Miércoles 27 marzo
Diospa gobiernonta [ . . . ] ñaupaqtaqa maskhaychis (Mat. 6:33).
Jesuspa wañupusqan qhepamanmi discipulonkunaqa sinchi llakisqa kasharqanku. Jesusqa allin amigontinmi discipulonkunawan karqanku chaymi wañupusqan qhepamanqa mana ima suyakuyniyoq jina llakisqa qhepakurqanku (Luc. 24:17-21). Kausarimpusqan qhepamanmi ichaqa Jesusqa discipulonkunaman rijurirqan jinaspa willarqan wañusqanwan Bibliapi profeciakunata junt’asqanta. Jinaspapas juj sumaq llank’aytan paykunaman qorqan (Luc. 24:26, 27, 45-48). Jesusqa qhepamanmi janaq pachaman kutipurqan, chay kutipaqqa manañan llakisqañachu Jesuspa discipulonkunaqa karqanku aswanpas kusisqan kasharqanku jujmanta kausarimusqanta rikuspa. Jinaspapas yacharqankun Jesusqa paykunata tukuy tiempo yanapananta, chhaynapi llank’ayninkuta junt’anankupaq. Chaymi tukuy tiempo kusisqa Jehová Diosta servirqanku (Luc. 24:52, 53; Hech. 5:42). Noqanchispas Jesuspa discipulonkuna jinan kallpachakunanchis Jehová Diospa gobiernonta ñaupaqman churananchispaq. Chayta ruwasunchis chayqa, Jehová Diosmi bendeciwasunchis (Prov. 10:22). w23.01 30, 31 párrs. 15, 16
Jesuspa wañupusqanta yuyarinapaq textokuna: (16 nisán p’unchaypi pasasqan) Marcos 16:2-8
Jueves 28 marzo
Ñut’u jallp’allamanmi tukunki (Gén. 3:19).
Manapunin Adán jina Eva jinaqa kaytaqa munanchischu. Noqanchisqa tukuy atisqanchistan kallpachakunanchis Jehová Diosta allinta reqsinanchispaq, chanin kamachikuyninkunatapas munakunanchispaq, pay jina imatapas piensananchispaqpas. Sichus chayta ruwananchispaq kallpachakusunchis chayqa astawanmi Jehová Dios munakuyninchis wiñanqa. Abrahanmanta yachasun. Payqa anchatapunin Jehová Diosta munakurqan, manaña Jehová Diospa llapa kamachikuyninkunata entienderqanchu chaypas payqa kasukurqanmi, jinaspapas kallpachakurqanmi astawan Jehová Diosta reqsinanpaq. Juj kutinmi Jehová Dios Abrahanta nirqan Sodoma, Gomorra llaqtata thunipunanpaq, Abrahanqa allintan yacharqan Jehová Dios chanin Dios kasqanta. Chaymi k’umuykukuywan Jehová Diosta tapurqan: “¿Cheqaqtapunichu chanin runakunatawan millay runakunatawan kuskata wañuchipunki?”, nispa. Chhaynataña Abrahán Jehová Diosta tapurqan chaypas Diosqa manan chaywanqa phiñakurqanchu, aswanpas pacienciawanmi payta uyarirqan, jinaspa tapukuyninman kutichirqan. Chaypin Abrahanqa astawan yacharqan Jehová Dios chanin Dios kasqanta, llapa runakunaq sonqonta qhawasqantapas. Jehová Diosqa manan jayk’aqpas chanin runataqa mana chanin runatawanqa wañuchinmanchu (Gén. 18:20-32). w22.08 28 párrs. 9, 10
Viernes 29 marzo
Confiana runaqa [ . . . ] mana willana kaqkunatan sonqollanpi waqaychan (Prov. 11:13).
Jerusalén llaqtaq perqankunata sayarichisqanku qhepamanmi 455 watapi chay llaqtata qhawarinankupaq gobernador Nehemías churarqan confianapaq jina runakunata. Jujninmi karqan Hananías, payqa allin perqasqa wasikunata qhawariqmi karqan. Biblian Hananiasmanta nin: “Payqa confianapaq jina, Diosta manchakuq runan karqan”, nispa (Neh. 7:2). Hananiasqa Jehová Dios manchakuq runan karqan, chaymantapas payqa munakurqanmi Jehová Diosta chaymi kallpachakurqan qosqanku llank’ayta allinta junt’ananpaq. Chhayna kaymi noqanchistapas yanapawasunchis confianapaq jina kananchispaq. Tiquicomantañataq yachasun. Payqa apóstol Pabloq ancha munakusqan amigonmi karqan. Tiquicon Pablotaqa yanaparqan sasachakuypi tarikushaqtin. Chaymi apóstol Pabloqa paymanta nirqan: “Señorpa junt’aq kamachin munasqa iñiqmasinchis”, nispa (Efes. 6:21, 22). Apóstol Pabloqa allintan yacharqan Tiquicoqa mana cartakunallatachu Éfeso, Colosas iñiq t’aqakunaman chayachinanta, aswanpas iñiqmasikunata yanapananta kallpachananta iman. Chaymi paypi confiarqan. Tiquicoq ruwasqanmi yuyarichiwanchis iñiyninchispi yanapariwaqninchis umalliqkunata. Paykunapas Tíquico jinan tukuy atisqankuta ruwashanku iñiqmasikunata yanapanankupaq kallpachanankupaq ima (Col. 4:7-9). w22.09 9, 10 párrs. 5, 6