13 YACHACHIKUY
Pantayta yachachiq religionkunaqa Diostam pinqaypi churanku
Religionpi kaq runakunam ninku: “Diospim iñiniku”, nispanku. Ichaqa, ¿imanasqataq mana allinkunataqa ruwanku? Pantay religionkunapi kasqankuraykum. Chaymi pantayta yachachisqankuwan hinaspa mana allinkunata ruwasqankuwan Diosta pinqaypi churanku. ¿Imaynataq Diosqa chaywan tarikun? ¿Imatam chayrayku ruwanqa?
1. ¿Imaynatataq Jehova Diosta pinqaypi churanku yachachisqankuwan?
Pantay religionkunaqa “Diosmanta chiqap kaqkunatam llullaman tikrarunku” (Romanos 1:25). Chaymi Diospa sutintapas mana yachachinkuchu, bibliam ichaqa niwanchik Diosta sutinmanta mañakunapaq (Romanos 10:13, 14). Wakin religionkunapi yachachiqkunaqa ninkutaqmi tukuy ñakariykunaqa Diospa castigon kasqanta, chayna nisqankuqa manam ciertochu, Diosqa manam castigawanchikchu (leey Santiago 1:13). Chayna pantaykunata yachachisqankuwanmi runakunaqa Diosmanta manaña yachayta munankuñachu.
2. ¿Imakunata ruwasqankuwantaq Diosta pinqaypi churanku?
Pantay religionpi kaqkunaqa manam Jehova Dios hinachu runakunataqa kuyanku. Chaymi biblia nin: ‘Huchankuqa hanaq pachaman chayanankamam muntukurun’, nispa (Apocalipsis 18:5). Pantay religionpi kaqkunaqa gobiernokunamanmi sayapakunku, guerrakunapim yanapakunku, chaymantapas achka runakunatam wañuchirqaku. Wakin religionkunapiqa pastorkunam iglesiankupi qullqi qusqankuwan tukuy imayuq kawsakunku. Paykunaqa manamá Diostaqa sunqumantaqa servinkuchu (leey 1 Juan 4:8).
3. ¿Imaynataq Diosqa tarikun pantayta yachachisqankuwan hinaspa mana allinkunata ruwasqankuwan?
Pantay religionpi kaqkunapa mana allin ruwasqankum piñachiwanchik, astawanraqchá Jehova Diostaqa piñachin llullakunata paymanta yachachisqankurayku hinaspa payta maskaqkunata ñakarichisqankurayku. Chaymi Jehova Diosqa nin paykunata chinkachinanmanta hinaptin ‘manaña haykapipas kanankumanta’ (Apocalipsis 18:21). Arí, Diosqa chinkachinqañam pantayta yachachiq lliw religionkunata (Apocalipsis 18:8).
ASTAWAN YACHAYKUSUN
Kaypim yachasunchik pantayta yachachiq religionkunamanta Jehova Dios ima nisqanta, tukuy mana allinkunata ruwasqankumanta hinaspa chaykunawan mana hukmanyaspayki Jehova Diosmanta hinalla yachanaykimanta.
4. Diosqa manam lliw religionkunatachu chaskin
Achka runakunam ninku mayqin religionpas Diosman asuykachiwasqanchikta. ¿Chaynachu kanman? Leeychik Mateo 7:13, 14 hinaspa qatiqninmanta rimariychik:
Leesqanchikman hinaqa, ¿imaynataq kawsakuyman apakuq ñanqa?
VIDEOTA qawaykuychik hinaspa qatiqninmanta rimariychik:
¿Lliw religionkunatachu Diosqa chaskin? ¿Ima nintaq biblia?
5. Pantay religionpi kaqkunaqa manam kuyakuqchu kanku
Pantayta yachachiq religionkunaqa “Diostam serviniku” nichkaspankupas guerrakunamanmi rinku, chaywanmi Jehova Diosta pinqaypi churanku. Chaymanta yachaykunapaq VIDEOTA qawaykuychik. Hinaspa qatiqninmanta rimariychik:
Iskay kaq hatun guerra kaptin, ¿imatam religionkunapi umalliqkuna ruwarqaku?
¿Ima niwaqtaq chay ruwasqankumanta? ¿Allinchu karqa?
Leeychik Juan 13:34, 35 chaynataq 17:16. Hinaspa qatiqninmanta rimariychik:
¿Imaynataq Jehova Diosqa tarikun religionpi kaqkuna guerrakunapi yanapakuptinku?
Pantay religionpi kaqkunaqa tukuy mana allinkunapi chapukuspam runakunata ñakarichin. ¿Imakuna qawasqaykiraykum qampas chayna kasqanta niwaq?
Pantay religionpi kaqkunaqa Dios hina kuyakuq kanankumantaqa mana allinkunatam ruwanku.
6. Diosqa munan pantay religionmanta lluqsikunanchiktam
Leeychik Apocalipsis 18:4a hinaspa qatiqninmanta rimariychik:
Diosqa munan pantay religionkunamanta runakunata libraytam, ¿chayqa allinchu kanman?
7. Diosmanta yachaytaqa amayá saqiruychu
Amayá pantay religionkunapi kaqkunapa tukuy mana allin ruwasqankuraykuqa Diosmanta yachaytaqa saqiruychu. Kaypi piensariy, huk musu taytanpa rimapayasqanta mana uyarikuspan wasinmanta ripukunman hinaspa mana allinkunata ruwanman. Chay mana allinkuna ruwasqanmanta taytanman tumpayqa ¿allinchu kanman? Manamá.
Chaynaqa, ¿allinchu kanman pantay religionpi kaqkunapa mana allin ruwasqanmanta Diosman tumpayqa? ¿Chayraykuchu Diosmantaqa manaña yachananchik?
WAKIN RUNAKUNAM NINKU: “Religionpi kaqkunaraqmi runamasintaqa astawan ñakarichinku, chaymi Diosmanta yachaytaqa mana munanichu”, nispanku.
¿Qampas chaynatachu ninki?
¿Pantay religionkunapi kaqkuna mana allinkunata ruwasqanraykuchu nichwan Diospas mana allinkunata ruwaq kasqanta?
YUYARIYKUSUN
Pantayta yachachiq religionkunam runakunata ñakarichispanku Diosta pinqaypi churanku. Chaymi Diosqa paykunata chinkachinqaña.
¿Ima niwaqtaq?
¿Ima niwaqtaq pantay religionkunapi kaqkuna mana allinkunata ruwasqankumanta chaynataq yachachisqankumanta?
¿Imatam Jehova Diosqa nin pantayta yachachiq religionkunamanta?
¿Imananqam Jehova Diosqa pantay yachachiq religionkunata?
ASTAWAN YACHANAYKIPAQ
Diosqa manam llapallan religionkunatachu chaskin, ¿imanasqa? Chaymanta kay yachachikuypi leey.
“¿Llapallan religionkunatachu Diosqa chaskin?” (Tarinkim jw.org nisqanpi)
Jehova Diosqa munanmi huñunakuspa payta yupaychananchikta, ¿imanasqa? Chaymanta kaypi yachaykuy.
“¿Religionpiraqchu kananchik Dios chaskiwananchikpaq?” (Tarinkim jw.org nisqanpi)
Curam religionninpi mana allinkunata qawarqa, chaywanpas Diosmantaqa manam karunchakururqachu. Diosmantam imam kaqta yachayta munarqa.
Ñawpaq watakunamantaraqmi pantay yachachiq religionkunaqa llullakunata Diosmanta yachachirqaku, chaymi runakunaqa ninku Diosqa mana llakipayakuq kasqanta. Chay yachachikuykunamanta kaypi astawan yachaykuy.
“Llulla yachachikuykunam Diosmanta karunchawanchik” (Willakuq, enero-febrero 2014)
a Bibliapim Apocalipsis qillqapi pantay religionkunata tupachin ‘hatun Babilonia’ sutiyuq warmiwan. Chaymanta astawan yachaykunaykipaq qaway kay libropa tukupayninpi punta willakuyta.