¿Imanasqataq Mesiasta mana chaskirqakuchu?

JESUSPA yachachisqanwan hinaspa milagrokuna rurasqanwanmi achka runakuna admirasqa tarikurqaku. Chaymi achka ‘paypi iñirqaku’ hinaspa reqsikurqaku payqa prometesqa Mesias otaq Cristo kasqanta. Hinaspapas piensarqakum: “Cristo hamuspanpas manachá kayna achkallaña milagrokunataqa ruranmanchu”, nispa (Juan 7:31).

Jesuspa Mesias kasqanmanta achka pruebakuna kaptinpas, rikuqninkunawan uyariqninkunaqa achkam paypiqa mana creerqakuchu. Qatiqninkunamanta wakinkupas saqerurqakum. ¿Imataq pasarurqa? ¿Imanasqataq achka pruebakuna kachkaptinpas mana creerqakuchu? Kay tapukuykunata contestasqanchikman hina tapukuy: “¿Ñoqatapas chayna pasawachkanmanchu?”, nispa.

Suyasqankuman hina mana ruraptin

Jesuspa nacesqan tiempopiqa, runakunam suyachkarqaku Mesiaspa chayamunanta. Wawachallaraq kachkaptin temploman tayta-maman apaspankum, Jerusalen llaqtata Mesiaswan ‘librasqa kananta’ suyaq runakunawan tuparurqaku (Lucas 2:38). Watakuna pasaruptin Bautizaq Juan predicayta qallariptinpas achkam tapukurqaku: “¿Paychuch Cristo kanman?”, nispa (Lucas 3:15). Ichaqa, ¿imatam Mesiasmanta suyarqaku punta pachak watapi kawsaq judiokuna?

Yaqa lliwmi suyarqaku romanokunamanta Mesias librananta hinaspa Israelpi rey kaqlla hatarichisqa kananta. Predicayta hinaspa yachachiyta Jesus manaraq qallarichkaptinmi, hukkunata achka nirqaku romanokunapa contranpi hatarinankupaq. Paykunapa chayna piensasqankuraykuchá, wakin judiokunapas chaynata piensaspanku suyarqaku tanteasqankuman hina Mesias rurananta.

Jesusqa manam mesias tukuq runakuna hinachu karqa. Hukkunapa contranpi hatarinankupaq ninanmantaqa, kallpancharqam enemigonkuta kuyanankupaq hinaspa autoridadkunata kasukunankupaqpas (Mateo 5:41-44). Chaynataq, ‘munaychakuynin mana kay pachamanta’ kasqanraykum mana saqekurqachu rey kananpaq judiokuna churanankutaqa (Juan 6:15; 18:36). Chayna kaptinpas, achkam mana cambiarqakuchu Mesiasmanta puntamantaraq imayna piensasqankuta.

Rimasun Bautizaq Juanmanta, payqa qawarqam Diospa Churin Jesus kasqanmanta qawachiq admirakuypaq pruebakunata. Ichaqa preso kaspanmi qatiqninkunawan tapuchimurqa: “¿Qamchu kanki Diosmanta hamuq icha huktachu suyasaqku?”, nispa (Mateo 11:3). Jesusta kayna tapuytachá Juanqa munarqa: “¿Qamchu judiokunata libranki?”, nispa.

Apostolkunapas pantasqatam creerqaku Mesiaspa ima rurananmantaqa. Mesias kaspan ñakarinanmanta, wañunanmanta hinaspa kawsarimunanmanta Jesus huk kutipi niptinmi, ‘Pedro huklawman pusaspan’ anyarqa (Marcos 8:31, 32). Manam entienderqachu Salvaqninku imanasqa wañunanmanta.

Jerusalenpi Pascuaman 33 watapi Jesus riptinmi, achkallaña chaskiq lloqsimuspanku nirqaku Israelpa reynin kasqanta (Juan 12:12, 13). Ichaqa chay punchawkunallapim presochasqa, wañunanpaq sentenciasqa hinaspa qerupi warkusqa karqa. Wañukusqan qepallatapas, iskay qatiqninkunam llakikusparaq nirqaku: “‘Payqa Israel naciontachiki libranqa’ nispaykum ñoqaykuqa suyachkarqaniku”, nispa (Lucas 24:21). Jesus kawsarimuptinpas, qatiqninkunaqa piensarqakum kay Pachapi kamachinanta. Chaymi tapurqaku: “Señorllayku ¿kunanpunichu libranki [otaq kamachinki] Israel nacionta ñawpaq hina kananpaq?”, nispa. Mesiasmanta mana allinta piensasqankuqa sonqonkupim sapichakurusqaña (Hechos 1:6).

Jesus hanaq pachaman kutiptinmi, chuya espirituta qatiqninkuna chaskirqaku, chayraqmi entienderqaku Mesiaspa hanaq pachamanta kamachimunantaqa (Hechos 2:1-4, 32-36). Chay tiempomantam, Pedrowan Juanqa mana manchakuspa Yachachiqninkupa kawsarimusqanmanta willakurqaku, milagrokunatapas rurarqaku Diospa yanapayninwan chaykuna rurasqankuta qawachinankupaq (Hechos 3:1-9, 13-15). Chaymi Jerusalenpi waranqantin iñirqaku. Hinaptinmi judiokunapa kamachiqninkuna piñakuruspanku apostolkunatawan Jesuspa mosoq qatiqninkunata ñakarichinankupaq qatikachayta qallaykurqaku, Yachachiqninkuta rurasqankuman hina. Ichaqa, ¿imanasqam cheqnikuywanqa Jesuspa contranpi karqaku?

Religionkunapi yachachiqkunam mana chaskirqakuchu

Jesuspa kay Pachaman hamusqan tiempopaqqa judiokunapa religionninkum llumpayta karunchakururqa Diospa Palabranmanta. Saduceokuna, fariseokuna hinaspa Diospa leynin yachachiqkunaqa costumbrenkunallata kasukuspankum Diospa Palabrantaqa mana kasukurqakuchu. Achka kutitam Jesusta acusarqaku, sabadonpi milagrokunata ruraspaqa Leytam mana kasukunkichu nispanku. Ichaqa, allinta piensarichiq rimaykunawanmi pantasqa yachachisqankupa contranpi churakurqa, chaymi paykunaqa mana autoridadniyoq hinaña qeparqaku hinaspa qawachirqa paykunata Dios mana yanapasqantapas. Chaynataq mana kapuqniyoq, mana ancha reqsisqa hinaspa reqsisqa escuelakunaman Jesus mana risqanraykum, religionpi hatun tukuq punta apaqkunaqa Mesias kasqantaqa haykapipas mana creenmankuchu karqa. Llumpaytam piñachirqa Jesuspa nisqankunaqa, chaymi “tanteanakurqaku [. . .] wañurachinankupaq” (Mateo 12:1-8, 14; 15:1-9).

¿Manachu milagrokuna rurasqanta qawarqaku? ¿Imaynatam chaykunamanta explicanmanku karqa? Manam negayta atirqakuchu. Chaymi runakuna paypi mana iñinankupaq nirqaku: ‘Demoniokunatam qarqon demoniokuna kamachiq Beelzebupa atiyninwan’, nispa (Mateo 12:24). Nirqakum Jesuspa rurasqankuna Satanaspa atiyniywan kasqanta. ¡Hatun llullam chayqa karqa!

Jesuspa Mesias kasqanta imanasqa religionpi kamachiqkuna mana creenankupaqqa karqam huk razonpas. Chaytam qawachirqaku Lazaropa kawsarimusqan qepallata paykuna huñunakusqankupi. Nirqakum: “¿Imatataq rurasun? Kay runaqa achkatañam milagrokunata rurarun. Mana harkaptinchikqa lliw runach payman iñirunqaku, hinaptinchá romanokuna hamuruspa purmarachinqaku templonchiktawan nacionninchikta”, nispa. Manaña autoridadniyoq kanankumanta manchakuspankum Jesustawan Lazarota wañurachinankupaq tantearurqaku (Juan 11:45-53; 12:9-11).

Cheqnisqa hinaspa qatikachasqam karqaku

Religionkunapi yachachiqkunapa imayna kasqankum Jesuspa qatiqninkunata llumpayta sasacharqa. Punta apaq kasqankuwan hatunchakuspankum nirqaku: ‘¿Iñirqachu payman huk kaqnin kamachiqllapas otaq huk kaqnin fariseollapas?’, nispa (Juan 7:13, 48). Chaywanmi qawachirqaku mana reqsisqa runakunalla Jesuspi iñisqankuta. Kamachiqkunamanta wakinku Jesuspi iñispankupas manam libretachu willakurqaku kamachiqmasinkuta manchakuspanku, chaynam karqa Nicodemowan Arimatea llaqtayoq Joseypas (Juan 3:1, 2; 12:42; 19:38, 39). Kamachikuqkunaqa tantearurqakuñam pipas: Jesusqa Mesias niptinqa ‘huñunakuna wasimanta wischunankupaq’, chaywanqa mana allin qawasqañam karqaku (Juan 9:22).

Chayna cheqnisqa kasqankum chaylla tikrakururqa ñakariypiña. Cortepi autoridadkunam kamachirqaku apostolkunata predicasqankurayku azotewan castiganankupaq (Hechos 5:40). Chay cortepi kaqkunam kamachirqaku Estebanta wañuchinankupaq, paytaqa llullakunawanmi mana allinkunamanta acusarqaku. Rumiwan choqapasqa kasqan qepallatam ‘llapa iñiqkunata ñakarichinankupaq qatikachayta qallaykurqaku. Chaymi llapallan iñiqkuna cheqerurqaku Judeaman hinaspa Samaria lawman. Apostolkunallañam Jerusalenpiqa qeparurqaku’ (Hechos 6:8-14; 7:54–8:1). Chaymantañam, sacerdotekunapa jefenkunapiwan “llapallan kamachiqkunapas” allinpaq qawarqaku cristianokunata Saulo qatikachasqanta, tiempo pasaptinmi Pablo sutiwan reqsisqa karqa (Hechos 9:1, 2; 22:4, 5).

Jesuspa wañukusqan watakuna pasaytam waranqantin runakuna mana manchakuspanku Diospi iñirqaku. Utqayllaman achkaña kaptinkupas, cristianokunaqa punta pachak watapim Palestinapi wakin runakunamantaqa aslla karqaku. Pipas Jesuspi iñisqanta hukkunapa qayllanpi qawachispaqa, mana allin qawasqa hinaspa ñakarichisqam karqa.

Qamqa amayá chaynataqa pantaychu

Qawasqanchikman hinaqa, piensasqankuman hina Mesiasmanta suyasqanku mana kaptin, hukkunapa imayna qawasqanku hinaspa qatikachasqa kanankumanta amenazasqa kasqankum, punta pachak watapi runakunata harkarqa Jesuspa qatiqnin kanankumanta. Kunanpas Jesusmantawan yachachisqanmantam mana allinta yachachinku. Wakinmanmi ninku Diospa Gobiernonqa runapa sonqonpi kasqanta otaq chay Gobiernota runakuna kay Pachapi hatarichinanta. Hukkunañataq seguro kachkanku runakunapa sasachakuyninta yachaysapa runakuna allichananmanta. Chayna kaptinqa, ¿imapaqtaq Jesuspi hinaspa Mesias kaspa kamachimusqanpipas iñichwan? Wakinkuqa ninkuraqmi Jesuspa vidanmanta willakuykuna cuentolla kasqanta, chayna nisqankum wakinkupa iñiyninta astawan hukmanyachin.

Chayna nisqankuwanmi achka mana yachankuchu Mesiaspa ruraynin imakuna kasqanta, wakinkutaqa manam imapas qokunchu Jesus prometesqa Salvaqninchik kasqanmanta yachayqa. Ichaqa chaykunamanta yachay munaqpaqmi, punta pachak watamanta kunanqa aswan achka pruebakuna kachkan. Kachkanmi Mesiasmanta willakuq Ñawpaq Testamentowan sutichasqanku Diospa Palabran hinaspa Jesusmanta willakuq tawa librokunapas, kaykunam willawanchik Mesiasmanta willakuykuna cumplikusqanta.a

Kunanqa Mesiasmanta yachachikuykunam achkallaña kachkan, chaymi Jesus Mesias kasqanmanta otaq mana kasqanmantapas yachachwan. Chaymantaqa yachananchikmi. ¿Imanasqam chaynata ninchik? Diospa Palabranmi qawachin Mesias Rey kaspan kay Pacha purmachiqkunata chayllaña chinkachinanmanta hinaspa paraisoman tikraspan allin gobiernopa kamachisqanpi kasukuq runakunaman wiñay kawsayta qonanmanta (Daniel 2:44; Apocalipsis 11:15, 18; 21:3-5). Qampas atiwaqmi chayna suyakuyniyoq kayta Jesusmanta yachanaykipaq kallpanchakuspa hinaspa paypi iñispaykiqa. Ama qonqaychu Jesuspa kayna nisqanta: “Diosqa ancha-anchatam kuyarqa runakunata, chaymi sapallan Churinta qomurqa pipas paypi iñiqqa manaña puchukaspa wiñaypaqña kawsananpaq” (Juan 3:16).

[Willakuy]

[17 kaq paginapi suti rikuylla kaq willakuy]

Jesuspa tiemponpi kawsaspaykiqa, ¿creewaqchu karqa pay Mesias kasqanmanta?

[18 kaq paginapi dibujo]

Jesusmanta cheqapta yachanaykipaq ama harkachikuychu puntamanta imayna piensasqaykiwanqa