Diosmanta allin noticiakuna

¿Imaynatam kay folletota servichikuchwan kaqmanta watukunapaq hinaspa estudiota qallarinapaq?

1. “Sonqotayá waqaychasun” nisqa asambleapi, ¿ima qellqatam chaskirqanchik kaqmanta watukunapaq hinaspa estudiota qallarinapaq?

¹ ¡Mayna kusisqam tarikurqanchik “Sonqotayá waqaychasun” nisqa kimsa punchaw asambleapi mosoq qellqa chaskisqanchikmanta! Kayqa yanapawasunmi kaqmanta watukunapaq hinaspa estudiota qallarinapaq. Diosmanta allin noticiakuna nisqa folletoqa ¿Imatam Diosqa munan ñoqanchikmanta? niq folletopa rantinpim lloqsimurqa, kaypas pisi rimayllapim kachkan, hinaspapas allinmi wasikunapa punkunpi estudiota qallarinapaq. ¿Imatam Diosqa munan ñoqanchikmanta? niq folletoqa Diospa kamachikuyninkunamantam astawan rimaq, chaymi sasa entiendenapaq hina rikchakun chayllaraq estudiaqkunapaqqa. Kay mosoq folletom ichaqa Bibliapi allin noticiakunamanta astawan riman (Hech. 15:35).

2. ¿Imapaqmi Allin noticiakuna niq qellqaqa ruwasqa kachkan?

² ¿Imapaqmi huk mosoq folletota ruwarqaku? Allpantinpi iñiqmasinchikkunam mañakurqaku runakuna yachayta munanankupaq hinaspa Yachachiq librota estudianankupaq kallpanchaq qellqata. Achka runakunam mana estudiayta munankuchu huk librowanqa, pisi rimayllapi qellqawanmi ichaqa yachayta munanku. Chaymantapas folletotaqa tikranmankum achka rimaykunamanpas.

3. ¿Imapim kay folletoqa mana chaynallachu wakin qellqanchikkunawanqa?

³ Imayna ruwasqam kachkan. Yaqa llapan qellqanchikkunam ruwasqa kachkan leespalla entiendenapaq. Kay mosoq folletom ichaqa mana chaynachu: chaymi yachachiqpa yanapakuyninwan estudiana. Munachispaqa allinmi kanman huk otaq iskay parrafollata estudiayqa. Pisi rimayllapi kasqanraykum wasinku punkupi otaq llamkayninkupi estudiayta atikunman. Punta kaq yachachikuy qallarinapaq allin kaptinpas, atichwanmi mayqenwanpas estudio qallariytaqa.

4. ¿Imaynatam kay folletoqa yanapawanchik Bibliamantapuni yachachinapaq?

⁴ Achka qellqanchikkunapim sapa parrafopa tapukuyninta contestachkan hina chay parrafollapi. Kay folletopim ichaqa contestachkan Bibliapi textonkunawan, runakunam qellqanchikkunamanta yachaytaqa mana munankuchu, Bibliamantapunim ichaqa munanku. Chaymi yaqa lliw textokunaqa maskanapaq kachkan. Bibliamanta leeyninkum ancha allinqa. Chaynapim estudiaqkunaqa ninqaku yachasqankuqa Diosmanta hamusqanta (Is. 54:13).

5. ¿Imanasqataq sapa yachachikuypaq preparakuyqa ancha allin?

⁵ Kay folletoqa manataqmi lliw textokunapa ima niy munasqantachu willan. Kayqa estudiaqkuna tapukunankupaqmi hinaspa predicaqkuna allin yachachiq kasqankuta qawachinankupaqmi. Chaymi allin kanman sapa yachachikuypaq allinta preparakuyqa. Ichaqa manam llumpaytaqa rimanachu. Textokunamanta yachachiy gustawaptinchikpas allinmi kanman estudiaqkuna ima entiendesqankumanta rimarinankupaq saqeyqa. Allinta tanteaspa tapuspanchikqa yanapasunmi pisi-pisimanta allinta entiendenankupaq (Hech. 17:2, NM).

6. ¿Imaynatam kay folletota servichikuchwan a) Bibliapi hinaspa Diospi mana creeq runakunapa kasqanpi? b) wasin-wasin rispa? c) estudiota chaylla qallarinapaq munachispa? d) kaqmanta watukuspa?

⁶ Wakin qellqakunata hinam kay folletotapas qochwan chay killapi predicanapaq mana tupawaptinchikpas. Yaqa lliwchá munanqaku wasikunapa punkunpi kay folletowan chaylla estudio qallariytaqa. Chaymantapas kimsa punchaw asambleapi nisqanman hinam, “kay folletoqa anchata yanapakunqa kaqmanta runakunata watukunapaq” (qaway 5-7 paginakunapi sapaq yachachikuykunata).

7. ¿Imaynatam kay folletowan estudiota qochwan?

⁷ Imaynatam servichikuchwan estudiota qonapaq. Qallarichwanmi yana letrapi tapukuykunata hinaspa qatiqnin parrafota leespa. Chaymantañataq allinta entiendenankupaq yanapasun qechqanpa tarikuq textokunata Bibliapi maskaspa hinaspa tapukuykunata ruwaspa. Manaraq qatiqnin yachachikuyman yaykuchkaspañataqmi ima entiendesqankuta yachanapaq yapamanta tapuna yana letrapi kaqkunata. Chayllaraq watukuspaqa allinmi kanman huk otaq iskay tapukuykunallata estudiayqa. Tiempopa risqanman hinam astawan yapachwan huk kutillapi enteron yachachikuyta estudianakama.

8. ¿Imatam mana qonqananchikchu textokunata leespaqa hinaspa imanasqa?

⁸ Leey niq palabrapa waqtanpi textokunam, yana letrapi tapukuykunataqa chaylla contestachkan. Bibliata leespaqa manam ninanchikchu: “Apostol Pablom nirqa” otaq “qaway Jeremiaspa willakusqanta”, nispaqa. Chaynata nispanchikqa entiendechichwanmi runakunapa nisqallanta leepusqanchikta. Aswan allinqa kanman “Diospa Palabranmi nin” otaq “qaway Bibliapa nisqanta” niymi.

9. ¿Parrafopi llapan textokunatachu leena?

⁹ ¿Llapan textokunatachu leena icha “leey” niqkunallatachu? Chayqa kanqa necesitasqanman hinam. Chay textokunapiqa sapakamapim kachkan parrafota entiendenapaq ancha allin yachachikuykuna. Ichaqa estudiachisqayki runapa tiempon mana ancha kaptinqa, yachayta mana munaptinqa otaq leeypi sasachakuptinqa, yaqapaschá allin kanqa “leey” niq textokunallata maskayqa.

10. ¿Haykapitaq Yachachiq librowanña estudiachichwan?

¹⁰ Haykapitaq Yachachiq librowanña estudiachina. Sapa kutiña ñoqanchikwan estudiaptinkuqa Yachachiq librowanñam estudiachichwan otaqmi folletota tukuna. Chaytaqa ruwanqaku sapakama yachachiqmi tanteasqanman hina. ¿Libropa qallariynin yachachikuymantachu qallarina? Chayqa kanqa sapakamapa necesitasqanman hinam. Ichaqa allinmi kanman wakin yachachikuykunata yuyariynin hinaspa Yachachiq librota servichikuspa estudiayninpas.

11. ¿Imanasqataq allinta servichikunanchik kay mosoq folletota?

¹¹ Mana allin noticiakunapa kasqanpim, atinchik allin noticiakunamanta willakuyta: Diospa Gobiernon kamachisqanmanta hinaspa mosoq pachapipas kamachinanmantaña (Mat. 24:14; 2 Ped. 3:13). Kay willakuyta uyariqkunaqa kaytam ninqaku: “¡Ima sumaqmi orqon-orqon allin noticia willakuqkunapa chayamusqanqa! ¡Ima sumaqmi hawkayaymanta uyarichiqkunapa chayamusqanqa! Paykunam allin noticiata willakuchkanku. Paykunam salvacionmanta uyarichichkanku. Diosninchikqa gobiernachkanmi”, nispa (Is. 52:7). Kallpanchakusunyá kay mosoq folletowan Diosmanta yachay munaq runakunaman allin noticiakunata apanapaq.

[5 kaq paginapi recuadro]

Diospiwan Bibliapi mana creeq runakunapa kasqanpi servichikunapaq

● Wakin llaqtakunapi runakunam Dios hinaspa Biblia niq palabrakunataqa mana uyariytapas munankuchu. Chaylawkunapiqa allinmi kanman: imapas sasachaqninkumanta, allin gobiernomanta, familiapaq consejokunamanta hinaspa hamuq tiempomantapas rimayninchikqa. Achka kutikama chay runakunawan rimaspanchikqa hinaspa Dios kasqanmanta chaynataq Palabranpas confianapaq kasqanmanta qawachispanchikqa, qochwanmi Allin noticiakuna niq folletotaqa.

[6 kaq paginapi recuadro]

Wasin-wasin predicanapaq

● “Achka runakunam tapukunku runakunata Dios ima ruwananmanta, munaymanmi chaymanta yachachiyta. Piensay kaypi, ¿munanchu Diosqa runakunapa ñakariynin tukuchiyta? [Contestananta suyay.] Kay folletom yanapasunki kikikipa Bibliaykiwan chay tapukuyta contestanaykipaq. [Folletota qospa leey punta kaq yachachikuyta hinaspa Jeremias 29:11 nisqantapas.] Kaypi nisqanman hinaqa, ¿munanchu Diosqa hamuq tiempopi kusisqa kawsananchikta? [Contestananta suyay.] Folletowanqa qepakuwaqmi, qatiqninpi watukamuptiymi iskay kaq parrafopi qawasunchik ñakariyta Dios imayna chinkachinanmanta”. Tiempon kaptinqa atiwaqchikmi iskay kaq parrafotawan kimsan textokunata leespa estudiaytapas. Qatiqninpi watukuspa qatiqnin tapukuyta estudianaykichikpaq niy.

● “Achka kutipim Diosta mañakurqanchik imapas sasachakuyninchik kaptin ¿aw? [Contestananta suyay.] ¿Runapa lliw mañakusqantachu Diosqa uyarinman icha wakillantachu? [Contestananta suyay.] Kay folletopim chay tapukuyta Bibliawan contestachkan. [Qoykuy hinaspa 12 yachachikuypa punta kaq parrafonta estudiaychik, chaynataq “leey” niq textokunatapas qawaychik.] Anchatam kusikunchik oracionnintakama asuykunapaq Diospa niwasqanchikmanta, ichaqa chayta ruwanapaqmi allinta Diosta reqsinanchik. [2 kaq yachachikuypi yana letrachakunata qawachiy.] Munaptikiqa saqeykimanmi kay folletota hinaspam kaqmanta kutimuptiy kay tapukuykunamanta Bibliawan qawanchikman”.

● “Runakunatam watukamuchkaniku hamuq tiempopi imapas pasakunanmanta yachayta munasqankurayku. ¿Yaqachu tukuy kay pasakusqankuna allinyanqa? [Contestananta suyay.] ¿Yacharqankichu Bibliapi allin noticiakuna kasqanmanta? Qawaykuy kaykunamanta Bibliapi ima nisqanta”. Folletota qospayki niy tukuynin paginapi kaq tapukuykunamanta hukninta akllananpaq. Hinaspa chay tapuypa yachachikuyninta kichaspa qawachiy folletota imayna estudianamanta. Niytaq kaqmanta kutispa qatiqnin yachachikuypa tapukuyninta qawanaykichikpaq.

[7 kaq paginapi recuadro]

Estudiota chaylla qallarinapaq

● “Huk ratollam watukamuchkaniku pisi tiempollapi Bibliamanta imayna yachachisqaykuta qawachinaykupaq. Kay folletopiqa 15 yachachikuyninkunapim tarisun kay tapukuykunata Biblia imayna contestasqanmanta. [Qawachiy folletopa qaranta hinaspa tukuyninpi kaqtapas.] ¿Haykapipas kallpanchakurqankichu Bibliapa nisqanta entiendenaykipaq? [Contestananta suyay.] Qawachisqayki mana sasachakuspalla yachanapaq kasqanta. [Maskay 3 kaq yachachikuyta hinaspa estudiaychik 3 kaq tapukuypa qallariynin parrafota. Chaymantañataq Apocalipsis 21:4, 5 nisqanta leey. Atikuptinqa leewaqmi qatiqnin parrafotawan textokunatapas.] Folletota saqesqayki. Kallpanchaykikum huk kaqnin yachachikuyta estudianaykipaq. Munaspaykiqa hinallam estudiawaq. Kaqmanta watukamuptiymi qawachwan punta kaq yachachikuyta, chayqa huk paginayoqllam”.

[7 kaq paginapi recuadro]

Kaqmanta watukuspa servichikusun

● “Anchatam kusikuni kaqmanta tupasqanchikwan. Kay folletotam apamurqayki, kaypim ancha allin tapukuykunata Bibliawan kutichichkan. [Folletota qoykuy hinaspa niy tukuyninpi kaqta qawananpaq.] ¿Mayqenmantataq astawan yachayta munanki? [Contestananta suyay hinaspa akllasqan yachachikuyta kichay.] Kay folletowan qawachisqayki chay tapukuyta Biblia imayna contestasqanmanta”. Qawachiy imayna estudianamanta huk otaq iskay parrafokunata hinaspa leey nisqa textokunatapas servichikuspa. Qawasqanchikman hinaqa mana sasachakuspallam estudiotaqa qallarichwan. Runakunaman folletota saqespaykiqa niy kutinaykipaq. Akllasqan yachachikuyta tukuruspaqa, kaqmanta hukta akllaptin chayta qawaychik otaq qallariyninmanta estudiaychik.