¿Imanasqam Diosta yupaychananchikpaq huñunakunanchik?

1-3. (1) ¿Imaynatam Diosta yupaychaqkunaqa huñunakuyman riy munasqankuta qawachirqaku? (Qaway kay paginapi kaq dibujota). (2) ¿Imakunamantam kay yachachikuypi yachasun?

CORINNAQA 17 watanpim kachkarqa mamanta presocharuspa aparuptinku, yachasqankumanta karu-karumanmi mamantaqa llumpayta llamkachinankupaq aparurqaku. Chaymanta qipallatam Corinnatapas Siberia lawman aparurqaku, chayqa wasinmantaqa karullay-karupim karqa. Chaypim animalkuna uywaypi sirvientata hina llamkachirqaku. Wakinpiqa chiripim pachanwan mana raktaykachispa llumpayta llamkachiqku. Chayna kaptinpas, Corinnawan huk iñiqmasinchikqa tukuytam ruwarqaku karupiraq huñunakuy kaptinpas chayman rinankupaq.

² Paykunaqa tardeykuqtañam yaqa kimsa hora puriyta trenpa kasqankama rirqaku. Corinnam nirqa: “Trenqa chawpi tuta pasayllatam lluqsirqa, suqta horam illarqaniku. Chaymantapas huñunakuyman chayanaykupaqqa yaqa huk horaraqmi purirqaniku”, nispa. Corinnaqa manam ñakakurqachu chay huñunakuyman risqanmantaqa. Paymi nin: “Huñunakuypiqa Willakuq qillqatam estudiarqaniku hinaspam Diospaqpas takirqaniku. Chay ruwasqaykuqa anchatamá iñiyniykupi kallpanchawarqaku”, nispa. Kimsa punchawmantam llamkasqaykuman kutirqaniku, chaypi nanachikuq runaqa manam haykapipas huñunakuyman risqaykutaqa yacharqachu.

³ Huñunakuykunaqa ancha chaninniyuqmi Jehova Diosta yupaychaqkunapaqqa. Ñawpaq tiempopi Jesuspa qatiqninkunaqa munaqkum huñunakuypi Jehova Dios yupaychayta hinaspa paymanta yachaytapas (Hech. 2:42). Ñuqanchikpas huñunakuykunaman riytaqa anchatamá munanchik. Ichaqa wakiqninchikmi llapan huñunakuykunam riytaqa sasachakunchik. Ichapas achka llamkayniyuq hinaspa achka ruwayniyuq kasqanchikrayku llumpay pisipasqa tarikunchik. ¿Imam yanapawasun huñunakuykunaman riyta mana saqinanchikpaq?^[1] ¿Imaynatam kallpanchachwan bibliamanta yachachisqanchik runakunata chaynataq hukkunatapas huñunakuyman rinankupaq? Kay yachachikuypim kimsa yanapakuymanta yachasunchik. Yachasunmi imanasqa huñunakuykunaman riyninchik ancha allin kasqanmanta. Yachasuntaqmi huñunakuyman riyninchik imaynata hukkunata yanapasqanmanta. Chaymantapas yachasunmi imanasqa huñunakuyman rinanchikta Jehova Dios munasqanmanta.^[2]

4. ¿Imaynatam huñunakuykunaqa Jehova Diosta astawan riqsinapaq yanapawanchik?

⁴ Huñunakuykunam yachachiwanchik. Huñunakuykunapim pasaq killakunapi Diosmanta yachachinapaq huñunakuypi estudiarqaku ‘Diospa kuyakuyninpiyá takyasunchik’ niq qillqata. ¿Imaynam tarikurqanchik Jehova Diosmanta astawan yachaspanchik? Astawanchá Jehova Diosta kuyarqanchik. Chaymantapas huñunakuykunapim bibliamanta astawan yachanchik lliw runakunapaq yachachikuykunata uyarispanchik, demostracionkunata qawaspanchik hinaspa bibliata leeptinku uyarispanchik (Neh. 8:8). Sapa semanataqmi bibliata leespanchik allin yanapakuykunata tarinchik chaymantapas iñiqmasinchikkunapa rimarisqankutam uyarinchik.

5. ¿Imaynatam huñunakuykuna yanapawarqanchik kawsakuyninchikpi hinaspa Diosmanta willakuyninchikpipas?

⁵ Huñunakuyninchikkunam yanapawanchik bibliapi yachasqanchikkunata kasukunapaq (1 Tes. 4:9, 10). Ichapas huk kaqninpi Willakuq qillqata estudiasqanchik kallpanchawarqanchik Jehova Diosta astawan yupaychanapaq, aswan allinta Diosta mañakunapaq utaq iñiqmasinchikkunata pampachanapaq. Sapa semanataqmi huñunakuypi yachachiwanchik Diosmanta imayna willakunapaq hinaspa runakunaman bibliamanta yachachinapaq (Mat. 28:19, 20).

6. ¿Huñunakuypi imakuna ruwaymi kallpanchawanchik?

⁶ Huñunakuykunam kallpanchawanchik. Satanasqa iñiyninchikpi hukmanyarunanchikta hinaspa chiriyarunanchiktam munachkan. Ichaqa huñunakuykunam kallpanchawanchik Jehova Diosta hinalla yupaychananchikpaq (leey Hechos 15:30-32). Wakinpim rimanchik bibliapi willakuykuna imayna cumplikusqanmanta. Kaywanmi astawanraq mana iskayrayanchikchu tukuy ima niwasqanchikta Jehova Dios ruwananmanta. Chaymantapas, iñiqmasinchikkunam kallpanchawanchik huñunakuypi yachachiwaspanchik chaynataq rimarispanku hinaspa tukuy sunqunkuwan Jehova Diospaq takispankupas (1 Cor. 14:26). Kallpanchawanchiktaqmi iñiqmasinchikkunawan huñunakuy manaraq qallarichkaptin chaynataq huñunakuy tukuytapas rimasqanchik, chaypim qawanchik kuyawaqninchik achka amistadninchikkuna kasqanta (1 Cor. 16:17, 18).

7. ¿Imanasqam ancha allin huñunakuyninchikkunaman riyninchikqa?

⁷ Huñunakuypim Diosqa chuya espiritunwan yanapawanchik. Jesusqa Diospa chuya espirituntam servichikun Diospa llaqtanta yanapananpaq. Paymi nirqa: “Uyariwaqniykunaqa kasukuychikyá huñunasqa iñiqkunaman espiritupa nisqanta”, nispa (Apoc. 2:7). Chuya espirituqa yanapawasunmi huchaman mana wichiykunapaq, Diosmanta willakuspa mana manchakunapaq hinaspa imatapas allinta tanteanapaq. Chaymi ancha allin lliw huñunakuyninchikkunaman riyninchikqa. Chayta ruwaspaqa Diospa chuya espiritunpa yanapakuynintam chaskisun.

8. ¿Imaynatam iñiqmasinchikkunata yanapan huñunakuyman risqanchik, chaypi rimarisqanchik hinaspa takisqanchikpas? (Qawaytaq “Sapa kutim kusisqallaña wasiman kutimuq” niq yachachikuyta).

⁸ Huñunakuypiqa iñiqmasinchikkuna kuyasqanchiktam qawachinchik. Achka iñiqmasinchikkunam imapas sasachakuywan ñakarichkanku. Pablom nirqa kallpanchanakunamanta (Heb. 10:24, 25). Chayta ruwananchikpaqqa huñunakuyninchikkunamanmi rinanchik. Huñunakuypi kaspanchikmi iñiqmasinchikkunawan kuska kay munasqanchikta qawachinchik, paykunawan rimay munasqanchikta hinaspa imayna tarikusqankumanta yachaytapas. Kallpanchanchiktaqmi huñunakuypi rimarispanchik hinaspa tukuy sunqunchikwan Jehova Diospaq takispanchikpas (Col. 3:16).

9, 10. (1) ¿Imanasqam Juan 10:16 Jesuspa nisqan yanapawanchik huñunakuyninchikkunaman riy ancha allin kasqanta entiendenapaq? (2) Huñunakuyman risqanchikqa, ¿imaynatam Jehova Diosta mana yupaychaq aylluyuq iñiqmasinchikkunata yanapan?

⁹ Huñunakuyman rispaqa iñiqmasinchikkuna huk sunqulla kanankupaqmi yanapanchik (leey Juan 10:16). Jesusmi nirqa qatiqninkuna ovejakuna hina kasqankuta, payñataq michiqnin kasqanta. Ovejakunaqa kuskankum mikunku hinaspapas michiqninta riqsispankum qipanta qatinku. Sichu iskay ovejakuna urqupi kanmanku, iskay ovejañataq wayqupi hinaspa hukninñataq huk lawpi, ¿nichwanchu pichqanku huk kanchallapi kasqankuta? Manam. Huk kanchallapi kayta munaspanchikqa hinaspa michiqninchikta qatinanchikpaqqa, huñunakuyninchikkunamanmi rinanchik iñiqmasinchikkunawan kuska kananchikpaq.

¹⁰ Huñunakuykunam yanapawanchik huk sunqulla kananchikpaq hinaspa ayllu hina kuyanakunanchikpaq (Sal. 133:1). Wakin iñiqmasinchikkunatam Diosta yupaychasqankurayku tayta-mamanku utaq wawqi-paninku chiqninku. Ichaqa Jesusmi nirqa kuyakuq hinaspa yanapaqnin aylluta qunanmanta (Mar. 10:29, 30). Huñunakuyman riyta mana saqiptinchikqa, kay iñiqmasinchikkunam tayta-mamanta utaq wawqi-paninta hina qawawasunchik hinaspam kallpanchasqa tarikunqaku. Kaypi yuyaymanaspanchikqa, manam haykapipas saqisunchu huñunakuyninchikman riytaqa.

11. ¿Imaynatam huñunakuykuna yanapawanchik Jehova Diosta agradecekunapaq?

¹¹ Huñunakuyman rispaqa Jehova Dios agradecekusqanchiktam qawachinchik. Jehova Diosqa unanchawaqninchikmi, chaymi agradecekunanchik hinaspa hatunchananchik (leey Apocalipsis 7:12). Chaytam ruwanchik huñunakuypi sapa kuti Diosta mañakuspa, takispa chaynataq paymanta rimarispa. Sapa semanam Jehova Diosta huñunakuypi yupaychayta atinchik.

12. ¿Imaynam Jehova Diosqa tarikun huñunakuyman rinapaq kamachiwasqanchikta kasukuptinchik?

¹² Jehova Diostaqa unanchawasqanchikraykum kasukunanchik. Payqa huñunakuyman riyta mana saqinanchikpaqmi kamachiwanchik, astawanraqmi kay tukupay punchawkunapiqa chayta ruwananchik. Jehova Diosqa kusisqam tarikun kamachiwasqanchikta ruwaptinchikqa (1 Juan 3:22). Payqa yachanmi huñunakuyninchikkunaman rinapaq kallpanchakusqanchiktaqa hinaspapas chaninchanmi (Heb. 6:10).

13, 14. ¿Imaynatam huñunakuykuna yanapawanchik Jehova Diosman chaynataq churinmanpas asuykunapaq?

¹³ Huñunakuykunaman rispaqa qawachinchikmi Jehova Diosman hinaspa churinman asuykuy munasqanchikta. Huñunakuykunapim bibliata estudianchik hinaspapas Jehova Diospa ima munasqantam yachanchik (Is. 30:20, 21). Diosta mana yupaychaq runakunapas huñunakuyman hamuspankum musyanku Diospa chuya espiritunwan huñunakuyninchik apakusqanta (1 Cor. 14:23-25). Chayraykum huñunakuykunapi imapas yachasqanchikqa kikin Jehova Diosmanta. Chaymi huñunakuyman rispaqa Diosta uyarinchik hinaspapas kuyawasqanchiktam musyakunchik. Chaynata ruwaspam astawan Jehova Diosman asuykunchik.

¹⁴ Jesusmi Diospa llaqtantaqa ñawparichichkan. Paymi nirqa: ‘Maypipas iskayllapas utaq kimsallapas ñuqarayku huñunakuptinqa paykunapa chawpinpim kachkani’, nispa (Mat. 18:20). Bibliaqa yachachintaqmi Jesusqa iñiqmasinchikkunapa ‘chawpinpi purisqanmanta’ (Apoc. 1:20–2:1). Manam iskayrayananchikchu Jehova Dioswan churin ñuqanchikwan kuska kasqankumantaqa hinaspa huñunakuypi kallpanchawasqanchikmantapas. ¿Imaynataq Jehova Diosqa tarikun payman hinaspa churinman asuykuptinchik?

15. ¿Imanasqam huñunakuykunaman rispanchikqa Dioslla allin kamachiwaqninchik kasqanta qawachinchik?

¹⁵ Huñunakuykunaman rispam qawachinchik Jehova Dios kasukuy munasqanchikta. Diosqa manam hikutawanchikchu huñunakuyman rinapaq kamachiwasqanchikta kasukunapaqqa (Is. 43:23). Aswanmi huñunakuyman rinapaqqa kikinchik tanteakunanchik. ¿Imatam ruwachwan huñunakuyman riyta manaña atinakama patronninchik llumpayta llamkachiwaptinchik? ¿Imatam ruwachwan huñunakuyman risqanchikrayku multata qunanchikpaq, presochasqa kananchikpaq hinaspa castigasqa kananchikpaq nacionninchikpi kamachiq runa niwaptinchikqa? ¿Imatam ruwachwan imatapas ruwananchikrayku huñunakuyman mana rispaqa? Jehova Diosta kasukunapaq tanteakuspanchikqa qawachisunmi pay kuyasqanchikta hinaspapas riqsikusunmi imatapas ruwananchikpaq kamachiwaqninchik kasqanta (Hech. 5:29; Rom. 6:17). Chaynata ruwasqanchikqa anchatam kusichinqa (Prov. 27:11).

16, 17. (1) ¿Imanasqam ninchik ñawpaq tiempopi Jesuspa qatiqninkuna huñunakuyta anchata chaninchasqankumanta? (2) ¿Imaynatam George Gangas iñiqmasinchikqa huñunakuykunata qawaq?

¹⁶ Jesuspa qatiqninkunaqa 33 watapi Pentecostes fiesta pasayllatam, apostolkunamanta hinalla yachayta munarqaku hinaspam kuskanku huñunakurqaku (Hech. 2:42). Arí, hinallam huñunakurqaku Jehova Diosta yupaychanankupaq. Manamá huñunakuyman riytaqa saqirqakuchu Roma nacionta kamachiq runa hinaspa judiokunapa religionninpi kamachiq runakuna ñakarichiptinkupas. Sasa kaptinpas hinalla huñunakunankupaqmi tukuyta ruwarqaku.

¹⁷ Kunanpas Jehova Diosta yupaychaqkunaqa anchatam agradecekunchik huñunakuyman risqanchikmanta. Yuyaymanasun George Gangas iñiqmasinchikpi, payqa yaqa 22 wata masninmi enteron pachapi Diospa llaqtanpi punta apaq karqa. Paymi nirqa iñiqmasinchikkunawan huñunakuy anchata kallpanchasqanmanta hinaspapas paypaqqa ancha kusikunanpaqmi karqa. Atisqanman hina huñunakuyman rispanqa punta-puntatam chayaq, huñunakuy tukuytañataqmi qipallataña lluqsiq. Iñiqmasinchikkunawanmi anchata kusikuq, chaymi nirqa: “Paykunawan kuska kaspayqa wasiypi aylluykunawan kachkayman hinam tarikuni Diosmanta yachaspayku”, nispa. Nirqataqmi iñiqmasinkunawan huñunakuy ancha chaninniyuq kasqanta.

18. (1) ¿Imaynatam huñunakuykunata qawanki? (2) ¿Imata ruwanaykipaqmi kallpanchasqa kachkanki?

¹⁸ ¿Qamqa iñiqmasinchik George Gangas hinachu tarikunki? Chayna kaptinqa hinaspa sasaña kaptinpas iñiqmasikikunawan huñunakuypi kanaykipaq kallpanchakuy. Kamachiq David hina tarikusqaykita Jehova Diosman qawachiy, paymi nirqa: ‘Ñuqallayqa kuyallanim yachanayki templollaykitaqa’, nispa (Sal. 26:8).