chaynataq ¡Rikchariy! sutiyoq revistapi yachachikuykunapas.

Huklaw congregacionmanta kaq iñiqmasikiwan chayllaraq tupaspaykiqa, ¿kallpanchakunkichu reqsiykunaykipaq, icha manachu? Iñiqmasinchikkuna kuyasqanchikmi kallpanchawananchik reqsiykunanchikpaq (Juan 13:35). ¿Imaynatataq rimayta qallariwaq? Sutikita willaspa sutinta tapuykuy. Jehova Diosta imayna reqsisqanmanta tapusqaykim yanapasunki paywan astawan rimanaykipaq chaynataq reqsinaykipaqpas. Paywan rimanaykipaq manchapakusqaykimanta musyaptinpas rimanaykipaq kallpanchakusqaykim qawachinqa paywan parlariy munasqaykita.

¿Imaynatataq kallpanchanaykipaq hina iñiqmasikiwan rimariwaq? Qawachiy paymantawan familianmanta sientesqaykita. ¿Imatam rurawaq huñunakuy tukuyta? Huñunakuypi yachasqaykimanta rimaptikiqa iskaynikichikmi kallpanchanakunkichik. Willawaqmi chayllaraq chaskisqayki Willakuq otaq ¡Rikchariy! revistapi yachasqaykimanta ichaqa manam yachasqaykita qawachinaykipaqchu nitaq iñiqmasikita penqarichinaykipaqchu aswanqa yanapaq kaq yachachikuykunamanta rimanaykipaqmi. Rimawaqchiktaqmi Diosmanta Yachachinapaq Escuelapi imam ruranaykichikpaq tupasusqaykichikmanta chaynataq imayna ruranaykichikmantapas. Willawaqtaqmi Diosmanta willakusqaykipi imapas pasasusqaykimanta.

Ima rurasqankupi chaynataq ima rimasqankupipas reparasqanchikqa sutillamá yanapawasun paykunawan allinta rimanapaq. Kusisqa kaypas yanapawachwanmi piwanpas rimanapaq. ¿Rimasqanchikwanchu kallpanchanchik? Chaynam kanqa Diospa munasqanman hina rimaptinchikqa hinaspa kuyakuyninchik sonqonchikmanta kaptinqa (Prov. 16:27, 28; Efes. 4:25, 29; 5:3, 4; Sant. 1:26).

Manaraq predicaq lloqsispaqa imamanta rimanapaqmi allinta preparakunchik. Chaynaqa, ¿manachu amistadninchikkunawan rimanapaqpas uyariy munasqankunapi reparachwan? Imamantapas leespaqa otaq uyarispaqa servichikunaykipaq kaqta qellqay. Tiempopa risqanman hinam imamantapas rimayta atinki, manam sapa punchaw imapas pasasqallanmantachu. Rimasqaykikunam sutillata qawachinan Diospa Palabranta astawan chaninchasqaykita (Sal. 139:17).