Jesusmi tiemponpi runakunata qaqcharqa

Jesusqa bautizaq Juanmantam allinta rimarqa, wakin runakunam ichaqa mana allinpaqchu hapiqku. Chaymi Jesusqa paykunamanta rimaspan nirqa: “Paykunaqa rikchakunkum plazakunapi tiyaspa pukllaqmasinkunata qayaykachaq warmachakunaman, hinaspam ninku: ‘Quenata tocapuptiykupas manam tusunkichikchu, llaki takita takipuptiykupas manataqmi llakikunkichikchu’”, nispa (Mateo 11:16, 17).

Hinaspam Jesusqa ima niy munasqanmanta nirqa: “Juanqa hamurqa ayunaspa chaynataq vinota mana tomaspanmi, ichaqa runakunam ninku: ‘Payqa demonioyuqmi’, nispa. Runapa churinñataqmi hamurqa mikuspa hinaspa tomaspa, ichaqa runakunam ninku: ‘Mikuysapa hinaspa vino tomakuq, impuesto mañaqkunapa chaynataq huchasapakunapa amistadnin’”, nispa (Mateo 11:18, 19). Juanqa Diospaq sapaqchasqa kasqanraykum vinotaqa mana tomaqchu, chaymi runakunaqa nirqaku demonioyuq kasqanta (Numeros 6:2, 3; Lucas 1:15). Jesusmi ichaqa mikuq hinaspa vinotapas tomaq, chaywanpas runakunaqa mana allintam paymantapas rimarqaku. Manam imawanpas runakunaqa kusisqachu karqaku.

Chayna kasqankuraykum Jesusqa chay runakunata tupachirqa plazakunapi tocaptinku mana tusuy munaq warmachakunawan, hinaspa llakipi kaqkunawan mana llakikuq warmachakunawan. Hinaspam nirqa: “Chayna kaptinpas runapa allin ruwasqankunam qawachin yachayniyuq kasqanta”, nispa (Mateo 11:16, 19). Chaynaqa Juanpa hinaspa Jesuspa ‘allinkuna ruwasqankuwanmi’ sutilla qawakurqa runakunapa rimasqankuqa yanqa kasqanta.

Runakunapa chayna kasqankumanta rimaruspanmi Jesusqa milagrokuna ruwasqan llaqtakunata qaqcharqa, Corazinta, Betsaidata hinaspa Capernaumta. Hinaspam nirqa tukuy chaykunata Tiro hinaspa Sidon llaqtakunapi ruwaptinqa unayña wanakunankumanta. Jesusqa Capernaum llaqtapim unay yacharqa, ichaqa chay runakunapas Jesuspa ruwasqankunataqa manam kaqpaqpas hapiqkuchu. Chaymi Jesusqa paykunata nirqaraq: “Juicio punchawpiqa Sodoma hinaspa Gomorra llaqtakunaraqmi qamkunamantaqa aswan llakipayasqa kanqa”, nispa (Mateo 11:24).

Hinaspanmi Jesusqa taytanta hatuncharqa “yachayniyuqkunamantawan yuyaysapakunamanta” sumaq yachachikuykunata pakasqanrayku, chaynataq chay yachachikuykunataqa wawa hina mana hatun tukuq kaqkunaman willasqanrayku (Mateo 11:25). Paykunatam Jesus nirqa: “Ñuqamanyá hamuychik llapallan hukmanyasqakuna hinaspa llasaq qipiyuqkuna, ñuqam samaykachisqaykichik. Yugoyta apaspayá ñuqamanta yachaychik, ñuqaqa kani llampu sunqu hinaspa humillakuqmi, chaynata ruwaspaqa hawkayaytam tarinkichik. Yugoyqa mana llasaqmi qipiypas sampallataqmi”, nispa (Mateo 11:28-30).

Religionkunapi punta apaqkunaqa yapa-yaparispam Diosmantaqa runakunaman yachachiqku. Chayraykum sabado punchawpaq Diospa kamachikuyninpas llumpa-llumpay sasa kasukuyña karqa. Jesusmi ichaqa imam kaqta Diosmanta yachachispan manaña ñakarinankupaq yanaparqa. Chaymantapas kamachiqkunapa ñakarichisqan runakunapa hinaspa huchasapakunapa sunqunkutam tiyaykachiq. Sumaqtam yachachirqa imata ruwaspanku huchankumanta pampachasqa kanankumanta hinaspa Dioswan hawka kanankumanta.

Jesustaña mana sasachakuspa qatiq runakunaqa Diospaqña kawsakunankupaq tanteakuspankum paytaña yupaychananku karqa. ¿Imanasqa? Diospa kamachikuyninkuna kasukuyqa ‘mana llumpay sasa’ kasqanraykum (1 Juan 5:3).