¿Imaynatam bibliata estudianayki?

Ichapas biblia leeyta munarqanki, ichaqa achkallaña leenapaq kasqanta qawaykuspaykipaschá qillapakurqanki. Chayna kaptinqa ama llakikuychu, as-asmanta leeyta qallaykuspaykiqa atinkim. Kay yachachikuypim yachanki mana amiruspa bibliata leenaykipaq hinaspa ima leesqaykitapas sumaqta entiendenaykipaq imakuna yanapasunaykimanta.

1. ¿Imanasqataq bibliataqa sapa punchaw leenanchik?

Bibliata sapa punchaw leeq runaqa kusisqam kawsakunqa, ima ruwasqanpas allinpunim kanqa (leey Salmos 1:1-3). Bibliata leespa mana amirunaykipaqqa as-asllamantaraqmi qallariwaq. Entiendeyta qallaykuspaykiqa astawanmi leeyta munanki.

2. ¿Imaynatam leesqanchikta sumaqta entiendechwan?

Bibliapa nisqan yanapasunaykipaqqa manam leeyllachu-leenayki, aswanqa leesqaykipim yuyaymananayki (Josuey 1:8). Kaykunapim leespaykiqa yuyaymanawaq: ¿Imatam Jehova Diosmanta yachachkani? ¿Imayna kanaypaqmi yachachiwan? ¿Pitawantaq kayqa yanapanman?

3. ¿Imaynatataq tiempochakuchwan bibliata leenapaq?

Tukuy ruwayniyuq kasqanchikraykum biblia leenapaqqa tiempo mana haypawachwanchu. Chaymi kallpanchakunanchik bibliapa nisqanman hina ‘tiemponchikta mana usuchinapaq’ (Efesios 5:16). Bibliata leenanchikpaqqa tiempochanchiktam sapaqchananchik. Wakinkum tuta-tutaraq bibliata leenku, wakinkuñataqmi ima ruwasqankumantapas samaykuspanku, wakinñataqmi manaraq puñuykuchkaspanku. ¿Imay horataq qampaqqa allin kanman bibliaykita leenaykipaq?

ASTAWAN YACHAYKUSUN

4. ¿Imaynatam mana qillapakuspa bibliata leechwan?

Imaynam ima mikuypas pisi-pisimanta gustawanchikña, chaynam bibliatapas as-asmanta leespaqa astawan leeytaña munasun. Leeychik 1 Pedro 2:2 hinaspa qatiqninmanta rimariychik:

• Bibliata sapa punchaw leenaykipaq kallpanchakuptikiqa, ¿gustarusunkimanchu biblia leeyta?

VIDEOTA qawaykuychik achka musu-sipaskuna bibliata sapa punchaw kusisqallaña imanasqa leesqankumanta yachaykunaykichikpaq. Hinaspa qatiqninmanta rimariychik:

VIDEO: Bibliata ñawinchanapaq kallpanchakuq mozo-sipaskuna (5:33)

• Videopi qawasqanchik musu-sipaskunaqa ¿imanasqataq sasachakuqku bibliata leenankupaq?

• ¿Imakunatataq ruwarqaku bibliata leenankupaq?

• ¿Imataq paykunataqa yanaparqa leesqankuta sumaqta entiendenankupaq?

¿Imaynatam bibliata leewaq?

• Chaylla entiendenapaq imam kaqta yachachiq bibliata akllay. Musuq allpa pachapi kawsaqkunapaq biblia kapusuptikiqa chaytam leewaq.

• Yachay munasqaykimanta leey. Kay libropa qallariyninpi “Biblia leeyta qallaykunaykipaq” niqpim tariwaq imamanta leenaykipaq.

• Ama qunqanaykipaq maypi qipasqaykita señalay. Kay qillqapa tukupayninpim kachkan “Biblia leesqaykita señalanaykipaq”.

• Bibliata celularpi leey JW Library^® nisqanpi. JW Library celularnikipi kaptinqa atinkim biblia leeyta hinaspa grabasqata uyariytapas.

• Bibliata entiendenaykipaq yanapachikuy Musuq allpa pachapi kawsaqkunapaq bibliapa qipanpi rikuriq mapakunawan, palabrakunata entiendenapaq listawan hinaspa huk yanapakuykunawanpas.

5. Kay librota sapallaykiraq puntata leey

Leeychik Salmos 119:34 hinaspa qatiqninmanta rimariychik:

• ¿Imanasqataq Diosta mañakunayki bibliata manaraq ñawinchachkaspayki hinaspa kay qillqatapas sapallaykiraq leespayki?

Kay libropa sapa yachachikuyninta sumaqta entiendenaykipaqqa allinmi kanman kaykunata ruwayniki:

1. Sapa yachachikuypa qallariyninpi parrafokunata leey.

2. Bibliapi textokunata maskaykuspa leey hinaspa yuyaymanay imaynata kay qillqapi leesqaykiwan tupasqanta.

3. Yuyanaykipaq kaqta señalay, chaynapi yachachisuqniki tapusuptiki rimarinaykipaq.

Yachaykunaykipaq

Jehova Diospa testigonkunaqa mayqin bibliatapas servichikunikum, ichaqa Musuq allpa pachapi kawsaqkunapaq bibliatam astawanqa servichikuniku, chaylla entiendenapaq kasqanrayku hinaspa Diospa sutinpas rikurisqanrayku (qawaykuy jw.org nisqapi “¿Sapaqchu Jehova Diospa testigonkunapa bibliankuqa?” niqta).

YUYARIYKUSUN

Bibliamanta sumaqta yachanaykipaqqa tantiaykuy ima horapi leenaykipaq hinaspapas Diosta mañakuy leesqaykita entiendenaykipaq, chaymantapas yachachisuqnikiwan kay qillqamanta manaraq rimachkaspayki sapallaykiraq sumaqta leeykuy.

¿Ima niwaqtaq?

• ¿Imaynatam biblia leesqaykita allinta entiendewaq?

• ¿Imay horataq qampaqqa allin kanman bibliaykita leenaykipaq?

• ¿Imaynanpitaq kay qillqata sapallaykiraq puntata leenayki, textokunatapas leenayki hinaspa yuyariy munasqaykita señalanayki?

ASTAWAN YACHANAYKIPAQ

Bibliaykita leenaykipaq imakuna yanapasunaykimanta yachanaykipaq kay yachachikuyta leey.

“¿Imaynatam bibliata ñawinchananchik?” (Willakuq, 2017—1 kaq)

Bibliata leenaykipaq kimsa yanapakuykunata leey.

“¿Biblia ñawinchayqa yanapawanmanchu? Punta kaq parte: Bibliapi maskay yanapasuqniki yachachikuykunata” (Tarinkim jw.org nisqanpi)

Bibliata leeyta gustasunaykipaq kay yachachikuyta leey.

“¿Biblia leeyqa yanapawanmanchu? Iskay kaq parte: Biblia leey gustasunaykipaqqa kaykunatam ruwawaq” (Tarinkim jw.org nisqanpi)

Wakin iñiqmasinchikkuna bibliankuta imaynata leesqankumanta yachanaykipaq kay videota qaway.

¿Imaynatam bibliata estudiana sumaqta entiendenapaq? (2:06)