Juan

11 Betania llaqtachamanta Lazaron onqosqa kasharqan, chaypin payqa tiyarqan panankunawan, Mariawan Martapiwan.+ 2 Marian Señortaqa sumaq q’apaq jawina aceitewan jich’aykurqan, chakintataq chujchanwan ch’akichirqan.+ Paypa turan Lazaron onqosqa kasharqan. 3 Chaymi Lazaroq panankunaqa juj runata kacharqanku: “Señor, munasqa amigoykin onqosqa kashan”, nispa Jesusman willamunankupaq. 4 Chayta willaqtinkun Jesusqa nirqan: “Chay onqoyqa manan wañunanpaqchu kashan, aswanpas Dios jatunchasqa kananpaqmi kashan,+ chhaynapi Diospa Churinpas chaywan jatunchasqa kananpaq”, nispa.

5 Jesusqa munakurqanmi Martata, ñañanta, Lazarotawan. 6 Chaywanpas Lázaro onqosqa kashasqanta yachaspaqa iskay p’unchaytawanmi qhepakurqan maypichus kasharqan chaypi. 7 Chaymantataq discipulonkunata nirqan: “Jaku, Judea llaqtata kutisun”, nispa. 8 Jinan discipulonkunaqa nirqanku: “Yachachikuq,*+ qayninpallamá riki Judeapiqa rumiwan ch’aqespa wañuchiyta munashasunkiku,+ ¿chaychu kunan kutiyta munashanki?”, nispa. 9 Jinan Jesusqa nirqan: “Chunka iskayniyoq horasmi p’unchayqa ¿riki?+ Pipas p’unchaypi puriqqa manan imawanpas laq’akunqachu, k’anchayta rikusqanrayku. 10 Pipas tutapi puriqmi ichaqa imawanpas laq’akunqa, k’anchay mana kasqanrayku”, nispa.

11 Chaykunata nispanmi Jesusqa nillarqantaq: “Amigonchis Lazaroqa puñurapunmi,+ noqaqa payta rijch’arichiqmi risaq”, nispa. 12 Jinan discipulonkunaqa payta nirqanku: “Señor, puñushantaq chayqa, qhaliyallanqachá”, nispa. 13 Jesusqa Lázaro wañusqa kasqanmantan rimasharqan, paykunan ichaqa piensasharqanku puñuyllamanta rimananpaq. 14 Chaymi Jesusqa sut’inta paykunata nirqan: “Lazaroqa wañupunmi.+ 15 Ichaqa kusikunin mana chaypichu kasqaymanta, qankunaq allinniykichispaqmi chayqa, chhaynapi astawan iñinaykichispaq. Jaku payman risunchis”, nispa. 16 Jinan Mellizo nisqa Tomasqa discipulomasinkunata nirqan: “Jaku noqanchispas paywan kuska wañumunanchispaq”,+ nispa.

17 Jesuspa chayananpaqqa ñan tawa p’unchayña Lazaroqa sepulturapi kasharqan. 18 Betania llaqtachaqa kinsa kilometropi jinallan* karqan Jerusalén llaqtamantaqa. 19 Chaymi askha judiokuna jamusqaku Martata Mariatawan turanku wañupusqanmanta sonqochaq. 20 Martataq Jesuspa jamushasqanta yachaspa payman aypaq lloqsimurqan, Mariataq+ ichaqa wasillapi qhepakurqan. 21 Martan Jesusta nirqan: “Señor, kaypi kawaq karqan chayqa, manachá turayqa wañunmanchu karqan. 22 Chaywanpas yachanin Diosmanta tukuy imatapas mañakuqtiykiqa qonasuykita”, nispa. 23 Jinan Jesusqa payta nirqan: “Turaykiqa jatarimpunqan”, nispa. 24 Chaymi Martaqa nirqan: “Noqaqa yachanin tukukuy p’unchaypi kausarimpuy kaqtin jatarimpunanta”,+ nispa. 25 Jinan Jesusqa payta nirqan: “Noqan kani kausarimpuypas kausaypas.+ Pipas noqapi iñiqqa wañunmanña chaypas, kausarimpunqan. 26 Pipas kausashan noqapitaq iñinqa chayqa manan jayk’aqpas wañunqachu,+ ¿creenkichu qan chayta?”, nispa. 27 Jinan payqa nirqan: “Arí, Señor. Noqaqa creenin, qanqa Diospa Churin Criston kanki, kay pachaman jamunan karqan chaypunin kanki”, nispa. 28 Chayta nispan Martaqa ñañan Mariata wajaq rirqan, paytan pakallapi nirqan: “Yachachikuqmi+ chayaramusqa, wajashasunkin”, nispa. 29 Chayta niqtinmi Mariaqa usqhaylla jatarispa Jesusman phawarqan.

30 Jesusqa manaraqmi jaykurqanchu chay aylluman, maypichus Martawan tuparqan chayllapiraqmi kasharqan. 31 Mariata sonqochaspa wasipi kashaq judiokunataq Mariaq usqhaylla sayarispa lloqsisqanta rikuspa qhepanta rirqanku “sepulturatachá waqaq rishan”+ nispanku. 32 Mariataq Jesuspa kasqanman chayaspa pampakama k’umuykurqan, jinaspa nirqan: “Señor, kaypi kawaq karqan chayqa, manachá turayqa wañunmanchu karqan”, nispa. 33 Jinan Jesuspa sonqonqa “phoq”* nirqan Mariata paywan jamuq judiokunatapas waqaqta rikuspa, sinchitataq llakikurqanpas, 34 jinaspa nirqan: “¿Maymanmi churamurqankichis?”, nispa. Paykunataq nirqanku: “Señor, jaku rikuchimusaykiku”, nispa. 35 Jesustaq waqarqan.+ 36 Chayta rikuspan judiokunaqa ninakurqanku: “¡Qhawariychis, anchatamá paytaqa munakusqa!”, nispa. 37 Wakintaq ichaqa nirqanku: “Kay runaqa ñausaq ñawintapas kicharirqanmá riki,+ ¿manachu imallatapas ruwanman karqan chay runa mana wañunanpaq?”, nispa.

38 Wajmantan Jesuspa sonqonqa “phoq” nirqan, chaymantataq payqa sepultura t’oqoman rirqan, chayqa qaqa t’oqon karqan, jatun rumiwan wisq’asqataqmi kasharqanpas. 39 Jinan Jesusqa nirqan: “Chay rumita suchuchiychis”, nispa. Wañuqpa panan Martataq payta nirqan: “Señor, ñachá asnakushanña, ñan tawa p’unchayña karun”, nispa. 40 Jesustaq payta nirqan: “¿Manachu nirqayki: Creenki chayqa, rikunkin Diospa qhapaq atiyninta, nispa?”.+ 41 Rumita suchuchiqtinkutaq Jesusqa wichayman qhawaspa+ nirqan: “Taytáy, gracias niykin uyariwasqaykimanta. 42 Noqaqa yachanin uyariwaqpuni kasqaykita, ichaqa kaypi kashaq runakuna kachamuwasqaykita yachanankupaqmi mañakamushayki”,+ nispa. 43 Chaykunata nispataq fuerteta nirqan: “¡Lázaro, lloqsimuy!”,+ nispa. 44 Jinan chay wañusqa runaqa telawan chakin makin k’uyusqa lloqsimurqan, uyanpas k’uyusqan kasqa. Jinan Jesusqa paykunata nirqan: “Paskaychis purinanpaq”, nispa.

45 Chayta rikuspan Mariata watukuq jamuqkunamanta askha judiokuna Jesuspi iñipurqanku.+ 46 Wakintaq ichaqa fariseokunaman rispa Jesuspa imachus ruwasqanta willarqanku. 47 Chaymi umalli sacerdotekunaqa fariseokunapiwan Jatun Juntata* juñurqanku, jinaspa nirqanku: “¿Imatan ruwasun? Kay runaqa imaymana señalkunatan ruwashan.+ 48 Jinallata qhawasun chayqa, llapa runachá paypi iñipunqaku, jinaqtintaq Roma llaqta runakuna jamuspa templonchista nacionninchistawan qechupuwasunchis”, nispa. 49 Paykunamanta Caifás+ sutiyoq runan chay tiempopi uma sacerdote kasharqan, paymi nirqan: “Qankunaqa manan imatapas yachankichischu, 50 ¿manachu reparankichis llaqtantin runa wañunanmantaqa juj runaq wañunallan allin kasqanta?”, nispa. 51 Chaytaqa manan payllamantachu rimarqan, aswanmi chay tiempopi uma sacerdote kasqanrayku profetizasharqan Jesusqa llaqtarayku wañunan kasqanta. 52 Ichaqa manan llaqtaraykullachu wañunan karqan, aswanpas Diospa ch’eqerisqa wawankunata jujllaman juñunanpaqwanmi. 53 Chaymi paykunaqa chay p’unchaymantapacha rimanakusharqanku Jesusta wañuchinankupaq.

54 Chaymi Jesusqa judiokunawan mana rikuchikuq jinalla puriq. Chaymantapas ch’inneq lado qayllaman rispan Efraín nisqa llaqtaman+ chayarqan, chaypin discipulonkunawan kuska qhepakurqan. 55 Judiokunaq Pascua Fiestankuqa+ ñan chayamusharqanña, chaymi jawa llaqtakunamanta askha runakunaña ñaupasharqanku Jerusalén llaqtaman, chhaynapi ch’uyanchakunankupaq. 56 Paykunan Jesusta maskhasharqanku, templopi sayaykuspataq ninakurqanku: “¿Imaninkichistaq qankunari? ¿Manachu fiestallamanpas jamunqa?”, nispa. 57 Umalli sacerdotekunawan fariseokunawanqa ñan kamachikusqakuña pipas maypichus Jesuspa kashasqanta yachaqqa paykunaman willanankupaq, chhaynapi jap’inankupaq.