2 Iskay p’unchay qhepamantaq Galileapi kaq Caná llaqtapi juj casarakuy fiesta karqan, chaypin kasharqan Jesuspa mamanpas. 2 Jesuspas discipulonkunapas invitasqan karqanku chay fiestamanqa.

3 Vino pisirushaqtinmi Jesuspa mamanqa payta nirqan: “Manan vinonku kanñachu”, nispa. 4 Jinan Jesusqa nirqan: “¿Imanaqtintaq noqanchisri chaymanta llakikunanchis? Tiempoyqa manaraqmi chayamunchu”, nispa. 5 Mamantaq chaypi serviqkunata nirqan: “Ruwallankichis ima nisqasuykichistapas”, nispa. 6 Chaypin kasharqan judío runakunaq kamachikusqanman jina ch’uyanchakunapaq rumimanta soqta rakikuna,+ sapankamanmi jaykuq tawa chunka tawayoq litro jina otaq soqta chunka soqtayoq litro jina.* 7 Jesusmi paykunata nirqan: “Chay rakikunaman unuta junt’achiychis”, nispa. Jinan paykunaqa junt’achirqanku. 8 Chaymantataq nirqan: “Kunanqa juj chhikanta orqospa apaychis casarakuy fiestamanta encargakuqman”, nispa. Jinan paykunaqa aparqanku. 9 Casarakuy fiestamanta encargakuqtaq vinoman tukuchisqa unuta malliykurqan, ichaqa manan yacharqanchu maymantachus apamurqanku chayta, unuta orqoq kamachikunan ichaqa yacharqanku. Chaymi casarakuy fiestamanta encargakuqqa casarakuq runata wajaspa 10 nirqan: “Lliu casarakuqpas ancha allin kaq vinotaraqmi ñaupaqtaqa jaywachin, runakuna machasqaña kaqtintaq mana allin vinollataña churan. Qanmi ichaqa ancha allin kaq vinota kunankama waqaychasqanki”, nispa. 11 Chay milagrotan Jesusqa ruwarqan Galileapi kaq Caná llaqtapi, chaymi karqan ñaupaq milagro ruwasqan, chhaynapin rikuchirqan atiyninta;+ chaymi discipulonkunaqa paypi iñiyta qallarirqanku.