Hechos

8 Sauloqa allinpaqmi qhawarirqan Estebanta wañuchisqankuta.+

Chay p’unchaymantapachan Jerusalenpi kaq iñiq t’aqata sinchita qatikachayta qallarirqanku; llapa iñiqkunan jinantin Judeaman Samariamanwan ch’eqerichisqa karqanku, apostolkunallañan qhepakurqanku.+ 2 Estebantataq Dios sonqo runakuna apaspa p’ampampurqanku, khuyaytan paymantaqa waqaykurqanku. 3 Sauloqa manchaytan iñiqkunata qatikachayta qallarirqan. Payqa wasinkuta jaykuspan qharitapas warmitapas aysamuq, jinaspa carcelman wisq’achiq.+

4 Ch’eqerichisqa kaqkunaqa jinantinpin purirqanku Diospa siminmanta allin willakuykunata willaspa.+ 5 Paykunamanta jujninmi karqan Felipe, payqa Samaria+ llaqtaman* jaykuspan Cristomanta willayta qallarirqan. 6 Llapallan runakunan tukuy yuyaywan Felipeq rimasqanta uyarisharqanku, señalkuna ruwasqantapas qhawasharqanku. 7 Askha runakunan millay espiritukunaq ñak’arichisqan kasharqanku, chay espiritukunaqa qaparispan paykunamanta lloqsiqku.+ Chaymantapas askha mana kuyuriy atiq runakuna wist’ukuna iman qhaliyachisqa karqanku. 8 Chaymi chay llaqtapiqa ancha kusikuy karqan.

9 Chay llaqtapin karqan juj runa Simón sutiyoq, payqa supaykunaq yanapayninwanmi imaymanata ruwaq, chaywantaq Samaria runakunata admirachiq. “Noqaqa atiyniyoq runan kani” nispan niq. 10 Paykunaqa llapankun juch’uypas jatunpas tukuy yuyaywan payta uyariqku, niqkutaq: “Kay runapiqa Diospa ancha atiyninpunin kashanman”, nispa. 11 Unayñan payqa supaykunaq yanapayninwan imaymanata ruwaspa paykunata admirachisharqan, chaymi paytaqa tukuy yuyaywan uyariqku. 12 Diospa gobiernonmanta+ Jesucristoq sutinmantawan allin willakuykunata Felipe willaqtinmi ichaqa chaypi iñipurqanku, jinaspa qharikunapas warmikunapas bautizakapurqanku.+ 13 Kikin Simonpas iñipurqanmi, bautizakapuspataq Felipewan+ kuska puriq, payqa anchatan admirakuq señalkunata jatun milagrokunatawan* ruwaqta rikuspa.

14 Samariapi runakuna Diospa siminta allinta chaskikushasqankuta+ yachaspan apostolkunaqa Jerusalenmanta kacharqanku Pedrota Juantawan, 15 jinan paykunaqa Samariaman rispa Diosmanta mañakurqanku iñipuqkuna santo espirituta chaskinankupaq.+ 16 Paykunaqa manaraqmi mayqenninkupas santo espirituta chaskisqakuchu, aswanpas Señor Jesuspa sutillanpiraqmi bautizasqa kasqaku.+ 17 Chaymi Pedrowan Juanwanqa paykunaman makinkuta churaykurqanku,+ jinan paykunaqa santo espirituta chaskiyta qallarirqanku.

18 Chay apostolkuna makinkuta churaykuqtinku iñiqkuna espirituta chaskisqankuta rikuspan Simonqa qolqeta paykunaman jaywarqan: 19 “Noqamanpas chay atiyta qowaychis, chhaynapi pimanpas makiyta churaykuqtiy santo espirituta chaskinanpaq”, nispa. 20 Jinan Pedroqa payta nirqan: “Diospa gratislla qokuyninta qolqewan rantiyta munasqaykirayku chay qolqeyki qanwan kuska chinkachun.+ 21 Manan qanpaqqa imapas kay ruwanapiqa kanchu, Diospa ñawinpaqqa manan allinchu sonqoykiqa kashan. 22 Chayrayku pesapakuy kay mana allin ruwasqaykimanta, jinaspa Jehová* Diosmanta rogakuy, ichapas sonqoykiq mana allin munasqanmanta perdonasqa kawaq. 23 Reparashaykin jaya veneno jina kasqaykita, mana chanin ruwayllatapuni munaq kasqaykitapas”, nispa. 24 Jinan Simonqa paykunata nirqan: “Ama jinachu kaychis, qankuna Jehová* Diosmanta rogapuwaychis llapa chay nisqaykichiskunamanta ama mayqenpas chayamuwananpaq”, nispa.

25 Paykunaqa llapa chay ladokunapin lliuman willarqanku, Jehová* Diospa simintan llapaman willarqanku, chaymantataq Jerusalenman kutipurqanku. Kutipushaspankuqa Samaria runakunaq tiyasqan ayllukunapi allin willakuykunata willan-willanmi kutipurqanku.+

26 Jehová* Diospa angelninmi+ Felipeta nirqan: “Phaway uray ladoman riy, Jerusalenmanta Gaza llaqtaman uraykuq ñannintan rinki”, nispa. (Chay ñanqa ch’aki ch’inneqpin karqan). 27 Jinan Felipeqa rirqan, chayllamanmi rikurqan Etiopía llaqtapi reinaq* kamachin jatun umallita, paymi reinaq llapa qhapaq kayninkunamanta encargasqa karqan. Payqa Jerusalén llaqtatan risqa Diosta adoraq,+ 28 chaymantan carretanpi tiyaykuspa kutimpushasqa profeta Isaiaspa qelqasqanta alto kunkawan leespa. 29 Jinan santo espirituqa Felipeta nirqan: “Phaway, chay carretaman aypay”, nispa. 30 Chaymi Felipeqa carretaq ladonman phawaspa uyarirqan profeta Isaiaspa qelqasqanta leeshaqta, jinan tapurqan: “¿Entiendeshankichu imachus leesqaykita?”, nispa. 31 Jinan payqa nirqan: “¿Imaynapitaq entiendeyman mana pipas yachachishawaqtinri?”, nispa. Jinaspa Felipeta valekurqan carretanman seqaspa ladonpi tiyaykunanpaq. 32 Diospa simin qelqapi leesqan profeciaqa khaynatan nirqan: “Payqa oveja jinan ñak’anaman apasqa karqan, willmanta rutuchikuq cordero jinan ch’inlla karqan, manan imatapas rimarirqanchu.+ 33 Sarunchasqan karqan, manan chanintachu juzgarqanku.+ Chinkachisqataq kay pachamanta kanqa chayqa, ¿pitaq willanqa piqpa mirayninmantachus jamusqantari?”,+ nispa.

34 Chay umalli runan Felipeta nirqan: “Ama jinachu kay, willariway: ¿Pimantan kayta profeta rimashan? ¿Pay kikinmantachu icha juj runamantachu?”, nispa. 35 Jinan Felipeqa chay qelqamanta qallarispa willarqan Jesusmanta allin willakuykunata. 36 Chay ñanninta rishaspankun chayarqanku unuq kasqanman, jinan chay umalli runaqa nirqan: “¡Qhawariy! ¡Unu! ¿Atiymanñachu bautizasqa kayta, icha imatawanraqchu ruwanay?”, nispa. 37 *—— 38 Jinan chay umalli runaqa kamachikurqan carretata sayachinankupaq, jinaspa Felipewan kuska unuman uraykurqanku, chaypin Felipeqa payta bautizarqan. 39 Unumanta lloqsimuqtinkutaq Felipetaqa Jehová* Diospa espiritun usqhaylla juj ladoman pusarqan. Umalli runaqa ancha kusisqan ripurqan, manañataqmi Felipetaqa rikurqanñachu. 40 Felipeqa Asdoj llaqtamanmi rirqan, jinaspa Cesarea llaqtaman+ chayanankama llapa llaqtakunapi allin willakuykunata willaspa purirqan.