Bibliam imayna kawsasqanta cambiarqa

• NACESQAN WATA: 1941

• NACIONNINMI: BENIN

• HUK WILLAKUYKUNA: ACHKA WARMIYUQMI KARQA HINASPAPAS JEHOVA DIOSPA TESTIGONKUNATAM CHIQNIRQA

ÑAWPAQPI IMAYNA KAWSAKUSQAY:

Benin nacionpi Cotonou hatun llaqtapim nacerqani. Catolico kanaypaqmi educawarqaku ichaqa wakillanpim misamanqa riq kani. Catolico runakunaqa achka warmiyuqmi karqaku, chay tiempopiqa chayna kayqa allin qawasqam karqa. Chayraykum ñuqapas tawa warmiyuq karqani.

1970 watapim Benin nacionpi achka runakuna autoridadkunapa contranpi hatarirqaku. Ñuqapas llaqtay allin kananta munaspaymi paykunawan kuska sayarirqani. Paykunaqa chiqniqkum Jehova Diospa testigonkunataqa pimanpas mana sayapakuq kasqankurayku. Chaymi paykunaqa mana allinkunata ruwaqku Jehova Diospa testigonkunapa contranpi. Ñuqapas paykunatam yanaparqani. 1976 watapim huklaw llaqtayuq testigokunata Benin nacionmanta qarquruptinkum nirqani: “Manañach haykapipas kutimunqakuchu”, nispay.

BIBLIAMANTA YACHASQAYMI CAMBIANAYPAQ YANAPAWARQA:

Benin llaqtapi wañuchinakuyqa 1990 watapim tukururqa, hinaptinmi Jehova Diospa testigonkunaqa chaylla kutiramurqaku. Chayta qawaspaymi sunqullaypi nikurqani: “Paykunawanqa Dioschusmi kachkan”, nispay. Huklawpiñam llamkapakuyta qallaykurqani, chaypim huk kaqnin llamkaqmasiy Jehova Diospa testigon kasqa, chaymi chaylla imanasqa Diospi iñisqanmanta willawarqa hinaspam bibliata nawinchapuwarqa, chaypim Jehova Dios kuyakuq hinaspa allin ruwaq kasqanta yacharurqani (Deuteronomio 32:4; 1 Juan 4:8). Hinaspam astawanraq yachayta munaspay bibliamanta yachachiwanapaq nirqani.

Chayllam huñunakuykunamanpas rirqani, maymantaña kaspankupas kuyakuqllaña kasqankuta qawaspaymi ancha-anchata admirakurqani. Paykunawan astawan hukllawakuspaymi mana iskayrayarqanichu Jesuspa chiqap qatiqninkuna kasqankumanta (Juan 13:35).

Jehova Diosta servinaypaqqa católico religionpi kasqaytam saqinay karqa. Runakuna ima niwanankuta manchakuspaymi tantiakunaypaq sasachakurqani. Sasa kaptinpas Jehova Diosmi yanapawarqa chaymi curata nirqani católico religionpi manaña haykapipas kanaypaq.

Ñuqaqa achka warmiyuqmi karqani, bibliapim ichaqa yacharurqani Diosqa achka warmiyuq kanankutaqa mana munasqanta (Genesis 2:18-24; Mateo 19:4-6). Diospaqa punta warmiywan casarakusqallaymi allinqa karqa, chaymi Diosta kasukuyta munaspay wakin warmiykunata wasinkuman kutikunankupaq niykurqani, ichaqa leypa nisqanman hinam paykunataqa mana usuchinichu mikunankumantaqa nitaq pachankumantapas. Tiempopa risqanman hinam, ñawpaqpi casarakusqay iskay warmikuna Jehova Diospa testigonña kanku.

KUSISQAÑAM KAWSAKUNI:

Warmichay catolico religionpi hinalla kaspanpas respetanmi Jehova Diospa testigon kasqaytaqa hinaspapas payqa ninmi kunanqa allin qusa kasqayta.

Ñawpaqtaqa munarqanim nacionniy allin kananpaq yanapakuyta, kunanmi ichaqa yachani Dios kamachimuptillan kay pachapi sasachakuykunaqa tukunamanta (Mateo 6:9, 10). Jehova Diostam agradecekuni kusisqaña kawsakunaypaq yanapawasqanmanta.

• NACESQAN WATA: 1977

• NACIONNINMI: BRASIL

• HUK WILLAKUYKUNA: PENTECOSTAL RELIGIONPI PASTOR

ÑAWPAQPI IMAYNA KAWSAKUSQAY:

Brasil nacionpi Itu sutiyuq llaqtapim wiñarqani, chay llaqtapiqa mana allin kawsaq runakunam achka kanku.

Huchapakuypi purikuq, maqakuqllaña hinaspa drogakuna rantikuqmi ñuqapas karqani. Ichaqa cuentatam qukururqani chayna kawsakusqayqa carcelman aparuwananmanta utaq wañurunaymantapas, chaymi chayna kasqaytaqa saqirurqani. Chaymantam iglesia pentecostalman yaykuruspay pastor karqani.

Iglesiapi kaspayqa llaqtamasiykunata yanapaytam munarqani chaymi radiontakama rimamuspay ancha riqsisqa runa rikurirurqani. Qawarqanim chay religionpi umalliqkunaqa runamasinkuta mana llakipayasqankuta hinaspa Diostapas mana sunqumanta servisqankuta. Paykunaqa qullqi huñuyllatam munaqku, chaymi chay religionta saqinaypaq tantiakurqani.

BIBLIAMANTA YACHASQAYMI CAMBIANAYPAQ YANAPAWARQA:

Jehova Diospa testigonkunawan bibliamanta yachayta qallaykuspaymi chaylla musyarqani paykunaqa wakin religionkuna hina mana kasqankuta. Tukuy ima ruwasqankuta qawaspaymi admirakurqani, paykunaqa Diosta kuyasqankumanta hinaspa runamasinkuta kuyasqankumantaqa manam rimayllachu-rimanku, aswanqa sunqumanta kuyakuqmi kanku, manataqmi politicokunawanpas chaqrukunkuchu nitaq guerrakunamanpas rinkuchu (Isaias 2:4). Chayna kasqankuta qawaspaymi mana iskayrayarqanichu chiqap religionta tarisqaymanta hinaspa ‘kichki ñanqa’ wiñay kawsayman apawasqanchikmantapas (Mateo 7:13, 14).

Diospa yupaychaqnin kanaypaqqa imayna kawsasqaytam saqinay karqa. Chaypaqqa aylluytam allinta uywanay karqa hinaspapas manam hatun tukuqqa kanaychu karqa. Chaykuna sasa rikchakuwaptinpas Jehova Diospa yanapakuyninwanmi cambiayta atirqani. Warmichayqa ñuqamanta puntataraqmi bibliamanta yachayta qallaykurqa, chaymanta bibliata ñuqapas estudiayta qallaykuptiymi anchata kusikurqa hinaspam astawanraq ñawparirqa. Chaymi pisi tiempollamanta tantiarurqaniku bautizakunaykupaq. Chay punchawllam iskayniyku bautizakururqaniku.

KUSISQAÑAM KAWSAKUNI:

Warmichaywan kuskam kimsan churi-wawaykuta yanapachkaniku Jehova Diosta yupaychanankupaq. Kusisqam llapayku kawsakuniku. Jehova Diostam anchata agradecekuni palabranmanta yachaspay paytaña yupaychasqaymanta. Bibliaqa yanapawanchikmi allintaña kawsakunapaq ñuqatapas yanapawarqam.

• NACESQAN WATA: 1957

• NACIONNINMI: AUSTRALIA

• HUK WILLAKUYKUNA: WARMA KASQANMANTAM ANCHATA ÑAKARILLARQA

ÑAWPAQPI IMAYNA KAWSAKUSQAY:

Qanchis warmakunam kaniku ichaqa ñuqam paykunapa mayornin kani, Australia nacionpi Newcastle llaqtapim wiñarqani. Tayta-mamayqa maqakuqllañam karqaku hinaspapas taytayqa trago tomakuqmi karqa. Mamayqa sapa punchaw maqawaspanmi tukuy imata niwaq. Niwaqmi: “Mana allin ruwaqmi kanki infiernomanmi rinki”, nispa. Chaynata niwaptinmi manchakuymanta katkatataqraq kani.

Sapa kutim mamayqa llumpayta maqawaq chaymi wakinpiqa escuelamanpas mana riyta atiqchu kani. 11 wataypi kachkaptiymi autoridadkuna tayta-mamaypa makinmanta huqariruwarqaku. Hinaspam monjakunapa kasqanman aparuwarqaku chaymantam 14 wataypi kachkaspay lluptikururqani, wasiymanqa manam kutiytaqa munarqanichu chaymi callekunapiña yacharqani.

Callekunapi yachaspayqa drogakuqmi, sinkakuqmi kani hinaspaypas qalalla kaqkunatam qawaq kani, chuchumika warmi hinam puriq kani. Huk kutipim llamkapakusqay runapa wasinpi kachkaptiy iskay runakuna paywan rimanankupaq chayaramurqa, chaymi sapallankuta saqiykunaypaq patronniyqa niykuwarqa. Huknin cuartomantam uyarirqani ima rimasqankuta, nirqakum Japon nacionpi trago tomananku wasipi llamkanaypaq aparuwanankupaq. Patronniyqa rantikuruwaytam utaq venderuwaytam munarqa, chaymi anchata mancharikuspay wasipa altosninmanta pawaykuspay chaymanta pasakurqani.

Huk runawan tuparuspaymi willaykurqani tukuy pasaruwasqanta qullqita quwananta munaspay, paymi ichaqa pusaruwarqa wasinman chaypi bañakuruspay imallatapas mikuykunaypaq. Chaypim qipakurqani hinaspam huk watamanta casarakururqaniku.

BIBLIAMANTA YACHASQAYMI CAMBIANAYPAQ YANAPAWARQA:

Jehova Diospa testigonkunawan estudiasqayman hinam yacharurqani kay allpa pacha satanaspa makinpi kasqanrayku ñakarisqanchikta. Chaytaqa manam yacharqanichu, ñuqaqa piensarqanim Dios ñakarichiwasqanchikta. Yacharurqanim Jehova Diosqa infiernopi mana castigawasqanchikta, chayqa sunquytam tiyaykachirqa. Ñuqaqa taqsacha kasqaymantam infiernotaqa manchakuq kani.

Qawaqmi kani Jehova Diospa testigonkunaqa bibliapa nisqanman hina kawsakusqankuta. Wakinpim ñuqaqa nanay simiwan rimaruq kani utaq imatapas ruwaruq kani. Chayna kaptiypas paykunaqa kuyakuywanmi hinaspa respetowanmi hinalla yanapaykuwarqaku.

Ñuqaqa mana valeqpaqmi hapikuq kani hinaspaypas kikiywanmi piñasqa tarikurqani. Hinallam chayna tarikurqani bautizakusqay qipamanpas. Yachaqmi kani Jehova Diosqa kuyakuq kasqanta, ichaqa sunquypim niq kani: “Ñuqataqa manam kuyawanmanchu”, nispay.

Bautizakusqaymanta chunka pichqayuq wata qipatañam cuenta qukururqani mana chayna kasqanmanta. Huñunakuypi puntamanta yachachimuspanmi huk iñiqmasinchik bibliapi Santiago 1:23 hinaspa 24 leenaykupaq nirqa. Chaypim nin bibliaqa espejo hina kasqanta, bibliata leespam yachachwan Jehova Dios imayna qawawasqanchikta. Sunquypim nikuq kani mana allin warmi kasqayta ichaqa Jehova Diosqa anchatam kuyawan. Chaywanpas hinallam mana allin warmi kasqayta piensarqani.

Chaymanta punchawkuna pasaytam bibliata leesqaypi tarirurqani Isaias 1:18. Chaypim Jehova Dios nin: ‘Kunanyá ñuqaman hamuychik. Kunanyá ñuqawan tanteanakusunchik. Cochinilla hina guindoña huchaykichik kaptinpas ritita hinam yuraqyachisaq’, nispa. Bibliapi chayna nisqanqa ñuqata Jehova Dios kaynatapas niwachkanman hinam karqa: “Vicky hamuy, tanteanakuykusunchik. Yachanim imakunapi pantarusqaykita, ichaqa riqsinim sunquykita chayraykum kuyayki”, nispa.

Chay tutaqa puñuytapas manam atirqanichu, yuyaymanarqanim Jehova Diosqa kuyawaspanchik ñuqanchikrayku wañunanpaq churinta kachamusqanpi. Chaymi cuentata qukurqani Jehova Diosqa anchata kuyawasqanta hinaspa ñuqawan pacienciakusqanta. Mana allin warmipaq hapikuspayqa Jehova Diosta kaynata nichkayman hinam karqa: “Huchaykunaqa llumpaymi manam kuyakuynikipas nitaq churikipa wañukusqanpas haypanmachu huchaymanta librawananpaqqa”, nispay. Chaynata nispayqa Jesuspa wañukusqantam mana chaninchachkarqanichu.

KUSISQAÑAM KAWSAKUNI:

Bibliamanta yachasqayqa anchatam yanapawarqa. Kunanqa kusisqa hinaspa hawkañam kawsakuni. Bibliamanta yachasqayqa yanapawarqam qusaywanpas allinlla kawsakunaykupaq. Anchatam kusikuni kay willakusqay hukkunatapas yanapanamanta yachaspay.

• NACESQAN WATA: 1974

• NACIONNINMI: RUSIA

• HUK WILLAKUYKUNA: MANA ALLIN TAKIKUNATAM UYARIQ KANI

ÑAWPAQPI IMAYNA KAWSAKUSQAY:

Nacerqanim Rusia nacionpa Vótkinsk sutiyuq llaqtachapi. Tayta-mamayqa wakcha runakunam karqaku. Nacesqay llaqtapitaqmi ancha riqsisqa Chaikovski sutiyuq runapas nacerqa. Taytayqa allin runam karqa ichaqa sapa kutim sinkakuq, chaymi wasiypiqa mana hawkachu kaq kaniku.

Escuelapiqa profesorkunapa yachachisqankutam mana chayllachu entiendeq kani. Chaymi watakuna pasasqanman hina mana valeqpaqña hapikuyta qallaykurqani. Warmamasiykunapa qayllanpi rimarinaypaq niwaptinkuqa manam rimariyta atiqchu kani, chaymi manaña escuelaman riytaqa munaqñachu kani. Colegiopiña kachkaptiymi wata tukuyta profesorniykuna libretaypi kaynata qillqarusqaku: “Mana ancha rimaqmi hinaspapas manam atinchu ima piensasqanmanta rimariytapas”, nispanku. Chaynata nisqankuqa anchatam hukmanyarachiwarqa. Chaymi nikurqani: “Imapaqñataq kawsani”, nispay.

Chaymantam sinkakuyta qallaykurqani. Qallariypiqa hawkayaykachiwaqmi, chaymantam ichaqa pesapakuq kani. Ancha hukmanyasqa tarikusqayraykum wasiymantapas mana lluqsiqchu kani. Munarqanim sipikuruyta.

Iskay chunka wataypi kachkaspaymi mana allin takikuna uyariyman qukururqani. Chay takikunata uyarispaymi kallpata hapiq kani. Hukllawakuytataqmi qallaykurqani chay takikunata uyariqkunawanpas, chaymi chukchasapa, aretuyuq hinaspa chay takiqkuna hina pachasqaña purirqani. Pisi-pisimantam maqakuqllaña hinaspa qaqchakuqllaña rikurirurqani, chayraykum wasiypipas mana hawkachu kawsakurqaniku.

Ñuqaqa piensarqanim chay takikunata uyarisqayqa hawka kanaypaq yanapawasqanta, ichaqa chayraykum mana allin runaña rikurirurqani. Chaymantapas yacharurqanim paykunaqa mana allinkunata ruwasqankuta.

Kaqmanta hukmanyaruspaymi sipikuruyta munarqani, ichaqa mamaytam yuyarirqani. Payqa tukuytam ruwarqa uywawananpaq chaymi mana sipikururqanichu. Chaywanpas manam hinalla kawsaytaqa munarqanichu.

Mana chaykunapi piensanaypaqmi librokuna leeyta qallaykurqani. Huknin libropim willakusqa religioso runamanta. Chaymi ñuqapas Diosmanta yachayta munarqani, munarqanitaqmi runakuna yanapaytapas. Chayraykum Diosta mañakurqani allin kawsakuyta yachaykachiwananpaq, chaynataqa manam haykapipas mañakurqanichu. Mañakuyta tukuruspayqa hawkañam tarikurqani. Chayna mañakusqaymanta iskay horallamanmi Jehova Diospa testigon punkuyta takaykamurqa hinaspam niykuwarqa bibliamanta yachachiwananpaq. Jehova Diosqa mañakusqaytam uyariykuwarqa. Chay punchawmantam kusisqaña kawsakuni.

BIBLIAMANTA YACHASQAYMI CAMBIANAYPAQ YANAPAWARQA:

Sasa kaptinpas chay mana allin takikunawan tupaqkunatam wischururqani. Chaywanpas umallaypim chay takikunaqa unay watakuna karqa. Chay takikunata takinanku lawninta richkaspay qunqaymanta chay takikunata uyariruptiyqa mana allinkunam umayman chayamuq. Chaymi chay lawninkunataqa manaña puriqchu kani. Manam munarqanichu umaypi nitaq sunquypi kaqmanta mana allinkuna kanantaqa. Ñawpaqta mana allin ruwasqaykunata yuyarispayqa Jehova Diostam mañakuq kani, chaymi sunquypi hawka tarikuni (Filipenses 4:7).

Bibliata leespaymi yacharurqani runamasinchikman Diosmanta willakunanchikmanta (Mateo 28:19, 20). Ñuqaqa manchakuqmi kani hukkunaman willakuytaqa. Ñuqataqa bibliamanta yachaymi yanapawarqa kusisqa hinaspa hawka kawsakunaypaq, chaymi hukkunapas bibliamanta yachanankuta munarqani. Chayraykum kallpanchakurqani hukkunaman Diosmanta willakunaypaq, chayqa anchatam yanapawarqa allinlla tarikunaypaq hinaspapas astawanmi Diosta kuyarqani.

KUSISQAÑAM KAWSAKUNI:

Kunanqa ancha kusisqam warmichaypiwan kuska kawsakuniku. Achka runakunatam yanaparqani bibliamanta yachanankupaq, yachachirqanim paniytawan mamaytapas. Diosta servispa hinaspa runamasinchikta yanapaspaymi kunanqa kusisqaña kawsakuni.