Daniel

5 Rey Belsasarmi+ waranqa autoridadninkunapaq jatun fiestata ruwachirqan, chaypin ñaupankupi vinota tomasharqan.+ 2 Vinowan machasqaña kashaspan Belsasarqa kamachikurqan Jerusalén templomanta papan* Nabucodonosorpa orqochimusqan qori vasokunata qolqe vasokunatawan apamunankupaq.+ Payqa chay vasokunapin autoridadninkunawan, tiyaqmasin warmikunawan,* wakin esposankunawan ima vinota tomayta munarqan. 3 Jinan apamurqanku Diospa wasinpi Jerusalén templomanta orqomusqanku qori vasokunata, chaykunapin tomarqan reypas, autoridadninkunapas, tiyaqmasin warmikunapas, wakin esposankunapas. 4 Vinotan tomarqanku, jinaspan qorimanta, qolqemanta, cobremanta, fierromanta, k’ullumanta, rumimantawan ruwasqa dioskunata jatunchasharqanku.

5 Chayllamanmi juj runaq makin rijurimurqan, jinaspan reypa palacion perqapi, yesowan llusk’achasqa perqapi, candeleroq ñaupanpi qelqayta qallarirqan, qelqashaq makita rikuspan reyqa 6 mancharikurqan, chiri jump’iraqmi oqarirqan,* chakinkunapas khatatataytan* qallarirqan,+ moqonkunapas* takanakurqanraqmi.

7 Jinan reyqa fuerteta qaparirqan suerte qhawaqkunata, Caldea runakunata,* ch’askata qhawaspa watuqkunatawan pusamunankupaq.+ Babiloniapi chay yachayniyoq runakunatan nirqan: “Pipas kay qelqata leespa sut’inchawanqa chayqa, azulniraq puka p’achawan p’achachisqan kanqa, kunkanmanpas qori collarwan churasqan kanqa,+ kamachikusqay suyupipas kinsa kaq kamachikuqmi kanqa”,+ nispa.

8 Jinan reypa llapa yachayniyoq runankunaqa jaykurqanku, ichaqa manan mayqenpas chay qelqata leeyta atirqankuchu, ni imaninanchus chaytapas sut’inchayta atirqankuchu.+ 9 Chaymi rey Belsasarqa sinchita mancharikurqan, uyanpas q’ellumanraqmi tukurqan, autoridadninkunapas manan ima ruwaytapas atirqankuchu.+

10 Reywan autoridadninkunapiwan rimasqankuta yacharuspan reinaqa fiesta ruwashasqankuman jaykurqan, jinaspa nirqan: “¡Wiñaypaq kausachun reyqa! Ama mancharikuychu, ama uyaykipas q’elluyachunchu. 11 Kamachisqayki suyupin kashan juj yachayniyoq runa, payqa ch’uya dioskunaq espiritunwan junt’aykusqan kashan. Papaykiq kamachikusqan tiempopin sut’ita rikukurqan chay runaqa dioskunaq yachaynin yachayniyoq kasqanta, allin yuyayniyoq allin reparaq kasqantapas.+ Chaymi papayki rey Nabucodonosorqa payta churarqan watuq sacerdotekunaq, suerte qhawaqkunaq, Caldea runakunaq, ch’askata qhawaspa watuqkunaq umallin kananpaq.+ Reyníy, chaytan papaykiqa ruwarqan. 12 Chay runaqa Danielmi, paytan reyqa suticharqan Beltsasar+ nispa. Danielqa aswan allin yuyayniyoqmi, allin yachayniyoq, allin reparaqmi. Yachanmi mosqoykuna sut’inchayta, pakasqa kaqkunatapas sut’inchayta, sasa allichanapaq kaqkunatapas allichayta.*+ Reyníy, chhaynaqa Danielta wajachimuy, paymi imachus ninanta sut’inchasunki”, nispa.

13 Chaymi Danielta reyman pusamurqanku, jinan reyqa nirqan: “¿Qanchu kanki Daniel? ¿Judamanta+ papaypa preso apachimusqan runakunamanta jujninchu kanki?+ 14 Qanpis ch’uya dioskunaq espiritun kashan,+ allin yuyayniyoq, allin reparaq, yachaysapa runas kanki.+ 15 Kay qelqata sut’inchawanankupaqmi pusamuwanku yachaysapa runakunata suerte qhawaqkunatawan, ichaqa manan mayqenninkupas imaninanchus chay qelqa chayta sut’inchayta atiwankuchu.+ 16 Qanqa yachankis chaykuna sut’inchayta,+ sasa allichana kaqkunatapas allichayta. Sichus kay qelqata leespa sut’inchawanki chayqa, azulniraq puka p’achawan p’achachisqan kanki, kunkaykimanpas qori collarwan churasqan kanki, kamachikusqay suyupipas kinsa kaq kamachikuqmi kanki”,+ nispa.

17 Jinan Danielqa reyta nirqan: “Reyníy, qanpaq kachun ima regalopas, premio qowanaykitapas jujkunaman qoy. Chay qelqasqataqa leepullasaykin, imaninanchus chaytapas sut’inchapullasaykin. 18 Reyníy, ancha jatun Diosmi papayki Nabucodonosorta churarqan kamachikuq kananpaq, jatunchasqa kananpaq, allin reqsisqa kananpaq.+ 19 Jatun kasqanraykun paytaqa llapa llaqtakunamanta, nacionkunamanta, imaymana rimayniyoq runakuna manchakuqku, paypa ñaupanpiqa khatatataqkuraqmi.+ Payqa munasqanman jinan pitapas wañuchiqpas manapas, munasqanman jinan jatunchaqpas pisichaqpas.+ 20 Ichaqa jatunchakuqman tukupuspa k’ulluman tukusqanraykun, mana allinkunata ruwasqanraykun+ kamachikuq kayninmanta wijch’usqa kapurqan, jatunchasqa kayninpas qechusqan kapurqan. 21 Runakuna ukhumantan wijch’usqa kapurqan, yuyayninpas animalkunaq yuyaynin jinan kapurqan, salqa asnokunawanmi campopi tiyarqan. Torokuna jinan pastota mijurqan, cielomanta chayamuq sullan* apicharqan, joq’ocharqan. Ancha jatun Dioslla runakunata kamachiq kasqanta yachanankaman, pitachus kamachikuqpaq munasqanta churaq kasqantapas yachanankaman chhayna karqan.+

22 ”Qantaq Nabucodonosorpa churin Belsasar, tukuy chaykunata yachashaspapas mana k’umuykurqankichu. 23 Aswanmi janaq pacha Señor contra sayarirqanki,+ wasinmanta vasonkunata apachimuspan+ chaypi autoridadniykikunawan, tiyaqmasiyki warmikunawan, wakin esposaykikunawan kuska vinota tomarqanki. Chaymantapas qolqemanta, qorimanta, cobremanta, fierromanta, k’ullumanta, rumimanta mana uyariq mana rikuq dioskunatan jatuncharqanki.+ Manataq jatuncharqankichu pi Diospa makinpichus kausayniyki,+ tukuy ima ruwasqaykipas kashan chay Diostaqa. 24 Chayraykun payqa juj makiwan qelqachirqan chay simikunata.+ 25 Chay qelqasqanqa MENÉ, MENÉ, TEQUEL, PARSÍN nispan nishan.

26 ”Kaymi chay simikunaq sut’inchaynin. MENÉ simiqa Diosmi kamachikusqayki p’unchaykunata yupan, ichaqa ñan tukuchipunña,+ ninantan nin.

27 ”TEQUEL simitaq Diosmi balanzapi pesarqasunki, ichaqa manan jayk’achus pesanaykiman chayankichu, ninanta nin.

28 ”PERÉS simitaq gobiernoykin iskayman t’aqasqa kapun, Media runakunaman Persia runakunamanwan qopusqa kapun,+ ninanta nin”, nispa.

29 Chaymi Belsasarqa kamachirqan Danielta azulniraq puka p’achawan p’achachinankupaq, qorimanta collarta kunkanman churanankupaqwan. Jinaspapas kamachisqan suyupi kinsa kaq kamachikuq kanantan+ juj willaqwan willachirqan.

30 Chay tutapachan rey Belsasartaqa wañuchipurqanku, payqa Caldea runan karqan.+ 31 Media nacionmanta Dariotaq+ kamachikuq kananpaq churasqa kapurqan, payqa soqta chunka iskayniyoq watanpin kasharqan.