Éxodo

38 Bezalelqa ruwallarqantaqmi ruphachina ofrendapaq altartapas. Chay altarqa acacia sach’a tablamanta ruwasqan karqan, cuadradotaqmi karqanpas. Largonmi karqan pisqa codo,* anchonpas pisqa codon kallarqantaq, altontaq kinsa codo.+ 2 Tawantin esquinanpin juj waqrata ruwarqan, altarwan chay waqrakunawanqa jujllan karqan. Chaymantataq llapanta cobrewan forrarqan.+ 3 Ruwallarqantaqmi altarpaq serviciokunatapas, chaykunan karqan: uspha mankakuna, palakuna, jatun p’ukukuna, trinchekuna, sansa apana p’ukukuna ima. Llapantan cobremanta ruwarqan. 4 Ruwallarqantaqmi malla jina cobre rejillatapas, chaytan altar ukhupi kuskan qhatanman jina churarqan. 5 Chay altarpaqmi ruwallarqantaq tawa ninrikunata, chaytataq altarpa tawantin esquinankunaman churarqan, maypichus cobre rejilla kasharqan chay rectaman. Chaynintan k’aspikunata suskhuchikunan karqan. 6 Chaymantataq acacia sach’amanta k’aspikunata ruwarqan, chaytataq cobrewan forrarqan. 7 Chay k’aspikunatan altarpi ninrikunaman suskhuchirqan chaywan apanapaq. Chay altarqa tablakunawanmi caja jina ruwasqa karqan, ichaqa t’oqollan uranqa karqan.

8 Chaymantataq cobremanta jatun puruñata ruwarqan+ tiyanantinta. Chaytaqa Dioswan tupana karpa punkupi allin organizasqa serviq warmikunaq espejonkunamantan* ruwarqan.

9 Chaykuna qhepatataq Bezalelqa karpa patiota ruwarqan.+ Uray ladota cercanapaqmi ñañuy-ñañu k’antisqa lino q’aytumanta juj cortinata awarqan, chay cortinaqa pachaj codo wask’ayoqmi* karqan.+ 10 Chay cortinapaqmi ruwarqan iskay chunka postekunata iskay chunka cobre sayanantintakama. Ruwallarqantaqmi chay postekunapaq ganchokunatapas jap’inakunatapas, chaykunaqa qolqemanta ruwasqan karqan. 11 Wichay ladopaqpas ruwallarqantaqmi pachaj codo cortinata, iskay chunka cobre postekunata, iskay chunka cobre sayanakunatawan. Chay postekunaq ganchonkunapas jap’inankunapas qolqemantan ruwasqa karqan. 12 Inti jaykuy ladopaqtaq ruwarqan pisqa chunka codo cortinata, chunka postekunata chunka sayanakunatawan. Chay postekunaq ganchonkunapas jap’inankunapas qolqemantan ruwasqa karqan. 13 Inti lloqsimuy ladomanpas pisqa chunka codon karpa patioq anchonqa karqan. 14 Punku jaykunaq jujnin ladonman cortinan karqan chunka pisqayoq codo. Postekunataq kinsa karqan sayanantinkama. 15 Punku jaykunaq juj kaq ladonman cortinapas chunka pisqayoq codon kallarqantaq. Postekunapas kinsan kallarqantaq sayanantinkama. 16 Karpa muyuriqpi cortinaqa llapapas ñañuy-ñañu k’antisqa lino q’aytumanta awasqan karqan. 17 Postekunaq sayanankunaqa cobremantan ruwasqa karqan, ganchonkunawan jap’inankunawantaq qolqemanta ruwasqa karqan. Postekunaq umanqa qolqewan forrasqan kasharqan. Karpa muyuriqpi llapa postekunapaqmi qolqemanta ruwasqa jap’inakuna karqan.+

18 Karpa patioman jaykuna punkupi cortinaqa azul q’aytumanta, azulniraq puka q’aytumanta, k’anchaq puka q’aytumanta, ñañuy-ñañu k’antisqa lino q’aytumantawan awasqan karqan. Chay cortinaq largonmi iskay chunka codo karqan, anchontaq pisqa codo karqan, chhaynan karqan karpa muyuriqpi llapa cortinaq anchonpas.+ 19 Kallarqantaqmi tawa cobre postekunapas cobre sayanakunantinkama. Ganchonkunaqa jap’inankunapiwan qolqemanta ruwasqan kasharqan, postekunaq umankunataq qolqewan forrasqa karqan. 20 Karpapaq estacakunapas karpa muyuriqpi cortinapaq estacakunapas cobremantan ruwasqa karqan.+

21 Imakunawanchus yupaychana karpata, Diospa rimanakuynin arcayoq karpata+ ruwakurqan chaykunatan listapi churakurqan. Chay listata ruwakunanpaqmi Moisés kamachirqan Leví runakunata, paykunan sacerdote Aaronpa churin Itamarpa+ umallisqan chay listata ruwarqanku.+ 22 Judá ayllumanta Hurpa nieton, Uripa churin Bezalelmi+ tukuy imaymanata ruwarqan Jehová Diospa Moisesman kamachisqanman jina. 23 Paywan kuskan llank’arqan Dan ayllumanta Aisamacpa churin Oholiabpas.+ Payqa allin artesanon karqan, kusatan yacharqan bordaytapas awaytapas. Paymi azul q’aytumanta, azulniraq puka q’aytumanta, k’anchaq puka q’aytumanta, sumaq lino q’aytumantapas telakunata awaq.

24 Yupaychana karpamanqa runakunaq ofrenda apamusqanku llapa qorin jaykupurqan. Chay qoritan runakunaqa apamurqanku maywisqa ofrendapaq.+ Chay qorin pesarqan iskay chunka isqonniyoq talentota,* qanchis pachaj kinsa chunka siclotawan,* chayqa yupaychana karpapi siclo pesoman jinan pesasqa karqan. 25 Yupasqa runakunaq apamusqanku qolqetaq pesarqan pachaj talentota, waranqa qanchis pachaj qanchis chunka pisqayoq siclotawan, chaypas yupaychana karpapi siclo pesoman jinan pesasqa karqan. 26 Llapa runakunan, iskay chunka watankumanta wichayman yupasqakuna, kuskan siclo pesaq qolqeta apamurqanku, chayqa yupaychana karpapi siclo pesoman jinan pesasqa karqan.+ Llapanpiqa soqta pachaj kinsayoq waranqa pisqa pachaj pisqa chunka runakunan karqanku.+

27 Pachaj talentota pesaq qolqetan Bezalelqa unuyachirqan, chaywantaq karpapaq sayanakunata karpa chaupipi t’aqaq columnakunaq sayanakunatawan ruwarqan. Pachaj talento pesaq qolqewanmi ruwakurqan pachaj sayanakunata, sapanka sayanatan ruwakurqan juj talento pesaq qolqewan.+ 28 Waranqa qanchis pachaj qanchis chunka pisqayoq siclota pesaq qolqewantaq ruwarqan postekunapaq ganchokunata, chaywanmi postekunaq umantapas forrarqan jinaspa jap’inachirqan.

29 Runakunaq ofrenda apamusqanku cobreqa pesarqan qanchis chunka talentotan, iskay waranqa tawa pachaj siclotawan. 30 Chaywanmi Bezalelqa ruwarqan Dioswan tupana karpa jaykunapaq sayanakunata, cobre altarta rejillantinta, altarpa tukuy imaymanankunata, 31 patio muyuriqpi kaq sayanakunata, patioman jaykunapi kaq sayanakunata, yupaychana karpapaq estacakunata, patio muyuriqpi kaq estacakunatawan.+