1 Reyes

7 Salomonqa chunka kinsayoq watapin wasinta* ruwayta tukurqan.+

2 Salomonqa Líbano Sach’a-sach’a nisqa wasitan ruwachirqan,+ chay wasiq largonmi karqan pachaj codo,* anchontaq pisqa chunka codo, altontaq kinsa chunka codo. Chay wasitaqa ruwarqan tawa fila cedro columnakuna patapin. Chay columnakuna patamanqa cedro vigakunatan churarqan,+ 3 chay vigakunataqa sapanka filamanmi chunka pisqayoqta churarqan, llapanpitaq karqan tawa chunka pisqayoq vigakuna. Chay patamantaq cedro maderakunawan mast’arqan. 4 Chay wasiq ventanankunaqa* kinsa pata filan karqan, sapanka ventanakunataq chimpapura kasharqanku. 5 Chay chimpapura ventanakunaq marconkunaqa cuadradon karqan.* Chhaynallataqmi karqan wasiq punku jaykunankunapas punkukunaq marconkunapas.

6 Chaymantapas juj wasita jinan ruwallarqantaq Columnakuna Punku nisqata. Chaytaqa ruwarqan pisqa chunka codo largoyoqtan, anchonmantaq karqan kinsa chunka codo. Chaypa ñaupanpitaq kallarqantaq columnakuna, chaypas techoyoqmi karqan.

7 Chaymantapas ruwallarqantaqmi Juzgana Wasi nisqata, chaypin Salomonqa tronopi tiyaykuspa juzgarqan.+ Chay wasi ukhutaqa llapantan pampamanta techokama cedro maderakunawan k’askachirqanku.

8 Chay wasi jinan Salomonpa tiyanan wasipas* ruwasqa kallarqantaq. Chay wasiqa juj kaq patiopin+ kasharqan Juzgana Wasimanta t’aqasqa. Chaymantapas faraonpa* ususinpaqmi juj wasita ruwapullarqantaq Juzgana Wasi nisqata jina, paywanmi Salomonqa casarasqa kasharqan.+

9 Tukuy chay wasikunaqa cimentacionninmanta techokaman k’apaj thupasqa rumikunawan perqasqa karqan, chay rumikunaqa ancha valorniyoqmi karqan.+ Chhayna rumikunawanmi ruwallarqantaq jawa patiokunatapas jatun patiowan tupaykama.+ Chay rumikunataqa sierrawanmi tukuy ladonmanta sumaqta kuchurqanku. 10 Cimentacionninkunaman churasqa rumikunaqa ancha valeq jatun rumikunan karqan, wakinmi medirqan chunka codota, wakintaq pusaq codota. 11 Chay rumikunaq patanpitaq karqan ancha valeq k’apaj thupasqa rumikuna, jinallataq cedro maderakunapas. 12 Jatun patio muyuriq perqatapas allin thupasqa rumikunawanmi kinsa patata perqarqan, patanmantaq muyuriqta churarqan cedro vigakunawan. Chaytaqa perqarqan Jehová Diospa wasinpa ñaupanpi kaq, jinallataq templopi wasi jina punkuq+ ñaupanpi kaq ukhu patioq+ perqanta jinan.

13 Rey Salomonqa Tiro llaqtamantan Hiramta+ wajachimurqan. 14 Hiramqa karqan Neftalí ayllumanta juj viudaq churinmi. Papantaq karqan Tiro llaqtamanta, payqa allintan yacharqan cobrewan* llank’ayta.+ Chaymi Hirampas allinta yacharqan cobrewan llank’ayta, payqa unayñan cobremanta imaymanata ruwaspa llank’aq.+ Paymi rey Salomonpa kasqanman rispa tukuy mañakusqanta ruwapurqan.

15 Hiramqa cobremanta iskay columnakunatan ruwarqan+ Diospa wasinpaq. Sapanka columnaq sayayninmi karqan chunka pusaqniyoq codo. Chay columnakunaq muyuriqnintaq karqan chunka iskayniyoq codo.+ 16 Chaymantapas cobremantan ruwallarqantaq iskaynin columnakunaq umanta. Chay columnakunaq umanqa sapankan karqan pisqa codo sayayniyoq. 17 Columnakunaq umanqa simp’asqa cadenakunamanta ruwasqa mallawan adornasqan karqan.+ Sapanka columnakunaq umanpin karqan qanchis mallakuna. 18 Chay mallakunaq patanpitaq karqan iskay fila granadakuna. Chhaynan iskaynin columnakunaq umanqa adornasqa kasharqan. 19 Chaymantapas chay iskaynin columnakunaq umanpiqa lirio t’ikakunan ruwasqa karqan, chay t’ikakunaqa tawa codo sayayniyoqmi karqan. 20 Chay columnakunaq umanqa muyuriqnintinmi mallawan adornasqa kasharqan, chay malla patapitaqmi muyuriqpi iskay pachaj granadakuna filapi kasharqan. Chhaynan karqan columnakunaq iskaynin umankunaqa.+

21 Chhaynatan temploq* punkunpi iskaynin columnakunata sayachirqan.+ Paña ladopi kaqta sayarichispan suticharqan Jakín* nispa, lloq’e ladopi kaqta sayarichispataq suticharqan Boaz*+ nispa. 22 Columnakunaq umanpiqa lirio t’ikakunan ruwasqa karqan. Chhaynatan iskaynin columnakunata ruwayta tukurqan.

23 Chaymantataq Hiramqa ruwarqan cobremanta unu waqaychana jatun muyu puruñata,* chaytan sutichakurqan Jatun Qocha+ nispa. Chay puruñaq lliu muyuriqninmi karqan kinsa chunka codo, juj cantonmanta juj cantonkamataq karqan chunka codo, sayaynintaq karqan pisqa codo.+ 24 Puruñaq siminpa uranpitaq muyuriqninpi iskay fila calabaza adornokuna kasharqan.+ Sapanka codopin karqan chunka calabaza adornokuna, chay adornokunaqa puruñawan kuska ruwasqan karqan, manan sapaqtachu k’askachirqanku. 25 Chay jatun puruñaqa cobremanta ruwasqa chunka iskayniyoq torokuna patapin kasharqan.+ Chay torokunan qhawarqan kinsa wichay ladota, kinsa uray ladota, kinsa inti lloqsimuy ladota, kinsataq inti jaykuy ladota. Chhaynapin llapa torokunaqa wasapura kasharqanku. 26 Puruñaq rakhunmi karqan maki ancho sayay.* Simintaq karqan lirio t’ika jina, copaq simin jina. Chay puruñamanqa jaykurqan tawa chunka tawayoq waranqa litro* unun.

27 Chaymantapas unu apanapaqmi ruwallarqantaq cobremanta chunka carretakunata.+ Chay carretakunaqa largonmanpas anchonmanpas tawa codon karqan, altonmantaq karqan kinsa codo. 28 Chay carretakunaqa khayna ruwasqan karqan: Sapanka ladonpin karqan cobremanta marcokuna, chay marcokunaq chaupinpitaq karqan cobremanta ruwasqa p’alta planchakuna. 29 Chay p’alta planchakunaqa leonkunayoq,+ torokunayoq, querubín angelkunayoq+ iman ruwasqa karqan. Chhayna ruwasqallataqmi karqan carretaq llapan marconkunapas. Torokunaq leonkunaq patanpipas uranpipas adornokunan* karqan. 30 Sapanka carretan karqan cobremanta llantayoq, llantakunataq jap’inachisqa karqan cobremanta ejewan. Chaymantapas carretaq tawantin esquinanpin karqan cobremanta rakhu marcokuna, chay marcokunaqa llantakunaq ejenpa samananman jap’ichisqan kasharqan. Unu churana puruñaq* tiyananpaqtaq tusakunata ruwarqanku, chaykunaqa sapanka ladonpi adornokunayoqmi* karqan. 31 Chay tusakunaq patanpitaq juj coronata ruwarqanku chay ukhuman puruñata churanankupaq, chay puruñaq tiyananqa muyun karqan. Puruñaq pachanmanta coronaq ura patankaman karqan juj codo, puruñaq pachanmanta coronaq jawa patankamataq karqan juj codo kuskan. Chay coronaq p’alta planchankunaqa cuadradon karqan munay adornokunayoq. 32 Carretaq tawantin llantankunaqa carretapi kaq p’alta planchakunaq uranpin kasharqan. Llantakunaq jap’iqninkunaqa carretaman k’askasqan karqan. Sapanka llantan karqan juj codo kuskan sayayniyoq. 33 Chay llantakunaqa carroq llantankuna jinan karqan. Llantakunaq jap’iqninkunapas, aronkunapas, rayonkunapas, llantaq tamborninkunapas lliumi cobremanta ruwasqa karqan. 34 Carretaq tawantin esquinanpin karqan rakhu marcokuna. Chay marcokunaqa carretawan kuska ruwasqan karqan, manan sapaq k’askachisqachu karqan. 35 Carretaq patanpi kaq coronaqa kuskan codo anchoyoqmi karqan, chay coronaq marconkunapas, p’alta planchankunapas carretawan kuskan ruwasqa karqan, manan sapaq k’askachisqachu karqan. 36 Coronaq marconkunapipas p’alta planchankunapipas jaykusqanman jinan querubinkunata, leonkunata, palmerakunatawan ruwarqan. Cantonkunapitaq karqan adornokuna.*+ 37 Chhaynatan chay chunka carretakunata ruwarqan.+ Chaykunaqa llapanmi kasqan sayayniyoq kasqan formayoq ruwasqa karqan.+

38 Chay chunkantin carretakunapaqmi sapankapaq cobremanta puruñakunata ruwarqan.+ Sapanka puruñamanmi jaykuq pusaq pachaj pusaq chunka litro* unu. Puruñakunaq siminpa juj cantonmanta juj cantonkaman tawa codo karqan. 39 Jinan Diospa wasinpa paña ladonman churarqan pisqa carretakunata, lloq’e ladonmantaq pisqa carretakunata. Jatun Qocha nisqa puruñatataq churarqan wasiq paña ladonman, inti lloqsimuy ladoman.+

40 Chaymantapas Hiramqa+ ruwallarqantaqmi juj puruñakunatapas, palakunatapas,+ jatun p’ukukunatapas.+

Chhaynatan Hiramqa Jehová Diospa wasinpaq tukuy imaymanata ruwayta tukurqan. Payqa rey Salomonpa nisqanman jinan ruwarqan:+ 41 iskay columnakunata;+ jatun p’uku jina columnakunaq umankunata; sapanka columnaq umanta adornaq mallakunata;+ 42 mallakuna pataman iskay filapi churanapaq tawa pachaj granadakunata,+ chaykunan columnakunaq umanta adornarqan; 43 chunka carretakunata;+ carreta patakunapi kaq chunka puruñakunata;+ 44 Jatun Qocha+ nisqa puruñata; chay puruñata churanapaq cobremanta ruwasqa chunka iskayniyoq torokunatapas. 45 Chaymantapas ruwallarqantaqmi: uspha apana mankakunata, palakunata, jatun p’ukukunata, imaymana serviciokunatawan. Chaykunatan Hiramqa Jehová Diospa wasinpaq ruwarqan cobremanta munay llusk’ata, chaytaqa ruwarqan rey Salomonpa nisqanman jinan. 46 Tukuy chaykunatan rey Salomonqa cobreta unuyachispa t’uru moldekunapi ruwachirqan. Chaykunataqa ruwarqanku Jordán jallp’apin, Sucojwan Zaretanwan tupaypi.

47 Salomonpa ruwachisqan serviciokunaqa askhapunin karqan, chaymi manaña pesachirqanchu. Jayk’a kilo cobremantachus ruwasqankuqa manan yachakurqanchu.+ 48 Salomonqa Jehová Diospa wasinpaqmi ruwachirqan: qori altarta;+ Diospaq t’aqasqa t’antata churanapaq qori mesata;+ 49 ch’uya qorimanta candelerokunata,+ chaykunaqa ch’uyay-ch’uya cuartoq ñaupanpin kasharqan, pisqa paña ladopi pisqataq lloq’e ladopi; qori t’ikakunata;+ qori mecherokunata;* qorimanta mecha jap’inakunata;*+ 50 ch’uya qorimanta puruñakunata; ch’uya qorimanta nina wañuchina tijerakunata;+ ch’uya qorimanta jatun p’ukukunata; ch’uya qorimanta copakunata;+ ch’uya qorimanta sansa apanakunatapas.+ Chaymantapas qorimanta ruwasqan karqan punkukunata jap’iq k’aspikunaq muyunankunapas, chay muyunakunaqa kasharqan aswan ukhupi kaq ch’uyay-ch’uya cuartoq+ jinallataq ch’uya cuartoq+ punkunkunaq esquinankunapin.

51 Chhaynapin rey Salomonqa Jehová Diospa wasinpaq tukuy imaymana ruwananta tukurqan. Chaymantataq papan Davidpa ch’uyanchasqan+ qorita, qolqeta, juj cosaskunatawan Jehová Diospa wasinman apaykurqan, jinaspataq chaykunata waqaycharqan valorniyoq cosaskunata waqaychana cuartopi.+