1 Reyes

17 Galaad jallp’amanta+ Tisbe llaqtayoq Eliasmi*+ Ajabta nirqan: “Wiñaypaq kausaq servisqay Jehová Diospa sutinpin, Israelpa Diosninpa sutinpin niyki: ¡Kay watakunapiqa manan parapas ni sullapas* kanqachu noqa ninaykama!”,+ nispa.

2 Chaymantataq Jehová Diosqa Eliasta nirqan: 3 “Kaymanta lloqsispa inti lloqsimuy ladoman ripuy, Jordán mayu chimpakama, jinaspa Kerij wayq’opi pakakamuy. 4 Noqan cuervokunawan* mijunata apachimusayki,+ unutataq mayumanta ujanki”, nispa. 5 Jinan Eliasqa Jehová Diospa kamachisqanman jina usqhaylla ripurqan Jordán mayuq chimpankama, jinaspa Kerij wayq’opi qhepakurqan. 6 Jinan cuervokunaqa sapa tutamantanta sapa tardenta t’antatawan aychatawan apamuqku, unutataq mayumanta ujaq.+ 7 P’unchaykuna qhepamanmi ichaqa chay mayuqa ch’akipurqan+ para mana kasqanrayku.

8 Jinan Jehová Diosqa Eliasta nirqan: 9 “Phaway Sidón jallp’api kaq Sarepta llaqtata riy, jinaspa chaypi qhepakamuy. Noqaña juj viuda warmita nisaq mijuchinasuykipaq”,+ nispa. 10 Jinan Eliasqa Sarepta llaqtaman rirqan. Llaqta punkuman chayaqtintaq chaypi juj viuda warmi llant’ata pallashasqa, jinan Eliasqa payta wajaspa nirqan: “Ama jinachu kay, juj vaso unuchaykita jaywariway”,+ nispa. 11 Chay viuda warmi unuta apamuq rishaqtintaq Eliasqa jujmanta wajaspa nirqan: “Ama jinachu kay, phasmi t’antaykitawan aparimuwanki”, nispa. 12 Chay warmitaq nirqan: “Wiñaypaq kausaq Jehová Diospa sutinpin jurayki, manan ima t’antaypas kanchu, juj jaft’ay* jak’ullaymi kashan jatun p’uyñupi, juch’uy p’uyñupitaq kashan pisi aceitella.+ Chaymi kunan llant’ata pallakushani noqapaqwan wawaypaqwan imallatapas wayk’uramusaq nispa. Chayllatachá mijusaqku, chay qhepamanqa yarqaymantachá wañupusaqku riki”, nispa.

13 Chaymi Eliasqa nirqan: “Ama llakikuychu, imachus yuyaykusqaykitaqa ruwamullay, ichaqa noqapaqraq ñaupaqta juch’uy t’antata ruwarampuway jinaspa apamuwanki, chaymantaña qanpaqwan wawaykipaqwan imallatapas ruwarakamunki. 14 Israelpa Diosnin Jehová Diosmi nin: Jatun p’uyñupi jak’uqa manan tukukunqachu, juch’uy p’uyñupi aceitepas manan tukukunqachu, noqa Jehová Dios kay jallp’aman parachimunaykama,+ nispa”. 15 Chaymi chay warmiqa Eliaspa nisqanman jina ruwarqan, jinan mijunanqa mana tukukurqanchu. Chaytan Eliaspas, chay warmipas, familianpas askha p’unchaykuna mijurqanku.+ 16 Eliaswan Jehová Diospa willachisqanman jinan jatun p’uyñupi jak’uqa mana tukukurqanchu, juch’uy p’uyñupi aceitepas manan tukukurqanchu.

17 Tiempowantaq chay warmiq churinqa onqopurqan, astawan onqospataq wañupurqan.+ 18 Chaymi chay warmiqa Eliasta nirqan: “Cheqaq Diospa profetan, ¿imanarqaykin noqa? ¿Juchayta yuyarichiwanaykipaqchu, wawayta wañuchinaykipaqchu kayman jamurqanki?”,+ nispa. 19 Eliastaq nirqan: “Apamuy wawaykita”, nispa. Jinan Eliasqa chay warmiq wawanta chaskispa altos patapi alojakusqan cuartoman aparqan, jinaspa puñunan pataman churaykurqan.+ 20 Jinan Jehová Diosmanta mañakurqan: “Jehová Diosníy,+ ¿kay alojaqniy viudatapas ñak’arichillankitaqchu wawanta wañuchispa?”, nispa. 21 Chayta nispan Eliasqa kinsa kutita chay wawa pataman thallaykurqan, jinaspataq Jehová Diosta rogakuspa nirqan: “Jehová Diosníy, ama jinachu kay, kay wawata kausarichiy”, nispa. 22 Jinan Jehová Diosqa Eliaspa rogakusqanta uyarispa+ chay wawata kausarichirqan.+ 23 Chaymantataq Eliasqa chay wawata altos patamanta uraykachimuspa mamanpa cuartonman apaykurqan, jinaspa mamanta nirqan: “Qhawariy wawaykita, kausashanmi”,+ nispa. 24 Chayta rikuspan chay warmiqa Eliasta nirqan: “Kunanqa allintapunin yachani Diospa profetan kasqaykita.+ Qanqa Jehová Diospa nisqantapunin rimanki, chaymi rimasqaykikunaqa cheqaqpuni”, nispa.