Diospa llaqtanpi punta apaqkunapa cartan

Kuyasqayku iñiqmasillaykuna:

Jehova Diosta hinaspa runamasinchikkunata kuyaspaqa Jesuspa nisqantam kasukusun, paymi kamachiwarqanchik: “Runakunaman rispayá yachachimuychik qatiqniykunaña kanankupaq, hinaspayá bautizamuychik”, nispa (Mat. 28:​19, 20; Mar. 12:​28-31). Kuyakuq kaspanchikqa atisunmi ‘wiñaypaq kawsakuy’ munaq runakunapa sunqunman chayayta (Hech. 13:48).

Ñawpaqtaqa anchatam kallpanchakurqanchik qillqanchikkunapa nisqanta grabakuruspa umallanchikmanta runakunaman Diosmanta willanapaq hinaspa qillqanchikkunata qunapaq. Kunanñataqmi astawan kallpanchakunanchik runakunapa yachay munasqankumanta rimananchikpaq. Runamasinchikta kuyasqanchikraykum chaynata rimanapaqqa kallpanchakunanchik. Chaymi piwanpas rimaspaqa piensarinanchik imamanta yachay munasqanpi utaq imakuna preocupasqanpi, chayman hina rimananchikpaq. ¡Kay qillqam chaypaq yanapawasun!

Kay folletopim kachkan imayna sunquyuq kanapaq 12 yachachikuykuna, chay yachachikuykunaqa sapakamatam yanapawasun kuyakuywan runamasinchikkunaman Diosninchikmanta yachachinapaq. Sapa yachachikuypim kachkan Jesuspa chaynataq ñawpaq tiempopi qatiqninkunapa runakunaman imayna yachachisqankumanta willakuykuna. Kunanqa manañam imaynata willakunapaq yachachisqa kasqanchikman hinallañachu willakunanchik, aswanqa runamasinchik imamanta uyariyta munasqanman hinam kuyakuywan rimapayananchik. Kay folletopi yachachikuykunaqa llapallanmi allin kachkan, chaywanpas wakin yachachikuymi astawanqa yanapawasun piwanpas rimayta qallarinapaq, kaqmanta watukunapaq hinaspa estudiachinapaq.

Sapa yachachikuyta estudiaspaykiqa piensariy runakunaman willakuspayki imaynata yachachinaykipi. Imaynata willakunamantapas utaq yachachinamantapas aswan allinqa Jehova Diostawan runamasinchikta kuyaymi. Kuyakuq kayninchikmi yanapawasun Jesuspa qatiqnin kanankupaq runakunata yanapananchikpaq.

Qamkunawan Diosta “huk sunqulla” yupaychayqa mayna allinmi (Sof. 3:9). ¡Jehova Diosyá bendecisunkichik Jesuspa qatiqnin kanankupaq runamasinchikkunata kuyakuywan yanapasqaykichikmanta!