Juan

14 Jesusqa nillarqantaqmi: “Aman sonqoykichisqa llakikunqachu.+ Diospi iñiychis,+ noqapipas iñillaychistaq. 2 Taytaypa wasinpiqa askhan kashan maypichus tiyanaykichispaq; manachus chhayna kanman chayqa, manachá niykichismanchu; chaymanmi noqaqa rishani qankuna maypichus tiyanaykichispaq alistaq.+ 3 Maymanchus rinayman rispaqa maypichus tiyanaykichispaqmi alistamusaq, chaymantataq wajmanta qankunaman jamusaq, jinaspa wasiman pusapusaykichis, chhaynapi qankunapas maypichus kasqaypi kanaykichispaq.+ 4 Maymanchus risaq chayman riq ñantaqa ñan reqsinkichisña ¿riki?”, nispa.

5 Jinan Tomasqa+ nirqan: “Señor, manan maymanchus rishanki chaytapas yachaykuchu, ¿chaychu reqsiykuman chayman riq ñanta?”, nispa.

6 Jinan Jesusqa payta nirqan: “Noqan kani ñanpas,+ cheqaq kaqpas,+ kausaypas.+ Noqallantapunin pipas janaq pacha Taytamanqa chayanqa.+ 7 Qankunachus allinta reqsiwankichis chayqa, Taytaytapas reqsillankichistaqmi; kunanmantapachan paytaqa reqsinkichis, rikunkichistaqmi kanpas”,+ nispa.

8 Jinan Felipeqa nirqan: “Señor, Tayta Diosta rikuchiwayku, chayllatan noqaykuqa munayku”, nispa.

9 Jinan Jesusqa payta nirqan: “Felipe, ¿khaytukuy tiempoña qankunawan kashaqtiychu manaraq reqsiwanki? Pipas noqata rikuwaqqa janaq pacha Taytatapas rikullantaqmi.+ Chhaynaqa, ¿imaraykutaq qanri nishawanki: Tayta Diosta rikuchiwayku, nispa? 10 ¿Manachu creenki noqaqa janaq pacha Taytawan jujllachasqa kasqayta, janaq pacha Taytapas noqawan jujllachasqa kasqanta?+ Qankunaman imachus nisqaytaqa manan noqallamantachu rimani,+ aswanpas noqawan jujllachasqa kashaq janaq pacha Taytan kaykunataqa ruwashan. 11 Creeychisyá: Noqaqa janaq pacha Taytawan jujllachasqan kashani, janaq pacha Taytapas noqawan jujllachasqan kashan, nispa nisqaytaqa. Manachus chayrayku creenkichis chayqa, creeychisyá imaymanakuna ruwasqayraykullapas.+ 12 Cheqaqtapunin niykichis: Pipas noqapi iñiqqa noqaq ruwasqaykunatan ruwanqa, chaykunamantapas astawanraqmi ruwanqa;+ noqaqa janaq pacha Taytamanmi ripushani.+ 13 Imatapas sutiypi mañakuqtiykichisqa noqan ruwapusaykichis, chhaynapi janaq pacha Taytaqa Churirayku jatunchasqa kananpaq.+ 14 Imatapas sutiypi mañakuqtiykichisqa noqan chayta ruwapusaykichis.

15 ”Munakuwankichischus chayqa, kamachikusqaykunatan kasukunkichis.+ 16 Noqan janaq pacha Taytamanta mañakusaq, jinan payqa juj yanapaqta* qosunkichis qankunawan wiñaypaq kananpaq,+ 17 chayqa cheqaq kaqta sut’iman orqoq espiritun,+ chaytaqa manan kay pacha runakunaqa chaskiyta atinkumanchu, paykunaqa manan chaytaqa rikunkuchu ni reqsinkupaschu.+ Qankunan ichaqa reqsinkichis, chay espirituqa qankunawanmi kashan, qankunapitaqmi kashanpas. 18 Noqaqa manan jinatachu* saqerparisaykichis, kutimusaqmi qankunamanqa.+ 19 Juj chhikanmantaqa manañan runakunaqa rikuwanqakuñachu, qankunan ichaqa rikuwankichis;+ noqaqa kausashallasaqmi, qankunapas kausashallankichismi. 20 Chay p’unchaypin qankunaqa yachankichis Taytaywan jujllachasqa kasqayta, qankunapas noqawan jujllachasqa kasqaykichista, noqataq qankunawan jujllachasqa kasqayta.+ 21 Pipas kamachikuyniykunata jap’ikuspa chayman jina ruwaqmi munakuwaqniyqa, munakuwaqniytaq Taytaypa munakusqan kanqa, noqapas paytaqa munakusaqmi, sut’itataq paymanqa rikuchikusaqpas”, nispa.

22 Jinan juj kaq Judasqa+ (manan Judas Iscariotechu) Jesusta nirqan: “Señor, ¿imanaqtintaq noqaykumanri sut’ita rikuchikunki, manataq runakunamanqa?”, nispa.

23 Jinan Jesusqa payta nirqan: “Pipas munakuwaqniyqa kasukunqan simiyta,+ Taytaytaq payta munakunqa; paymanmi noqaykuqa jamusaqku, jinan payqa noqaykuwan tiyanqa.+ 24 Pipas mana munakuwaqqa manan kasukunchu simiyta; uyarisqaykichis simikunaqa manan noqaqchu, chayqa kachamuwaqniy janaq pacha Taytaqmi.+

25 ”Qankunawanraq kashaspaymi tukuy chaykunataqa nishaykichis. 26 Chaymantaqa yanapaq santo espiritun* tukuy imaymanata yachachisunkichis, tukuy imaymana nisqaytataq yuyarichisunkichispas,+ chay espiritutan janaq pacha Taytaqa sutiypi kachamunqa. 27 Noqaq qosqay thaj kaytan saqeshaykichis.+ Chay thaj kay qosqayqa manan kay pachaq qosqan thaj kay jinachu. Aman sonqoykichispi llakikunkichischu, amataq manchakunkichispaschu. 28 Uyarirqankichismi riki: Ripusaqmi, chaymantataq qankunaman kutimusaq, nisqaytaqa. Munakuwankichis chayqa, kusikunkichismi janaq pacha Taytamanmi ripushani nisqaymanta, janaq pacha Taytaqa noqamanta aswan atiyniyoqmi.*+ 29 Noqaqa manaraq chaykuna pasashaqtinmi chayta nishaykichis, chhaynapi chaykuna pasaqtinqa rimasqayta creenaykichispaq.+ 30 Kay pacha kamachikuqqa ñan jamushanña,+ chaymi noqaqa manaña nishutachu qankunawan rimasaq. Payqa manan imanaytapas atiwanmanchu.+ 31 Ichaqa kay pacha runakuna Taytayta munakusqayta yachanankupaqmi noqaqa Taytaypa kamachiwasqanman jinapuni ruwashani.+ Jatariychis, jaku kaymanta”, nispa.